Thomas Williams (1) a sat chachampiw aka sarnaqäwejj qallti, jupajj Horncastle (Inglaterra) cheqanwa nasiwayi, enero 20, 1815 marana. Pä maranïskän ukhaw mamitapajj jiwjjäna ukat John sat awkipakiw kimsa jilanakapampir uywjjäna. Awkipajj carpinterjam irnaqañwa yatichäna, ukampis jupajj yaqhanak lurañ munäna.

Uka tiemponjja, John Wesley sat chachajj Inglaterra markanwa, Anglicana Iglesiat yaqhaqtjjasajj Sociedad de Metodistas sat grupo uñstayäna. Ukajj Biblia sapak yatjjatañaru ukat yatiyañaruw chʼamañchäna. Wesley chachan yatichäwinakapajj ratukiw taqewjan yatiyasjjäna, Williams chachan familiapajj ukaruw tukuwayjjarakïna. Thomasejj John Wesley chachan arkiripäjjänwa, Pacífico sur toqen misionerjam irnaqañatakiw mayirakïna. Casarasjjasajja, julio, 1840 maranwa Mary (2) esposapampejj Fiyi sat markankir Lakeba b sat islar puripjjäna, ukanjja jaqe manqʼerinakaw utjäna.

Jupanakatakejj Fiyi markan jakañajj chʼamänwa, walja horanakaw irnaqapjjañapäna ukat juntʼurakïnwa. Yatiyäpkän uksa, janiw jila partejj istʼañ munapkänti. Ukanjja, jaqe manqʼerinaka, viudanakar jaychkatiri, wawanakar jiwayiri ukat tribunak pura chʼajjwasin jiwarayasir uñjapjjäna. Esposapasa, John sat jilïr wawapasa niyapuniw usuntasin jiwapjjäna. Thomas chachajja, akham sasaw 1843 maran qellqäna: “Llakimpejj wal aynachtʼayäta. [...] Janipuniw kuns kamachtʼirjamakäyätti” sasa. Ukampis Thomasimpi Marympejj Jehová Diosapat janiw armasipkänti.

Uka tiemponwa, Thomasejj carpinterjam irnaqañ yatisajj Europa toqenkir utanakjam Fiyi markan utachasïna. Uka utan pisopajja, janiw oraqer taqjjatatakänti, jan sinti juntʼuñapatakiw ukham luräna. Uk uñjasajja, uka markankirinakajj muspharapjjänwa. Ukampis uta lurañ janïr tukuykäna ukhaw payïr wawapajj nasjjäna, jupajj Thomas Whitton Williams (3) satänwa. Jupaw awkijan achachilapan achachilapäna.

Ukat 1843 maranwa Thomas (awki) chachajj Bibliankir Juan qellqata fiyiano arur jaqokipasiñapataki yanaptʼäna, ukajj jupatakejj wali chʼamänwa. c Antisas jaqenakat yatjjatañatakiw khusäna, jupajj jaqenakat sum amuyirïna. 1800 maranakan jakir Fiyi markankirinakatwa mä libro qellqäna (Fiji and the Fijians, 1858).

 Fiyi markan 13 mara wal irnaqasajja, Thomasejj usuntjjänwa ukat familiapampiw Australiar sarjjäna. Ukanjja, Diosat yatiyaskakïnwa, jaqenakas wal respetapjjarakïna. 1891 maranwa Victoria sat markankir Ballarat sat cheqan jiwjjäna.

Thomas Whitton ukat Phoebe (4) sat esposapampejj wawanakapampiw Perth (Australia Occidental) sat cheqar 1883 maran sarjjapjjäna. Arthur Bakewell (5) Williams sat payïr yoqapajja, ukhajj 9 maranikïskänwa.

Arthur chachajja, 22 maranïkän ukhaw Kalgoorlie sat jiskʼa markan trabajo thaqer saräna, ukajj Perth markat 600 kilometronak inti jalsu toqer sarañankiwa, uka markajj qori minampiw nayrar sartaskäna. Ukanarakwa Bibliat Yatjjatirinakan (jichhajj Jehová Diosan Testigonakapa) yaqhep qellqatanakapsa liytʼarakïna. Ukat Zionʼs Watch Tower (jichhajj Yatiyañataki) sat revista katoqañatakis qellqayasirakïnwa. Ukanakat yatjjatasajja, yaqhanakaruw yatiyäna ukat Bibliat yatjjatañatakis utapan tantachäna. Ukhamatwa Testigonakajj Australia Occidental toqen Diosan arunakap yatiyañ qalltapjjäna.

Jupajj yateqkäna ukjja, familiaparus yatiyarakïnwa. Awkipajj yanaptʼänwa, ukampis qhepat jiwjjänwa. Mamitapasa, Violet, Mary sat kullakanakapasa, Bibliat Yatjjatirinakaruw tukjjäna. Yamas Violet sat kullakapajj precursorjamaw irnaqtʼäna. Arthur jilapajj jupat akham sänwa: “Australia Occidental toqenjja, jupakiw precursorjam wali kusisita sum irnaqtʼawayäna” sasa. Inas jan ukhamapunïkchïnti, ukampis Violetajj jupjjar jutir Williams familiarojj jupjam irnaqtʼapjjañapatakiw yanaptʼawayäna.

Qhepatjja, Arthur chachajj casarasjjänwa ukat Donnybrook sat markaruw sarjjäna, ukajj Australia Occidental aynach toqenkiwa. Ukanjja, mojjsa achunak yapuchapjje. Jupajj 1914 marat parlir profecianakatwa parlirïna, d ukatwa vecinonakapajj 1914 marat parlir loqhe jaqe sasin sutichapjjäna. Nayrïri Jachʼa Chʼajjwäwi qalltjjäna ukhatjja, janiw ukham sawkasjjapjjänti. Jupajj tiendapanjja, vitrinaruw Bibliat apstʼat qellqatanak uskurïna, alasirinakaparus Bibliat parlirïna. Ukat ‘khitinakatï Trinidad yatichäwejj cheqawa sasin Bibliampi uñachtʼaykani ukarojj 100 libra qollqenakaw churasini’ sasaw vitrinapar mä qellqat uchirïna. Ukampis janiw khitis qhanañchkänti. Trinidad yatichäwejj janiw Bibliarjamäkiti, ukatwa jupajj ukar jan creykänti.

Donnybrook sat markanjja, Arthur Bakewell Williams utapajj Bibliat yatjjatañ utajjänwa, ukat ukanwa taman tantachäwinakapas apasjjarakïna. Qhepatjja, mä Tantachasiñ Utwa Australia  Occidental toqen utachäna, ukaw uka markankir Jehová Diosan Testigonakapan nayrïr Tantachasiñ Utapäna. Niya 80 maranëjjchïnsa, ternsa corbatsa uchasiskakïnwa, Doll sat caballopatsa sarnaqaskakïnwa ukat Donnybrook markpachanwa Diosan arunakap yatiyäna.

Jupajj wawanakapatakejj yateqaskayänwa, pacienciani, kusisita ukhamänwa. Phuchapajja, Florence (6) satänwa jupajj India markan misionerjamaw irnaqäna, Arthur Lindsay (7) ukat Thomas sat yoqanakapajj jupjamarakiw irpir chuymanjam walja maranak irnaqtʼawayapjje.

Arthur Lindsay Williams achachilajan achachilapajj munasiri, wajjtʼasiri ukhamänwa. Mayninakatakejj tiempo apstʼasipunirïnwa ukat taqeniruw respetompi uñjirïna. Hacha apnaqañsa sum yatirakïna, 12 maranakaw tronconak khuchhuñ atiptʼasïwinakan 18 kuti atipäna.

Arthur Lindsay chachatakejj janiw Ronald (8) sat pä marani wawapan mä jiskʼa manzan alir hachampi jisktatapajj askïkänti. Mamapajj jan jiwsuñapatakejj chʼoqantänwa. Qhepatjja, mojjsa manzananakwa achoqjjäna ukat Lady Williams sasaw sutichapjjäna. Uka qhepatwa wali uñtʼat Cripps Pink sat manzanajj uñstaskäna.

Ronald achachilajajj casarasjjasajja, Jehová Diosan Testigonakapajj Tantachasiñ Utanak lurapki, ukanwa esposapampejj Australia ukat Salomón sat islanakan walja maranaka yanaptʼawayapjje. Jichhajj achachilajajj niya 80 maranëjjewa, ukampis irpir chuymanjamaw irnaqtʼaski ukat Australia Occidental toqenwa Tantachasiñ Utanak lurañsa, askichañsa yanaptʼaskaraki.

Geoffrey (9) awkijasa, Janice (10) mamitajas Diosar loqtañatakiw Katherine (11) kullakajampir nayampir (12) yatichawayapjjetu. 13 maraniruw Diosar serviñ mä jachʼa tantachäwit kuttʼanjjas amtawayta. Ukanjja, Oraqpachan Jilïr Irpirinaka taypinkir John E. Barr sat jilataw mä suma arstʼäwipan waynanakar akham säna: “Kunatï utjapktam ukjja, jan ina chʼusar aptʼapjjamti: Jehová Diosar uñtʼapjjam ukat Jupar munasipjjarakim” sasa. Pä mara qhepatjja, precursorjamaw loqtjjayäta.

Jichhajj Chloe esposajampi, nayampejj Tom Price sat markanwa Diosat yatiyasipkta, ukajj Australia Occidental toqenkiwa. Kunatï jakañatak munaski ukanak jikjjatañatakejja, janiw uru jornälpach irnaqapkti. Awk taykajasa, kullakajasa, Andrew sat esposopasa, Port Hedland markanwa precursorjam irnaqasipki. Uka markajj Tom Price markat 420 kilometronak alay toqenkiwa. Awkijampejj irpir chuymanjamaw tamanakajan irnaqasipkta.

Williams familiatjja, waljaniw Diosar loqtawayapjjta: Thomas Williams jupat qalltasin nayakama. Uka herencia katoqasajj wali kusisitätwa.