Biblian yatichäwinakapa

¿Kunjamsa angelanakas ukat sajjranakas jakäwisar mayjtʼayaspa?

Aka yatichäwejja, kawkïr jisktʼanaktï jumajj jisktʼasirïta ukwa pachpa Bibliamampi yatjjatañ yanaptʼätam. Jumatï munstajja, Jehová Diosan Qhanañchirinakapampiw aka jisktʼanakat yatjjatasma.

1. ¿Angelanakajj khitinakäpjjesa?

Angelanakajja, jaqenakat sipans jukʼamp chʼamanïpjjewa ukat alajjpachanwa jakapjjaraki. Jehová Diosajj ajayurakiwa ukat Juparakiw aka Oraq janïr utjkipan jupanakar luratayna (Job 38:4, 7; Mateo 18:10). Jehová Diosajj Jupar iyawsir walja waranq waranq angelanakamp muyuntatarakiwa. (Salmo 103:20, 21 ukat Apocalipsis 5:11 liytʼäta.)

2. ¿Angelanakajj yanapistuti?

Nayra pachajja, Lot chacharuw angelanakajj yanaptʼapjjatayna jupajj Diosan askit uñjatänwa. Kawkïr markarutï Diosajj tʼunjjañ amtkäna ukanwa jupajj jakasïna uka markanjja jan wali qhoru jaqenakamp phoqhantatänwa. Ukat uka markat mistsjjapjjañapatakejj pä angelanakaw Lot chachampiru ukat familiapampirojj yatiyäna. Yaqhepanakajj sawkakïkaspas ukham amuyapjjäna ukat janiw istʼapkänti. Ukampis Lot chachampi ukat phuchhanakapampejj kuntï Diosajj angelanak toqnam siskän ukarojj istʼapjjänwa ukat qhespipjjänwa. (Génesis 19:1, 13-17, 26 liytʼäta.)

Jichhürunakanjja angelanakajj yanaptʼarakistuwa sasaw Bibliajj qhanañchi. ¿Kunjamsa? Diosan Reinopat taqe chuyma yatiyirinakaruw irpi (Mateo 24:14). Uka yatiyäwinakajja, aski yatiyäwinakawa ukat jan walinakat amuyasiñasatakirakiwa. Janiw Lot chachan urunakapanjam mä sawkakïkaspas ukham amuyañasäkiti, kunattejj Diosaw angelanakap toqe uka aski yatiyäwinak yatiyaskistu. (Apocalipsis 1:1 ukat 14:6, 7 liytʼäta.)

Maysa toqetjja Diosajj jan walinakan uñjasktan ukhaw angelanakap jiwasar chʼamañchtʼañatak khithani, kunjamtï Jesusampejj lurkän ukhama. (Lucas 22:41-43 liytʼäta.)

Tʼaqhesiyapki uka qhoru jaqenakarojj niyaw Jehová Diosajj angelanakapamp tukjayani ¡kunja kusiskañakïkani! (2 Tesalonicenses 1:6-8 liytʼäta.)

  3. ¿Sajjranakajj khitinakäpjjesa ukat kuns lurapjje?

Walja jaqenakaw Diosar jan istʼas sarnaqawayapjje. Ukhamarakiw alajjpachanjja walja angelanakajj Dios contra saytʼawayapjje (2 Pedro 2:4, MT). Uka jan istʼasir angelanakaw sajjranakäpjje. Jupanakan pʼeqtʼiripajj Supayawa ukat jupaw sajjranakapampi jaqenakar sallqjjapjje. (Apocalipsis 12:9 liytʼäta.)

Supayajja, qollqe toqnama akapach gobiernonakampi ukat kʼari yupaychäwinak toqnamaw jaqenakarojj Diosat jitheqtayi. Ukhamajja taqe akapachan kuna jan waltʼäwinakatï utjki ukanakjja Supayaw utjayi. (1 Juan 5:19 liytʼäta.)

4. ¿Kunjams sajjranakajj jaqer sallqjje?

Jiwatanakajj ajayur tukusins jaqenakamp parlapkaspa ukhamwa Supayajj jaqenakar amuyayi. Ukampis jiwatanakajj janiw kuns lurapkaspati sasaw Bibliajj qhanañchi (Eclesiastés 9:5). Sajjranakajj jiwatan arupäkaspas ukham parlasaw jaqenakar sallqjjapjje (Isaías 8:19). Ukat yatirinakampi, layqanakampi, yaqha ukhamanakampiw Supayajj kunaymanit sallqjje. Ukhamajj taqe uka luräwinakat jitheqtjjañasawa ukat kunanakatï sajjranakankki ukanakajj janipuniw utasan utjañapäkiti sasaw Bibliajj ewjjtʼistu. (Deuteronomio 18:10, 11 ukat Hechos 19:19 liytʼäta.)

Jehová Diosar munastanjja janiw ñanqha ajayunakar ajjsarañasäkiti. Bibliat yatjjatasa ukat ukarjam sarnaqasaw Supayat jitheqttänjja ukat Diosarus jakʼachasiraktanwa. Sajjranakat sipansa Jehová Diosajj jukʼamp chʼamaniwa, ukat kuna jan walinakans uñjasiñäni ukhajja angelanakap toqew Diosajj chʼam churistani. (Salmo 34:7 ukat Santiago 4:7, 8 liytʼäta.)

Jukʼamp yatjjatañatakejja, ¿Kunsa Bibliax chiqpachapuni yatichi? aka libron 10 jaljap uñjjattʼäta, ukajj Jehová Diosan qhanañchirinakapan luratawa.