TAQENIW kusisita jakasiñ muntanjja. Ukampis aka qhepa urunakajj “chʼama tukuña jan wali tiemponakaw[a]” (2 Tim. 3:1). Kunayman jan walinakaw llakit sarnaqayistu, sañäni, ina chʼusat tʼaqesiñanaka, usuntañanaka, jan trabajonïña, mä munat familiarasan jiwatapa. Uka jan walinakampejj Diosan servirinakapas aynachtʼapjjarakispawa, jukʼat jukʼatwa jan kusisitäjjapjjaspati. Ukhamantï uñjastanjja, ¿wasitat kusisitäñatakejj kuns lursna?

Uka jisktʼar qhanañchañatakejja, kunas kusisiñajja, kunjamatsa yaqhep jaqenakajj jan walinkkasas kusisitäpjjäna ukanak nayraqat yatjjatañäni. Ukjjarojja, kusisitakïskakiñatakejj kunsa lurañasa, kunjamsa jukʼamp kusisitässna ukanakwa yatjjataskañäni.

Kusisiñajj janiw larusiñampi pachpäkiti. Uk amuytʼañäni, mä umat jaqejja wali kʼuchikïspawa. Ukampis, jan umatäjje ukhajj janiw kusisitäjjeti, llakinakapatakwa amtasjje. Kusisiñapajj mä ratokiwa, janiw cheqpach kusisiñäkiti (Prov. 14:13).

Ukampis kusisiñajj janiw ukhamäkiti. Kunapachatï mä kunas wali sum utjistu, jan ukajj kunatï wali wakiskirïki uk suyasktan ukhajja, wali kusisitätanwa. Cheqpach kusisiñajja, walinsa jan walinsa kʼuchikïskaña sañ muni (1 Tes. 1:6). Cheqas maynejj jan walinsa uñjaskchejja, kusisiñapajj utjaskakispawa. Amuytʼañäni, apostolonakajja Cristot parlapjjatap laykojj jawqʼjataw uñjasipjjäna, ukampis “jupanakajj Sanedrinankir jaqenakan nayraqatapatjja wali kusisitaw sarjjapjjäna. Jesusan sutip layku phenqʼachat uñjasipjjatapatjja Diosajj wali sum jupanakar uñjäna” (Hech. 5:41). Cheqas janiw jawqʼjayasipjjatap layku kusisipkänti, jan ukasti, Diosat jan jitheqtapjjatap laykuw kusisipjjäna.

Janiw khitis kusisita naskiti, janirakiw justupakis kusisit jaqëkaspati. Cheqpach kusisiñajja, espíritu santon achupat mayawa. Uka espirituw ‘machaq jaqëñampi isthapisiñatak’ yanaptʼistu, kusisiñasti ukatakiw yanaptʼarakistani (Efes. 4:24; Gál. 5:22). Jiwasatï kusisitäñänejja, jan walinakarojj jan kunakiw saykatañäni.

Jehová Diosajj aka oraqe lurkäna ukhajja, taqe kunas sumäñapwa munäna, janiw jan walinak utjañap munkänti. Jaqenakajj jan walinaksa lurapkchejja, Diosan kusisiñapajj utjaskakiwa, Bibliajj uka toqet akham siwa: ‘Chʼamasa, kusisiñasa lugarapankiwa’ sasa (1 Crón. 16:27, NM). Yamas servirinakapajj sum sarnaqapki ukhajja, Diosajj chuymapan wal kusisi (Prov. 27:11).

¿Kunjamsa Jehová Diosat yateqassna? Jan munkayätan uk pasaspa ukhajja, janiw sinti llakisiñasäkiti. Llakisiñat sipansa, kuna  askinakas utjistu ukanakatwa lupʼiñasa, pacienciampirakiw jan walinak chhaqtjjañap suyañasa. *

Diosan servirinakapajj jan walin uñjaskasas kusisitäpjjänwa, ukaw Biblian qhanañchasi. Abrahán chachajja, yaqhanakan jan waltʼayataw uñjasïna, jiwayañ kunwa munapjjäna, ukhamäkchïnsa uka jan walinakarojj saykatañapänwa (Gén. 12:10-20; 14:8-16; 16:4, 5; 20:1-18; 21:8, 9). Ukampis kusisitäskakïnwa. Jupajj machaq mundon Mesiasampi apnaqatäñ wal suyäna (Gén. 22:15-18; Heb. 11:10). Jesusajj uka toqet akham sänwa: “Jumanakan Abrahán awkimasti, nayan uruj uñjañ suykasajj wal kusisïna” sasa (Juan 8:56). Jiwasajj Abrahanat yateqasisajja, kunanakatï jutïrin utjkani ukanakat lupʼiñasarakiwa (Rom. 8:21).

Apóstol Pablompit Silas chachampit amuytʼarakiñäni, jupanakajj Abrahán chachjamarakiw Diosan arsutanakapar confiyapjjäna. Ukarakiw jan walin uñjaskasas kusisitäñatak yanaptʼäna. Mä kutejja, wal jawqʼjasaw carcelar llawintapjjäna. Ukampis “niya chika arumäjjäna ukhajja, Pablompi Silasampejj oracionwa lurasipkäna, cantasaw Diosar jachʼañchasipkarakïna” (Hech. 16:23-25). Jupanakarojj mä suma suytʼäwinïñaw yanaptʼäna, ukatsti Criston sutip layku tʼaqesipjjatapatwa kusisitäpjjarakïna. Jiwasatï jupanakat yateqasiñ munstanjja, Diosar taqe chuyma serviñajj kunanakansa yanaptʼistu uk amuytʼañasawa (Filip. 1:12-14).

Jichhürunakanjja, walja jilat kullakanakaw jan walin uñjaskasas kusisitäpjje. Amuytʼañataki, 2013 maranjja, umampi thayampi lamar qotat mistunisaw (supertifón Haiyan) Filipinas markar tukjäna. 1.000 jila familianakan utanakap qʼal tukjäna. Ukaw Tacloban markan George jilatar pasäna, jupajj akham siwa: “Ukham jan walinakan uñjasisas jilat kullakanakajj kusisitäpjjewa, kunja kusisitäpjjtsa uk janiw arunakampi sañjamäkiti” sasa. Kunanaktï Jehová Diosajj jiwas layku lurawayki ukanakat lupʼiñäni, yuspärarakiñäni ukhajja, jan walinakan uñjaskasas kusisitäñäniwa. ¿Kusisitäñatakejj kunanakampsa Jehová Diosajj churistu?

Jehová Diosampi sum apasitas laykuw wali kusisitässna. Jupaw alajjpachsa, oraqsa lurawayi, Juparakiw Awkisajja, Diosasajja, amigosajja (Sal. 71:17, 18).

Maysa toqetjja, jakañ vidanïtas laykuw kusisit jakasiraksna (Ecl. 3:12, 13). Jehová Diosaw markapar irpanistu, ukatwa kunsa jutïritak amtaski, kun lurañassa muni ukanak yattanjja (Col. 1:9, 10). Ukatwa jakañ vidasan kuns lurañäni uk sum yattanjja. Ukampis jaqenakat jila partejja, kunsa jakañ vidapan lurapjjani uk janiw yatipkiti. Ukatwa apóstol Pablojj akham säna: “‘Nayrajj janiw uñjkiti, jiñchus janiw istʼkiti. Kunanaktï Diosajj munasirinakapatak wakichkäna ukanakjja, janiw jaqejj chuymapan amuykiti’ sasa. Ukampis Diosaw jiwasarojj espíritu santopampi ukanak qhanañchistu” (1 Cor. 2:9, 10). Diosan amtanakap yatiñasa, munañap amuyañasa kusisitäñatakiw yanaptʼistu.

Jehová Diosajj markap layku kunanaksa lurawayi uk yatjjataskakiñäni. Jupaw juchanakas perdonatäñapatak yanaptʼistu (1 Juan 2:12). Khuyapayasiñap laykuw mä suma oraqen jakasiñ suyasktanjja, ukasti wali jakʼankjjarakiwa (Rom. 12:12). Jupar adorañatakejj oraqpachankir walja jilat kullakanakampiw bendisirakistu (Sal. 133:1). Jehová Diosajja, Supayatsa, demonionakatsa markaparojj jarkʼaqewa sasaw Bibliajj qhanañcharaki (Sal. 91:11). Uka bendicionanakat lupʼiñänejja, jukʼamp kusisitäñäniwa (Filip. 4:4).

¿Jukʼamp kusisitäsnati? Jesusajj uka toqet akham sänwa: “Nayan kusisiñajajj jumanakan utjaspa, jumanakan kusisiñamajj phoqatäspa ukwa munta, ukatwa nayajj ukanak sapjjsma” sasa (Juan 15:11). Uka arunakarjamajja, maynejj jukʼamp kusisitäspawa. Kusisiñajj ninjamawa, jukʼamp aqtañapatakejj jukʼamp lawanakampi apjjatañaw wakisi. Jukʼamp kusisitäñatakejj niya ukhamarakiwa, espíritu santon yanaptʼapaw wakisi. Ukhamajja, Jehová Diosaru espíritu santo mayisiskakiñäni, Biblian yatichäwinakapatsa lupʼiskakiñäni, cheqas ukajja espíritu santon yanaptʼapampiw qellqasiwayi (Sal. 1:1, 2; Luc. 11:13).

Jukʼamp kusisitäñatakejja, kunatï Jehová Diosar kusisiyki uk lurañaw yanaptʼarakistaspa (Sal. 35:27; 112:1). ¿Kunatsa ukham sistanjja? Jehová Diosajj munañap lurañatakiw lurawayistu. Bibliajj akham siwa: “Diosar yupaycham, ukatsti mandamiento arunakapa phoqam, taqe ukanakajj jaqetakïtap layku” sasa (Ecl. 12:13). Ukhamasti, Jehová Diosar servisaw jukʼamp kusisitässna. *

Jiwasatï kusisitäñänejja, chuymasan sumakiw jikjjatasiñäni, yamas jan walin uñjaskasas Jehová Diosar kusisita chuymampi serviskaktan ukhajja, Jupajj wal kusisi (Deut. 16:15; 1 Tes. 5:16-18). Cheqpach kusisiñajja, qollqe thaqañat sipansa, Diosan Reinop nayrar uchañatakiw yanaptʼistu (Mat. 13:44). Ukham luratasajj wali wakiskirïtap amuytan ukhajja, jukʼamp kusisitätanwa, chuymasansa sumakirakïtanwa, yaqhanakan kusisitäpjjañapatakis yanaptʼaraktanwa (Hech. 20:35; Filip. 1:3-5).

Jukʼamp kusisitäñajja, jan usuntañatakiw yanaptʼarakistaspa. Nebraska (Estados Unidos) markan universidadankiri mä doctorajj akham sänwa: “Jumatï kusisitästa, jakañ vidamatsa kusisitarakïstajja, inas jutïrin jan usuntañatak yanaptʼchïtam” sasa. Uka arunakajj Bibliankiri aka arunakarjamawa: “Kusisit chuymajj jaqen jakañapawa sumaptayi” sasa (Prov. 17:22).

Ukhamajja, jan wali tiemponakansa jakaskstanjja, espíritu santow kusisit jakasiñatak yanaptʼistaspa. Ukatakejj Diosaruw mayisiñasa, Biblia liyiñasa, kuntï liyktan ukanakatsa lupʼiñasarakiwa. Yamas jukʼamp kusisitäñatakejja, kuna bendicionanaksa Diosajj churistu ukanakatwa sum amuytʼañasa. Diosat jan jitheqtapkäna uka servirinakatsa yateqasiñasarakiwa, Diosan munañap lurañatakis chʼamachasiñasawa. Ukhamatwa kuntï Salmo 64:10 qellqatajj siski ukajj jiwasan phoqasirakini, ukan akham siwa: “Aski jaqejj Tatitumpiw kusisini, jupampiw arjjatayasini” sasa.