Jupjam iyawsäwinïpxañäni

Jupax Diosaruw taqi llakinakap katuyäna

ANAX Siló qullur sarañatakiw wal wakichtʼasiski, janiw llakinakapat sint amtasiñ munkiti. Ukar sarañax wali kusiskañapunïñapänwa, kunattix sapa marapuniw Elcana chachapax Siló sat qullun jikxataski uka tabernaculor Diosar yupaychapxañapatak familiapar irpäna. Uka urunakanxa kusisitäpxañamapuniwa sasaw Jehová Diosax israelitanakar säna (Deuteronomio 16:15). Chiqas Anax wawatpachwa Diosar ukham yupaychir sarasax kusisit jikxatasirïpachäna, ukampis aka qhipa maranakanxa llaktʼatakïxänwa.

Chiqas chachapax wal munasi, ukax jupatakix wali askiwa. Ukampis yaqha warminirakiwa, jupax Penina satänwa. Uka warmiw jan walinak lurasax Anarux sapür chuym ustʼayäna. Yämas sapa mara Siló qullur kusisit sarapxañapäkän ukhaw Anan wali llakita ukat qʼala aynachtʼat jikxatasiñapatak Peninax kuns luräna. ¿Kun lurasas llakimp qʼal aynachtʼayäna? Ukham jan wal luratpachas ¿kunjamsa iyawsäwipax ukanakar saykatañ yanaptʼäna? Jumatï llakinakampi qʼala aynachtʼat jikxatassta ukhaxa, Anan sarnaqäwipaw yanaptʼätamxa.

“¿Kunatsa ukataq llakitäta?”

Ananxa, pä llakipaw utjäna siw Bibliaxa. Uka llakinakapat maynïrix akawa, Elcanax pä warminïnwa, uka warminakapatx jupaw maynïrixa, ukat chachapan maynïr warmipan uñisitaw uñjasïna, ukampis janiw ukax añch llakisiykänti. Ukatsti, jupax janiw wawanïñ puedkänti, ukaw jukʼamp llakisiyäna. Khitinakatï wawanïñ munapki uka warminakatakix ukax wali llakkañapuniwa. Ukampisa, Anan tiemponakapanxa jan wawanïñax wali llakkañapunïnwa, kunattix taqi familianakaw sutip jan chhaqtañapatakix wawanïpxäna. Ukatwa uka urunakanxa jan wawanïñax jan walit uñjatäna ukat mä phinqʼarakïnwa.

Janitï Peninäkaspänxa uka jan waltʼäwirux sumakwa saykataspäna. Walja warminïñax janipuniw walïkiti. Kunattix sapa kutiw warmi pura uñchikisiñasa, nuwasiñanakasa ukat jan waltʼäwinakas utji. Ukhamarusa Diosax Edén huertan familia uttʼaykän ukhax janiw Adanan walja warminakanïñap amtkänti (Génesis 2:24). * Anan sarnaqäwipat yatxatasaw kunatsa Bibliarjamax walja warminïñax jan walit uñjata uk amuysnaxa.

Elcanax Ana warmiparuw wal munasi. Judionakan saräwiparjamax Elcanax Anamp mä qhawqha maranak jaqichatäkan ukhaw Peninamp jaqichasxarakïna. Ukax chiqäskchi janisa, kunjamsa Peninax Anar kunayman tuqit llakisiyäna ukax qhanawa. Wawanakanïtap laykuw Peninax jachʼa jach’ tuküna, ukat mayampi mayamp wawanïsax jukʼampiw jachʼañchasxarakïna. Ukampis Anar jan wawanïtap layku chuymachtʼañat sipansa jukʼampikiw jiskʼachxäna. Ukat wal jiskʼachasaw tuqïna ukat Anax janiw kuns kamachtʼirjamaxänti sasaw Bibliax qhanañchi (1 Samuel 1:6).  Jïsa, Peninax Anar chuym ustʼayañatakipuniw kuns luräna.

Amuyataxa, Siló sat qullun tabernaculox utjki ukar sapa mara sarasaw Peninax Anar chuym ustʼayäna. Peninan sapa mayni “yuqall, imill wawanakaparu[w]” Elcanax kunatï Jehová Diosar luqtatäkän uka sacrificionakat mä jiskʼakam churi. Ukampis Anarux jupa sapatakikiw churi. Uk uñjasaw Peninax jachʼa jachʼa tuktʼas jan wawanïtap amtayi, ukatwa Anax walpun jachaqtʼasi janirakiw manqʼañs munxiti. Ukatxa Elcanax munat warmipar jan manqʼiri ukat wali llakit uñjasax akham sasaw chuymachtʼañ yantʼi: “Ana, ¿kunatsa jachta? ¿Kunatsa ukataq Ilakitäta, janiraki manqʼañsa munktati? ¿Janit nayasti jumatakisti tunka wawanakat sipansa askïktsti?” sasa (1 Samuel 1:4-8).

Kunatsa Anax wali llakita jikxatasïna ukwa Elcanax amuyäna, ukaw wali askïnxa. Ukat ukham wali munasiñampi arxaytʼatapax Anatakix wali askïpachänwa. * Ukampis Elcanax kuna jan walinaktï Peninax lurki ukanakxa janiw arskiti, ukat Anax chachapar uka tuqit arsutapxa janirakiw Bibliax qhanañchkiti. Uka tuqit parlaspäna ukhax inas jukʼamp jan walinakan jikxataschispäna, ukwa Anax amuytʼaspachäna. ¿Elcanax uka jan waltʼäwinak askichpachäniti? ¿Janit Peninasa wawanakapasa ukat servirinakapas jukʼamp uñisipkpachäni? Uka qhuru warmin sapürutjam wali jiskʼachat uñjasisaxa, pachpa utapans yaqhachataw Anax jikxataspachäna.

Kuntï chuym ustʼayir ñanqha Penina warmix lurkäna ukx janis Elcanax yatkchïnxa, Diosaw ukanak sum uñjaskäna. Uñisiñat ukham jan walinak luririnakarux Jupaw taripaskani sasaw Arupanx qhanañchasi. Maysa tuqitxa, chiqapar uñjir Diosaw tiempoparu ukat kunjamtï Jupax munki ukarjam uka jan walinak askichaskani. Uk yatiñaw khitinakatï Elcanan Ana warmipjam suma jaqïpki ukat altʼat chuymanïpki ukanakarux chuymachtʼani (Deuteronomio 32:4). Anax uk yatisarakiw Jehová Diosarux atinispachäna.

“Janirakiw mayamps Ilakiskxänti”

Sarapxañapäkän uka alwaxa, familpachaw wal wakichasisipki, wawanakas ukhamaraki. Efrainan utjkäna uka qullu qull thakinjam sarasax Siló qullur puriñkamaxa, 30 kilometronak jilwa sarapxani. * Mä uru jan ukax pä uru sarañankiwa. Kunsa Penina warmix lurani ukxa Anax yatiwa, ukampis janiw utar qhiparkiti. Ukax jichhürunakan Diosar luqtapki ukanakatakix yatiqaskayapuniwa, maynin jan wali luratax Diosat jithiqtsna ukhaxa, janipuniw walïkaspati. Ukat kuna bendicionanaktï aguantaskakiñasatak chʼam churkistaspa ukanaks janiw katuqksnati.

Mä uru jurnalpach qullu qull thaknam sarasaxa, familpachaw Siló sat qull uñjapxi. Uka qullux yaqha jachʼa qullunakampi muyuntatänwa. Niya ukar jakʼachaskasaxa, kunsa Jehová Diosar mayisini ukwa Anax chuymapan lupʼiskpachäna. Ukat ukar purisax manqtʼasiñatakiw quntʼasipxi. Anax jankʼakiw Jehová Diosan tabernaculopar sari. Templo mantañ punkunwa Elí sacerdotex quntʼatäski. Ukampis Anax Diosat mayisiñ lupʼiski. Tabernaculonx Diosax istʼapunitaniwa sasaw amuyasi. Janisay kunja llakitas jikxatasi uk khitis sum amuykchixa, alaxpachankir Awkipax sum amuyi. Ukham llakit jikxatasitapatwa jupax jacharakïna.

Jehová Diosaru chuymapan mayisiskäna ukhaxa, jañchipax khathatïnwa. Ukatxa llakinakap Diosar yatiyañatak suma arunak amtkasaxa lakapas khathatirakïnwa. Ukat  kunjamsa jupax chuymapan jikxatasïna ukxa Diosar qʼal yatiyäna. Ukampis Anax janiw Diosarux wawanïñak maykänti, janirakiw bendicionap katuqañ laykukis Diosar jakʼachaskänti, jan ukasti kuntï jupax Diosar churirjamäkän uksa yatiyarakïnwa. Ukatwa akham sas Diosar arsüna: “Mä wawsa apayarakïtätaxa, nayasti uka wawsti jumar serviritakiw uywä” sasa (1 Samuel 1:9-11).

Kunjamsa Diosar mayisiñasa ukwa Anan mayisïwipat yatiqsna. Kunjamtï mä wawax wali munasir awkipar taqi kuns chuymatpach awistʼaskixa, ukham llakinakam yatiyapxita sasaw Jehová Diosax wali khuyaptʼayasiñapat markaparux sistu (Salmo 62:8; 1 Tesalonicenses 5:17). Diosar mayisiñ tuqit parlkasax akham sasaw Pedrox Diosan amuytʼayatax qillqäna: “Taqi llakisiñanakamsti Diosar jaytapxarakim, jupasti jumanakatxa llakisirakiwa” sasa (1 Pedro 5:7).

Jaqinakaxa janiw Jehová Diosjam khuyaptʼayasiri ukat chuymachtʼasiri ukhamäktänti, ukaw wali llakkañaxa. Anax wali jachtʼasis Diosar mayisiskäna ukhax Elí sat jilïr sacerdotex uñchʼukiskänwa, Anax arup istʼasinx wal sustjasi. Jilïr sacerdotex akham sänwa: “¿Kunapachkamas ukan umatäskäta? ¡Vinxa apanukum!” sasa. Kunjamsa lakapax khathatïna, jikʼun jikʼun jachaskäna ukat wali chuyma ustʼatäkäna uk uñjänwa. Ukampis kunatsa ukhamäskta sas jisktʼañat sipansa machir warmitwa uñjäna (1 Samuel 1:12-14).

Ukham wali llakimp aynachtʼata jikxataskasinx jilïr sacerdoten machir warmit uñjatäñax Anatakix wali llakkañapunïpachänwa. Ukhamäkchïnsa, Anax janiw Jehová Diosar luqtañatxa jithiqtkänti, jiwasax ukwa jupat yatiqasiraksna. Kunats ukham jixatasïna ukxa, Anax wali respetompiw Elí jilïr sacerdoter qhanañchäna. Uk istʼasax inas Elí chachax mä juk’ phinqʼaschïna, ukatwa suma arunakamp akham säna: “Sumakiy sarxam, Israelan Diosaparakiy jumarux kuntix maykta ukxa churpan” sasa (1 Samuel 1:15-17).

Jehová Diosar llakinakap yatiyasasa ukat tabernaculon Jupar yupaychir sarasas ¿kunjamakis jikxatasxäna? Bibliax akham siwa: “Ukatsti Anax kawkhattix jutkän ukkharuw kuttanxäna, manqʼasiriw sarxaraki, janirakiw mayamps llakiskxänti” sasa (1 Samuel 1:18). Anax janiw jukʼamps llakisxänti, kunattix alaxpachankir Awkiparuw taqi llakinakap katuyxäna (Salmo 55:22). Nayrasa, jichhasa ukat jutïrinsa Jupatakix janipuniw kuna jan walinak askichañax chʼamäkiti.

Llakimp wali aynachtʼat jikxatasïta ukhaxa, Anat yatiqasisinxa, mayisitanakar istʼir Jehová Diosaruw llakinakamat taqi chuyma yatiyañama (Salmo 65:2). Ukhamtï mayisïtaxa, Diosawa llakinakamat samarañap churarakïtamxa (Filipenses 4:6, 7).

“¡Janiw jumat jukʼampix khitis utjkiti!”

Qhiparmantisti Anax tabernaculoruw chachapamp kuttʼi. Inas kuntï Jehová Diosar arsuwaykäna ukxa chachapar yatiychïna, kunattix  Moisesax katuqkäna uka Leyirjamax warmix chachapar jan yatiyasaki kuns Diosar arsuspäna ukhaxa, chachax warmipan arsutapxa ina pamparuw tukuyaspäna (Números 30:10-15). Ukampisa, Diosar taqi chuyma luqtir Elcanax janiw warmipan arsutapxa ina chʼusar tukuykiti, jan ukasti janïr utapar kutʼkasax Anamp chikaw Jehová Diosar yupaychi.

 ¿Kunapachas Peninax Anar chuym ustʼayañatak jan chʼamanïxatap amuyasxäna? Bibliax uka tuqit janiw qhanañchkiti, ukampis “janirakiw mayamps llakiskxänti” siski uka arunakaxa, Anax ukat uksarux kʼuchik jikxatasxatapwa amuytʼayistu. Ukhamarusa, Anar chuym ustʼayañatak jan chʼamanïxatapx Peninax amuyasxänwa. Bibliax janipuniw mayamps Peninan sutip aytxiti.

Walja phaxsinak qhipatsti usur jaqïtap laykux Anax wali kusisitapuniwa. Ukampis kuntï Diosar arsuwayki ukxa janiw armaskiti. Wawax yurxäna ukhaxa, Samuel sasaw sutichäna, uka sutixa “Diosan Sutipa” sañ muni, ukax Jehová Diosar taqi chuyma atinisiñ tuqir uñtayatawa, kunjamtix Anax lurkatayna ukhama. Janiw uka maras ni uka pä qhipa maranakansa chachapampi ukat familiapamp chikax Siló chiqar sarkiti, jan ukasti utanwa asu wawampi ñuñ tʼaqʼañapkam qhipari. Ukäñkamasti, wali munat wawapar tabernaculor Diosar luqtañapatak jaytanxañatakiw chʼamachasiski.

Wawapat jaljtañ horasax niy purinxiwa, ukampis Anatakix ukax wali llakkañawa. Samuelux tabernaculon irnaqapki uka yaqhip warminakan wali suma uñjatäñaps yatkchixa, Anax janiw jiskʼa wawapat jaljtañ munkiti. Ukhamäkipansa, chachapampix taqi chuymaw Diosar yupaychañapatak wawapar irpapxi. Sacrificionakwa Diosan utapan luqtapxi ukat Elí sacerdoten ukaruw Samuelurux irpapxi, kuntï Anax Jehová Diosar mä qhawqha maranak nayrax arsuwaykäna ukwa amtayapxi.

Ukhawa Anax Diosar mayisi, uka arunakax wali askïtapwa Diosax uñjäna, ukatwa Biblian uñstañapatak qillqayäna. 1 Samuel 2:1-10 qillqatanxa kunja iyawsäwinis Anax ukaw qhan amuyasi. Jehová Diosax jachʼa jachʼa tukurinakar jiskʼachañataki, tʼaqhisiyatanakar bendiciñataki ukat jiwayañatakis jan ukax mayniru jiwañat qhispiyañatakisa chʼamanïtap yatisaw Anax Diosar jachʼañchi. Ukatxa, qullanätapata, taqi kuns chiqapar uñjirïtapata ukat atiniskañätapatwa Diosar jachʼañcharaki. Taqi ukanakatwa akham sasin säna: “¡Janiw jumat jukʼampix khitis utjkiti!” sasa. Jehová Diosax atiniskaña ukat imantaskañarakiwa kunapachatix jiskʼachatanakasa ukat tʼaqhisitanakas Jupar yanap mayipki ukhaxa.

Jehová Diosar taqi chuyma atinisir taykanïñax Samuelutakix wali askipunïnwa. Jupax janisay taykapamp jilskchixa, janipuniw taykapan jaytanukutäkaspas ukham amuykänti. Tabernaculon luqtaskakiñapatakix sapa maraw taykapax mä machaq isi aparapïna. Uka isi chʼuktʼasinxa wawapar wal munasitapa ukat wawapat llakisitap uñachtʼayäna (1 Samuel 2:19). Uñjkasmas ukham amuytʼam, Anax wawaparuw machaq is usktʼasax askichtʼaski, wawapar wali munasiñampiw uñkattʼasi ukat chʼamañchtʼkir arunakampiw arxaytʼaskaraki. Ukham taykanïñax mä bendicionapuniw Samuelutakixa. Ukat jupax jilsxani ukhasti awk taykapatakisa Israel markatakis mä bendicionarakïniwa.

Ukat Anamp Elcanampix phisqa wawanïxapxarakïnwa, Diosaw Anarux yaqha wawanakanïñapatak bendicïna (1 Samuel 2:21). Ukampisa, taqi bendicionanakat sipansa Jehová Dios Awkipampi sum apasiñaw jupatakix wali jachʼa bendicionäpachänxa, ukat sapa maratjamaw Diosampix sum apasipxpachäna. Jumatix Anat yatiqasïta ukhaxa, Diosarux jukʼampwa jakʼachasirakïta.

[Qhanañchäwinaka]

[29 janan recuadropa]

Pä aski mayisïwi

Anan pä aski mayisïwipaw 1 Samuel 1:11 ukat 2:1-10 qillqatanakan jikxatasi, uka mayisïwinakatxa wali askinakwa yatiqsna. Ukanakat mä qhawqha yatxatañäni:

◼ Nayrïr mayisïwipan akham sasaw Diosar jakʼachtʼasi: “Alaxpach ejercitonakan Jehová Diosapa, NM” sasa. Biblian qillqatäki uka jaqinakatxa, jupaw nayraqatxa Diosar ukham arunakamp jakʼachasitayna. Biblian nayra qillqatanakapanxa, 285 kutiw uka arunakax uñsti. Ukaxa, Diosax alaxpachankir angelanakapxar munañanïtapwa uñachtʼayi.

◼ Ukat Anax Elcanampi wawapar Siló chiqan Diosar luqtañapataki katuyir sarapkäna ukhaw payïr aski mayisïwip lurarakïna. Ukatxa janiw Peninar amuktʼayatap layku kusiskänti, jan ukasti Jehová Diosan bendicionap katuqatap laykuw wal kusisïna.

◼ Kunapachatï Anax “Jehová Diosanwa waxrajax jachʼañchasi” sasin siskäna ukhaxa, inas mä urqu wakat lupʼiskchïna, kunattix urqu wakanx waxrapankiw chʼamapaxa (1 Samuel 2:1, NM). Mä arunxa, “Jehová Dios jumaw chʼamañchistaxa” sasaw Anax saskäna.

◼ Diosan“ajllit[ap]” tuqit arskäna ukaxa, mä profeciat uñjatawa. Yaqha jiskʼa tʼaqanakan “mesías” sas jaqukipatäki uka pachpa aru Anax ayti. Biblian qillqatäki uka jaqinakat jupaw nayraqatxa, Diosan jutïr ajllit reyipat parlañatak ukham arsutayna (1 Samuel 2:10).

◼ Ukat waranqa maranak qhipatxa, Anax arskäna niya uka pachpa arunakapampirakiw María Jesusan mamapaxa, Jehová Diosar jachʼañchañatak arsutayna (Lucas 1:46-55).

[28 janan fotopa]

Anax jan wawanïtap laykux wali llakitapuniw jikxatasi, ukat llakimp qʼala aynachtʼatäñapatakix Peninax kuns lurapunïnwa

[28, 29 jananakan fotopa]

¿Jumax Anat yatiqasis Diosar taqi chuyma mayisirakismati?

[29 janan fotopa]

Elí sacerdotesay Anat jan wal amuykchïnxa, Anax janiw coleraskänti