LLÄTUNKA marankamakiw jilawayta. Ukajj 34 maranak nayraw Costa de Marfil markan pasäna. Jichhakamajj mä metro ukchʼakïtwa. Awk taykajajja, jan jukʼamp jiltañaj amuyasajja, jan llakisiñajatakejj trabajiñatakiw chʼamañchtʼapjjetäna. Ukatwa frutanak aljañatakejj utaj nayräjjan wali sum uchirïta. Uk uñjasajj waljaniw alasir jutapjjeri.

Walsa trabajchiyätjja, jiskʼa tansakïskayätwa. Kun lurañatakis wal chʼamachasiñajäna, tiendan utjkäna uka estantenakat kun apaqañas chʼamakïnwa. Taqe kunas jachʼa jaqenakatak luratkamakïnwa. Wal llaktʼasirïta, ukampis 14 maranëjjayäta ukhajj janiw ukhamäjjänti.

Mä kutejj pä Testigonakaw fruta alasir jutapjjatayna, ukhamatwa Bibliat yateqañ qalltta. Yateqkasajja, naya pachpat llakisiñat sipans kunja wakiskiris Diosar uñtʼañasa, amtanakap yatiñas ukwa amuyjjayäta. Bibliat yatjjatañajj wal yanaptʼawayitu. Salmo 73:28 qellqatajj wal gustitu. Uka tʼaqan qalltapajj siwa: “Nayasti Diosaruw jakʼachasï, ukaw nayarojj kusisiyitu” sasa.

Akatjamatwa familiajajj Burkina Faso markar sarjjapjjäna, qʼalapuniw jakäwijajj ukan mayjtʼäna. Costa de Marfil markanjja, frutanak aljasir taqeniw uñjapjjetäna, yatitäjjapjjänwa. Ukampis Burkina Faso markanjja janiw khitis uñtʼkitänti, waljaniw mayja nayranakampi uñchʼukipjjerïtu. Ukhamätap laykojja, walja semananakaw utat jan mistkayätti. Ukhamaruw Diosar jakʼachasiñajj kunja kusiskañas uk amtasiyäta. Ukatwa Testigonakan sucursalapar qellqayäta. Jupanakasti motot sarnaqeri Nani sat misioneraruw khitanipjjäna, uka kullakajj munkayäta ukhamapunïnwa.

Jakaskayäta ukanjja, laqʼa utjatap laykojj thakejj wali llustʼäriwa. Yamas jallupachajj wali ñeqʼëriwa. Nani kullakajj Bibliat yatichir jutasajj walja kutiw motopat jaqosïna, ukhampachas jutaskakïnwa. Mä kutejja, ‘tantachäwir sarañäni’ sasaw sitäna. ‘Ukatakejj utat mistuñajäniwa, jaqenakaw uñchʼukipjjetani, motoru panin makatasajj moto apnaqañajj chʼamäniwa’ sasaw amuyayäta. Ukhamsa amuykchiyätjja, tantachäwir sarañwa amtayäta. Ukatakejj kuntï Salmo 73:28 qellqatajj niya tukuyar siski ukaw yanaptʼitäna.  Ukansti siwa: “Tatay, jumaw arjjatirejjätajja” sasa.

Awisajj Nani kullakampejj ñeqʼerus jalantapjjerïkstjja, tantachäwir sarañ wali askitwa uñjapjjerïta. Ukanjja, janiw jan wali nayrampi uñchʼukipjjerïkituti. Llätunka phajjsitsti bautisasjjayätwa.

Salmo 73:28 tʼaqa tukuyarojj akham siwa: “Taqpach luräwinakamat yatiyä” sasa. Yatiyir sarañajj kunja chʼamäspas nayatakejj uk sum yatiyäta. Nayrïr kuti utat uta yatiyir mistkta uk sum amtasta. Jilïr jaqenakasa, wawanakas wal uñchʼukipjjetäna. Ukatsti nayjamarakiw sarnaqapjjeri, ukajj wal chuym ustʼayirïtu, ukampis jupanakajj jutïrin nayjamarak Paraison jakasipjjaspa ukwa munayäta. Uk amuyañaw jan aynachtʼañatak yanaptʼitäna.

Chʼam jan tukuñatakejj amparamp pedaleyañ mä triciclo alasiyäta. Yatiyir mistkayäta ukhajja, nayamp chik yatiyiri kullakaw parkinak nuksurïtu, bajadanakajj utjkäna ukhasti tricicloruw makatanirakirïna. Yatiyir sarañajj qalltan chʼamäkchïnsa qhepat kusisitaw jikjjatasjjayäta. Ukatwa 1998 maran precursor regularjam serviñ qalltta.

Waljaniruw Bibliat yatichayäta, jupanakat pusiniw bautisasjjapjje, sullka kullakajas bautisasjjarakiwa, ¡ukajj wal kusisiyitu! Jan walinakan jikjjataskayäta ukhajja, kunjamsa yaqhanakajj Biblia yateqasajj nayrar sartasipki uk yatiñajj wal chʼamañchtʼitäna. Mä urojja, malaria usump usuntatäyätwa, ukhaw Costa de Marfil cheqat mä carta katoqta. Burkina Faso markan mä universitarior Bibliat yatichañ qalltkayäta ukan cartapätaynawa. Juparojj qhepat mä jilataw yatichjjäna. ¡Janïr bautisatäkasin Bibliat yatiyir mistjjatap yatisajj wal kusisiyäta!

¿Kunjamsa qollqe toqet yanaptʼastjja? Usurnukstatanakar yanaptʼir mä organizacionaw chʼukuñ yatichitäna. Yatichirinakat maynisti, trabajirïtaj amuyasajj “jabón lurañ yatichapjjäma” sasaw sitäna. Jichhasti jabona, ukhamarak jabonsillonakwa lurta. Waljaniw ukanak alasipjjetu, yaqhanakarus nayat alapjjañapatakiw chʼamañchtʼapjjaraki. Jabonanak mayipkitu ukjja, nä pachpaw motojat jaytir sarta.

Jikhanit usutayätwa ukajj jukʼampiw usjjetäna. Ukatwa 2004 maran precursorjam serviñ jaytawayta. Ukampis yatiyirejj taqe chuymaw saraskakta.

Jaqenakajj lartʼasiritwa uñtʼapjjetu. Diosan markapankasajj wali kusisitapuniw jikjjatasta. Cheqas nayarojj Diosar jakʼachasiñaw kusisiyitu. (Sarah Maiga kullakan arsutaparjama.)