Kunsa liytʼirinakax yatiñ munapxi

¿Qhawqha qullqsa churañajäpacha?

“Diosasti kusisit chuymampi chuririruw munaraki.” (2 Corintios 9:7.) Uraqpachanwa, yupaychäwinakar saririnakax uka arunak uñtʼapxi, ukat inas churirjamäpki ukats jukʼamp churapxañapäkaspa ukham amuyasipxarakchi. Yaqhip yupaychäwinakanxa taqiniw diezmo churapxañama sasax mayiñ yatipxi, uka diezmox sapa patakat tunka (10%) churaña sañ muni.

¿Qhawqhas churasiñapa ukax Bibliankiti? Ukat inas jumax akham jisktʼassta: “¿Qhawqha qullqsa churañajäpacha?” sasa.

Biblia qillqaskäna uka tiemponakanxa maynin amtataparjama ukat liyinakarjamaw qullq churapxirïna

Diosax Israelitanakar qhawqha qullqsa ukat kunjam churapxañapsa mayïna uk Bibliaw sum qhanañchi. (Levítico 27:30-32; Números 18:21, 24; Deuteronomio 12:4-7, 11, 17, 18; 14:22-27). Uka mayitanakarux janiw jan phuqañjamäkänti. Jehová Diosaxa israelitanakarux akham sänwa: Jumanakatï kamachinakajar istʼapxitätaxa, ‘jilarkir uraqinaka’ churapxäma sasa (Deuteronomio 28:1, 2, 11, 12).

Awisaxa, qhawqtï munapki ukakwa israelitanakax churapxañapäna. Amuytʼañataki, kunapachatï David reyix Jehová Diosatak mä templo lurañ amtkäna ukhaxa, markapankirinakax ‘phisqa waranqa [valorani] quri’ churapxäna (1 Crónicas 29:7, NM). * Aka Uraqir jutasax kuntï Jesusax uñjkäna uk amuytʼañäni. Jesusax “mä pobre ijma warmiru pä jiskʼa cobret lurat qullqi [templonkir cajar] uchir uñjarakïna”. ¿Qhawqha qullqsa churpachäna uk amuysnati? Jïsa, mä uru jurnäl irnaqatat pago katuqatäki ukhäñapatakixa ¡suxta tunk pusini kutiw ichuntañapäna! Ukham jukʼitaksa ichuntkchïnxa Jehová Diosarux kusisiyänwa siw Jesusaxa (Lucas 21:1-4).

¿Qhawqpunsa mä cristianox churañapa?

Diosax israelitanakarux qhawqha qullqis churapxañapa ukatakixa mä kamachi churäna, jichhürunakanxa cristianonakarux janiw ukarjamax mayisxiti. Ukampisa, chiqpach cristiano taman qhawqsa taqi chuyma churapxi ukax wali askiwa. Jesusax akham sänwa: “Katuqirit sipansa jukʼamp kusisiñaniw khititï churki ukaxa” sasa (Hechos 20:35).

Jehová Diosan Qhanañchirinakapaxa, Uraqpachan Diosat yatiyasiñapatakix qullqimpiw yanaptʼapxi. Churapki uka qullqimpix Bibliat apstʼat revistanak lurañataki ukat Tantachasiñ Utanak askichañataki jan ukax machaqat lurañatakiw irtasi. Janiw uka qullqimpix Diosan Arupat yatiyirinakarux pagaskiti. Jehová Diosan Qhanañchirinakapat mä qhawqhanixa, sapüruw Diosan Arup yatiyapxi, jupanakarux pasajepataki ukat gastonakapampitakix qullqimpiw yanaptʼapxi. Ukampis janiw maynis yanaptʼapxapunita sapkiti. Chiqas waljaniw tiempopsa qullqipsa Diosan arunakapat sapüru yatiyir sarasax gastasipxi, ukat janirakiw khitirus gastasitapat qullqix kuttʼayaskiti. Jan ukasti, kunjamtï apóstol Pablox carpanaka chʼukusin irnaqirïkänxa ukhamarakiw uka jilat kullakanakax kunayman irnaqäwinakan irnaqtʼapxi (2 Corintios 11:9; 1 Tesalonicenses 2:9).

Jehová Diosan Qhanañchirinakapax kuntï lurasipki ukar maynix yanaptʼañ munchi ukhaxa, ¿qhawqsa churaspa? Apóstol Pablox akham qillqatayna: “Sapa mayniw, kunjämtï chuymapanxa amtki ukhamarjam churañapa; janiw pä chuyma churañapäkiti, janirakiw maynin jariyatakis churañapäkarakiti, Diosasti kusisit chuymampi chuririruw munaraki” sasa (2 Corintios 8:12; 9:7).

[Qhanañchäwi]