ГАЗАХЛАР тарихән көчәри халг олуб. Ҝүнү бу ҝүн дә бәзи чобанлар көчәри малдарлыгла мәшғул олур. Онлар јај мөвсүмүндә мал-гараны отармаг үчүн сәрин әразиләрә, јајлаглара үз тутур, гарлы гыш јахынлашанда исә гышлаглара гајыдырлар.

Бәзи газахлар инкишаф етмиш шәһәрләрдә јашајыр. Бунунла белә, онларын бәзи әнәнәләри, јемәкләри вә әл ишләри әҹдадларынын көчәри һәјат сүрдүјүндән хәбәр верир. Газахларын поезија, нәғмә, милли аләтләрдә чалынан мусигиләр кими зәнҝин ирси вар.

Көчәриләрин мәскунлашдығы алачыглар — јуртлар инсанын тәбиәтлә һәмаһәнҝ јашамасыны символизә едир.  Мүасир дөврдә дә чобанлар јуртлара үстүнлүк верир. Шәһәр сакинләри дә хүсуси тәдбирләрдә тез-тез онлардан истифадә едир. Јуртлар һәмчинин туристләрин галмасы үчүн раһат јерләрдир. Бәзи јуртларда газах гызларынын халча тохума усталығы, тохуҹулуг сәнәти вә мүхтәлиф әл ишләри сәрҝиләнир.

Кәнд сакинләри үчүн атлар чох дәјәрлидир. Газах дилиндә атлары јашына вә ҹинсинә ҝөрә фәргләндирмәк үчүн азы 21 сөз мөвҹуддур. Онларын рәнҝ чаларларыны тәсвир етмәк үчүн исә 30-дан чох сөз вә ифадә вар. Газахыстанда јахшы ат гијмәтли һәдијјә һесаб олунур. Кәнд јерләриндә оғлан ушаглары ат чапмағы кичик јашларындан өјрәнирләр.

Газахыстанын милли мәтбәхини әтсиз тәсәввүр етмәк мүмкүн дејил вә јемәкләри, адәтән, әдвијјатсыз олур. Ән севимли ичкиләри мадјан сүдүндән һазырланмыш гымыздыр. Бу ички мүалиҹәви һесаб олунур. Еләҹә дә дәвә сүдүндән һазырланмыш јағлы, туршмәзә шубат Газахыстанын мәшһур ичкисидир.

Јеһованын Шаһидләринин Алматыда јерләшән филиалынын гапылары һамынын үзүнә ачыгдыр.