Maynitï cheqpach kusisitäñ munchi ukhajja, ajay toqet aynachtʼatätap amuyasiñapawa, sasaw amuyunak toqet yatjjattʼatanakajj sapjje. Cheqas ukajj ukhamapunïskiwa, kunattejj jaqenakajja, wali askinakwa lurañ munapjje. Ukatwa ajay toqet jan aynachtʼat jikjjatasiñatakejj tiemponïpki ukhajja, kunayman qoqanakata, animalanakata yatjjatapjje, ukat music tokañsa jan ukajj yaqha ukhamanakatsa yatjjatapjjarakiwa. Ukampis jila partejj taqe ukanak lurasajj janiw kusisiñ jikjjatapkiti.

Jaqenakajj wawatpachaw ajay toqet chʼamañchtʼatäpjjañap wakisi, ukjja Biblia liyirinakajj sum amuyapjje. Cheqas Diosaw nayrïr chacha warmirojj luratayna ukat jupanakarojj parlapunirïnwa, ukaw Jupamp sum apasiñatak yanaptʼäna sasaw Génesis libron nayrïr jaljanakapan qhanañchi (Génesis 3:8-10). Jaqenakajj janiw Diosat jayarstʼat jakañapatak luratäpkiti, jan ukasti Jupar thaqhapjjañapatak luratäpjjewa. Bibliajj walja kutiw uka toqet parli.

Jesusajj akham sänwa: “Kusisiñanïpjjew khitinakatejj ajay toqen aynachtʼatäpjjatap amuyasipjje ukanakajja” sasa (Mateo 5:3). Uka arunakarjamajja, kusisit jakasiñatakejj ajay toqet chʼamañchtʼatäñaw wakisi. ¿Kunjamsa uk lursna? Jesusajj akham qhanañchäna: “Janiw jaqejj tʼantʼa sapampikiti jakkani, jan ukasti taqe kuntejj Diosajj siski uka arunakampiw jakarakini” sasa (Mateo 4:4). Jïsa, Jehová Diosajj kuntï siski, mä arunjja, kuna amuyunakapatï ukat mandamientonakapatï Biblian qellqatäki ukanakaw kusisit jakasiñatak yanaptʼistani. Jichhajj ukanakat kimsa yatjjatañäni.

Jichhürunakanjja, walja yatjjattʼatanakaw aka toqenakat ewjjtʼañatak jankʼakïpjje: jaqenak pura sum apasiñata, munasiñata, familiata, jan waltʼäwinak askichañata, kusisiñ jikjjatañata ukat kunatsa jakastan ukanakata. Ukampis taqe ukanakatjja Jehová Diosakiw suma ewjjtʼanak churistaspa, kunattejj Jupaw lurawayistu.

Mä computadora jan ukajj fotonak apsuñatak mä maquins alaskasma ukham amuytʼañäni. Luririnakajj  kunjamsa ukanakajj apnaqasiñapa uka toqet qhanañchir qellqata (manual) apayanipjje ukajj ¿wali askejjaya? Bibliajj uka qellqatar uñtasitarakiwa, Diosaw Luririsajja, Jupaw kunjamatsa kusisit jakassna uk yatichañatak Biblia churistu. Uka “qellqataw” kuna amtampis luratätan ukat kunjamsa askinak jikjjatsna ukanak sum qhanañchi.

Aparatonak sum apnaqañatak utjki uka suma qellqatjamaw Bibliajj kunanakas jakäwisan jan waltʼayistaspa ukanakat sum amuyasiñasatak qhanañchistu. Jaqenakan ewjjanakaparjam sarnaqañajj janiw chʼamjamäkaspati. Ukampis sum jakasiñataki ukat askinak jikjjatañatakejj ¿janit ‘Luririsan’ ewjjanakap istʼañajj wakiskaspa?

Jehová Diosajj sum jakasiñatakiw ewjjtʼistu, ukampis janiw munkir jan munkir uka ewjjtʼanakarjam sarnaqaykistuti. Antisas munasiñata ukat yanaptʼañ munasaw akham suma arunakampi ewjjtʼistu: “Nayätwa [Jehová] Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma. Nayan arunakajjaru istʼasamäna ukapachajj, waltʼañamajj mä jawirar uñtataw jiljjatasapäna, atipjañamasa jachʼa qotan mathapinakapar [jan ukajj oladanakapar] uñtataw jilarakisapäna” sasa (Isaías 48:17, 18). Ukhamajj Diosan ewjjanakaparjam sarnaqañäni ukhajja, sumwa jakasiñäni. Cheqas kusisita jakasiñatakejj Diosan yanaptʼap munapuntanwa.

Diosan yanaptʼapajj janiw wakiskiti jan ukajj Diosajj janiw utjkiti sasaw yaqhepajj sapjje. Mä munasir Diosatï utjaspa ukhajja, janiw jan walinakajj utjkaspati sasaw amuyapjje. Ukat akhamwa jisktʼasipjjaraki: “¿Kunatsa suma jaqenakajj tʼaqhesipjje? ¿Kunatsa walja wawanakajj usurnukstat nasipjje? ¿Kunatsa ina chʼusat tʼaqhesiñanakajj utji?” sasa. Ukham jisktʼasiñajj walikïskiwa, ukat qhanañchäwinakap yatiñajj wal yanaptʼistaspa. Ukampis taqe jan walinakat Diosar juchañchañat sipansa, kunjamsa uka toqet Bibliajj qhanañchi uk yatjjatañäni.

Génesis libron kimsïri jaljapanjja, kunjamsa Supayajj mä asiru toqnäma Adanampir Evampirojj Diosar jan istʼapjjañapatakejj yantʼäna, ukwa qhanañchi. Jupanakarojj aski ukat ñanqha yatiñ churir qoqat janiw manqʼapjjätati sasaw Diosajj säna. Ukampis Supayajj Evarojj akham sänwa: “Janiw jiwapkätati. Diosajj yatiwa, kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja, ukatsti Diosjamäpjjasmawa” sasa (Génesis 2:16, 17; 3:4, 5).

Ukham sasinjja, Jehová Diosajj kʼariskaspasa ukat jan wali apnaqerïkaspasa ukhamwa Supayajj amuyayäna. Ukat jaqenakajj Diosamp jan yanaptʼatajj jukʼamp sumaw jakasipjjaspa sasaw sarakïna. Ukampis ¿kunjamsa ukajj qhanstañapäna? Jehová Diosaw ukanakajj cheqati janicha uk sum  amuyasiñapatak tiempo churäna. Mä arunjja, jaqenakajj Diosamp jan yanaptʼatajj jukʼamp sumat jakasipjjaspa janicha uk uñachtʼayañatakiw Supayaru ukat jupamp chika saytʼasipkäna ukanakar tiempo churäna.

¿Jumajj kamsasmasa? ¿Jaqenakajj Diosan jan yanaptʼapampejj jukʼamp sumti jakasipjjaspa jan ukajj apnaqasipjjaspa? Akanakat amuytʼañäni: tʼaqhesiñasa, jan walinakasa, usuñanakasa, jiwañasa, guerranakasa, jaqe jiwayirinakasa, lunthatanakasa ukat yaqha ukham jan walinakasa, nayra maranakatpachaw jaqenakar tʼaqhesiyi. Ukat jaqenakajj janiw ukanak askichirjamäpkiti, Diosamp jan yanaptʼatajj jukʼampikiw aynachtʼasipki. Ukham tʼaqhesipjjatapat Diosajj janiw juchanïkiti, jan ukasti kunatsa tʼaqhesiñanakajj utji uka toqet Bibliajj akham siwa: ‘Jaqejj chʼamapampikiw jaqe masinakaparu jan walinak luri’ sasa (Eclesiastés 8:9).

Ukhamasti, Diosan yanaptʼap thaqhañajj kunja wakiskiris uk sum amuytanjja, ukampis janiw jisktʼanakasan qhanañchäwip jikjjatañ laykukejj Diosar thaqhañasäkiti, jan ukasti kunjamsa jan walinakar saykatsna uk yatiñatakiw thaqhañasa. ¿Kunanaksa Jupajj lurani?

Nayratpachwa jaqenakajj jan usuntasa, jan awkiptasa, jan taykaptas ukat jan jiwasa jakasiñ munapjjäna. Ukatakejj inamayapuniw tiempsa, qollqsa ukat chʼamsa aptʼasiwayapjje. Yaqhepajj kʼumara ukat wiñaya wayn tawaqokïskañataki qolla jikjjatañwa suyapjjäna, jichhürunakanjja ciencia toqerakiw uk jikjjatañ munapjje, ukampis inamayakiw wal chʼamachasiwayapjje.

Jaqenakajj kusisita jakasipjjaspa ukwa Diosajj qalltatpach munäna, ukat amtapajj janiw mayjtʼkiti (Génesis 1:27, 28; Isaías 45:18). Ukhamasti kuntï Diosajj lurañ amtawayki uk phoqapuniniwa (Isaías 55:10, 11). Adanamp Evampejja mä suma Paraíso aptʼawayapkäna ukar uñtasitwa Diosajj aka Oraqjja mä suma paraisor tukuyani sasaw Bibliajj qhanañchi. Ukat Apocalipsis libronjja akham sarakiwa: “Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” sasa (Apocalipsis 21:4). Taqe ukanak phoqañatakejj ¿kunsa Diosajj lurani? ¿Kunjamsa jiwasajj uka arunak phoqasiñapatak yanaptʼsna?

Diosan munañapajj phoqaspan sasin mayisipjjañapatakiw Jesucristojj arkirinakapar yatichäna. Walja jaqenakajj uka arunakarojj nanakan Awkejja sat oracionjam uñtʼapjje. Ukasti akham siwa: “Alajjpachankir nanakan Awkejja, sutimajj jachʼañchatäpan. Munañamampisti [jan ukajj Reinomampisti] apnaqapjjeta. Munañamasti luratäpan akapachanjja, kunjämatï alajjpachana luratäki ukhama” sasa (Mateo 6:9, 10). Ukhamajja, Diosajj Reinop toqew kuna jan walinaktï marka apnaqerinakajj utjayawayapki ukanak chhaqtayani, ukat Oraqsa mä suma Paraisoruw tukuyarakini  (Daniel 2:44; 2 Pedro 3:13). * Ukampis ukankañatakejj ¿kun lurañasas wakisispa?

Ukjja Jesusaw akham sasin qhanañchäna: “Aka wiñay jakañajj juma sapa cheqpach Diosar uñtʼañanwa utji, ukhamarak Jesucristoru kawkïrirutejj jumajj khitankta ukaru” sasa (Juan 17:3). Cheqas wiñay jakasiñatakejj Jehová Diosakiw yanaptʼistaspa. Ukhamajja ¿Diosan yanaptʼap munapuntanti? Jïsa.

Pä waranqa maranaka nayrajja, Atenas markan Areópago (colina de Marte) sat cheqan apóstol Pablojj akham sasaw yatjjatat griego jaqenakarojj Diosjjat säna: “Jupajjay taqe jiwasanakarojj jakañsa, samañsa, taqe kunanaksa churchistojja [...]. Jiwasanakajj Diosanwa jakapjjtanjja, sarnaqapjjaraktanjja, utjapjjaraktansa, kunjämtï jumanakan yaqhep qʼochu qellqerinakamajj sapjjaraki: ‘Diosan familiapätanwa’” sasa (Hechos 17:25, 28).

Pablon uka arunakapajj cheqapunïskiwa. Taqe chʼamani Luririsakiw samansa, manqʼañanaksa ukat umsa churistu. Diosatï ukanak jan churkistaspajja, janiw jakañajj utjkaspati. Ukampis walja jaqenakas Jupat armasipkchejja, ¿kunatsa Diosajj jupanakar yanaptʼaskakpacha? Pablojj akham sasaw qhanañchi: “Diosajj jaqenakan jupar thaqapjjañapatakiw ukham ukjj luri, inampis jupar kunjämats jikjjatapjjaspa. Ukampis Diosajj cheqpachana janiw jayankkiti sapaqat jiwasanakatjja” sasa (Hechos 17:27).

¿Diosar jukʼamp uñtʼañ munasmati? ¿Jupajj kuna amtanakanisa ukat jichhürunakansa jutïrinsa kusisit jakasiñatakejj kuna ewjjtʼanakanisa ukanakat yatjjatañ munasmati? Ukhamächi ukhajja, aka revista jaytawayktam jupampi parltʼañamataki jan ukajj aka revista qellqerinakampi parltʼañamatakiw chʼamañchtʼapjjsma. Jupanakajj kusisit chuymampiw yanaptʼapjjätam.