¿Kunas iyawsäwixa?

IYAWSÄWIXA, jan sum yatxatas kunarus iyaw sañakiw sasaw waljanix amuyapxi. Amuytʼañataki, Estados Unidos markankir wali uñtʼat periodista H. L. Mencken chachax iyawsäwitxa akham qillqatayna: “Jaqinakax kunarus iyaw sapxakiwa ukat jan phuqasirjamäki ukarux jan amuytʼasis phuqasiniw sapxakirakiwa” sasa.

Ukampis, iyawsäwix janiw jan sum yatxatasa ukat jan sum amuytʼasis kunarus iyaw sañakïkiti sistuw Biblianxa. Iyawsäwitxa Hebreos 11:1 jiskʼa tʼaqan akham qillqatawa: “Katuqäwa sas taqi chuymamp suytʼktans ukawa, ukhamarak chiqpachapuni iyawsañasa kuntix jan uñjtan ukax chiqätapa”.

Kunas iyawsäwixa uk sum amuyañatakix aka jisktʼanakar qhanañchañaw wakisi:

• Chiqpach iyawsäwimpi ukat jan sum yatxatasa kunarus iyaw sañampixa, ¿kikpakïpachati?

• Biblian parlki uka iyawsäwit yatxatañaxa, ¿kunatsa wali wakiskirïpacha?

• ¿Kunjamatsa iyawsäwis chʼullqhiptaysna?

“Katuqäwa” sasin taqi chuyma suytʼañampi ukat “kuntix jan uñjtan ukax chiqätapa” uk amuyañampi

Hebreos 11:1 jiskʼa tʼaqa qillqaskäna uka tiemponakanxa, griego arut jaqukipata: “Katuqäwa sas taqi chuymamp suytʼktans” uka arunakax taqinin wali uñtʼatänwa. Alañataki, aljañataki uka documentonakanwa uka arunakax uñstirïna, ukax mä garantiyänwa, kunatï alatäki uk katuqañataki. Mä qillqatax uka jiskʼa tʼaqat parlkasax akham jaqukipasirakispa siwa: “Iyawsañaxa, katuqäwa sas suyktan ukan mä qillqatapawa (título de propiedad)” sasa.

Uka tuqit akham amuytʼaraksna. Wali uñtʼat tiendat alasisaxa utajaruw puriyanirapitani sasaw suytanxa. Alasktan ukhaxa mä factura katuqtanxa, ukaxa mä título de propiedad ukar uñtasitawa, ukasti kuntï alasktan uk katuqañasataki mä garantiyawa. Ukatwa katuqaw sasax taqi chuyma suytʼaskaraktanxa. Uka factura chhaqhaysna ukhaxa, janiw kunjamatsa jiwasankatap uñachtʼayksnati. Iyawsäwixa facturäkaspas ukhamarakiwa, mä arunxa “título de propiedad” sat documentomp sasiwa. Diosar taqi chuyma atinisiñäni ukhaxa, mä garantiaw utjarakistu kuntï Jupax churapxämaw siskistu ukanak katuqañataki. Ukampis iyawsäwis chhaqtaysna ukhaxa, janiw kunjamatsa Diosat kunsa katuqkaraksnati (Santiago 1:5-8).

Iyawsäwi tuqit parlkasaxa, Hebreos 11:1 qillqatan akham sarakiwa: “Kuntix jan uñjtan ukax chiqätapa” sasa, ¿ukax kamsañs muni? Amuytʼañäni: Intix jalsunisaxa alaxpachnäm sari ukat jaypʼuxa jalantxarakiwa, uk uñjasaxa Intix Uraqsa muytkaspa ukhamaw amuyasi. Ukampisa, astronomía ukat matemática yatxatäwirjamax uka tuqit akham uñachtʼayi: Intix janiw Uraq muytkiti jan ukasti Uraqiw Intirux muyukipi sasa. Taqi ukanakat sumpach yatxattan ukat iyaw saraktan ukhaxa, janis ukhamaw sañjamäkchixa, Uraqix Intir muytatap amuyasaw jan payachasisa ukhamaw saraktanxa. Ukar iyaw sasaxa, ¿jan sum yatxatasakit iyaw sistanxa? Janiwa. Sum yatxatasaw ukanakarux chiqaw sistanxa, ukatwa kunatï amuyusarjamax chiqjamäki ukanakampix jan apayasktanti.

¿Kunatsa iyawsäwinïñax wali wakiskirixa?

Chiqpach iyawsäwinïñatakiw Bibliax chʼamañchistu, sum yatxatasa taqi chuyma iyaw sañäni ukhaxa, pantjat amuyunak jaytxañatakiw yanaptʼistani, uka kasta iyawsäwinïñasatak chʼamachasiñasax wali wakiskiripuniwa, ukatwa apóstol Pablox akham säna: “Janiw Diosarux jan iyawsañampix kunapachas kusisiyksnati, jupar jakʼachasiñatakixa maynix iyawsañapawa Diosax utjatapa, ukhamaraki jupar thaqirinakarux bendecirïtapa” sasa (Hebreos 11:6).

Inas chʼullqhi iyawsäwinïñax chʼamakïchispa, kunjamsa iyawsäwisarux chʼamañchsna ukwa pusi tuqit uñjañäni.