1. ¿Kunjamsa apóstol Pablojj siervo ministerialanakar uñjäna?

 SIERVO MINISTERIAL jilatanakajj wali wakiskir luräwinakampiw congregacionanakan phoqapjje. Apóstol Pablojj Diosat jan jitheqtir uka jilatanakarojj wali valoranitwa uñjäna. Filipos markankir cristianonakar mä carta qellqkäna ukhajja, siervo ministerialanakampiru ancianonakampiruw aruntäna (Filip. 1:1).

2. ¿Siervo ministerialat servisajj kunjamas Luis jilatajj jikjjatasi?

² Jilïrinakas waynanakas taqe bautisat jilatanakaw siervo ministerialat servisajj wali kusisitäpjje. Devan jilatarojj 18 maranïkäna ukhaw siervo ministerialat uttʼayapjjäna. Luis jilatarojj 50 mara jilanëjjäna ukhaw uttʼayapjjarakïna. Jilatajj akham siwa: “Jilat kullakanakar siervo ministerialat servisajj wali kusisitapunïtwa, jupanakajj qhawqha munasiñampis uñjapjjetäna uk amuytʼasajj jukʼamp munasiñampiw jupanakar uñjarakta. Walja siervo ministerialanakaw ukham amuyapjjaraki” sasa.

3. ¿Kuna jisktʼanakarus aka yatichäwin qhanañchasiskani?

³ Jumatï bautisat jilatästa, janirak siervo ministerialäksta ukhajj ¿janit siervo ministerialäñatak chʼamachaskasma? ¿Kunas siervo ministerialat serviñ munañatakejj yanaptʼiristam? Ukatakejj ¿Biblian kawkïr requisitonakapsa jan ukajj mayitanakapsa phoqañama? Uka jisktʼanakaruw aka yatichäwin qhanañchasiskani. Ukampis nayraqatajja, kuna lurañampis mä siervo ministerialajj phoqañapa ukwa yatjjataskañäni.

 ¿KUNA LURAÑANAKAMPIS MÄ SIERVO MINISTERIALAJJ PHOQAÑAPA?

4. ¿Kuna lurañanakampis mä siervo ministerialajj phoqañapa? (Fotonak uñjjattʼarakïta).

⁴ Siervo ministerialanakajj bautisat jilatanakäpjjewa, espíritu santomp ajllitäpjjewa, congregacionan kunayman lurañanakampiw ancianonakar yanaptʼapjjaraki. Yaqhep siervo ministerialanakajj publicadoranakaruw predicapjjañapatak territorionaksa qellqatanaksa churapjje. Yaqhepanakajj Salón del Reino qʼomachañana ukat mantenimiento lurañanwa yanaptʼapjjaraki. Yaqhepanakajj acomodador jan ukajj audio y video equiponak apnaqañanwa tantachäwinakan yanaptʼapjjaraki. Taqe ukanakat sipansa, siervo ministerialanakajj Jehová Diosaruw munasipjje, mandatonakap phoqasaw sarnaqapjjaraki. Jilat kullakanakarojj taqe chuymaw munasipjjaraki (Mat. 22:37-39). ¿Kunanaks mä jilatajj siervo ministerialäñatak luraspa?

5. ¿Kunsa mä jilatajj siervo ministerialäñatak lurañapa?

⁵ Mä jilatan siervo ministerialäñapatakejja, Bibliarjamaw requisitonak phoqañapa (1 Tim. 3:8-10, 12, 13). Ukhamajj jumatï siervo ministerialäñ munstajja, kawkïr requisitonakas wakisi uk yatjjatasajj ukarjam phoqañatak chʼamachasim. Ukampis nayraqatajj kunatsa siervo ministerialäñ munta ukwa amuytʼasiñama.

¿KUNATSA SIERVO MINISTERIALÄÑ MUNTA?

6. ¿Kunatsa jilat kullakanakar serviñ munta? (Mateo 20:28; Dibujo uñjjattʼarakïta).

⁶ Jesusat amuytʼañäni. Jupajj Awkiparu, jaqenakar wal munasitap laykuw kuns lurirïna. Ukham munasirïtapatwa mayninak laykojj wal trabajïna, kuna lurañanaktï mayninakajj jiskʼachapkäna ukanaks lurarakïnwa (Mateo 20:28 liytʼäta; Juan 13:5, 14, 15). Jumatï munasiñat kuns lurätajja, Jehová Diosajj bendisïtamwa, siervo ministerialäñamatakejj yanaptʼarakïtamwa (1 Cor. 16:14; 1 Ped. 5:5).

7. ¿Kunatsa mä jilatajj wali importantet uñjatäñ jan munañapäki?

⁷ Akapachankir jaqenakajj wali importantet uñjayasiñatakiw wal chʼamachasipjje. Ukampis Jehová Diosan markapan janiw ukhamäkiti. Mä jilatatï Jesusat yateqasisajj munasiñat kuns lurchejja, janiw mayninakar apnaqañsa, ni wali importantet uñjatäñsa thaqkiti. Wali importantet uñjatäñ munki ukatï siervo ministerialata jan ukajj ancianot congregacionan uttʼayatäspa ukhajja, inas kunanakatï  Jehová Diosan wali valorani ovejanakapar uñjañatak wakiski uka jiskʼachat yaqhep lurañanak jan lurañ munkchispati. Ukanak lurañajj janis jupar waktʼkaspa ukhamwa amuyaspa (Juan 10:12). Jehová Diosajj janipuniw jachʼa jachʼa tukuri jan ukajj wali importantet uñjatäñ munirin chʼamachasitaparojj bendiskaniti (1 Cor. 10:24, 33; 13:4, 5).

8. ¿Kamsasas Jesusajj apostolonakapar ewjjtʼäna?

⁸ Jesusan amigonakapas awisajj jan wali amtampiw privilegionak munapjjäna. Kunsa Santiago ukat Juan apostolonakapajj lurapjjäna uk amuytʼañäni. Jesusarojj Reinopan mä wali importante asignación katoqañatakiw mayipjjäna. Jesusajj janiw uk mayipjjatapat jupanakar felicitkänti, antisas akham sasaw 12 apostolonakaparojj ewjjtʼäna: “Khititejj jumanakat jilïrïñ munki ukajja, mayninakar servirïñapawa. Khititejj jumanak taypin nayrankañ munki ukajja, mä esclavjamaw taqenirus serviñapa” sasa (Mar. 10:35-37, 43, 44). Mayninakar serviñ amtanïpki uka jilatanakajja, congregacionan mä bendicionäpjjaniwa (1 Tes. 2:8).

¿KUNAS MAYNINAKAR SERVIÑ MUNAÑATAKEJJ YANAPTʼIRISTAM?

9. ¿Kunas mayninakar jukʼamp serviñatak yanaptʼiristam?

⁹ Cheqas Jehová Diosar wal munaspachätajja, jilat kullakanakarus wal serviñ munarakpachätajja. Ukampis inas siervo ministerialat serviñ jan munkstati. Ukhamajj ¿kunas congregacionan jukʼamp serviñ munañatakejj yanaptʼiristam? Jilat kullakanakar servisajj kunja kusisitas jikjjatasisma ukwa amuytʼasma. Jesusajj akham sänwa: “Katoqañat sipansa churañanwa jukʼamp kusisiñajj utji” sasa (Hech. 20:35). Jesusajj uka arunakarjamaw sarnaqäna, ukatwa mayninakar servisajj wali kusisitäna. Jumajj ukham kusisitarakïsmawa.

10. Mayninakar serviñajj wal Jesusar kusisiyäna, ¿kunjamsa uk uñachtʼayäna? (Marcos 6:31-34).

¹⁰ Kunjamsa Jesusajj mayninakar servisin wali kusisitätap uñachtʼayäna uk amuytʼañäni (Marcos 6:31-34 liytʼäta). Mä kutejja, Jesusampi apostolonakapampejj wali qaritäpjjänwa, mä chʼusa lugararuw samartʼañatak sarapjjarakïna. Ukampis Jesusan yatichäwinakap istʼañatakejj walja jaqenakaw ukar nayraqat puripjjäna. Jupanakarojj janiw saspänwa, kuna laykutejj Jesusansa mayninakans ‘janiw manqtʼasiñatakejj tiempojj utjkänti’, jan ukajj kunatï cheqäki uk mä qhawqhanak yatichtʼasajj jaqenakar khitanukjjaspänwa. Ukampis niyakejjay Jesusajj wali munasirïchïnjja, ‘jupanakarojj kunayman toqenakat yatichañwa qalltäna’, ‘wali jaypʼukamaw’ yaticharakïna (Mar. 6:35). Janiw uk lurañ waktʼatap laykukejj lurkänti, jan ukasti ‘jupanakat wal sinttʼasitap’ laykuw uk luräna. Jaqenakar wal munasitap laykuw jupanakar yatichañ munarakïna. Jesusajj mayninakar servisajj wali kusisitänwa.

11. ¿Kunjamsa Jesusajj yatichkäna uka jaqenakar yanaptʼäna? (Dibujompi fotompi uñjjattʼarakïta).

¹¹ Jesusajj janiw kunatï cheqäki ukak jaqenakar yatichkänti. Jan ukasti jupanakarojj mä milagro toqew manqʼayäna, discipulonakaparuw jupanakar manqʼa churapjjañapatak mayirakïna (Mar. 6:41). Ukhamatwa Jesusajj discipulonakaparojj jaqenakar serviñ yatichaskäna. Jaqenakar ukham yanaptʼañajj kunja wakiskirisa ukwa jupanakar yatichaskarakïna, siervo ministerialanakan ukham servipjjañapajj wali wakiskirirakiwa. ¡Apostolonakajj wali kusisitaw Jesusamp chikajj manqʼa lakirapjjäna! ‘Taqenirakiw sistʼasiñkam manqtʼasipjjäna’ (Mar. 6:42). Cheqas Jesusajj janiw uka horasakejj jupat llakisiñat sipans mayninakat llakisitap uñachtʼaykänti. Aka oraqen jakkäna taqe uka urunakanwa jaqe masipar  yanaptʼäna (Mat. 4:23; 8:16). Jesusajj mayninakar yatichasasa kunanaktï necesitapki ukanakat llakisisas wali kusisitänwa. Jumajj ukhamarakiw siervo ministerialat mayninakar servisajj wali kusisitäsma.

12. ¿Kunatsa congregacionan janis kuns lurirjamäksna ukham jan amuyañasäki?

¹² Jumatï mä kuns jan sum lurtʼirjamätam amuyassta ukhajja, jan desanimasimti. Jumajj suma chuymanïtawa, kunaymanitwa congregacionan yanaptʼasma. Ukatakejj orasiñamawa, 1 Corintios 12:12-30 texton siski ukwa liytʼañamaraki. Uka textorjamajja, Jehová Diosan servirinakapat taqeniw congregacionan mä wakiskir luräwinïpjje. Inas jichhajj siervo ministerialäñatak jan requisitonak phoqerjamäkstati, ukampis jan desanimasimti, antisas Jehová Diosar jukʼamp serviñataki jilat kullakanakar yanaptʼañatakiw chʼamachasisma. Ancianonakajj janiw jumat armasipkaniti, kuntï lurirjamäkta ukarjamaw asignacionanak churapjjätam (Rom. 12:4-8).

13. Siervo ministerialäñatak mayiski uka jilaparte requisitonak ¿khitinakas phoqapjjaraki?

¹³ Akwa amuytʼarakisma, siervo ministerialäñatak Bibliarjam requisitonakajj mayiski uk taqe cristianonakaw phoqapjjañapa. Taqe cristianonakaw Jehová Diosar jakʼachasipjjañapa, mayninakar mä kun churasas kusisitäpjjañapa, mayninakatakis yateqaskañ sarnaqapjjañapa. Ukhamajj inas siervo ministerialäñatak wakichtʼatäjjsta, jichhajj kunsa maynejj siervo ministerialäñatak luraspa ukwa uñjaskañäni.

¿KUNAS SIERVO MINISTERIALÄÑATAK WAKISI?

14. “Responsable jaqëpjjañapawa” siski ukajj ¿kamsañs muni? (1 Timoteo 3:8-10, 12).

¹⁴ 1 Timoteo 3:8-10, 12 (liytʼäta) texton utjki uka yaqhep requisitonakat yatjjatañäni. Siervo ministerialanakajj “responsable jaqëpjjañapawa”. Uka arunakajj “respetkañ sarnaqerïpjjañapawa” sasaw traducisirakispa. Ukajj janirakiw janis kunapachas lartʼasiñamäkaspa jan ukajj kusistʼañamäkaspa ukham sañ munkiti (Ecl. 3:1, 4). Jan ukasti kuna lurañanakatï utjktam ukanak sum phoqañamawa. Jumatï lurañanak churapktam ukanak sum phoqätajja, taqe jilat kullakanakaw jumar confiyapjjätam, respetapjjarakïtamwa.

15. 1) “Janiw may may parlirïpjjañapäkiti” siski uka arunakajj ¿kamsañs muni? 2) “Janirakiw kunatï jupanakatak walïki ukak thaqerïpjjañapäkiti” siski uka arunakajj ¿kamsañs muni?

¹⁵ “Janiw may may parlirïpjjañapäkiti” siski  uka arunakarjamajja, maynejj qhana aruni, cheq parliri, confiykañarakiwa. Arupar phoqeriwa, janirakiw mayninakar engañkiti (Prov. 3:32). “Janirakiw kunatï jupanakatak walïki ukak thaqerïpjjañapäkiti” siski uka arunakarjamajja, maynejj kuna negocionak lurañansa congregacionan qollqe apnaqañans honradöñapawa. Janirakiw jilat kullakanakamp sum apasitap laykojj jupanakat qollqechaskiti.

16. 1) “Janiw vinjja jiljas umirïpjjañapäkiti” siski ukajj ¿kamsañs muni? 2) “Qʼoma conciencianïpjjañapawa” siski ukajj ¿kamsañs muni?

¹⁶ “Janiw vinjja jiljas umirïpjjañapäkiti” siski uka arunakajja, alcoholan umañanak jan jiljas umaña, janirak jiljas umirit uñtʼatäña sañ muni. “Qʼoma conciencianïpjjañapawa” siski ukajja, Jehová Diosan mandatonakaparjam jakaña sañ munaraki. Pantjasir jaqëkasasa, maynejj Jehová Diosamp sum apasitapat sumakiw jikjjatasiraki.

17. Mä jilatajj lurañanakamp phoqaspati janicha ukajj ¿kunjamats yantʼasispa? (1 Timoteo 3:10; foto uñjjattʼarakïta).

¹⁷ “Luräwinakampi phoqapjjaspati janicha ukaw nayraqat yantʼasiñapa” siski ukarjamajja, maynejj luräwinak phoqerïtap qhan uñachtʼayañapawa. Ukhamajj ancianonakatï mä lurañ churapjjstam ukhajja, Diosan markapajj churki uka instruccionanakarjam sum phoqañatakiw chʼamachasiñama. Kun lurañamas wakisi, kunapachas uka lurañ tukuyjjañama uks sum amuyañamarakiwa. Jumatï mä asignación taqe chuym phoqätajja, congregacionankirinakajj uk amuyapjjaniwa, uk luratam wali valoranit uñjapjjarakini. Ancianonaka, bautisat jilatanakar yatichañatakejj jankʼakïpjjam (1 Timoteo 3:10 liytʼäta). ¿Congregacionaman bautisat qʼajjo waynitunakasa jan ukajj jukʼamp waynitunakas utjiti? ¿Bibliat sapak yatjjatañarojj yatitati? ¿Tantachäwinakatakis sumt wakichtʼasi? ¿Tantachäwinakan comentarionak arstʼapuniti, predikiris mistupuniti? Ukhamächi ukhajja, qhawqha maranisa ukarjamaw lurañanak churapjjasma. Ukhamatwa wayna jilatanakajj ‘luräwinakamp phoqapjjaspati janicha’ ukajj yantʼasispa. Ukat qʼajjo waynitüñ pasjjapjjani ukhaw siervo ministerialat serviñatak uttʼayatäjjapjjaspa.

18. ‘Jan khitins juchañchkay sarnaqerïpjjañapawa’ siski ukajj ¿kamsañs muni?

¹⁸ Siervo ministerialanakajj ‘jan khitins juchañchkay sarnaqerïpjjañapawa’. Mä arunjja, janiw jachʼa jucha lurapjjatapat juchañchatäñatakejj mä razonajj utjañapäkiti. Cheqas  cristianonakajj ina chʼusat juchañchatäpjjaspawa, Jesusarojj walja kutiw kʼarintapjjäna, arkirinakajarojj uka pachpa lurapjjani sarakïnwa (Juan 15:20). Ukampis jumatï Jesusjam sum sarnaqätajja, congregacionan yateqaskañ sarnaqerit uñtʼatäyätawa (Mat. 11:19).

19. “Mä sapa warminikïpjjañapawa” siski ukajj ¿kamsañs muni?

¹⁹ Casaratäpki uka siervo ministerialanakajj “mä sapa warminikïpjjañapawa”. Jehová Diosajj matrimonio uttʼaykäna ukhajja, chacha warmiw casarasipjjañapa sasaw säna. Cristianonakajj uka mandatorjamaw phoqapjjañapa (Mat. 19:3-9). Mä casado jilatajj janipuniw qʼañu jucha lurañan sarnaqañapäkiti (Heb. 13:4). Janiw ukakïkiti, esposaparojj janipuniw apanukuñapäkiti, janipuniw yaqha warminakarojj jan wali amtanakamp uñchʼukiñapäkiti (Job 31:1).

20. ¿Kunjamsa mä chachajj familiapar sum pʼeqtʼaspa?

²⁰ “Wawanakaparusa familianakaparusa sum pʼeqtʼapjjañapawa”. Jumatï familia pʼeqtʼirïstajja, kunanaktï familiaman lurañamäki ukanak sum phoqañamawa. Familiamampejj Bibliat yatjjatañamapuniwa. Jupanakamp sapa kuti predikir mistuñatakis chʼamachasiñamarakiwa. Wawanakamar Diosamp sum apasipjjañapatakejj yanaptʼañamarakiwa (Efes. 6:4). Familiapar sum cuidir chachajja, congregacionar cuidañatakejj wakichtʼatarakiwa (1 Timoteo 3:5 liytʼarakïta).

21. Janïratï siervo ministerialäksta ukhajj ¿kunsa lurasma?

²¹ Jumatï jan siervo ministerialäksta ukhajja, mirä amp suma, aka yatichäwi wali amuyump yatjjatam, uka toqet Jehová Diosar orasirakim. Kuna requisitonaksa siervo ministerialanakajj phoqapjjañapa uk yatjjatasajja, ukanakamp phoqañatak chʼamachasim. Qhawqsa Jehová Diosarusa jilat kullakanakarus munasta uk amuytʼarakim. Jupanakar jukʼamp serviñatak chʼamachasim (1 Ped. 4:8, 10). Siervo ministerialäsin jilat kullakanakar servisajj wali kusisitäyätawa. Siervo ministerialat serviñatak chʼamachasitamarojj ¡Jehová Diosay wal bendispan! (Filip. 2:13).