Julio: Kamisaraki Ernesto, jumamp jikisiñajj wali askipuniwa. Biblia toqet sapa semana jumamp parlir jutañajj sumapuniwa. * ¿Kunjamakïsktasa?

Ernesto: Walikïsktwa, yuspära.

Julio: Walikjjaya. Pasïrinjja, Diosan Reinopajj 1914 maranwa apnaqañ qalltjje sasajj kunatsa Jehová Diosan Qhanañchirinakapajj yatichapjjta, uka toqet parltʼawaytanjja. * Ukat Daniel 4 jaljajj kunjamsa ukham amuyañatakejj yanaptʼistu uks yatjjatawayaraktanwa ¿uk amtasktati?

Ernesto: Jïsa, Nabucodonosor reyin samkapat yatjjatawaytanjja.

Julio: Ukhamawa. Jupajj alajjpachkam purir mä jachʼa qoqampiw samkasïna. Ukansti, Diosan mä angelaparuw istʼatayna uka qoqa khuchhunukupjjam siri. Uka qoqatjja, saphipamp ukat troncopat mä jiskʼakiw jiltʼjjäna. “Paqallqo mara” pasatatsti uka qoqajj mayampiw jiltjjäna. * Uka profeciajj pä kutiw phoqasïna, uksa yateqawayaraktanwa. Kunjamsa nayraqat phoqasïna ¿uk amtastati?

Ernesto: Nabucodonosor reyejj paqallq maranak loqher tukjjäna ukhajjay phoqasïnjja ¿janicha?

Julio: Jïsa, ukhamäskapuniwa. Loqheruw tukjjäna ukat janiw reyëjjänti. Ukat Diosajj paqallq mara aka Oraqjjar jan apnaqjjäna ukhaw uka profeciajj wasitampi phoqasirakïna. Uka paqallq maranakajja, Jerusalén markajj 607 nayra pacha maran tʼunjatäkän ukhaw qalltäna. Ukhatjja, Diosan uttʼayata reyinakajj janiw aka Oraqen utj-jjänti. Uka maranak phoqasjjäna ukhajja, Diosajj mä machaq reyiruw alajjpachan uttʼayañapäna. Mä arunjja, paqallq maranak phoqasjjepan Diosan Reinopaw apnaqjjañapäna. Akhakamajja, kunapachatsa uka maranakajj jakhuñ qalltasiwayi ukjja yateqjjtanwa. Jichhajj kuna maransa Diosan Reinopajj apnaqañ qalltjjäna uk yatiñatakejj qawqha maranakas pasañapäna uk yatiñasawa. ¿Amuyasktati?

Ernesto: Jïsa, amuyasktwa. Pasïrin yateqawayktan uk jukʼat jukʼat amtasktwa.

Julio: Waliki. “Paqallqo marajj” qawqha tiempönsa uk jichhajj uñjañäni. Taqpach amtañatakejj wasitatwa nayas uñakiptʼaniwayta. Ukanak jumar sum qhanañchañatakiw chʼamachasï.

Ernesto: Mirä amp suma.

Julio: Nayrïr kutinjja, uka profeciajj Nabucodonosor reyimpiw phoqasïna, ukapachanjja paqallqo  maranak siski ukajja cheqpacha paqallq maranakänwa. Ukampis payïrinsti, mä arunjja, Diosan Reinopampi phoqaskän ukansti, jukʼamp walja maranakänwa.

Ernesto: ¿Kunjamatarak uk yattasti?

Julio: Qalltañataki, 607 nayra pacha maran Jerusalén markajj tʼunjaskäna ukhaw uka paqallq maranakajj jaktʼañ qalltasïna. Uka marat paqallq maranak jaktʼsna ukajja, 600 nayra pacha mararuw pursna. Uka maranjja, Diosan Reinop toqet janiw kunas phoqaskänti. Ukampis kunjamtï yateqaniwayktanjja, walja maranak qhepat Jesusajj aka Oraqer jutkäna ukhajja, ‘paqallq maranakajj janïraw tukuskiti’ sasaw säna.

Ernesto: Ah, jïsa uk amtastwa.

Julio: Ukhamajj uka payïr phoqasïwipanjja, paqallq maranakajj janiw 12 phajjsin maranakakïkiti, jan ukasti jukʼampi walja maranakawa.

Ernesto: ¿Jukʼamp walja maranaka? ¿Qawqha maranakarakisti?

Julio: Paqallqo maranakat parlki uk sum amuytʼañatakejja, Daniel qellqatan utjki uka profeciar uñtasitaw Apocalipsis qellqatan utjaraki, uka profecianjja, kimsa mara chikatanejj 1.260 urunakawa sasaw qhanañchi. * Ukhamajja, paqallqo maranakajj 2.520 urunakäjjaspawa. ¿Akhakamajj amuyasiskiti?

Ernesto: Jïsa, ukampis jumanakajj kunatsa 1914 maranwa Diosan Reinopajj apnaqañ qalltjje sasin yatichapjjta uk janïraw sum amuykti.

Julio: Uk jichhajj yatjjatañäni. Yaqhep profecianakanjja mä urojj mä maramp sasiwa. * Ukhamajj paqallq maranakajja, mä arunjja, 2.520 urunakajj 2.520 maranakäspawa. Ukat 2.520 maranak 607 nayra pacha marat, jakhuñ qalltsna ukhajja, 1914 mararuw pursna. * Ukatwa, uka paqallqo maranakajj 1914 maran tukusjjäna, ukat Diosan Reinopanjja Jesusaw Reyjam uttʼayatäjjäna sasin sistanjja. Ukat uka maranarakwa Bibliajj qhepa urunakat parlki uka profeciajj phoqasiñ qalltjjarakïna.

Ernesto: Mirä ampsuma, uka toqet sumpacha qhanañchtʼita.

Julio: Mateo 24:7 qellqatarjamajja, Jesusajj alajjpachan apnaqañ qalltañapäna ukhajj kunanakas pasañapäna ukjja, akham sasaw jupajj satayna: “Mä jachʼa markajj yaqha jachʼa marka contraw nuwasini, mä markasti yaqha marka contrarakiw sartani, ukapachaw manqʼat pistʼañajj utjani, [...] oraq khatatinakas walja cheqanakana” sasa. Amuytati, manqʼat pistʼañanaka ukat Oraq khatatinakaw utjani sasaw Jesusajj säna. Uka marat jichhakamajj ukanakapuniw aka Oraqen pasaski ¿janicha?

Ernesto: Jïsa, ukhamäskapuniwa.

Julio: Guerranakas utjarakiniwa sasaw sarakïna. Ukat Apocalipsis qellqatanjja, guerranakajj oraqpachanwa utjani sasaw qhanañcharakïna. * ¿Kuna maransa Nayrïr Jachʼa Chʼajjwäwejj qalltäna uk amttati?

Ernesto: 1914 marana. Jesusajj apnaqañ qalltjjew sapktas uka marana. Janipuniw ukhamätap amuyirïkti.

Julio: Jïsa. Paqallq maranakat parlki uka profeciampi ukat qhepa urunakat parlki uka profeciampejj mä pachpakïtap amuyañäni ukhajja,  kuntï parlaniwaytan uk amuyañajj janiw chʼamäjjaniti. Jesusajj 1914 maranwa apnaqañ qalltjjäna, ukat uka maratarakwa qhepa urunakan jakjjtanjja sasaw Jehová Diosan Qhanañchirinakapajj amuyapjjta. *

Ernesto: Taqe ukanak amuyañajj chʼamakiwa.

Julio: Ukhamäpachawa. Nayar qalltan ukanakat parlapkitäna ukhajj amuyañajj chʼamarakïnwa. 1914 marajj janis Biblian uñstkchejja, yateqawayktan ukajj sumpach amuytʼañatakejj yanaptʼawaypachätamwa. Walja toqenakat yatjjatasaw Jesusajj 1914 maran apnaqañ qalltjje sasin sapjjta. Ukat kuntï creyipkta ukajj Bibliarjamapunïtap amuyañatakis yanaptʼawaypachätamwa.

Ernesto: Jïsa, yanaptʼawayituwa. Ukampis janiw jumajj “ukhamäpachawa”, “nayajj ukhamak amuyta” sasinak siskistati, jan ukasti Bibliampipuniw kuns qhanañchtʼistajja, ukaw nayatakejj wali askejja. Ukampis ¿kunatsa ukanak amuyañajj chʼamäpacha? Jesusajj 1914 maranwa Reyjam apnaqjjani sasin ¿kunatsa Diosajj cheqak jan siskpachäna?

Julio: Ukajj suma jisktʼawa Ernesto. Biblianjja walja toqenakatwa jan cheqaki qhanañchaskiti. ¿Kunatsa Diosajj ukham lurawaypachäna? Mä arunjja, ¿kunatsa amuyañatakejj chʼamachasiñasa? Uka toqet mä semanan parltʼsna ukajj ¿walikïspati?

Ernesto: Jïsa, walikïspawa. Suyämawa.