Nayrïri: Almax janiw jiwkiti

¿Kunjamatsa uka kʼari yatichäwix uñstäna? “Greciankir filosofonakan amuyuparjam yatichir nayrïr cristianonakax almax janiw jiwkiti sasaw yatichxapxäna. Maynin cuerpoparux taykapan purakapatpachaw Diosax mä alma lurtʼi ukat cuerpor usktʼi sasaw amuyapxäna.” (The New Encyclopædia Britannica, 1988.)

¿Bibliax kamsisa? “Jiwxapxi ukapachaxa, laqʼaruw tukxapxi, ukürpachaw amtatanakapax tukusxi” (Salmo 146:4).

“Jiwatanakax janiw kunsa yatipkiti” sasaw Bibliax yatichi. Ukatxa janiw munasiñapasa, uñisisiñapasa utjkiti sarakiwa, ukat sepulcror sarapki ukanxa “janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti” sasaw yaticharaki (Eclesiastés 9:5, 6, 10). Taqinis jiwirïtanwa cuerpon jiwatapxarux janiw jakxtanti. Jakäwisax velan ninampjamawa. Kunapachatix nin jiwayktan ukhaxa janiw kawkirus sarkiti jan ukasti ina chʼusarukiw tukusxi.

Cuerpon jiwatapxarux almax jakaskakiwa sasaw yatichapxi, ukham yatichapxatapatxa yaqha jisktʼanakar qhanañchañaw wakisxaraki: ¿Maynin jiwatapxarux kawkirus almapax sarxi? ¿Jan wali lurir jaqinakax jiwxapxi ukhax kawkirus sarapxi? Cristianüpxtwa sirinakax cuerpon jiwatapxarux jakañax utjaskakiwa sasin kʼari yatichäwi yatichañ qalltawayapxäna ukhaxa, aqkir infierno tuqit kʼari yatichäwi yatichañ qalltawayapxarakïna.

Aka qillqatanakat yatxattʼam: Eclesiastés 3:19, 20; Génesis 3:19.

CHIQA YATICHÄWI:

Maynix jiwxi ukhaxa, jakäwipax ukharukiw tukusxi.