1. Inyuki i nla bane bés nseñ i nigil kaat Tjémbi 15:​1-5?

 I YIGIL i ntagbe, di nigil le bagwélél ba Yéhôva ba nla ba bakén i ndap yé libadô ibale ba mboñ biliya i bana maada ma bas bas ni nye, tole i yila mawanda mé. Ndi kii di nla boñ inyu ba mawanda mé? Kaat Tjémbi 15 i ntimbhe i mbadga i. (Añ Tjémbi 15:​1-5.) I hiémbi hini, hi nti bés maéba malam ma ma nla hôla bés i kôôge bebee ni Nyambe.

2. Kii i bi tinde ntôp tjémbi David i pôdôl ndap libadô i Yéhôva?

² Tjémbi 15 a mbôdôl le: “A Yéhôva, njee u ga leege i ndap yoñ libadô? Njee a’ yén i hikôa hioñ hipubhaga?” (Tjémbi 15:1) I ngéda a bé pôdôl “ndap libadô” i Yéhôva, i nene le David a bé hoñol lap i i bé ha i ngéda i, i Gibéôn. David a bi sima yak “hikôa hipubhaga,” bebek a bé pôdôl hikôa hi Siôn i Yérusalem. Nyoo haa, i nwelmbok u Gibéôn nyen David a bi téé ndap libadô. A ha nkuu malômbla mukété, le u yén mu letee ba oñ témpel.​—2 Samuel 6:17.

3. Inyuki di nlama wan Tjémbi 15? (Béñge yak titii.)

³ Maliga ma yé le, libim li bon ba Israel li bééna bé kunde i sal i lap. Ndék ndik yon i bééna kunde i jôp i lap i het nkuu malômbla u bééne. Ndi maselna ni hala, bagwélél ba Yéhôva bobasôna ba ba tiñi ni nye, ba nla ba bakén i ndap yé libadô, tole ba nla yila mawanda mé. Mahoñol  ma mon bésbobasôna di gwé. Kaat Tjémbi 15, i nsima bilem bilam di nlama hôlôs, ni bi di nlama bana inyu ke ni bisu i ba mawanda ma Yéhôva.

BA NGI NSOHI U BOÑ KI MAM MA TÉÉ SÉP

4. Lelaa di nyi le sôble yotama i kôli bé inyu ba liwanda li Yéhôva? (Yésaya 48:1)

⁴ I kaat Tjémbi 15:​2, ba nkal le liwanda li Nyambe li yé mut a yé “ngi nsohi, a boñok mam ma téé sép.” Bibuk ba ngwélél hana le “ngi nsohi” ni “boñok,” bi ñunda le i mut nu a nlama ke ni bisu i boñ i mam ma. Ndi baa, di yé toi le di ba “ngi nsohi”? Ñ. Maliga ma yé le, tolakii mut nye ki nye a ta bé peles, Yéhôva a ga tehe bés kiki bôt ba yé “ngi nsohi” ibale di mboñ kii yosôna di nla inyu nôgôl nye. I ngéda di nti bésbomede nkikip yak Nyambe, di kôs ki sôble, hala a yé ndik bibôdle bi liwanda jés ni nye. Yimbe le i ngéda kôba, i ba man Lôk Israel i bé bé i kôli inyu ba nkén Yéhôva. Bahogi ba bé sébél nye, ndi ba bé boñ bé hala “ni ñem maliga, to ni telepsép.” (Añ Yésaya 48:1.) Inyu unda le ba bé gwés toi ba i ndap libadô i Yéhôva, bon ba Israel ba bé lama nigil matéak mé, ba nôgôl ki mo. Nlélém ni bés i len ini, inyu lémél Nyambe, di nlama ndik bé ba nsôblege kristen ni i kal le di yé Mbôgi Yéhôva, ndi di nlama bana maada ni lôk kéé i likôda. Di nlama ki ke ni bisu i ‘boñ i mam ma téé sép.’ Kii hala a nkobla?

5. I nôgôl Yéhôva ikété mam momasôna i nkobla le kii?

⁵ I mis ma Yéhôva, i ta bé inyule mut a nyoñ ngaba ikété ngim minson mi likoda nyen ba nla kal le, a yé “ngi nsohi” ni mut nu a ‘mboñ i mam ma téé sép.’ (1 Samuel 15:22) Di nlama boñ  biliya i nôgôl Yéhôva i makas ma niñ yés yosôna, yak i ngéda di yé bésbotama. (Bingéngén 3:6; Ñañal 12:​13, 14) I nlôôha ba nseñ i nôgôl Yéhôva yak ikété disii di mam. I ngéda di mboñ hala, di ñunda le di ngwés toi nye, hala a mboñ le yak nye a gwés bés.​—Yôhanes 14:23; 1 Yôhanes 5:3.

6. Inoñnaga ni kaat Lôk Héber 6:​10-12, kii i nlôôha ba nseñ iloo i mam malam di bi boñ kôba?

⁶ Yéhôva a nkon maséé ngandak ni i mam malam di bi boñ behee. Ndi i mam malam ma, ma kôli bé inyu boñ le di kee ni bisu i ba bakén i ndap libadô i Yéhôva. Kaat Lôk Héber 6:​10-12 i ñunda hala. (Añ.) Yéhôva a nhôya bé i mam malam di bi boñ i ngéda kôba. Ndi a gwé ngôñ le di kee ni bisu i gwélél nye ni ñem wonsôna “letee ni lisuk.” A ga neebe le di ba mawanda mé i boga ni boga “ibale di ntomb bé.”​—Galatia 6:9.

POT MALIGA IKÉTÉ ÑEM WOÑ

7. I pot maliga ikété ñem wés, wee kii?

⁷ I mut a ngwés le Yéhôva a neebe nye kiki nkén i ndap yé libadô, a nlama “pot maliga ikété ñem wé.” (Tjémbi 15:2) Hala a ta ndik bé i tjél bitembee. Yéhôva a gwé ngôñ le di ba maliga ikété mam momasôna. (Lôk Héber 13:18) Hala a yé nseñ “inyule Yéhôva a ñoo mut mandon, ndi a yé liwanda li bôt ba téé sép.”​—Bingéngén 3:32.

8. Mambe maboñok di nlama keñgle?

⁸ I bet ba ‘mpot maliga ikété ñem wap’ ba gwé bé lem i nôgôl mambén ma Nyambe i ngéda ba yé i mbamba, ndi ba bôgôk mo i ngéda ba yé botama. (Yésaya 29:13) Ba ta bé bôt ba mandon. Mut mandon a yé a bôdôl pééna mambén ma Yéhôva mahogi. (Yakôbô 1:​5-8) A nla ndogbene Yéhôva ikété mam nye a ntehe le ma nlôôha bé ba nseñ. I mbus, ibale a ntehe le bikuu bi nkwél bé nye, a nla bôdôl bôk mambén ma Nyambe ni ntjeñ kayéle kiki ngéda i mba i ntagbe, bibégés gwé bi mba nyonok ni bihéñba. (Ñañal 8:11) Ndi bés, di nlama ba maliga i manjel momasôna.

9. Kii di nigil mu jam li bi tagbe i ngéda Yésu a bi boma Natanael inyu ngélé bisu? (Béñge yak titii.)

 ⁹ Di nla nigil ngandak inyu nseñ i bana ñem maliga, i ngéda di mbigda ngélé bisu Yésu a bi boma Natanael. I ngéda Filipô a bi kena liwanda jé Natanael i boma Yésu, jam li hélha li bi bôña i kel i. Tolakii Yésu a bé ngi tehe Natanael, a kal le: “Nuna-ki! Bañga man Israel nu a gwé bé mandon.” (Yôhanes 1:47) Yésu a bé yi le bana banigil bape ba yé maliga, ndi a bé tehe jam li tôbôtôbô yak Natanael. Natanael a bé kwéha mut kiki bés, ndi a bé bé mut mandon, a bé maliga ikété mam momasôna. Hala a bé lémél Yésu ngandak, a bégés ki nye. Kinje loñge jam ibale Yésu a bak le a kal nlélém jam inyu yés!

10. Inyuki di nlama yoñ yihe ni i yom di mpot? (Yakôbô 1:26)

¹⁰ Libim li mam ba mbat bés le di boñ i kaat Tjémbi 15 li ntihba maada més ni bôt bape. Tjémbi 15:3 a nkal le i mut Yéhôva a nleege i ndap yé libadô “a ñôbôs bé mut jôl ni hilémb hié, a mboñ bé to mut wé libôk béba, a ñôm bé ki to mawanda mé nsohi.” Ibale di mbep gwélél hilémb hiés kiki ba nkal munu nlôñ unu, di yé le di bep nôgha bôt bape njôghe, Yéhôva a luhul ki bés mu ndap yé libadô.​—Añ Yakôbô 1:26.

11. Kii ba nsébél le i ôbôs bôt bape jôl, kii ba yé ba mboñ i ngéda mut a nai le a ntjôô bé i lem i?

¹¹ Ntôp tjémbi a nsima i lem ini le i ôbôs mut jôl. Kii yé i ôbôs mut jôl? I mbéna ba bitembee mut a ntôô, bi bi nla hoo jôl li mut mahindi. I bôt ba gwé i lem i, ndi ba ntop bé héñha yo ba nla pémés bo i likoda.​—Yérémia 17:10.

12-13. Imbe ngéda di nla sohbene mawanda més? (Béñge yak titii.)

¹² Tjémbi 15:3 a mbigdaha ki bés le, i bet Yéhôva a nleege i ndap yé libadô, ba mboñ bé to mut wap libôk béba, ba  ñôm bé ki to mawanda map nsohi. Kii hala a nkobla?

¹³ Ibabé i yi, i nla pam le di ôm mut nsohi ni bitembee di ntjam inyu yé. Kiki hihéga: (1) sita yada i ntéé nson wé u nsañal, (2) babiina ba nsal ha bé i Bétel, tole (3) mankéé wada a ta ha bé mañ tole a ta ha bé nhôla nson. Baa i yé loñge i hégda manjom ma ntinde bo i téé nson wap ni i tjam i mam di nhoñol? Ngandak manjom i yé le i ba i di nyi bé, i i mboñ le i nya jam i i bôña. Ni ki le, i mut Yéhôva a nleege i ndap yé libadô “a mboñ bé to mut wé libôk béba, a ñôm bé ki to mawanda mé nsohi.”

TI I BÔT BA NKON YÉHÔVA WOÑI LIPÉM

14. Lelaa i bôt Yéhôva a nleege i ndap yé libadô ba ntjél bana maada “ni nu a yé yoma mut.” Toñol.

¹⁴ Tjémbi 15:4 a nkal le i mut a yé liwanda li Yéhôva “a ntjél bana maada ni nu a yé yoma mut.” Lelaa di nla boñ hala? Kiki di yé bikwéha bi bôt, bés bé bon di nkit le nunu a yé yoma mut. Inyuki? I nla pam le di adbe ngim bôt inyule bilem gwap bi nlémél bés, di gwés bé bape inyule bilem gwap bi nlémél bé bés. Ndi di nlama ndigi tjél bana maada ni nu ni nu Yéhôva a ntehe kiki “yoma mut.” (1 Korintô 5:11) Mu nsoñgi wap di nla sima baboñ béba ba ba ntjél tam béba yap, i bôt ba nkolba hémle yés, tole ba ba nyéñ ôbôs maada malam di gwé ni Yéhôva.​—Bingéngén 13:20.

15. Sima njel yada i i ñunda le di nti “ba ba nkon Yéhôva woñi” lipém?

¹⁵ Maselna ni i yom di ntip tehe, kaat Tjémbi 15:4 i nkal bés le di ti “ba ba nkon Yéhôva woñi” lipém. Inyu hala nyen di nyéñ manjel inyu unda mawanda ma Yéhôva loñgeñem ni ti bo lipém. (Rôma 12:10) Lelaa? Njel yada i mpémél i kaat Tjémbi 15:​4, i yé le, i nwet Yéhôva a nleege i ndap yé libadô “a nyônôs mimbônga nwé to ibale hala a yé nye ndutu.” I ngéda di nyônôs bé mimbônga nwés, hala a nla babaa bôt bape. (Matéô 5:37) Kiki hihéga, Yéhôva a mbem le hiki sobiina a yônôs mbônga a bi ti nlô wé tole nwaa wé i ngéda ba bé biiba. A yé ki maséé i ngéda bagwal ba mboñ biliya i yônôs mimbônga ba mbôn bon bap. Kiki di ngwés Nyambe ni mut wés libôk, di mboñ kii yosôna di nla inyu yônôs mimbônga nwés.

16. Kii ipe di nla boñ inyu ti mawanda ma Yéhôva lipém?

¹⁶ Njel ipe di yé le di gwélél inyu ti mawanda ma Nyambe lipém i yé le di kabna i yom di gwé, di leege ki bo loñge. (Rôma 12:13) I ngéda di ntégbaha loñge ngéda ni lôk kéé i bôlôm ni i bôda, di nkônde yila mawanda ni bo, hala a nlédés ki maada més ni Yéhôva. Jam lipe li yé le, i ngéda di nyi leege bakén, di nkôna Yéhôva.

DI GWÉHÉK BAÑ MONI

17. Inyuki ba mpôdôl moni i kaat Tjémbi 15?

¹⁷ Di ñañ le i mut Yéhôva a nleege i ndap yé libadô “a mpôôs bé moni nwé inyu kôs ngim nseñ, a neebe bé bitek inyu kolba mut nginsohi.” (Tjémbi 15:5) Inyuki ba mpôdôl moni munu i kaat Tjémbi ini? Inyule ibale di gwé béba litehge li moni, hala a nla tééñga bôt bape, a ôbôs ki maada més ni Nyambe. (1 Timôtéô 6:10) Ba nsima i jam li hana inyule i ngéda kôba, bôt bahogi ba bé pôôs lôk kéé yap i i bé ngoo moni inyu kôhna  nseñ. Bakéés bahogi ba bé neebe bitek inyu kôde mbagi, maboñok ma ma bé bébél Yéhôva ngandak.​—Ézékiel 22:12.

18. Mambe mambadga ma nla hôla bés i yi lelaa di ntehe moni? (Lôk Héber 13:5)

¹⁸ I yé loñge le di wanba inyu yi lelaa di ntehe moni. Badba le: ‘Baa me mbéna hoñol moni ni gwom me nla somb? I ngéda ba mpôôs me moni, baa me yé me nhoo timbhe nwo, tole me yé me kal le i mut a mpôôs me nwo a gwé bé ngôñ ni nwo? Baa i ngéda me gwé moni me nôgda le me nloo bôt bape, baa me yé me nima? Baa me yé me ntehe bilôk bikéé bi bôlôm ni bi bôda kiki bôt ba nhép nkus inyule ba gwé moni? Baa me nyéñ ndigi ba liwanda ni mingwañ mi bôt, me pidbak ngoo bôt?’ Di bi bana nsima nkeñi i ba bakén ba Yéhôva. Di nla tééda nsima u ibale di yé nkwoog nkaa le di ngwés bé moni to ndék. Ibale di mboñ hala, kekikel Yéhôva a ga tjôô bé bés!​—Añ Lôk Héber 13:5.

YÉHÔVA A NGWÉS MAWANDA MÉ

19. Inyuki Yéhôva a mbat bés i mam mana momasôna?

¹⁹ Kaat Tjémbi 15 i mal ni mbônga unu: “I mut a mboñ i mam mana a ga piñgla bé kekikel.” (Tjémbi 15:5) Ni bibuk bini, ntôp tjémbi a nyeelene bés inyuki Yéhôva a mbat le di boñ i mam mana momasôna. Yéhôva gwé ngôñ le di ba maséé. Jon a nti bés maéba ma ma nlona bés bisai ma tadak ki bés.​—Yésaya 48:17.

20. Bimbe bisai bi mbem i bet Yéhôva a nleege mu i ndap yé libadô?

²⁰ I bôt Yéhôva a nleege i ndap yé libadô ba ga kôhna ngandak bisai i dilo di nlo. Minhook mi ga niñ i ngii i het Yésu a bi kôôbana bo ‘ngandak mayééne.’ (Yôhanes 14:2) I bet ba gwé botñem i niñ hana ’isi ba mbem le mbôñga u yé kaat i Masoola 21:3 u yon. Kinje lipém likeñi di gwé, i yi le Yéhôva a naña bés i ba mawanda mé, ñ, i ba bakén bé i boga ni boga i ndap yé libadô!