Minson mi baôma 7:1-60
7 Ndi prisi keñi i kal le: “Baa hala nyen mam ma yé?”
2 Stéfanô a timbhe le: “A bôt, a lôk kéé ni botata, emblana. Nyambe nu lipém a bi pémél sôgôlsôgôl wés Abraham i ngéda a bé i Mésôpôtamia, ilole a nlo i yééne i Haran,+
3 a kal nye le: ‘Nyodi i loñ yoñ ni i lôk yoñ, kee i loñ me ga unda we.’+
4 Ha nyen Abraham a nyodi i loñ Kaldéa, a ke i yééne i Haran. I mbus nyemb isañ,+ a nyodi nyoo, Nyambe a boñ nye le a loo a yén munu nkoñ unu i het ni nyééne nano.+
5 Ndi a bi ti bé nye ngababum munu, to hisi i het a yé le a tééne kôô;* a bôn ndik le a nti nye i nkoñ u le u ba inyu yé ni inyu mbôda*+ yé i mbus yé, to hala kiki a bé ngi bana man.
6 Nyambe a kal nye le mbôda* yé y’a ba bakén ba bôt i loñ i i ta bé yap, ni le bôt ba ga yilha bo minkol, ba tééñga* ki bo 400 nwii.+
7 Nyambe a kal ki le: ‘M’a kéés+ i loñ y’a sélha bo kiki minkol; ndi i mbus mam mana, b’a nyodi mu loñ i, ba bégés ki me hana homa nunu.’+
8 “Nyambe a bi boñ ki malômbla ma likwee+ lôñni Abraham, a gwal Isak,+ a kwee nye i hilo hi nyônôs juem;+ i mbus, Isak a gwal* Yakôb, yak Yakôb a gwal 12 basañ ba lihaa.*
9 Basañ ba lihaa ba kil Yôsep+ njôñ, ba nuñul nye i Égiptô.+ Ndi Nyambe a bé lôñni nye,+
10 a tohol nye ikété mandutu mé momasôna, a ti nye pék, a boñ ki le a lémél Faraô, kiñe Égiptô. Faraô a téé nye ngomin le a énél Égiptô ni ndap yé yosôna.+
11 Ndi njal i kwo i Égiptô yosôna ni i loñ Kanaan, ñ, njiiha ikeñi yaga; basôgôlsôgôl bés ba bé léba bé yom i je.+
12 Yakôb a nok le bijek* bi yé i Égiptô, a ep basôgôlsôgôl bés nyoo lisañ li bisu.+
13 Lisañ li nyônôs iba, Yôsep a boñ le lôkisañ i yi nye, yak Faraô a yi lihaa li Yôsep.+
14 Ha nyen Yôsep a bi ep nwin le ba lona isañ le Yakôb, ni bôt bé ba lihaa bobasôna le ba nyodi i loñ Kanaan;+ bobasôna ba bé 75 bôt.+
15 Jon Yakôb a bi sôs i Égiptô,+ nyoo ki nyen a bi wél,+ yak basôgôlsôgôl bés.+
16 Ba begee mim nwap, ba kena nwo i Sikem, ba jô nwo i soñ Abraham a bi somb ni moni mi silba yak bon ba Hamor i Sikem.+
17 “Kiki ngéda i bé kôôge le mbônga Nyambe a bi ti Abraham u yon, litén li keñep, li bôl ki i Égiptô,
18 letee kiñe ipe i telep i Égiptô, kiñe i i bi yi bé Yôsep.+
19 I bi gwélél mandon inyu kolba litén jés; lôñni béba ñem, i nyégsa basañ i tjôô minkéñéé nwap mi bon le mi niñ bañ.+
20 Ha ngéda i nyen Môsi a bi gwééne; a bé nlam iloo hihéga.* Ba nyuñus* nye sôñ aa i ndap isañ.+
21 Ndi i ngéda ba bi tjôô nye,*+ ngond Faraô i yoñ nye, i néñés nye kiki man wé.+
22 Jon ba bi niiga Môsi pék yosôna i bôt ba Égiptô. Ni maliga, a bééna bipôdôl bi ngui lôñni minson mi ngui.+
23 “I ngéda a bi pamna 40 ma nwii, i lo nye i ñem* le a yuuga* lôkisañ yé, bon ba Israel.+
24 Kiki a ntehe ba ntééñga wada wap, a sôñ nye, a nol man Égiptô inyu pun nu ba bé tééñga.
25 A bé hoñol le lôkisañ y’a nok le Nyambe a yé i ti bo tohi ni woo wé, ndi ba bi nok bé hala.
26 I kel i bé noñ ha, a koba bo ba njo, a noode boñ le ba kôp nsañ ipôla yap, a kal le: ‘A bôt, ni yé lisañ li bôt. Inyuki ni njo bisañ bé ni bé?’
27 Ndi nu a bé tééñga mut wé libôk a nyuge Môsi, a kal le: ‘Njee a ntéé we ñane ni nkéés i ngii yés?
28 Baa u nsômbôl nol me kiki u bi nol man Égiptô yani?’
29 Kiki a nok hala, Môsi a ke ngwéé, a niñ kiki nkén mut i loñ Madian, nyoo nyen a bi bana bon bôlôm iba.+
30 “I mbus 40 ma nwii, añgel i pémél nye i ñoñ u hikôa Sinai ikété lindômbôô li hié li man e biloo.+
31 Môsi a hel ngandak inyu jam a bi tehe. Ndi kiki a bé tiige bebee inyu tibil béñge, a nok kiñ Yéhôva* i nkal le:
32 ‘Men me yé Nyambe nu basôgôlsôgôl boñ, Nyambe nu Abraham, nu Isak ni nu Yakôb.’+ Môsi a bôdôl sehla, a bana ha bé makénd i kônde tiige bebee.
33 Yéhôva* a kal nye le: ‘Héya bitamb i makôô moñ, inyule i homa u tééne a yé hisi hipubhaga.
34 Me ntehe yaga ndutu i litén jem li li yé i Égiptô, me nok ki njelel yap,+ jon me nsôs inyu tohol bo. Nano loo, m’a om we i Égiptô.’
35 I nlélém Môsi ba bi tañba, ba kal le: ‘Njee a ntéé we ñane ni nkéés?’+ Nye yaga nyen Nyambe a bi ep+ le a ba ñane ni ntohol ni njel añgel i i bi pémél nye i man e biloo.
36 I mut nunu a bi pamna bo,+ a boñok bihélha bi mam* ni biyimbne i Égiptô,+ i tuye Nkôibaga+ ni i ñoñ 40 ma nwii.+
37 “I Môsi nu nyen a bi kal bon ba Israel le: ‘Nyambe a’ pémhene bé mpôdôl kiki me ipôla lôkisoñ nan.’+
38 Nyen a bé lôñni litén li Israel i ñoñ; a bé nyoo ni añgel+ i i bi pôdôs nye+ i hikôa Sinai lôñni basôgôlsôgôl bés, a kôhna bibañga bipubi bi boga inyu ti bés.+
39 Basôgôlsôgôl bés ba tjél nôgôl nye, ndi ba kôm nye mbus,+ ba témb i Égiptô ikété miñem nwap,+
40 ba kal Arôn le: ‘Bôñôl bés banyambe ba b’a bôk bés i bisu. Inyule di nyi bé kii i mpémél i Môsi nunu, nu a bi nyodna bés i loñ Égiptô.’+
41 Mu dilo di nyen ba bi uñgus man nyaga, ba sémél sat sesema, ba bôdôl kon maséé lôñni minson mi moo map.+
42 Jon Nyambe a bi kôm bo mbus, a nwas bo le ba béghak ntôñ gwét u ngii,*+ kiki i yé ntilga ikété kaat i bapôdôl le: ‘A litén li Israel, me bé nyen ni bi ti makébla ni bisesema mu 40 ma nwii ni bi tégbaha i ñoñ!
43 Ndi ndap libadô i Môlôk+ ni hiôdôt hi nyambe le Réfan gwon ni bi begee, biôñgba ni bi boñ inyu bégés. Jon m’a kena bé i minkôm i homa nu a yé haa iloo Babilôn.’+
44 “Basôgôlsôgôl bés ba bééna ndap libadô i mbôgi* i ñoñ, ndik kiki Nyambe a bi ti oda i ngéda a pôdôs Môsi le a boñ yo inoñnaga ni ndémbél a bi tehe.+
45 I mbus, basôgôlsôgôl bés ba bi yoñ i ndap libadô i, ba jôbna yo ikété nkoñ u biloñ+ bipe i ngéda ba bé ke lôñni Yôsua, i biloñ Nyambe a bi luhul i bisu bi basôgôlsôgôl bés.+ I bi yén hana letee ni dilo di David.
46 David a bé lémél Nyambe, a bat nye le a ti nye bisai i oñ homa liyééne inyu Nyambe nu Yakôb.+
47 Ndi Salômô nyen a bi ôñôl nye ndap.+
48 Ndi Nungingii a nyééne bé i mandap ba ñoñ ni moo,+ kiki mpôdôl a nlegel le:
49 ‘Yéhôva* a nkal le: “Ngii i yé yééne yem ane,+ yak hisi hi yé kéhne yem makôô.+ Umbe ntén ndap n’a ôñôl me? Tole hee ni yé le ni ôñôl me homa linôyôi?
50 Baa woo wem bé won u bi hek i gwom bini gwobisôna?”’+
51 “A bôt ba ño mbe, bongikweeba i miñem ni i maôô,* ni nkolba mbuu mpubi ngéda yosôna; kiki basôgôlsôgôl banan ba bi boñ, nlélém jam won ni mboñ.+
52 Numbe mpôdôl basôgôlsôgôl banan ba bi tééñga bé?+ Ñ, ba bi nol i bôt ba bi legel i bisu bi ngéda malo ma mut a téé sép;+ ndi nano, bé ni nliibana nye, ni nol ki nye,+
53 bé ba ni bi kôhna mbén Môsi ni njel biañgel+ ndi ni tééda bé yo.”
54 Kiki ba nok ndigi i mam mana, ba unup iloo hihéga,* ba bôdôl jél nye masoñ.
55 Ndi kiki a bé nyonok ni mbuu mpubi, a bok mis i ngii, a tehe lipém li Nyambe, yak Yésu a téé i woo walôm u Nyambe,+
56 a kal le: “Nuna-ki, me yé i tehe ngii i nyibla, ni Man mut+ a téé i woo walôm u Nyambe.”+
57 Ha nyen ba lond ni kiñ yap yosôna, ba lô maôô ni moo map, bobasôna ba kwo nye i nyuu ngélé yada.
58 I mbus, ba pémés nye i tison, ba bôdôl ôm nye ngok.+ Bôt ba mbôgi+ ba bii mambot map i makôô ma mañge wanda wada nu ba bé sébél le Saulô.+
59 Kiki ba bé leñ Stéfanô ngok, a yemhe le: “A Nwet Yésu, leege niñ* yem.”
60 I mbus, a ôm maboñ ’isi, a lond ni kiñ ikeñi le: “A Yéhôva,* u soñgle bañ bo i béba ini.”+ Kiki a mal pot hala, a wo.*
Ndoñi
^ Tole “hisi hi hi gwé bikeñi bi libal jé.”
^ Ni hop Grikia, “mbôô.”
^ Ni hop Grikia, “mbôô.”
^ Tole “nôgha njôghe.”
^ Tole “basôgôlsôgôl.”
^ I nla ki ba, “a boñ nlélém ni.”
^ Tole “kôn.”
^ Tole “a bé nlam i mis ma Nyambe.”
^ Tole “ba néñés.”
^ Tole “ba bii nye i mbamba.”
^ Tole “a yoñ makidik.”
^ Tole “a kee a tehe.”
^ Béñge Ndoñi bibuk.
^ Béñge Ndoñi bibuk.
^ Tole “manyaga.”
^ Hala wee, hiañgaa, sôñ ni tjôdôt di ngii.
^ Tole “ndap libadô i i bé bok mbôgi le Nyambe a yé ni bo.”
^ Béñge Ndoñi bibuk.
^ Tole “bôt ba minledek mi miñem ni bôt ba ndok.”
^ Tole “hala a kek bo i ñem.”
^ Tole “nhébék.” Ni hop Grikia, “mbuu.” Béñge Ndoñi bibuk.
^ Béñge Ndoñi bibuk.
^ Ni hop Grikia, “a ke ’ilo.”
