Tingalinja anaké cenik di gambaré ené. Tusingké ngenahné ia takut lan padidiana? Apaké cening taén marasa kéto?— Ajak onyang taén marasa kéto. Cakepan Suci ngomongang unduk timpal-timpalné Yehuwa ané taén marasa padidian lan takut. Salah satuné madan Elia. Mai plajahin undukné ia.

Elia suba ngoyong di Israel makelo satondén Yesus lekad. Ahab, raja Israel ané tusing nyembah Widi ané beneh, Yehuwa. Ahab lan kurenanné, Isebél, nyembah widi palsu Baal. Ento krana liunan anak Israel milu nyembah Baal. Ratu Isebél ento jaat gati lan dot ngamatiang makejang anak ané nyembah Yehuwa, termasuk Elia! Lantas, kéngkén carané Elia apang slamet?​—⁠

Elia malaib! Ia nuju ka gurun lan mengkeb di tengah guané. Menurut  cening kenapa ia mengkeb?​— Krana ia takut. Benehné Elia tusing perlu takut. Kenapa? Krana ia nawang Yehuwa lakar nulungin. Yehuwa suba taén nunjukang kuasané tekén Elia. Ipidan, Yehuwa taén nuunang api uli suargan buat nyawab pangastawan Elia. Pastiné, jani Yehuwa ngidaang nulungin Elia!

Dugas Elia ada di guané, Yehuwa ngomong lan matakon tekén Elia kéné: ’Ngudiang ragané dini?’ Elia masaut: ’Tuah tiang ané enu nyembah Yehuwa. Tiang padidian, tiang takut lan tiang lakar matianga.’ Elia ngadén yén makejang para panyembahné Yehuwa suba matianga. Yehuwa ngorahin Elia: ’Sing, ento tusing beneh. Enu ada pitung tali anak ané nyembah Ulun. Wanénja. Enu ada tugas buat ragané!’ Menurut cening apaké Elia seneng ningeh unduké ento?—

Apa ané cening bisa plajahin uli kisahné Elia?​— Cening tusing perlu marasa padidian lan takut. Cening ngelah timpal ané sayang tekén Yehuwa lan sayang tekén cening. Kéto masih, Yehuwa ngelah kakuatan ané gedé lan Ida lakar terus nulungin cening! Apaké cening seneng nawang yén Yehuwa terus lakar nulungin cening?​—⁠