MÄ SUMA regalo katoqasisajj ¿janit wal yuspärktanjja? Yuspärasirïñajj kunja wakiskirisa ukwa Jesusajj lepra usuni tunka chachanakar qollasajj yatichawayistu. ‘Jupanakat maynïrejja, kʼumaräjjasin Diosar jachʼat yupaychasaw kuttʼaniwayäna’. Jesusajj uk uñjasajj akham sänwa: “¿Janit tunkanïki kʼumarachatanakajja? ¿Kawkinkapjjesa llätunkanejja?” sasa (Lucas 17:12-17). ¿Kunsa ukajj yatichistu? Awisajja, kuntï mayninakajj jiwas layku lurapki ukjja jankʼakiw armasjjsna.

Kunjamtï uñjaniwayktanjja, Diosajj jiwas layku Yoqapan jakañap loqtawayki ukajj mä suma regalowa. Janiw kuna regalos ukat sipan jukʼamp jachʼajj utjkaspati. Ukhamajj ¿kunjamsa Diosar uka suma regalopat yuspärsna?

• Qhespiyawaykistu uka Diosar uñtʼañasawa. Jesusan jiwatapatjja, janiw taqenipunejj wiñay  jakañ katoqapkaspati. Jesusajj akham sasaw Diosar mayisïna: “Aka wiñay jakañajj juma sapa cheqpach Diosar uñtʼañanwa utji, ukhamarak Jesucristoru kawkïrirutejj jumajj khitankta ukaru” sasa (Juan 17:3). ‘Mä jaqew wawäkayäta ukhajj jiwañat qhespiyawaytamʼ sasin yatiyapjjeristam ukhajja, ¿janit uka jaqer jukʼamp uñtʼañ munkasma, ukat kunatsa qhespiyawaytam uk yatiñ munkarakisma? Jiwañat qhespiyawaykistu uka Diosajja, ukhamarakiw Jupar uñtʼañassa ukat Jupamp sum apasiñassa muni. Ukatwa Bibliajj akham ewjjtʼistu: “Diosar jakʼachasipjjam, jupasti jumanakarojj jakʼachasirakiniwa” sasa (Santiago 4:8).

• Jesusan jiwatapar iyawsañasawa. Bibliajj akham siwa: “Khititejj Yoqar iyawski ukajja wiñay jakañaniwa” sasa (Juan 3:36). Jesusan jiwatapar iyawsañajj ¿kamsañsa muni? Jesusan jiwatapaw jiwañat qhespiyistu sasin iyawstan ukhajja, luratanakasampiw uñachtʼayañasa (Santiago 2:17). Amuytʼañataki, ampar loqtasapuniw mä regalo katoqastanjja. Jesusajj jiwas layku jiwawayki ukar iyawsatasjja, ukhamarakiw luratanakasan qhan uñjasiñapa. ¿Kunjamsa uk lursna? Kun lurañassa Jehová Diosajj muni uk yateqasawa ukarjam sarnaqañatak chʼamachasiñasa. * Diosaruw juchanakas perdonañapataki ukat qʼoma conciencianïñasataki oracionan mayisiñasa. ‘Jesusan jiwataparu iyawsatas laykuw wiñayataki kusisit sum jakasiñäni’ sasaw taqe chuyma confiyañasa (Hebreos 11:1).

• Jesusan jiwatap amtañataki tantachäwiruw sarañasa. Jesusajja, jupan jiwatap jan armañatakejj sapa mara apasiñapatakiw mä tantachäwi aka arunakamp uttʼayawayi: “Akjja nayat amtasisin lura[sipkakim]” sasa (Lucas 22:19). Aka marajja, Jehová Diosan Testigonakapajj abril 11, martes uruw Inti jalantjjarojj Jesusan jiwatap amtaskañäni. Kunatsa Jesusajj jiwawayi, jiwatapajj kunjamsa jichhasa jutïrinsa yanaptʼistaspa ukaw uka tantachäwin niya mä horan qhanañchasiskani. Pasïr marajja, niya 20 millón jaqenakaw aka Oraqpachan uka tantachäwir sarawayapjje. Jichhajj jumaruw Diosan suma regalopat yuspärañataki uka tantachäwir sarañamatak wali munasiñamp invittʼapjjsma.