Pusi marani mä jiskʼa imill wawajja, mä fabrican chimeneapat jewqʼe mistur uñjasajj ‘qenayanak lurir fabricäpachawa’ sasaw amuyäna. Ukham amuyatapajj inas larusiñjamächi. Ukampis jukʼamp pantjasiñanakaw utjaspa, ukanakajj jakäwissa mayjtʼayaspawa. Amuytʼañataki, mä medicamenton sutip jan sum liytʼasin umsna ukhajja, jan waliruw purtʼassna.

Jiwasatï Diosan arunakap jan sum amuyksna ukhajja, jukʼamp jan waliruw purtʼassna. Mä kutejja jaqenakajj janiw Jesusan yatichäwinakap sum amuyapkänti (Juan 6:48-68). Yateqañat sipansa, jupanakajj janiw yatichäwinakap istʼañ munjjapjjänti. ¡Ukajj wali llakkañawa!

Jumatï yanaptʼayasiñ amtampi Biblia liystajja, ukajj wali khusawa. Ukampis yaqhepajj Biblia liytʼasajj janiw sum amuyapkapuniti. Kunanaksa jan sum amuyapki ukanakat kimsa uñjañäni.

• ‘Diosar ajjsarapjjam’ siski uka arunakajj Diosar wali khatattʼasisa ajjsaraña, sañsa munkaspa ukhamwa yaqhepajj amuyapjje (Eclesiastés 12:13). Ukampis Diosajja janiw ajjsarasa khatattʼasisa serviñas munkiti. Antisas akham sistuwa: “Jan ajjsaramti, nayaw jumampïskta, jan ajjsaramti, nayäsktwa juman Diosamajja. Nayaw chʼamañchaskäma, nayarakiw yanapaskäma” sasa (Isaías 41:10). Ukhamasti Diosar ajjsarañajj wali respetompi Jupar jachʼañchaña sañwa muni.

• Biblia liytʼirinakat yaqhepajja, “aka oraqenjja taqe kunas horasanikiwa [...]. Naciña horasa, jiwjjaña horasa” siski uka arunakwa jan sum amuyapkarakiti (Eclesiastés 3:1, 2). Jaqenakajj kunapachas jiwani ukjja Diosaw amtjje sasaw uka qellqat liytʼasajj amuyapjje. Ukampis uka qellqatajja, jaqenakajj nasipki, jilsusin wawanïpki, jiwapki uka toqetwa parlaski. Qhawqhsa jakañäni ukajja, jakäwisan kunanaksa amtañäni ukarjamäniwa sasaw Bibliajj yatichistu. Sañäni, “Tatitur ajjsaras jakir jaqetakisti, jakañapajj jukʼamp yapjjatatawa” sasaw qhanañchi (Proverbios 10:27; Salmo 90:10; Isaías 55:3). Diosar ajjsaratasatjja janiw jan walinak lurjjañäniti, mä arunjja, janiw alcohol umjjañäniti ni qʼañu juchanaksa lurjjarakiñäniti (1 Corintios 6:9, 10).

• “Aka oraqempi alajjpachampisti ninampi tʼunjatarakïniwa” siski uka arunakajja cheqapuniw phoqasini sasaw yaqhepajj amuyapjje, ukatwa akham sapjje: ‘Aka oraqjja Diosaw ninampi nakhantayani’ sasa (2 Pedro 3:7). Ukampis aka Oraqejja janipuniw tʼunjatäkaniti sasaw Diosajj arsuwayi. Aka Oraqejj wali suma thurtʼatawa, uttʼayatäkän ukawjatsa janipuniw onjjtayatäkaniti ni tʼunjatäkarakinisa (Salmo 104:5; Isaías 45:18). Ukhamajj janiw aka Oraqejj tʼunjatäkaniti, jan ukasti aka oraqen jakir jan wali jaqenakaw ninampis jiwarayatäkaspa ukham tʼunjatäpjjani. Maysa toqetjja, alajjpacha sasajj kawkjantï Diosajj jakki uka cheqatwa Bibliajj parlaski.

Kunjamtï uñjaniwayktanjja, Biblian yaqhep textonakap liytʼasajj janiw jaqenakajj sum amuyapkiti. Inas maynejj akham sasin jisktʼaschispa: “Diosajj wali yatiñanïsajj ¿kunatsa Biblia taqenin amuykaña jan qellqayawaypacha?” sasa. Kunatsa jaqenakajj Biblia liytʼasajj jan sum amuyapki uk kimsa toqet uñjañäni.

1. Bibliajj humilde chuymanïpki, yateqañsa munapkaraki ukanakatak luratawa. Jesucristojj akham sasaw Awkipar säna: “Yupaychsmaw Awkiy [...]. Jumajj akanakjj wali yatiñaninakatsa ukhamaraki amuytʼaninakampitsa imanttawa, ukatsti jukʼa yatiñan jaqenakaruw uñachtʼaytajja” sasa (Lucas 10:21). Suma chuymanïpki ukanakakiw Biblia sum amuyapjjaspa. ‘Wali yatiñaninakasa’ ‘amuytʼaninakasa’ jachʼa jachʼa tukupjjatapatwa Biblia jan sum amuyapkiti.  Ukampis ‘jukʼa yatiñani’ jaqenakaw Diosan cheqa arunakap sum amuyapjjaspa. Cheqasa Bibliajj muspharkaña lurtʼatawa.

2. Bibliajja cheqpachapuni amuyañ munapki ukanakatak luratawa. Jesusajja, yatichäwinakap sum amuyapjjañapatakejj mä yanapiriw munasini sasaw säna. “Awkejjaw nayan sutejjaru qollan ajayu khitanini, jumanakar yanapañapataki, ukhamarak chuymachañapataki. Jupaw jumanakar taqe kuns yatichapjjätam” sasaw Jesusajj qhanañchäna (Juan 14:26). Ukhamasti Diosaw qollan ajayupampi, mä arunjja chʼamapampi jaqenakar Biblia sum amuyapjjañapatak yanaptʼi. Ukhamarusa janiw khitinakatï Jupar jan confiyapki ukanakar Diosajj yanaptʼkiti, ukatwa Biblia jan sum amuyapkaspati. Bibliat yatjjatañ munapki ukanakarojja, Diosan servirinakap toqew qollan ajayojj yanaptʼaraki (Hechos 8:26-35).

3. Horasäki ukhakiw jaqenakajj Biblian yaqhep textonakap amuyapjjaspa. Amuytʼañataki, Daniel profetarojja jutïr urunakat parlir mä profecía Diosajj qellqayäna. Mä angelajj akham sänwa: “Daniel, jumajj sarañamjja saraskakim, taqe akanakasti jan khitiru yatiyasa imatäñapawa, tukuya horasajj purinkani ukkhakama” sasa. Jaqenakajj walja maranakaw Daniel libro liyipjjäna, ukampis janiw amuyapkänti. Daniel profetas janirakiw qellqkäna uka arunak amuykänti, ukatwa akham säna: “Nayasti istʼaskarakïyätwa kuntejj siskäna ukjja, ukampisa janiw amuytʼkäyätti” sasa. Ukhamasti kunapachas uka profeciajj qhanstañapäna ukjja Diosakiw amtaspäna, mä arunjja kunapachatï horasajj puriniñapäkäna ukhakiw jaqenakajj Danielan profeciap amuyapjjañapäna. Angelajj akham saskakïnwa: “Daniel, jumajj sarañamjja saraskakim, taqe akanakasti jan khitiru yatiyasa imatäñapawa, tukuya horasajj purinkani ukkhakama” sasa. ¿Khitinakakis uka arunak amuyapjjaspäna? Ñanqha jaqenakajj janiw amuyapkaniti, yatiñani jaqenakakiw taqe ukanak amuyapjjani sasaw Bibliajj qhanañchi (Daniel 12:4, 8-10). Ukhamasti horasaparuw Diosajj Biblian yaqhep textonakap qhanañchañapäna.

Jehová Diosan Testigonakapajja, Biblian yaqhep textonakap qhanañchasajj pantjasiwayapjjaraktwa. Ukampis Diosajj Biblian mä textop horasapar qhanañchäna ukhajja, jankʼakiw uka qhanañchatarjam askichawayapjjta. Ukham lurasajj Jesusan apostolonakapatwa yateqasipjjta, jupanakajj humilde chuymampiw pantjasitanakapjja Jesusan arunakaparjam askichapjjäna (Hechos 1:6, 7).

Qalltan parlaniwayktan uka jiskʼa imill wawajja, mä fábrica uñjasajj qenayanak lurir fabricäpachawa sasin amuyasajj pantjasiskänwa. Kuntï Bibliajj yatichki ukajja taqenitak wali wakiskiriwa, jiwas pachpa liyisakejj janiw amuyksnati, ukatwa maynimpi yanaptʼayasiñajj wakisi. Ukham lurañamatakiw chʼamañchtʼapjjsma. Ukhamasti khitinakatï yanaptʼayasiñ amtampi Biblia liyipki, Diosan qollan ajayupaw Biblia sum amuyañatak yanapistani sasin confiyapki, arup sum amuyañaswa Diosajj muni sasin sapki ukanakamp yanaptʼayasim. Jumatï munasmajja, Jehová Diosan Testigonakapaw yanaptʼapjjeristam, jan ukajj Internetan jw.org cheqan utjki uka qellqatanakwa liytʼasma. Bibliajj akham siwa: “Chʼikhi chuymanïñarusa [...] thaqarakïta ukkhajja, yatïtawa Tatitur ajjsaraña; ¡jikjjatarakïtawa kunäkitejj Diosar uñtʼañajja uka!” sasa (Proverbios 2:3-5).