Diosajja Abrahanarojj ‘taqe markankirinakaw’ jumat jutir mä wawam toqe bendisitäni sasaw säna (Génesis 22:18). ¿Khititsa Diosajj parlaskäna?

Diosajj niya 2.000 maranak nayraw Jesusar milagronak lurañapatak chʼam churäna. Uka milagronakajja, Diosajj kuntï Abrahanar arskäna ukajj Jesús toqe phoqasitapwa uñachtʼayäna (Gálatas 3:14).

Jesusajj milagronak lurkäna ukaw aka oraqer bendisiñatak Diosan ajllit profetapätap uñachtʼayäna, kunjamsa Diosajj jutïrin Jesús toqe aka oraqer bendisini uksa uñachtʼayarakïnwa. Jesusan milagro luratanakapajja, jupajj kunjam jaqënsa ukwa mä qhawqhanak uñachtʼayi, uk jichhajj uñjañäni.

Munasirïnwa ukat usutanakaruw qolläna.

Mä kutejja, lepra usuni mä jaqew qolltʼañapatak Jesusar ruwtʼasïna. Jesusasti amparamp loqjjatasaw qolläna. Ukatsti lepra usupajj ukaratpachaw chhaqtjjäna (Marcos 1:40-42).

Wajjtʼasirïnwa ukat manqʼat jiwatanakaruw manqʼayäna.

Jesusajj janiw jaqenakan manqʼat jiwapjjañap munkänti. Jupajj mä jukʼa tʼantʼampi chawllanakamp waljar tukuyasaw walja waranqa jaqenakar manqʼayäna, ukhamsti janiw mä kutik lurkänti (Mateo 14:17-21; 15:32-38). Taqeniw sistʼasiñkam manqʼapjjäna, waljaw jiltʼarakïna.

Khuyaptʼayasirïnwa ukat jiwatanakaruw jaktayäna.

Jesusajj mä viuda warmin sapa yoqapan jiwatap uñjäna ukat uka warmir jan khiti cuidirinïtap amuyasajja, “walpun jupat sinttʼasïna”, ukatsti yoqaparojj jaktayänwa (Lucas 7:12-15).