Bibel i nkal bés le i béba añgel ba nsébél le Satan Nsohop, nyen a bi kolba kunde Djob a gwé i énél bôt ba binam. A bé sômbôl kal le bôt ba binam ba nla niñ loñge ibabé le Djob a énél bo. Kinje ngoo le Adam bo Éva ba bi noñ njel yé, ba kolba Djob.​—Bibôdle 3:1-6; Masoola 12:9.

Adam bo Éva ba bi nimis Paradis ni botñem i niñ boga inyule ba bi tjél le Djob a ba ñane wap (Bibôdle 3:17-19) Makidik map ma bé lama tihba yak mbôda yap. Bibel i nkal le inyu hihôha i Adam nyen ‘béba i bi jôp i nkoñ ’isi, yak nyemb i jôp ni njel béba.’ (Rôma 5:12) Béba i bi lona kuu ipe le: “Mut wada a ntét numpe i boñ nye béba.” (Ñañal 8:9) Hala wee, ngéda mut binam a ñénél bape, a ntét ndigi bo.

Bibel i nkal bés le mut binam nu bisu i énél bape, a bé Nimrôd. A bi kolba énél i Yéhôva. Ibôdôl dilo di Nimrôd, i bôt ba gwé kunde i ngii bape ba mbéna tét bo. Hala a yé yom kiki bo 3 000 di nwii le Kiñe Salômô a bi tila le: “Ndi nun-ki, gwiiha bi ba ba bi tééñgana, to mut a nhôgbaha bo a bé bé! Ngui i bé ngam batééñga bap.”​—Ñañal 4:1.

Mam ma yé nlélém i len ini. I nwii 2009, lipep li manwin jada li ONU li bi kal le “énél i mbanda yon i mboñ le mam ma mbep ndigi, bep ni bep ikété nkoñ ’isi.”

Nkoñ ’isi u gwé ngôñ ni loñge ñane ni énél ilam. I mam ma mon Nhek wés a mbôn bés!

Nyambe a bi téé Ane i i ga yiha énél i bôt ba binam, i mbus, “yomede i ga tééba mba ni mba.” (Daniel 2:44) Inyu Ane i nyen ngandak bôt i nsoohe. (Matéô 6:9, 10) Ndi Djob nyemede bé nyen a ga ba Kiñe i Ane i. Ndi inyu téé Kiñe, a bi pohol mut nu a bi niñ kiki mut binam. Njee a bi tep?