«ТӘҺГИР ВӘ ГЫШГЫР-БАҒЫРЫН АДИ ҺАЛ ОЛДУҒУ БИР АИЛӘДӘ БӨЈҮМҮШӘМ», — дејә Патрисија адлы бир гадын бөлүшүр: «Бағышламағы һеч ҹүр өјрәнә билмирдим. Һәтта бөјүјәндән сонра да хәтримә кимсә дәјәндә ҝүнләрлә бу һагда дүшүнүр, сәһәрә кими јатмырдым». Бәли, һәјаты гәзәб вә кинлә долу олан инсан нә хошбәхт ола биләр, нә дә сағлам. Тәдгигатлар да ҝөстәрир ки, бағышламағы баҹармајан инсан...

• гәзәб вә кинин мүнасибәтләри дағытмасына јол верир, нәтиҹәдә, тәк-тәнһа галыр

• тез инҹијир, нараһатчылыг кечирир, һәтта ағыр депресијаја дүшүр

• сәһвләрә о гәдәр көкләнир ки, һәјатдан зөвг ала билмир

• үрәјинин дәринлијиндә дүзҝүн давранмадығыны билдији үчүн виҹданы ону нараһат едир

• ҝүҹлү стресс кечирир; белә адамда јүксәк ган тәзјиги, үрәк чатышмазлығы кими хәстәликләрин јаранмасы, һәмчинин артрит вә баш ағрылары кими хроники ағрылар кечирмәк еһтималы даһа јүксәкдир *

БАҒЫШЛАМАГ НӘДИР? Бағышламаг гаршы тәрәфин тәгсириндән кечмәк вә гәзәб, кин, интигам һиссиндән гуртулмаг демәкдир. Бағышламаг киминсә сәһв һәрәкәтини дәстәкләдијимизи ҝөстәрмир, һәмчинин бу, о демәк дејил ки, биз сәһви кичилдир, јахуд она ҝөз јумуруг. Бу, сүлһү горумаг, гаршы тәрәфлә мүнасибәти бәрпа етмәк үчүн мәһәббәтдән доған дүшүнүлмүш аддымдыр.

Бағышламаг һәмчинин анлајыш ҝөстәрмәкдир. Бағышламағы баҹаран инсан дәрк едир ки, һамымыз сөздә вә әмәлдә сәһвә јол верә вә ја ҝүнаһ едә биләрик (Ромалылара 3:23). Мүгәддәс Китабда дејилир: «Бир-биринизә гаршы һәмишә сәбирли олун, биринизин диҝәриндән шикајәти олса да, бир-биринизи үрәкдән бағышлајын» (Колослулара 3:13).

Ајдындыр ки, бағышламаг инсанлар арасында «камил бирлик јарадан» мәһәббәт хүсусијјәтинин ваҹиб бир јөнүдүр (Колослулара 3:14). «Mayo Clinic» веб-сајтына әсасән, бағышламаг...

• мүнасибәтләрә мүсбәт тәсир ҝөстәрир, гаршы тәрәфә ҹаныјананлыг, анлајыш вә шәфгәт кими хүсусијјәтләр тәзаһүр етдирмәјә тәшвиг едир

•   инсанын әгли сағламлығыны вә Аллаһла мүнасибәтләрини јахшылашдырыр

• нараһатлыг, стресс вә әдавәти азалдыр

• депрессијанын симптомларыны минимума ендирир

ӨЗҮНҮЗҮ БАҒЫШЛАЈЫН. Бир журнала әсасән, инсанын өзүнү бағышламасы чох чәтин олса да, бу, онун әгли вә физики сағламлығы үчүн олдугҹа ваҹибдир («Disability & Rehabilitation»). Өзүнүзү бағышламаға сизә нә көмәк едә биләр?

• Өзүнүздән мүкәммәллик ҝөзләмәјин. Бир реаллығы гәбул един ки, һамы кими сизин дә сәһвләр етмәјиниз гачынылмаздыр (Ваиз 7:20).

• Ејни сәһвләри тәкрарламамаг үчүн сәһвләриниздән нәтиҹә чыхармағы өјрәнин.

• Сәбирли олун, чүнки бәзи пис вәрдиш вә хүсусијјәтләри бир ҝүнүн ичиндә дүзәлтмәк мүмкүн дејил (Ефеслиләрә 4:23, 24).

• Сизи руһландыран, мүсбәт әһвал-руһијјәли, һәмчинин гынамадан сәһвинизи демәји баҹаран инсанларла достлуг един (Мәсәлләр 13:20).

• Әҝәр биринин хәтринә дәјсәниз, сәһвинизи бојнунуза алыб вахт итирмәдән үзр истәјин. Башгалары илә мүнасибәтләриниз јахшы олса, үрәјиниз дә раһат олаҹаг (Мәтта 5:23, 24).

Јухарыда һаггында данышдығымыз Патрисија Мүгәддәс Китабы арашдырмаға башлајандан сонра бағышламағы өјрәнди. О дејир: «Һәјатымы зәһәрләјән гәзәб һиссиндән азад олдум. Артыг нә өзүм әзаб чәкирәм, нә дә башгаларына әзаб верирәм. Мүгәддәс Китаб принсипләри ҝөстәрир ки, Аллаһ бизи севир вә бизим рифаһымызы дүшүнүр».

Рон адлы бир киши дејир: «Баша дүшдүм ки, башгаларынын дүшүнҹә вә һәрәкәтинә нәзарәт едә билмәсәм дә, өзүмә нәзарәт едә биләрәм. Әҝәр сүлһә наил олмаг истәјирәмсә, ичимдәки киндән гуртулмалыјам. Сүлһә вә кинә әкс гүтбләр кими јанашмаға башладым. Инсан ејни вахтда һәр ики гүтбдә ола билмәз. Артыг виҹданым мәни гынамыр».