Diosan munañap phoqayañatakejja, angelanakajj Diosan servirinakaparojj jan walinakat awisajj jarkʼaqapjjänwa sasaw Biblian yatichi (Salmo 34:7). Amuytʼañataki:

• Jehová Diosajj Sodoma, Gomorra markankir jaqenakar jan walinak lurapjjatapat tukjkäna ukhajja, Diosar servir Lot chachampiru familiapampirojj angelanakaw yanaptʼapjjäna (Génesis 19:1, 15-26).

• Kimsa hebreo waynanakajj aqkir mä hornor phichantatäñatak jaqontatäpjjäna ukhajja, Diosaw ‘angelap khitasajj servirinakapar’ salväna (Daniel 3:19-28).

• Leonanakatak utjkän uka pʼiyar jaqontatäsajja, Danielajj mä arumpachaw ukankäna, ukatjja jan kuna kamachtʼataw mistunïna. Daniel profetajj sänwa: “Diosajjajj angelapwa khitani, juparakiw leonanakan lakapsa jistʼanti” sasa (Daniel 6:16, 22).

Yatiyir angelanakajj nayrïr patak maranakanjja, Diosan munañap phoqañatakiw cristiano congregacionar wakiskäna ukhajj yanaptʼapjjäna. Sañäni:

• Mä angelaw cárcel punkunak llawiräna, ukhamat apostolonakar librëpjjañapatak yanaptʼäna. Templon yatiyasipkakim sasaw sarakïna (Hechos 5:17-21).

• Mä angelaw Feliperojj Jerusalenat Gaza markar sarkäna uka wasar thaknam sarañapatak khitäna. Ukhamat etíope mä jaqer yatiyañapataki, uka jaqejj Diosar adorañatakiw Jerusalenar saräna (Hechos 8:26-33).

• Diosajj jan judiöpki uka jaqenakan cristianöpjjañap munäna ukhajja, mä angelaw Cornelio sutini mä romano jaqer mä visionan uñstäna, ukatjja apóstol Pedror utapar jawsayañapatakiw mayïna (Hechos 10:3-5).

• Apóstol Pedrojj carcelar llawintatäkäna ukhajja, mä angelaw carcelat irpsüna (Hechos 12:1-11).

Nayra tiemponjja, milagronak lurasaw angelanakajj jaqenakar yanaptʼapjjäna, jichhürunakan ukhamarakit yanaptʼaski janicha uk janiw yatktänti. Kunas jichhürunakan pasañapäna uka toqet Jesusajj akham sänwa: “Reinon aka suma yatiyäwinakapajja aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14). Angelanakaw Diosan Reinopat yatiyasiñapatak yanaptʼapjje, ¿uk jumajj yatiyätati?

Apocalipsis libronjja, angelanakajj oraqpachankir jaqenakaruw Diosata amtanakapatsa yatipjjañapatak yanaptʼapjjani sasaw parli. Apóstol Juanajj sänwa: “Alajjpachan jalnaqaskir mä angelaruw uñjarakta. Jupajj wiñay suma yatiyäwinakanïnwa, ukhamat oraqenkirinakaru, taqe markankirinakaru, tribunkirinakaru, kunayman parlani jaqenakaru, kunayman kasta jaqenakaru yatiyañataki. Uka angelajj akham sasaw jachʼat arnaqasïna: ‘Diosar ajjsarapjjam, jachʼañchapjjarakim, jaqenakar juzgañ horasajj purinjjewa. Ukhamajj khititejj alajjpachsa, oraqsa, lamar qotsa, uma jalsunaksa lurki uka Diosar adorapjjam’ sasa” (Apocalipsis 14:6, 7). Angelanakajja, kunjamsa Diosan Reinopat yatiyasiñapatak yanaptʼasipki uka toqet walja experiencianakaw utji. Ukhamarusa mä jucharar jaqejj arrepentisi ukhajja, wal kusisipjje (Lucas 15:10).

Diosan Reinopat jan jukʼamp yatiyasjjani ukhajja, ¿kunas angelanakampi pasani? Angelanakajj Jesucristomp chikaw mä arunjja, reyinakans Reyipampiw “Taqe Chʼamani Diosan jachʼa urupan guerrajj apaskani” ukan nuwasipjjani, uka guerrajj Armagedón satawa (Apocalipsis 16:14-16; 19:14-16). Jesucristomp chikaw wali chʼamani angelanakajj ‘Jesús Tatitusat parlki uka suma yatiyäwinakar jan istʼirinakar castigapjjani’ (2 Tesalonicenses 1:7, 8).

Angelanakajja taqe jaqenakatwa llakisipjje, Diosar serviñ munirinakarojj wal yanaptʼañ munapjjaraki, janiw ukat pächasiñasäkiti. Jehová Diosajja, walja kutiw angelanakapampejj servirinakapar chʼamañchtʼäna, jan walinakatsa jarkʼaqarakïna (Hebreos 1:14).

Oraqpachan suma yatiyäwinakajj yatiyasiski ukjja, istʼañäniti ukat ukarjamat sarnaqañäni uk sapa mayniw amtjjañasa. Jehová Diosan Testigonakapajja, taqe chuymaw Diosamp yanaptʼayasiñamatak Bibliat yatichapjjätam.