Diosan amtapanxa Mariax mä suma luräwiniwa

JESUSAX walja jaqinakaruw yatichaskäna, ukhaw akatjamat mä warmix akham artʼanïna: “¡Kusisiñaniwa jumar wawachasin uywktam uka warmixa!” sasa. Jesusatï mamapar yupaychasiñap munasapänxa, ukhaw ukhamäñapatakix arsusapäna. Ukampisa, Jesusax akham sänwa: “¡Jukʼamp kusisiñanïpxiwa khitinakatix Diosan arunakap istʼapki, ukhamarak jaysapxi ukanakaxa!” sasa (Lucas 11:27, 28).

Jesusax janipuniw mamapar yupaychasiñapatakix jachʼar aptkänti, janirakiw arkirinakapar ukham lurapxañapatakis maykänti. Ukhamasti, ¿kunatsa Mariax walja yupaychirinakani? Jesusan mamapatxa kunayman yatichäwinakaw utji uka yatichäwinakatxa kamsis Qullan Qillqatanakax uk jichhax uñjañäni.

Diosan askipamp phuqtʼata ukat taqi warminakat sipansa Diosan bendecita

Diosan amtapanxa kuna luräwinïnisa uk janïr yatiykasaxa akham sasaw Gabriel angelax Mariar aruntäna: ‘¡María, kamisaraki. Jehová Diosax wali askitwa uñjtamxa ukat jumampïskarakiwa!’ sasa (Lucas 1:28, NM). Yaqhip Biblianakax akhamrakwa uka aruntxa jaqukipapxi: “¡Aruntsmawa, María! ¡Diosan askipamp phuqtʼata! Tatitux jumampiwa” sasa. Mä kutixa Mariax Elisabetar visitiriw saräna, jupasti Mariar uñjasax akham aruntäna: “Diosaw jumarux bendistam taqi warminakat sipansa, ukhamarak wawamarusa” sasa (Lucas 1:42). ¿Uka aruntanakaxa Mariar yupaychasiñapatakiw sissnati?

Janiw ukhamäkiti. Catoliconakax Gabriel angelan ukat Elisabetan aruntanakap Mariar rezasiñatak mä oracionarus uskupkchixa, Biblian janiw Mariar yupaychasiñapaw sasax kawkhansa yatichkiti. Uka aruntanakasti, Mesiasan mamapätap laykuxa wali askit uñjatätap uñachtʼayañatakikïnwa, janiw Mariar mä oracionan mayisiñatakïkänti. Janipuniw Biblian ukham yatichaskiti. Kunapachatï Jesusax arkirinakapar Diosat mayisiñ yatichkäna ukhaxa khitirus mayisipxañapäna ukxa sum qhanañchäna, ukat akham sasaw mayisïwip qalltäna: “AIaxpachankir nanakan Awkixa” sasa (Mateo 6:9).

Alaxpachan apnaqiri

Mariax “Alaxpachankir Reinaw” sasaw walja chiqanakan yatichapxaraki. Ukampisa, Bibliax janipuniw kawkhansa ukham sutichkiti. Jan ukasti, Mariax alaxpachankir Diosan markapanxa mä suma luräwiniwa sasaw Bibliax qhanañchi. ¿Kuna suma luräwinisa?

Nayaru taqi chuyma arkirinakatxa yaqhipax nayampiw alaxpachan apnaqapxani sasaw Jesusax qhanañchäna (Lucas 22:28-30). Uka ajllitanakaruxa Jesusaw yatichi, Diosatakix ‘sacerdotenakarakwa tukuyi. Taqi aka Uraqpacharu apnaqapxañapataki’ (Apocalipsis 5:10). Bibliarjamaxa, Mariax suma luräwi lurañataki ajllitanak  taypinkpachaw sissnawa. ¿Kunatsa ukham sistanxa?

Jesusan jiwatapatxa, Mariampi, Jesusan jilanakapampi ukat arkirinakapampix “mayakiw tantachasipxirïna, Tatitut oracionan mayisiñataki” ukwa nayrïr yatichäwin yatiqaniwaytanxa. Mä 120 jaqinakaw “yaqha warminakampi” kuna Diosat mayisiñatak tantachasipxäna (Hechos 1:12-15). Pentecostés urunxa “taqi jilatanakaw mayawjanaki tantachasipxäna” ukhaw Diosax qullan ajayup jupanakar churäna ukat yaqha arunakat parlañ qalltxapxäna sasaw Bibliax qhanañchi (Hechos 2:1-4).

Mariax mayni warminakamp chikaw qullan ajayu katuqäna, ukax Jesusaru alaxpachankir apnaqäwipan yanapañapatak ajllitätap uñachtʼayi. Ukatwa Mariax alaxpachan Jesusampïskatapa amuyasixa (Romanos 8:14-17). ¿Mariasa ukat mayni ajllitanakasa kunjamsa Diosan amtanakap phuqasiñapatakix yanaptʼapxani?

Jachʼa bendicionanak churañanwa Mariax yanapani

144.000 jaqinakaw sacerdotenakjama, taripirinakjama ukat reyinakjama Jesucristompi chika alaxpachan irnaqañataki jaktapxani siw Bibliaxa (Apocalipsis 14:1, 4; 20:4, 6). Diosar taqi chuyma luqtirinakatakixa Jesusan jiwäwip laykux kuna bendicionanakas utji ukanak katuqapxañapatakiw sacerdotenakjamax chʼamachasipxani, ukhamat Jehová Diosampix jukʼamp sum apasipxañapataki ukat sarnaqäwipsa qʼumachasipxañapataki ukat jañchi tuqitsa kʼumara sum jakasipxañapatakis yanaptʼapxarakiniwa (Apocalipsis 21:1-4). ¡Taqi ukanak phuqasiñapxa Jehová Diosar taqi chuyma luqtirinakax walpun suyapxi! *

Nayra tiemponxa, Jehová Diosan amtanakap phuqasiñapatakix Mariax mä suma luräwinïnwa, jichhürunakanxa ukhamarakiw yanapaski. Mariax wali munasir taykänwa ukat altʼat chuymani, istʼasiri, Diosarus taqi chuyma luqtiri ukhamänwa ukat jan waltʼäwinakarusa saykatarakïnwa ukatwa taqinitakis yatiqaskayaxa. Ukampisa, janiw Jesucristor yuritapatsa ni Diosan amtapanxa mä suma luräwinïtapataksa Mariat yatiqasis sarnaqañasäkiti, jan ukasti taqiniw Mariar respetañasa.

Mariax Diosar taqi chuyma luqtirinakjamarakiw Jehová Diosarukipuni yupaychi, ukaw jukʼampi yatiqaskayaxa. Jesucristox alaxpachanwa ajllitanakampi chika apnaqaski, Mariax jupanakampi chikaw alaxpachan Jehová Diosar yupaychasipki akham sasa: “Yupaychañasa, jachʼañchäwisa, jachʼa kankañasa, munañanïñasa, [Jehová Diosaru] khititix tronon quntʼatäki ukar churatäpan, ukhamarak [Jesucristo] Corderorusa wiñayan wiñayapataki!” sasa (Apocalipsis 5:13; 19:10).

[Qhanañchäwi]