JAMACHʼINAKASA, pakasa (jan ukajj águila) ukat wallpasa wali yateqaskayäpjjewa. Ukjja 3.000 jila maranak nayraw Job chachajj amuyjjäna. Biblianjja, uñachtʼäwinakat parlañatakiw wal apnaqasi. Ukat sum jakasiñataki, Diosampi sum apasiñatakis kunjamsa yanaptʼapjjestaspa ukanaksa yaticharakistuwa. Uk jichhajj uñjañäni.

Jerusalén markan jakirinakajja, golondrina jamachʼinak sum uñtʼapjjäna. Uka jamachʼinakajj uta techoruw tapachasipjjerïna, Salomón chachan templopansa tapachasipjjarakïnwa. Golondrina jamachʼinakajja, mara maraw uka templon sumaki jakasipjjpachäna ukhamarak chhiwchinakapsa uka cheqan wali sum uywapjjarakpachäna.

Salmo 84 qellqerejja, golondrina jamachʼinakan tapanakapwa templon uñjpachäna, jupajj sapa sojjta phajjsiw mä semana templon Diosar serviri sarirïna. Jupajj golondrinanakar uñtasitaw Diosan utapan wiñayatak jakasiñ munarakïna. Ukatwa akham säna: “¡Taqe chʼaman Diosay, qollan utjäwimajj munkayawa! Taqpach almajjampiw temploman uyupankañ munta” sasa. Ukat akham saskakïnwa: “Taqe chʼaman Tatitojjay, Reyejjay, Diosajjay, jamachʼinakamppachaw jakʼaman tapachtʼasi, golondrina jamachʼisti, chhiwchinakapatakejj altaraman tap jikjjataraki” sasa (Salmo 84:1-3). Jiwasasa wawanakasasa, ¿ukhamarakit Diosan markapampi ukat jilat kullakanakampi tantachasiñ wali askit uñjtanjja? (Salmo 26:8, 12).

Jeremías profetajja, akham sasaw qellqarakïna: “Cigüeña sat jamachʼis alajjpachanjja yatiwa kunapachatejj kuttaniñapäki ukjja” sasa. Jeremiasajja kunapachas cigüeñanakajj mä cheqat yaqha cheqar sarjjapjjäna uk sumwa yatpachäna, Suma Oraqenjja, ukajj wali sumaw uñjasirïna. Primavera phajjsinakanjja, 300.000 jila cigüeñanakaw África cheqat Europa uksa cheqar Jordán vallenjam jalapjje sasaw sapjje. Cigüeñanakarojja Diosaw ukham amuytʼasir lurtʼawayi, jupanakajj sapa verano phajjsinakaw kawkhantï wawanakapar uywapkaspa uka cheqanakar kuttʼanjjapjje. Cigüeñanakasa ukat yaqha jamachʼinakasa “yatipjjarakiwa kunapachatejj yaqha cheqaru sarjjapjjañapäki ukjja” (Jeremías 8:7).

“Jamachʼinakajja kunapachas mä cheqat yaqha cheqar sarapjjañapa ukjja yatipjjewa, ukajj wali muspharkañawa” sasaw Collins Atlas of Bird Migration librojj qhanañchi. Diosajja jamachʼinakarojj yatiñanwa lurawayi, ukhamat kunapachas mä cheqat yaqha cheqar sarjjapjjañapa uk yatipjjañapataki. Jaqenakarojja kuna tiemponsa jakasktan uk yatiñatakejj amuytʼasir lurawayarakistu (Lucas 12:54-56). Cigüeñanakajja kunapachas yaqha cheqar sarapjjani uk jupanakakiw amtapjje,  ukampis jaqenakajja Diosatwa nayraqatajj yatjjatañasa ukhamat kuna tiemponsa jakasktan uk amuytʼañasataki. Jeremías tiempon jakir Israelitanakajja, janiw kuna tiemponsa jakasipkäna uk amuytʼapkänti. Ukatwa Diosajj akham säna: ‘Jupanakajj janipuniw kuna yatiñanïpkisa, arunakajjsa janiw istʼañ munapkiti’ sasa (Jeremías 8:9).

‘Qhepa urunakanwa’ jakasktan sasaw Bibliajj qhanañchi (2 Timoteo 3:1-5). Cigüeñat yateqasisajj ¿qhepa urunakan jakaskatas amuyasktanti?

Bibliajja pakat walja kutiw parli. Suma Oraqe uksanjja, kunjamänsa pakajja uk sum yatipjjäna. Bibliajj akham siwa: “Uka patatpachwa kunürutejj katuntkani ukarusa uñchʼukiniraki” sasa (Job 39:27-29). Pakanakan nayranakapajja, 1 kilómetro jayaruw uñjaspa.

Kunjamtï pakajj wali jayar uñjkejja, ukhamarakiw Jehová Diosajj kunas jutïrin pasani ukanak wali sum yatiraki. Bibliajj akham siwa: “Nayaw taqe kunan tukusiñapsa, qalltatpach yatiyta, nayratpachrakwa kunatejj qhepat luraskani ukanaksa yatiytjja” sasa (Isaías 46:10). Diosan Aruparjam sarnaqañäni ukhajja, yatiñapwa churistani ukat kunas jutïrin pasani uk amuytʼañatakis yanaptʼarakistaniwa (Isaías 48:17, 18).

Bibliajja khitinakatï Diosar confiyapki ukanakajj pakar uñtasitäpjjewa sasaw akham sasin qhanañchi: Jehová Diosar confiyapki ukanakajja chʼamaniw tukupjjani, águila pakalinakar uñtatarakiw jalapjjani sasa (Isaías 40:31). Pakajja, wali alton jalañatakejj oraqet juntʼu thayajj alajjpachar makatki ukampiw yanaptʼayasi. Juntʼu thayajj utjki ukhajja, pakajj chheqanakap ayatatasaw wali altor muytas muytas makati, ukham lurasajja, janiw chʼam tukkiti. Diosar taqe chuyma confiyapki ukanakajja, ‘jachʼa chʼamajj Diosat juti’ sasaw confiyapjjaraki (2 Corintios 4:7, 8).

Janïr jiwayatäkasajja, Jesusajj Jerusalén marka uñtasin akham sänwa: “¡Jerusalén, Jerusalén, jumawa profetanakarojj jiwaytajja, Diosan khitanitanakaparusti qalampirakiw kʼupjaraktajja! ¡Nayasti qawqha kutirakiw jumanakarojj tantachtʼañ munapjjäyäsmajja kunjämtï mä wallpajj jiskʼa chhiwchhinakaparojj jawsthapki ukhama, ukampis janiw munapktati!” sasa (Mateo 23:37).

Jamachʼinakasa, pakasa ukat wallpasa wal chhiwchinakapat jarkʼasiñ yatipjje. Wallpatï mä pakaru uñjchi ukhajja, chhiwchinakapar jarkʼaqañatakejj warartañ yati, ukhamatwa chhiwchinakapajj taykapan chheqanakapar imantasipjje. Jalluta ukat lupit jarkʼaqasiñatakejja, chhiwchinakajj taykapan chheqanakaparuw imantasipjjaraki. Jesusajja ukhamarakiw Jerusalén markan jakir jaqenakar yanaptʼañsa ukat jarkʼaqañsa munäna. Jichhürunakanjja, Jesusajj jupar llakinakas jaytañasatakiw chʼamañchtʼistu (Mateo 11:28, 29).

Jamachʼinakatsa, pakatsa ukat wallpatsa waljanakwa yateqapjjsna. Jutïrin jupanakar uñjañäni ukhajja, kunjamäpjjesa ukat kunsa yateqsna uka toqetwa lupʼiñasa. Mä golondrina jamachʼir uñjkañäni ukhajja, kawkhantï Diosar yupaychktan ukar wali askit uñjañatakiw chʼamachasiñasa. Diosaw chʼam churitani sasaw pakar uñtasit confiyañasaraki. Jan waltʼäwinakan uñjaskañäni ukhajja, Jesusaruw taqe llakinakas jaytañasa, jupajj kunjamtï mä wallpajj chhiwchinakapar jarkʼaqki ukhamwa jarkʼaqestani. Cigüeñat yateqasisajja, kuna urunakansa jakasktan uk wali sum amuytʼañasaraki.