Мүгәддәс Китаб дүнјада јајылмыш ән ҝениш китабдыр. Чүнки бу илаһи китабда һәгигәтән дә јашамыш инсанларын башларына ҝәлән һадисәләр, онларын бир-бири илә вә Аллаһла мүнасибәтләри гәләмә алыныб. Буна ҝөрә дә һәмин инсанларын кечирдији һиссләр бизим кечирдијимиз һиссләрлә ејнидир. Садә дилдә вә дүрүст шәкилдә јазылдығы үчүн бу һәјат һекајәләри бизә чох шеј өјрәдир. Һәмчинин бунун сајәсиндә Мүгәддәс Китабы јүзләрлә дилә тәрҹүмә етмәк мүмкүндүр, еләҹә дә һарада вә нә вахт јашамасындан асылы олмајараг, һәр кәс ону баша дүшә биләр. Ҝөрүндүјү кими Мүгәддәс Китаб принсипләри һәмишә ишә јарајыр.

Ән ваҹиби исә одур ки, Мүгәддәс Китаб садәҹә олараг Аллаһ һаггында олан китаб дејил, о, Аллаһдан олан китабдыр. Орада Аллаһын ады вә хүсусијјәтләри, еләҹә дә Јер күрәси вә инсанларла бағлы дәјишилмәз нијјәтләри ачыгланыр. Мүгәддәс Китабда тарих боју пислә јахшы арасында ҝедән мүбаризәдән, јәни бүтүн дүнјаны әһатә едән вә сону хошбәхтликлә битән һадисәдән данышылыр. Аллаһын Кәламыны гәрәзсиз шәкилдә охумаг инсанда иман вә үмид јарадыр.

Бу илаһи китабда башга һеч һарада тапа билмәјәҹәјимиз мәлуматлар вар. Мисал үчүн, Мүгәддәс Китаб ашағыда ҝәтирилән мөвзуларла бағлы һәгигәтләри ачыглајыр:

• Биз неҹә јарадылмышыг вә нәјә ҝөрә бу гәдәр әзаб-әзијјәт чәкирик?

• Јерин-ҝөјүн Јараданы инсанлары ағ ҝүнә чыхартмаг үчүн һансы тәдбири ҝөрүб?

• Иса пејғәмбәр бизим үчүн нә едиб?

• Јашадығымыз дүнјанын вә инсанларын агибәти неҹә олаҹаг?

Нәјә ҝөрә нөвбәти сәһифәләрә гысаҹа нәзәр салараг Мүгәддәс Китабын бу суаллара неҹә ҹаваб вердијинә бахмајасыныз?