¿Bibliax kamsis machjayir umañanakatxa?

BIBLIARJAMAX machjayir umañanak mä jukʼa umtʼañax walikïskiwa. * Chiqansa, Diosaw ‘chʼamañchir tʼantʼa, chuymar kusisiyir vino, ajan lliphipiyir aceite’ churistu (Salmo 104:15). Jesusas mä jaqichasïwin kusistʼapxañapatakis umxa ‘suma vinoruw’ tukuyarakïna (Juan 2:3-10).

Machjayir umañanakax jañchisarus lixwisarus kunjamtʼayistaspas ukxa alaxpachankir Awkisax sum yati. Kusisit jakasiñasa ukat jiwasatak askïki ukwa Jupax muni, ukatwa machjayir umañanak jan jiljañasatakix Biblian qhan iwxtʼistu (Isaías 48:17).

Biblianwa akham iwxtʼanak jikxattanxa: “Jan machjasipxamti, machjasiñasti jiwañaruw api” sasa (Efesios 5:18). Ukat Diosan Apnaqäwipanxa machirinakax janiw katuqatäpkaniti sasaw Qullan Qillqatanakax qhanañcharaki (1 Corintios 6:9-11). Ukatxa “machañanaka, jiljas manqʼañanaka, akanakaru uñtat yaqha lurañanaka[sa]” janipuniw walïkiti sasaw iwxtʼaraki (Gálatas 5:19-21).

Ukampisa, ¿chiqapunit jiljas umañax jan waltʼaykistaspa?

Kuna jan walinakarus puriyistaspa

Machjayir umañanak mä jukʼa umtʼañax cuerpotakix askiwa, ukampis jiljas umañax cuerporus lixwirus janiw waltʼaykiti. Kuna jan walinakarus puriyistaspa uk uñjañäni:

Jan amuyunwa jaqirux tukuyi, jan walinak lupʼiyi, “jan parlañanaka parlayarak[i]” (Proverbios 23:33). Nayrïr yatichäwin Albertot parlkayätan uka chachax akham sasaw qhanañchtʼi: “Machirïñax mä usuwa janiw cuerporuk jan waltʼaykiti; jan ukasti amuyussa luräwinakassa mayjtʼayarakiwa. Kuna llakinakans mayninakar uñjasiyaspa ukxa janiw machir jaqix amuyasxiti” sasa.

Jucharuw purtʼasiyaspa. Bibliax akham siwa: “Vino machañanaka[xa], jaqirux jan amuyun tukuyi” sasa (Oseas 4:11). Chiqas ukhamäskapuniwa, maynix machatäki ukhax janiw sum amuyasxiti, jupatakix kuna jan wali amtanakas walikjamakiwa. Ukatwa kunatï askïki uk  lurañax janis wakiskirïkasp ukham amuyxaspa, Diosan kamachinakaparjam qʼum sarnaqañs armtʼasxaspa ukat jan walinak lurxasax Diosan chuymaps ustʼayxarakispawa.

Uk sum amuytʼañatakix John sat chachat parltʼañäni. Mä kutix warmipamp tuqisiwayasinx wali colerataw umañ utar sarxatayna. Mä qhawqha umtʼkipanwa mä warmix jupar jakʼachasïna. Ukat mä qhawqha copanakamp umtʼxasaxa, uka warmimpiw sarxatayna ukat jaqichatäkasinsa uka warmimpiw ikintasxatayna. Ukham luratapatxa wali llaktʼatapuniw jikxatasïna, janitï umkiriskayätxa, janipuniw ukhamar purtʼaskiriskayätti sasaw John sat chachax qhipat säna.

Kuntï parlki, lurki ukxa maynix janiw amuyasxaspati. “¿Khitisa tʼaqhisixa? ¿Khitisa ayquxa? ¿Khitisa chʼaxwañana, jachañansa sarnaqixa?” sasaw Bibliax jisktʼi. Ukatsti akham sarakiwa: “Khititixa vino machañanakana sarnaqaski, ukhamarak yaqha machañanaksa uñstayki ukawa ukham tʼaqhisiskixa” sasa (Proverbios 23:29, 30). Machir jaqixa ‘jachʼa quta taypinkkaspasa, jan ukax mä jachʼa lawa puntankkaspasa ukhamwa amuyasini’ (Proverbios 23:34). Akaw jukʼamp llakkañaxa, ikit sartasinxa akham saraki: “Nuwapxituwa, ukatsti janiw uskituti; asotʼipxituwa, janiw amuyaskti” sasa (Proverbios 23:35).

Maynix usunakampiw apantasispa. Machjayir umañanakax “mä katarjamawa achjasina wali usuyasi” sasaw Proverbios 23:32 qillqatan iwxtʼistu. Jiljas umañaxa venenjamäspawa sasaw uka jiskʼa tʼaqax qhanañchi, ukat doctoranakas uka pachp sapxaraki. Kunayman cáncer usunaka, hepatitis alcohólica, cirrosis, pancreatitis, síndrome alcohólico fetal, derrames cerebrales, fallos cardíacos ukat diabeticonakarux hipoglucemia ukanakar ukat yaqha usunakampir aptʼirïtap yatisiraki. Awisax mä kuti jilañchjasakiw jiwatjam jan amuyuni jan unxtkiri jikxatasxsna (estado de coma), jan ukax jiwañarus purtʼassna. Ukampis jiljas umañax jukʼamp jan waliruw aptʼistaspa, ukax janiw doctoranakan libronakapan qillqatäkiti.

Diosamp sum apasiñwa maynix aptʼasispa. Machjayir umañanak umasax inas maynix jan machjaskapunchiniti, ukampis jiljas umasax Diosamp sum apasitapwa aptʼasispa. Isaías profetax akham sänwa: “Ay, kunakïkani jumanakatakixa alwatpach sartasin machasipkta, ukatsti janiraki arumkama uka umañxa apanukupki ukanakatakixa” sasa. ¿Kunatsa ukham sispachäna? Kuna jan walinakarutï Diosar yupaychañ tuqit aptʼkistaspa uk sum yatïna, ukatwa akham säna: “Janiw amuyapktati [Jehová Diosan] luratanakapxa, janirakiw  yäqapktasa jupan luratanakapxa” sasa (Isaías 5:11, 12).

“Machir jaqinakampix jan mayachasimti” sasaw Diosax Arup tuqnäm iwxtʼistu (Proverbios 23:20). Ukatsti jilïr warminakarux janiw “sinti vinoru chuyma churata[pxañamäkiti]” sasaw iwxtʼasiraki (Tito 2:3, MT). ¿Kunatsa uka tuqit sum amuyasiñasa? Kunattix jila part jaqinakax jukʼat jukʼat jukʼamp umañ qalltxapxi ukat sapa kutirakiw umxapxi. Jupanakax janisay uk amuyasipkchixa, aka amuyuniw ikxapxi: “Ikit sartasinxa wastataw jukʼamp vino thaqiri sarä” sasa (Proverbios 23:35). Khitinakatï arum paqar wal umjasipxi ukat alwarux sumak jikxatasiñatakix umxattʼasipkaki ukanakax machiriw mistxapxaspa.

Khitinakatï “machañanakana, wali manqʼañanakana, jila umjasiñanakana” sarnaqasipki ukanakax “khititix wakichasiski jiwirir jakirir taripañataki [...] ukaruw luratanakapata [cuenta] churapxani” sasaw Bibliax qhan iwxtʼistu (1 Pedro 4:3, 5). Ukat Jesusax mä profecía tuqi Jehová Diosan jachʼa urupan puriniñapat parlkasax akham sarakïnwa: “Amuyasipxam, jan chuymanakamxa vicionakampi machañanakampi qalarayasipxamti, ukhamarak aka jakañan llakisiñanakampisa jan khä urun jumanakax akatjamat katjayasipxañamataki” sasa (Lucas 21:34, 35).

Jiljas umirïpki ukanakax kuns lurapxaspa jan ukhamäxapxañapatakix uk jichhax uñjañäni.

[Qhanañchäwi]

[4, 5 janan fotonakapa]

Jiljas umañax kunayman jan waltʼäwinakaruw api