Diosajj ajayuwa ukat janiw uñjksnati. Jupaw alajjpachsa, aka Oraqsa ukat taqe kunatï ukan utjki ukanaksa lurawayi. Diosarojj janiw khitis lurawaykiti, janiw qalltanïkiti ni tukuyanïkisa (Salmo 90:2). Jaqenakajj Jupar thaqhapjjaspa ukat kunatï Jupat cheqäki uk yatjjatapjjaspa ukwa Jupajj muni. (Hechos 17:24-27 liytʼäta.)

Diosajj sutiniwa. Ukat kunjam Diosäkiti ukjja, luratanakapanwa mä qawqhanak yateqsna (Romanos 1:20). Ukat jukʼamp sum uñtʼañatakejja, Bibliatwa yatjjatañasa. Ukhamatwa, kunjam Diosäkiti uk yatiñäni. (Salmo 103:7-10 liytʼäta.)

Ina chʼusat tʼaqhesiñ utjki uk Jehová Diosajj uñisiwa ukat Jupar uñtasitwa jaqenakar lurawayi (Deuteronomio 25:16). Ukatwa jiwasanakat jila partejj ina chʼusat tʼaqhesir uñjktan uk uñistanjja. Diosajj janiw taqe ukanakat juchanïkiti. Kunattejj jaqenakarojj jupanak pachpa kunatï walïki ukat jan walïki uk ajllipjjañapatakiw lurawayi. Ukampis jila partejj kunatï jan walïki ukwa lurapjje. Uk uñjasajja, Diosajj wal chuymap usuyasi. (Génesis 6:5, 6 ukat Deuteronomio 32:4, 5 liytʼäta.)

Kunatï cheqäki ukwa Jehová Diosajj muni, ukatwa jan walinakjja jan ukhamak wiñayatak uñchʼukkaniti (Salmo 37:28, 29). Diosajj niyaw ina chʼusat tʼaqhesiñanak chhaqtayjjani sasaw Bibliajj qhanañchistu. (2 Pedro 3:7-9, 13 liytʼäta.)