Kunsa Jesusax jupa kikpat yatichäna

“Jupax khitïnsa, kawkits jutäna, kunatsa aka Uraqir jutäna ukat kunarus purtʼasïñapäna ukxa Jesusax sum yatïna.”(HERBERT LOCKYER, QILLQIRI)

JESUSARUSA yatichäwiparus iyawsäwinïñatakix nayraqatxa juparuw sum uñtʼañasa. Jupax khitïnsa, kawkitsa ukat kuna amtampis aka Uraqir jutäna ukwa yatxatañasa. Mateo, Marcos, Lucas ukat Juan qillqatanakanwa uka jisktʼanakarux qhanañchasi, uka qillqatanakanx Jesús kikpaw uk qhanañchtʼi, ukaw wali askixa.

Uraqin janïr yurkän ukhatpachaw utjxäna Mä kutix Jesusax akham sänwa: “Janïra Abraham utjkipanwa, nayax utjtxa” sasa (Juan 8:58). Abrahamax jakkäna ukkhat pä waranq maranak qhipat yuriskchïna ukhasti, ¿kunjamataraki Abrahamax janïr utjkipan yurisapänsti? “Alaxpachatwa nayax saraqanta” sasaw jupax qhanañchtʼäna (Juan 6:38, MT).

Diosan Yuqapa Alaxpachanxa, Diosax walja angelanakanïkchisa Jesusax janiw jupanakjamäkiti. Jupa kikpaw ‘Diosan mä sapa Yuqapätwa’ sasax säna (Juan 3:18). Jupa sapakipuniw Dios kikpan lurtʼataxa, ukatwa ‘Diosan mä sapa Yuqapa’ sataxa. Diosan taqi luratanakapax jupa tuqiw utjawayaraki (Colosenses 1:16).

‘Jaqin Yuqapa’ Jupa kikpat parlkasinxa uka arunak aytapunirïnwa (Mateo 8:20). Ukhamatwa jupax chiqpach jaqipunïskatap qhanañchtʼäna, janiw jaqir tukuta mä angeläkänti. Qullan ajayup tuqnämwa Diosax Yuqapan jakäwipxa María sat mä virgen tawaqun purakapar uchatayna. Ukhamatwa, Jesusax alaxpachan jakkasinxa aka Uraqin jan juchani jaqjam yurxäna (Mateo 1:18; Lucas 1:35; Juan 8:46).

Jutaniw sat Mesías “Nayax yattwa Cristo sutini Mesiasan jutañapa” sasin Samariankir mä warmix säna ukhaxa, Jesusax akham sänwa: “Ukax nayätwa, khititix jumamp parlki uka” sasa (Juan 4:25, 26). Mesías ukat cristo siski uka arunakax: “ajllita”sañ muni. Mä arunxa, Diosaw Jesusarux Jupan amtapa phuqañapatak ajllïna.

Wakiskir luräwipa Jupa kikpaw kuna wakiskir luräwinïnsa uk akham sasin qhanañchtʼäna: “Wakisirakiw nayanxa Diosan reinopat yaqha markanakaru yatiyir sarañaxaxa, ukataki khitanitarakïtwa” sasa (Lucas 4:43). Walja suma luräwinak lurkchïnsa, Diosan Apnaqäwipat yatiyañaw jupatakix jukʼamp wakiskirïnxa. Ukampis qhiparuw kuntï Diosan Apnaqäwipat yatichkäna uk yatxatañäni.

Akhakamax taqi kunanaktï yatxatawayktan ukanakax Jesusax jan aliq jaqikïtapwa uñachtʼayistu. * Alaxpachan jakaniwayatap laykuw yatichäwinakapax aka Uraqin jukʼamp askixa. Ukatwa yatichäwinakapax millón millón jaqinakatakix chuymar purtʼkiripunixa.

[Qhanañchäwinaka]