Uk sum amuyañatakejj mä jan wali usunïkasmas ukat uka usumat waliptañatakejj operayasiñamäkasmas ukham amuytʼañäni. Ukatakejj mä suma atiniskay doctoraruw (cirujano) thaqhasma, kunattejj jakäwimajj jupan amparapankiwa. Ukat uka doctorajj uka kasta operacionanakat experiencianiti janicha uksa sumwa yatjjatarakisma.

Religionanakat jan ukajj yupaychäwinakat parlkasajj ukhamarakiwa: sum yatjjatañaw wakisi. Jumatï mä religionankstajja, ajay toqet jakäwimas ukat qhespiyäwimas jupanakan amparapankiwa.

Uka toqet sum amuytʼasiñatakejj Jesusajj akham sänwa: “Sapa qoqapï achupat uñtʼatajja” sasa (Lucas 6:44). Amuytʼañataki, mä religionat parlkasajja akham jisktʼasiñasawa ¿kuna kasta achunaksa achoqaski? ¿Pʼeqtʼirinakapas sinti qollqe chuymäpjjeti? ¿Chʼajjwäwinak toqetsa, sarnaqäwinakapasa Biblian aski yatichäwinakaparjamäskiti?, sasa. Ukanakat sum yatjjatasajj ¿mä atiniskay religionajj utjpachati?, uk jutïr yatichäwinakan yatjjataskañäni.