HÉGDA LE: U yé hiôm i ndap i het ba ntéédana minlômbi mi gwom. Libim li yé ntubak, ñôbak, tole bipe bi yé mbugak. Mimpe mi nimis ngim bijô gwap. Ndi u nyimbe le yada mu i gwé bé to ntende, hiki hisiina hi jam u mbéñge mu, hi nkwés we nkaa le i bi béña toi bañga libañak. Ha ni nyen u mbat ñéga we le: “Baa ini i yé mondo iloo bini bipe?” Ndi nye a timbhe we le: “To, i yé yak nlômbi iloo ngim gwom ipe munu, ba mah bé tibil yo.” U kônde ki bat nye le: “Baa i bi bana matééda ma tôbôtôbô?” Ñéga nye we le: “Hee nu, ini yo i bi kolba banop ba ngui bobasôna ni mintén mi mbuk mbebi nwominsôna. Ngandak mintonba i bi yéñ ki i mélés yo.” Bebek hala a nsuk we, u badba le: ‘Kinje jam nunu, ba bi bañ yo ni kii?’

Di nla hégha Bibel kiki tik yom. I yé nlômbi kaat kiyaga​—nlômbi iloo ngandak ipe. Ñ, minlômbi mi bikaat mi ntôl. Ndi kiki minlômbi mi gwom mi mi yé miñunuk, ngandak ikété minlômbi mi bikaat mi bi ôbi ni ngéda. Kiki hihéga, minlômbi mi bikaat bi njôôñ yi mi nkiha bé ni i yi bikaat bi len bi nti bés. Libim li ngéda, maéba map inyu jam li matibla, ma yé ma nlona bés bikuu iloo mbôô. I bak ki le, libim li minlômbi mi bikaat li yé ndik bipes bipes nano, inyule bipes bipe bi bi nimil tole bi bi ôbi.

Bibel yo i yé mahéñha. I bi bôdôl tilba hala a yé iloo 3 500 nwii, ndi Bibel i ngi yii peles. To hala kiki, i bi kolbana nwii ndi nwii​—ba bi ligis, ba sôñga, ba ndegle​—ndi biniigana gwé bi bi yémbél i ngolba i yosôna. I ntagbege bé ngéda to  bebee, ndi Bibel i nkal mam ma ma nyon, ma undga le i ntehna bisu bi ngéda.​—Nun nkéñék matila le: “I bisu tole i mbus ngéda yé?”

U yé le u badba le: ‘Baa biniigana bi Bibel bi gwé toi mahee i dilo tjés?’ Ilole u ntimbhe, badba ndugi le: ‘Ikété bikuu bôt ba binam ba mboma, bimbe bi nlôôha bibe? Bimbe bi nlôôha kônha woñi?’ Bebek u nla hoñol gwom kiki bo: gwét, liôbôs nkoñ isi, manola ni makala pati. Nano di béñge ngim matiñ Bibel i niiga. Kiki u mba u ñañ mo, badba le: ‘Ibale bôt ba noñok matiñ mana, baa ki nkoñ isi u ta bé loñge homa?’

GWÉHA I NSAÑ

“Basañgal bôt ba yé nsaibak, inyule b’a séblana le bon ba Nyambe.” (Matéô 5:9) “Ibale i yé le i ba hala, kingéda la nan, wee yéna ni nsañ ni bôt bobasôna.”​—Rôma 12:18.

KONANGOO, NWÉHÉL

“Bakonangoo ba yé nsaibak, inyule b’a kon yak bo ngoo.” (Matéô 5:7) “Ni hônbanaga bé ni bé, ni nwéhlaga ki bé ni bé, to ibale mut a ntogha inyu maasañ; kiki [Yéhôva] * a bi nwéhél bé, yak bé boña hala.”​—Kôlôsé 3:13.

NSAÑ IPÔLA MATÉN MOMASÔNA

“Inyu mut wada nyen [Nyambe] a boñ le hi loñ bôt i lôl, le ba yén mu nkoñ isi wonsôna.” (Minson mi baôma 17:26) “Nyambe a ta bé ntodol bôt; ndi ikété hi loñ, nu a nkon nye woñi, a boñok ki mam ma téé sép, nyen a nlémél nye.”​—Minson mi baôma 10:34, 35.

I BÔÑGÔL HISI

“Ni Yéhôva Nyambe a yoñ mut, a yis nye i wom Éden le a ba a salak wo, a téédaga ki wo.” (Bibôdle 2:15) Nyambe nye, a’ “ôbôs ba ba ñôbôs hisi.”​—Masoola 11:18.

ÔA I HÉP NKUS NI I MAM MA NYEGA

“Ni yihge, ni tadak ki bébomede inyu hép yosôna; inyule nom mut i tane bé inyu ngandak gwom a gwé.” (Lukas 12:15) “Ndi ndéñg ni ndôñ nyega yosôna, to hép nkus, ni sima yaga bañ mam mana jôl ikété nan, wengoñle hala a kôli ni bapubhaga.”​—Éfésô 5:3.

ÑEM MALIGA, I SAL NI NGUI

“Di nsômbôl hiôm loñge ikété manjel momasôna.” (Lôk Héber 13:18) “Mut a nibik, a nip ha bañ, ndi a tumbba yaga.”​— Éfésô 4:28.

NSEÑ I HÔLA NGOO BÔT

“Ni lédhak ba ba gwé bihôya bi miñem, ni hôlga mimbomba, ni nihbege bôt bobasôna.” (1 Tésalônika 5:14) “Yuuga nyu bon ni biyik bi bôda ikété njiiha yap.”​—Yakôbô 1:27.

Bibel i nsima ndik bé biniigana bini. Ndi ni njel dihéga, i ñéba bés lelaa di diihe gwo, ni lelaa di bii gwo bisélél i niñ yés i hiki kel. Nano, ibale libim li bôt li noñok maéba mana, baa ki hala a nhôyôs bé mandutu ma bôt? Hodo, di nla kal le, nano nyen matiñ ma Bibel ma gwé mahee iloo kôba, ñ, ma nkwo toi i loñge ngéda! I ntiik, kii biniigana bi Bibel bi nla boñ inyu yoñ hanano?

Mut nu a nlôôha pék a bi kal kel yada le: “Pék i nkéla le i téé sép ikété minson nwé.” (Matéô 11:19) Baa hala bé? Inyu yi too ngim jam i yé pék, béñge mambe matam i num i ngéda u mbii yo i bisélél. Jon, yoñ ngéda i ôt mahoñol, u badba le: ‘Ibale me mbii biniigana bi Bibel i bisélél, baa me kôli bé tehe mahéñha malam i niñ yem? Lelaa i nla hôla me inyu mandutu me mboma nano?’ Di wan hihéga hiada.

Delfin * a bé a pégi, a ban-ga niñ i yôni ni bisai. Ndi, kunda yada, bikuu bi bôdôl kwél nye, yada ni yada. Nkondbak wé ngond u wo. Libii jé li mal. Yak bigwel moo bi kahal héñél nye. A nkal le: “Me bé nyômôk​—me bi nimis ngond, nlôm ni ndap. Me bé nôgda wee me nhôla ha bé to yom, me bi nimis libak jem, ngui yem, me bé hek ha bé pék inyu bilôl.”

Ilole i mam ma ma nkwel nye, Delfin a bé nok bé bini bibañga bi kaat Tjémbi 90:10, bi bi nkal le: “Dilo di nwii nwés di yé môm masaambok ma nwii, to môm juem ma nwii inyu ngui. Ndi biyat gwap bi yé ndik ndumbba ni ndutu; hala a nhoo tagbe, di mpuue ki.”

Ha mangéda ma njiiha ma, Delfin a bi nigbene Bibel. Bibel i bi bôñôl nye mimpémba mi mam.  Kiki minkwel maa mi mi noñ ha mi ga éba, yak ngandak bôt ipe, i bi léba le Bible i bi boñ bihélha bi mam inyu yap, i ngéda ba bi bii maéba mé i bisélél inyu jôs mandutu map. Ba bi nôgda le Bibel i yé kiki tik yom di mpôdôl i bibôdle. I yé mahéñha ni bini bikaat bipe gwobisôna, inyule gwo bi ñun, bi tagbege ki ngéda. Baa hala a yé toi inyule Bibel i yé mbañak nya ipe? Baa i gwé toi mahoñol ma Nyambe​—he ma bôt bé?​—1 Tésalônika 2:13.

Bebek wemede u ma yimbe le niñ i yé nhubuk, i bak i yôni ni mandutu. I ngéda mandutu ma nkéña we, ma yéñék ki yuu we, hee homa u yé u yiñil hogbe, mahôla ni maéba malam?

Di béñge manjel makeñi maa, i het Bibel i nla hôla we i niñ yoñ. I niiga we lelaa u nla

1. keñgle bikuu, ibale njel i yé.

2. yémbél mandutu, i ngéda ma mpam.

3. hônba mandutu u ta bé le u sembba.

Di ga kwélél i mam maa mana mu gwigil bi noñ.