Leipzig sat marka jakʼanwa jilsuwayta, nayra República Democrática Alemana markana, ukajj Polonia ukat República Checa markanak qorpa jakʼankiwa. Sojjta maranëjjayät ukhajja, tatajan trabajop laykojj Brasilaruw jakasir sarjjapjjta, qhepatsti Ecuador markaruraki.

Ukat 14 maranerojj, escuelan yateqañäjatakiw awk taykajajj Alemania markar wasitamp khitapjjetu. Niyakejjay sapakëjjchiyätjja, amtajarukiw kuns lurayäta. Kunanaktï lurkta ukajj mayninakatak walïskpas janisa, janiw llakisirïkti.

Awk taykäjajj 17 maranëjjayät ukhaw Alemania markar kuttʼanjjapjje. Qalltanjja jupanakampiw jakaskäyäta, ukampis amtajaruk kuns lurañ munirïtaj laykojj jupanakar istʼañajj chʼamäjjänwa, ukatwa 18 maranerojj utat sarjjta.

Jakäwijan janjamakiw kunas walïkänti, ukatwa kusisit jakasiñ thaqayäta. Ukhamïpansti, kunayman gruponakata, organizacionanakatwa yatjjatta. Ukatjja, aka suma Oraqe jaqenakan janïr tukjkipan sum uñtʼañwa amtta.

Mä moto alasisaw Alemaniat África toqeru sarjjta. Ukampis mä jukʼatjja, moto askichañatakiw Europa toqer kuttʼanta. Askichtʼjjasajja, Portugal markankir mä qota lakar puriñkamaw viajta. Ukar purisajj moto jaytjjañäjaw wakisispa, antisas barcot viajasaw aka oraqpach muytä sasaw lupʼjjäyäta.

Océano Atlántico jachʼa lamar qota pasañatak wakichasisipkän uka wayn tawaqonakamp chikaw sarjjta. Laurie sat mä tawaqow ukankatayna, qhepatjja jupaw esposajäjje. Caribe uka islakamaw puripjjta, Puerto Rico markan mä jukʼa qamartʼasajja, Europa toqeruw kutʼjjapjjta. Lauriempi nayampejj velomp uchat barco thaqapjjäyäta ukat uka barco pachpajj jakasiñatakjam luratäñapwa munapjjäyäta. Ukampis kimsa phajjsi thaqasajja, janiw kuntï amtkapjjäyät uk phoqjjapjjti, alemán soldadonakaw ejerciton serviñäjatak katuntjjapjjetu.

Ukat 15 phajjsinakaw uka ejercitomp chikäskayäta, uka tiemponwa Lauriempejj casarasjjapjjta. Ukampis oraqpach  uñtʼañ munasipkakïyätwa. Janïr katuntapkitu ukhaw mä lancha alasipjjäyäta, ukat ukjja ejercitonkkasaw velomp uchat barcoru tukuyasipkäyäta. Nanakajj uka barcon jakasiña, ukat aka suma Oraqen viajaskakiñ munapjjäyäta. Ukampis uka ejercitot mistjjayäta ukat janïr barco sum tukuyapkayät ukhaw Jehová Diosan Qhanañchirinakapampejj parlapjjta ukat Bibliat yateqañ qalltapjjta.

Taqe kunsa sums lurkirista ukhamwa Bibliat yateqañ qalltkayät ukhajj amuyasiyäta. Kunattejj Laurie sat warmijampejj casaratajjayätwa ukat cigarro pitañsa jaytjjarakiyätwa (Efesios 5:5). Ukampis Diosan taqe muspharkañ luratanakap uñjañataki viajasin oraqpach muytañajja, mä suma amtawïkaspas ukham amuyayäta.

Cheqas waljaw jaytañajäskäna. Jachʼa jachʼa tukuri, amtajaruki kuns lurañ muniri ukhamakïskayätwa. Kunanaktï lurañ yatkta jan ukajj jikjjatkta ukanakatsa jachʼañchasiskakiyätwa. Taqe kunat sipansa naya pachpatakikiw llakisiskayäta.

Mä urojja, Jesusan Wali Uñtʼat Arstʼäwipwa Bibliat liytʼta (Mateo 5-7 jaljakama). Khitinakatejj awtjayasipki, pharjayasipki ukanakaw kusisitäpjje sasin Jesusajj siskäna ukjja, janiw qalltan amuykayätti (Mateo 5:6). Ukampis ¿kunjamsa awtjayasirinakasa, pharjayasirinakas kusisitäpjjaspa? Bibliat jukʼampi yateqjjasaw taqeni ajay toqet yanaptʼa munatas amuyjjayäta, ukampis yanaptʼa katoqañatakejj nayraqat yanaptʼa munataswa amuyasiñasa. Uka toqetjja, Jesusajj akham sänwa: “Kusisiñanïpjjew khitinakatejj ajay toqen aynachtʼatäpjjatap amuyasipjje ukanakajja” sasa (Mateo 5:3).

Lauriempi nayampejj Alemania markanwa Bibliat yateqañ qalltapjjta, ukampis Francia markaruw sarjjapjjta, uka khepatsti Italia markaruraki. Jehová Diosan Qhanañchirinakapajj kawkhans utjapunïnwa. Jupanakkamajj munasiñampiw uñjasipjje ukat mayachtʼataw jakasipjjaraki, ukaw chuymajar purtʼitäna. Cheqapuniw oraqpachan mä wawaki mayachtʼat jakasipjje (Juan 13:34, 35). Ukat tiempompejja, bautisasjjapjjtwa.

Jehová Diosan Qhanañchiripajjchiyätsa, suma jaqëñatakejj chʼamachasiskakiñäjänwa. Lauriempi nayampejj qota laknämwa África toqeru viajapjjta ukat Atlántico jachʼa lamar qota pasasajj Estados Unidos markakamaw puripjjta. Uka jachʼa lamar qota taypin mä jiskʼa barcot esposajamp viajkasaw Diosajj jiwasanakat sipan kunja chʼamanisa uk amuytatasta. Ukanjja, tiemponiyätwa (jachʼa lamar qotanjja, janiw lurañanakajj walja utjkiti), ukatwa Biblia wal leyirïta. Jesusan sarnaqäwipaw jukʼamp yanaptʼawayitu. Jupajj jan juchani ukat kunjam jaqëkäntï ukas muspharkañäkchïnjja, janipuniw jachʼañchasirïkänti. Jupa pachpatak llakisiñat sipansa, Awkiparuw jachʼañchirïna.

Jesusat lupʼisajja, taqe kunat sipansa Diosan Reinop nayrar uchañäj wakisitap amuyasiyäta (Mateo 6:33). Estados Unidos markan barcot saraqjjasajja, barco wiñayatak anclampi uchjjaña ukat Diosar jukʼamp serviñwa amtapjjta.

Nayrajj nä pachpatak llakisirikäyät ukhajja, kuntï lurañ amtirïkta ukanakat pächasirïtwa. Ukampis jichhajj kunatï confiykayäki ukwa jikjjatawayta (Isaías 48:17, 18). Mä amtampiw jakasjjarakta: Diosan munañap luraña ukat jaqenakar Diosar uñtʼapjjañapatak yanaptʼaña.

Biblian ewjjtʼanakapajj esposajamp sum jakasiñatakis yanaptʼawayarakituwa. Jehová Diosajj mä suma imill wawsa, bendicirakituwa, jupajj ukhamarakiw Diosar uñtʼawayjje ukat munasiraki.

Jan waltʼäwinakan uñjasiwayapjjtwa, ukampis Jehová Diosajj janipuniw jaytapkituti. Jan aynachtʼañataki chʼamachasiña ukat Diosar confiyañwa amtawayapjjta (Proverbios 3:5, 6).