ӘҜӘР сиз бир нечә ил әввәл Индонезијанын кичик адасы олан Санҝир-Бесара сәјаһәт етсәјдиниз, орада дәнизин саһилиндә үч баҹымызла растлашардыныз. Инсанлара Аллаһын Кәламыны өјрәтдикләри үчүн һәмин адада демәк олар ки, һамы онлары таныјыр. Амма бу дәфә онлар тамамилә башга бир ишлә мәшғул идиләр.

Әввәлҹә онлар дәнизин ичинә ҝириб тапдыглары ағыр дашлары саһилә чыхарырдылар. Бәзи дашлар футбол топу бөјүклүјүндә олурду. Сонра баҹылар кичик тахта стулда отуруб, чәкиҹлә дашлары тојуг јумуртасындан да балаҹа һиссәләрә бөлүрдүләр. Ардынҹа дашлары пластик ведрәләрә јығырдылар вә пилләкәнлә евләринә дашыјырдылар. Ахырда бүтүн дашлары бөјүк торбалара јығырдылар. Бу торбалар јүк машынларына јүкләнирди. Һәмин дашлар јолларын тикинтисиндә истифадә олунурду.

Бу баҹылардан биринин ады Һүлда иди. Диҝәр баҹылардан фәргли олараг, о бу иш үчүн даһа чох вахт ајыра билирди. Адәтән Һүлда газандығы пулун һамысыны аиләсинин зәрури тәләбатлары үчүн хәрҹләјирди. Амма бу дәфә о, пулун бир гисмини јығмаг гәрарына ҝәлди. Истәјирди ки, һәмин пулла планшет алсын вә «JW Либрарј^®» тәтбигини истифадә едә билсин. О баша дүшүрдү ки, тәтбигдәки видеолар вә диҝәр материаллар һәм тәблиғ ишиндә онун әлиндән тутаҹаг, һәм дә Мүгәддәс Китабы даһа јахшы баша дүшмәсинә көмәк едәҹәк.

Һүлда ај јарым әрзиндә һәр ҝүн бу ишә әлавә ики саат вахт сәрф етди. Гырдығы дашлар кичик јүк машынынын архасыны там долдурду. Ахыр ки, онун планшет алмаг үчүн әлиндә кифајәт гәдәр пул олду.

Һүлда баҹы дејир: «Бүтүн ҝүнү даш гырмагдан һәр јерим ағрыјырды, чох јорулмушдум. Амма планшети әлимә аланда бүтүн ағрыларымы унутдум. Артыг тәблиғим даһа сәмәрәли олур, ҝөрүшләрә даһа раһат һазырлашырам». Һәмчинин Һүлда дејир ки, пандемија башлајанда јығынҹаглар виртуал форматда кечирилдији үчүн планшетин она бөјүк көмәји дәјди. Мәгсәдинә чатдығы үчүн Һүлда баҹыја ҝөрә чох севинирик.