Ñañ nlam u Ane Djob u yé añlana ni nkoñ isi wonsôna, kiki Yésu a bi bôn. (Matéô 24:14) Kaat Daniel i nkal bés le Ane i, i yé Ane i Djob. Pes i yônôs iba i kaat Daniel i gwé mbañ i i ñunda kiki biane bikeñi hana nkoñ isi bi noñna, ibôdôl Babilôn nu kôba ibol i len ini. Inyu mam ma nke lo, nlôñ 44 u nkal le:

“Nyambe nu ngii yosôna a’ téé ngim ane i yé le y’a tjiba bé kekikel. To pot yé mbok ki y’a yégle bé i moo ma loñ ipe. Ndi y’a bôk biane bi gwobisôna ngéñ ngéñ ni tjé gwo hies, ndi yomede y’a tééba mba ni mba.”

Ini mbañ, ni ipe i Bibel i bi bôk legel i bisu bi ngéda le Ane Djob i ga tjé biane bi bôt ba binam, i lona ki nsañ ni oda ikété nkoñ isi. Lelaa niñ i ga ba i si Ane Djob? Di béñge ngim mbañ ilam i i ga yon ndék ngéda.

• GWÉT BI GA BA HA BÉ

  Tjémbi 46:10: “[Djob] a nsugus gwét letee ni lisuk li hisi. A mbôk mpihlôngô, a nkit ki likoñ bikidik, a nligis bikak ni hié.”

  Hégda lelaa nkoñ isi u bé le u ba, ibale moni nwominsôna ni pék ba mbôñôl inyu bañ bijôl bi gwét, bi bak inyu hôla bôt, ndi he bé inyu nol bo! Mbônga u, u ga yon i si Ane Djob.

• MAKON M’A BA HA BÉ

  Yésaya 33:24: “Mut nye ki nye a nyééne mu nkoñ u a’ kal bé le: ‘Me nkon.’”

  Hégda le nkoñ isi u gwé bé mut nye ki nye nu a gwé kon u ñem, to pos, to lihep, to makon mape yaga. Bôt ba ga bana ha bé ngôñ ni bidokta, to ni matam ma bee. Mbôô u ga ba peles​—i mam ma mon di bem.

• BIJEK BI GA HAÑ HA BÉ

  Tjémbi 72:16: “Blé i ba ngandak hana isi; [yak] i ngii mababat ma dikôa.”

  Hisi hi ga pémés ngandak bijek inyu hiki mut kayéle hiki wada a ga kôhna bijek. Njal to bijek bibe bi ga ba ha bé.

• TO NJÔGHE, TO NDUTU, TO NYEMB BI GA BA HA BÉ

  Masoola 21:4: “[Djob] a’ tos gwiiha gwobisôna mis map; nyemb y’a ba ha bé, to malep (tole maéya), to nlondok, to njiiha ki, b’a ba ha bé, inyule mam ma bisu ma mal tagbe.”

  Hala a nkobla le bôt ba ga niñ hana isi mba ni mba, ikété libak li peles i paradis! Hala  nyen Yéhôva Djob, Nhek wés nu gwéha a mbôn bés.

Baa hala a nlôôha ba nlam inyu ba maliga? Tolakii ngandak bôt i ga pala neebe le i loñge niñ Bibel i ntoñol, yon i mbéda bés, ndi ngandak ipe ki i nkal le, i yé ndutu i bôdôl mimbônga mi Bibel ñem. Hala a nhélés bé bés, inyule di yé ngi tehe mut nu a niñ i nya ntén niñ u.

Kiki mut binam a yé minkôm mi béba ni nyemb, a salak ki ikété njôghe, ndutu, ni njiiha hala a yé ntandaa ngéda nano, jon ngandak bôt i nhoñol le nya ipe i ta ha bé, i bi sôk ki i neebe le hala nyen niñ i yé hana isi. Ndi hala a yé maselna ngandak ni i yom Nhek wés, Yéhôva Djob, a mbôn bôt ba binam.

Inyu hôla bés i hémle mam a mbôn bés, Djob a bi ti bés makénd ikété kaat yé ngéda a bi kal le: ‘Lipôdôl jem l’a témb bé i meeni li ma kwo tua, ndi l’a gwel yaga jam li nkônha me maséé, l’a too ki ikété jam me bi om jo le li boñ.’​—Yésaya 55:11.

Bibel i nkal le Yéhôva a yé Djob “nu a mpot bé bitembee.” (Titô 1:2) Kiki a bi bôn bini gwom bilam inyu bilôl, i yé bés nseñ i badba le: Baa bôt ba binam ba nla toi niñ i mba ni mba munu hisi ikété Paradis? Kii yak bés di nla boñ inyu tehe mbônga u Djob u? Mu mapep ma noñ munu mbamble unu, u ga kôhna biniinaga bipe bi bi yé nseñ inyu timbhe mambadga ma.