Familianakataki

Jichhak jaqichasitanakataki iwxtʼanaka

Chachax akham siwa: “¡Janipuniw may may amtirïpxatax amuykayätti! Nayax alwat sartirïtwa, ukampis warmijax urukamaw iktʼaski. Ukhamarusa, sumäkasas akatjamatakwa colerxi, kunatsa ukhamäpacha uk janiw amuyirjamäkti. Phayaskta ukhax tuqik tuqiskitu, yämas secadorampi ampar phiskhurtʼast ukhax jukʼampikiw colerasxi”.

Warmipax akham sarakiwa: “Manqʼañ horasax familiajampix walpun parltʼasipxirïta, ukampis chachajax janiw ukhamäkiti. Ukat phayki ukhaxa, secadorampipuniw ampar phiskhurasi, ¡colerañjamapuniwa! ¿Kunjamsa yaqhipax sum jakasipxpacha? Ukatwa chacha warmjam nayrïr mara yatinuqtañax chʼamapuniw sasin sapxirïpacha”.

JICHHAK jaqichasipki ukanakax inas ukham jan waltʼayasipxarakchi. Inas qalltan sum qamasipxä sapxchispa ukampis qhipat janiw ukhamäxaspati, inas maynin pantjasitanakapak thaqxapxchispa. Chiqas jan waltʼañanakax utjakipunispawa, ukampis jaqichasitanakax sum jakasipxañapatakixa, ¿kuns lurapxaspa? (1 Corintios 7:28.)

Nayraqatxa, jaqichatäxatam laykus chacha warmjam sum sarnaqañ yatkasma ukham janiw amuyasiñamäkiti. Sapäsipkayäta ukhaxa, yaqhanakamp sum apasiñ yatiqapxpachätawa ukat uñtʼasipkayäta ukhas maynit maynïr sum uñjasiñ yatiqapxarakpachätawa. Ukampis jaqichatäxasax kunayman jan waltʼañanakaw utjaspa, ukhaw suma chuymamp uñjasiñ jukʼamp yatiqapxäta. Kunjamtï yatktanxa, kun yatiqkasas pantjasiñax utjakipuniwa. Inas jumanakax pantjasipxchisma, ukampis jaqichasïwimax janis nayrar sartirjamäkaspa ukham janiw amuyasiñamäkiti.

Kun sum lurañ yatsuñatakixa, uka tuqit yatxattʼatäki ukaruw jisktʼasiñama ukat iwxtʼaparjam lurañamarakiwa. Chacha warmjam sum jakasiñ tuqitxa, Jehová Diosakiw wali yatxattʼataxa. Jupaw jiwasarux jaqichasiñ munañasatak lurawayistu (Génesis 2:22-24). Kunjamsa Biblian iwxtʼanakapax jichhak jaqichasitanakarux jan waltʼañanak askichañataki ukat walja maranak sum jakasipxañapatak yanaptʼi, uk jichhax uñjañäni.

1. ARUSKIPTʼASIPXAÑAMAPUNIWA

¿Kunatsa chʼamäspa? Chachasa jan ukax warmis jan jisktʼasakiw kuns amtañ yatipxi.  Japón markankir Keiji * chachax akham siwa: “Warmijar jan jisktʼasakiw kuna invitacions katuqtʼasirïta. Ukampis jupax janiw taqi ukanakar sarirjamäkänti” sasa. Ukat Australia markankir Albert sat chachax akham siwa: “‘Chachax janipuniw warmipar jisktʼañapäkiti’ sasaw yatichapxitäna” sasa, ukxa wawatpachwa yatichapxatayna. Gran Bretaña markan jakasiri Diana sat warmixa, niya ukhamanarak jikxatasïna. Jupax akham siwa: “Kun amtañatakisa familiajarupuniw jisktʼasirïta, ukat jaqichaskayäta ukhaxa, janiw chachajar jisktʼirïkti” sasa.

¿Kun lurapxañamas wakisi? Ak amtapxapunim, Diosax jaqichasitanakarux ‘mayakïpxaspas’ ukhamwa uñji (Mateo 19:3-6). Taqi jaqinakamp sum apasiñat sipansa chacha warmjam sum apasipxañamaw Jehová Diosatakix jukʼampi wakiskirixa. Ukampis sum apasipxañamatakixa, parltʼasipxañamapuniw wakisi.

Uka tuqitxa, Jehová Dios pachpatwa yatiqasipxasma. Kunjamsa Diosax Abrahamampi parltʼasipxäna ukwa Génesis 18:17-33 qillqatan qhanañchtʼi. Jehová Diosax Abrahamar kunja respetompis uñjäna ukwa kimsa tuqit uñachtʼayi: 1) kunsa lurañ amtäna ukwa yatiyäna; 2) kuntï Abrahamax siskäna uk istʼänwa, ukat 3) Abrahaman jisktʼanakaparjamaw amtanakap mayjtʼayäna. Jumanakax janïr kun amtkasas ukhamwa lurapxarakisma.

¿JANIT AKHAM LURAPKASMA? Janïr kun amtkasax akanakwa lurapxasma: 1) Kun lurañas walïspa ukwa chachamarusa jan ukax warmimarus qhanañchtʼañama, ukampis amtatäxaspas ukham janiw parlañamäkiti. 2) Kunsa uka tuqit amuyi ukwa jisktʼarakisma ukat janiw jumjam amuykaniti, uk amtapunim. 3) Suma chuymanïñamawa ukat wakisirjamänixa, kuntï maynix munki ukarjam lurañataki chʼamachasim (Filipenses 4:5).

2. WALI AMUYUMP PARLTʼASIPXAM

¿Kunatsa chʼamäspa? Kawkhantï qhuru arunakamp parlañax jan kuna jan walïki uka chiqanakana jan ukax familianakanwa waljanix jilsuwayapxi. Europa markan jakasir Liam sat chachax akham siwa: “Kawkhattï jutktxa uka chiqanxa kuns qhan sañ yatipxi. Ukampis warmijar chuym jan ustʼayañatakix wali amuyumpi parlañ yatiqawayta” sasa.

¿Kun lurapxañamas wakisi? Ukhamarusa janiw taqinix ukham arunakampipuni arxayatäñ yatitäpkiti (Filipenses 2:3, 4). Apóstol Pablox mä misioneror iwxtʼkäna uka arunakaw jichhak jaqichatanakarux yanaptʼaspa, jupax akham sänwa: “Tatitun mä serviripax janiw nuwasiñanakan sarnaqañapäkiti, ukatsipana taqinimpis  sumankañapawa. Munasirïñapawa [jan ukax wali amuyumpi sarnaqirïpxañapawa]” sasa (2 Timoteo 2:24). Ukhamasti jichhak jaqichatäsipki ukanakaxa, kuna jan walinakan jikxatasisas jaqi masiparux wali amuyumpi parlañwa yatiqapxañapa.

¿JANIT AKHAM LURAPKASMA? Chachamasa jan ukax warmimas kuns colerayirjam lurani ukhaxa, kuna arunakampis jefemarusa jan ukax mä munat masimarus parltʼasma ukham amuytʼañamawa. Janipuniw jupanakarux qhuru arunakamp parlkasmati. Kunatsa chachamasa jan ukax warmimas jefemata jan ukax mä munat masimat sipansa wali respetompi uñjatäñapax wakisi, ukwa sapa maynix qillqtʼasipxañama (Colosenses 4:6).

3. CHACHA WARMJAM SARNAQAÑWA YATIQAPXAÑAMA

¿Kunatsa chʼamäspa? Jichhak jaqichatäki uka chachax, inas familiapar jan sum pʼiqtʼañ yatkchiti, ukatwa awisax warmipar chuym ustʼayaspa. Maysa tuqitsti, warmix inas chachapar wali amuyumpi kun sañs jan yatitäkchiti. Italia markankir Antonio sat chachax akham siwa: “Tatajax kun amtañatakisa janipuniw mamajar jisktʼirïkiti, ukat jaqichasxayäta ukhaxa, taqi kuns munañajarukiw lurirïta” sasa. Canadá markankir Debbi sat warmixa akham sarakiwa: “Chachajax kuns yäpar sum apthaptʼasirïñap munayatxa, ukampis munañajarjam lurañatak waytʼatax jukʼampikiw jan istʼasxänti” sasa.

¿Kunsa chachax lurañapa? Warmix chacharuw pʼiqtʼiriparjam istʼañapa ukat wawanakax awk taykaparux istʼañapawa siski uka arunakax kipkakïkaspas ukham yaqhip chachanakax amuyapxi (Colosenses 3:20; 1 Pedro 3:1). Ukampis janiw ukax ukhamäkiti. “Chachax awkiparu taykaparu jaytanukusin warmipampi mayachasxani, panipasti mayakïxarakiniwa” sasaw Bibliax qhanañchi, ukat awk taykampit wawanakapampitxa janiw ukham siskiti (Mateo 19:5). Warmixa chachapan ‘yanapiripawa’ siw Diosaxa (Génesis 2:18). Ukampis janipuniw wawanakax awk taykan ‘yanapirinakapaw’ sasin siskiti.  Ukhamasti, phuchaparjam warmipar uñjki uka chachax Diosan kamachinakapwa pʼakintaski.

Kunjamtï Jesusax tamar wali munasiñamp uñjkixa, ukhamarakwa chachax warmipar uñjañapa sasaw Bibliax iwxtʼi. Familiapar uñjañatakixa, ¿kunjamsa chachax Cristot yatiqasispa? Kuntï warmix lurañapäki uk phuqañ jan chʼamäñapatakixa, ¿kunsa chachax luraspa? Janiw jaqichasipki ukhatpach pʼiqtʼiriparjam istʼañapsa ukat kuns jan pantjasis lurañapsa warmipat suyañapäkiti. Ukat jan waltʼäwin jikxatasisas kunjamtï jupa pachpax munaski ukham munasiñampirakiw warmipar uñjañapa (Efesios 5:25-29).

¿Kunsa warmix lurañapa? Diosaw chacharux familiar pʼiqtʼañapatak uttʼayi, ukwa warmix amtañapa (1 Corintios 11:3). Ukhamasti chachaparu pʼiqtʼiriparjam respetir warmixa, Diosarux respetarakiwa. Janitï respetkaspaxa, janirakiw Diosarusa ukat kamachinakaparus respetkaspati (Colosenses 3:18).

Kuna tuqits jan mä amtar puripkani ukhaxa, chachar kutkatasiñat sipansa, jan waltʼañ askichañatakiw chʼamachasiñapa. Ester sat reinax ukhamwa luratayna. Kunapachatï jupax mä jan wali amta askichasiñap munkäna ukhaxa, janiw Asuero sat apnaqir chachapar juchañchkänti, jan ukasti wali amuyumpiw uka jan waltʼäw askichañapatakix chachapar parlxaytʼäna. Ukat ukarjamaw chachapax kunatï chiqapäki uk luräna (Ester 7:1-4; 8:3-8). Ukhamaxa, chachapan wali munatäñatakixa, ¿kunsa warmix lurañapa? Chachapax familiapar pʼiqtʼañ yatiqañapkamaxa, paciencianïñapawa ukatxa respetañaparakiwa, pantjaskchini ukhasa (Efesios 5:33).

¿JANIT AKHAM LURAPKASMA? Kunsa maynix lurañapa uk uñchʼukisiskañat sipansa kunsa sapa maynix sum jakasipxañamatakix lurapxasma uk lurañatakiw chʼamachasipxañama. Chachjamaxa, kunjamsa familiamar pʼiqtʼaskta ukax warmimatakix jan sumjamäkani ukhaxa, ¿kuns luriristxa? sasaw jisktʼañama. Ukat chachamatï jan respetatam amuyani ukhaxa, ¿kunjamsa jumar jukʼamp respet uñachtʼayirisma? sasaw jisktʼañama. Ukat sapa mayniw kuntï maynix siski uk qillqtʼasipxañama ukat ukarjam sarnaqañatakiw chʼamachasipxañama.

Kunans pantjasikipuntanwa

Chacha warmjam kusisit jakasiñaxa, bicicleta apnaqañ yatiqañamp sasiwa. Qalltanxa, taqiniw bicicletampi liwisis liwisisa apnaqañ yatiqapxi. Jichhak jaqichatäpki ukanakax ukhamarakiw qalltan pantjasipxaspa.

Ukampis pantjasitanakamat janiw colerasipxañamäkiti, antisasa kunanakas chachamarusa jan ukax warmimarusa llakisiyi ukanak amuyañamawa. Nayrïr mara jaqichatäkasinxa, kunjamatsa sapa maynix chachaparusa jan ukax warmiparusa kusisit jakasiñatakix yanaptʼaspa ukwa amuyapxañama (Deuteronomio 24:5). Ukat taqi kunat sipansa, Biblian iwxtʼanakaparjam sarnaqañatakiw chʼamachasipxañama. Ukhamatwa chacha warmjam marat marata kusisit jakasipxäta.

[Qhanañchäwi]

AMUYTʼAÑATAKI JISKTʼANAKA

▪ Janïr kun amtkasaxa, ¿chachajaruti jan ukax warmijarupunit nayraqat jisktʼastxa?

▪ Chachajaru jan ukax warmijar munasiña ukat respeto uñachtʼayañatakixa, ¿kunsa jichhürux lurtxa?

[11, 12 jananakan recuadropa/fotonakapa]

Bibliaw jupanakar yanaptʼatayna

Japón markankir Toru waynamp Akiko tawaqumpix wali munasisapuniw jaqichasipxäna, ukampis kimsaqallq phaxsitxa, niya divorciasiñampisipkänwa. ¿Kunatsa ukhamar purtʼasipxäna?

Toru: “Warmijampi nayampixa, mä amtanikïpxiristsa ukham amuyasipxayäta, ukampis janiw ukhamäkänti. Televisión uñchʼukipkayäta ukhaxa, nayax pelota anatir uñchʼukiñ munayäta, jupasti película uñchʼukiñ munäna. Nayax kawks uñatattʼasir sarañ munirït ukhaxa, jupax utarukiw qhiparañ munirïna”.

Akiko: “Chachajax nayar jan kuns jisktʼasakiw kuntï familiapax maykäna ukanak lurirïna. Mä kutixa, mamamarut nayat sipans wal munasta sasaw wali colerat jisktʼta. Ukat askip thaqasakiw kʼartʼasirïña, ukax wal colerayitäna. Kʼarisiskakït ukhax jaljtañäniw sasaw sista”.

Toru: “Ukham satax janiw kuns lurirjamäkayätti, ukatwa jefejar jisktʼasta. Jupax akham sasaw iwxtʼitu: ‘Warmimarux amuktʼam sam, ukat arsuskakini ukhaxa, nuwjam’ sasa. Mä uruxa, wal tuqisisipkayät ukhax tʼaxllitatwa ukat nuktʼasax mä mesa kun liwnuqta. Uka qhipat Akikox Tokio markaruw mä hotelar sarxäna. Nayaw thaqhir sarta ukat jikisisax divorciasiñ amtawayapxta. Qhiphärmantisti, oficinajar sarxayäta ukhax jupax yänakapwa apthapisiskäna”.

Akiko: “Maletanakaj aptʼat niya utat sarxañampïxayät ukhaw timbre toctʼanir istʼta. Punk llawirta ukhax Jehová Diosan Qhanañchiripa mä warmitaynawa, ukat ‘pastʼanim’ sasaw sista”.

Toru: “Oficinajar purisaxa janiw divorciasiñx munxayätti, ukatwa jankʼak utar kuttʼawayta. Utar purisaxa, Akikox mä warmimpiw parlaskatayna ukat akham sasaw situ: ‘Paninpach Bibliat yatiqapxañamaw wakisispa, ¿janit yatiqañ munapkasma?’ sasa. Ukspachaw akham sista: ‘Nayax jan jaljtañatakix kuns lurakiristwa’”.

Akiko: “Nänakar Bibliat yatichapxañapatakix jupaw yanaptʼawayapxitu. Kuntï Bibliax jaqichasitanakat qhanañchi uk liytʼañaw yanaptʼawayapxarakitu. Génesis 2:24 qillqatan akham siwa: ‘Chachax awkipsa, taykapsa jaytxaniwa, warmipampi mayachasxañataki, panpachanisti mä sapa jaqikïpkaspasa ukhamäpxaniwa’ sasa”.

Toru: “Ukat mäkiw kuntï lurañajäki uk amuytʼastxa. Ukat awk taykajamp parlasax ‘akat uksarux janipuniw warmijampi jan parltʼasisax kuns amtkäti’ sasaw sista. Janirakiw machjasiñkam umxayätti. Ukatxa, Diosax kʼarinak uñisiw sasin yatiqawayt ukhaxa, jan kʼarisxañatakiw chʼamachasiyäta”.

Akiko: “Nayrax munañajarukiw kuns lurañ munayäta, ukampis chachajar Biblian iwxtʼanakaparjam sarnaqir uñjasax jupar wal yanaptʼxayäta (Efesios 5:22-24). Jichhakamax 28 maranakaw Biblian iwxanakaparjam sarnaqasasa ukat sapa mayni sum uñtʼasisas wali kusisit jakasisipktxa”.