ISRAELITANAKAJJ Suma Oraqe katoqapkäna uka jakʼanakanjja, “walja” qoqanakaw utjäna sasaw Bibliajj qhanañchi (1 Rey. 10:27; Jos. 17:15, 18). Ukampis jichhürunakanjja, uka cheqanakan janiw walja qoqanakajj utj-jjeti, ukatwa yaqhepajj akham jisktʼasipjje: ‘¿Kuntï Bibliajj siski ukajj cheqapunïpachati?’ sasa.

Mä librojj akham siwa: “Nayra Israel markanjja, jichhürunakat sipans jukʼamp qoqanakawa jan ukajj chʼuminakaw utjäna” sasa (Life in Biblical Israel [La vida en el Israel bíblico]). Qollunakanjja, pino de Alepo (Pinus halepensis), encina de Palestina (Quercus calliprinos), terebinto (Pistacia palaestina) sat qoqanakaw jiläna. Sefelá sat cheqajj cordillera central ukat mediterránea jachʼa lamar qota jakʼanwa jikjjatasi, ukanjja sicómoro (Ficus sycomorus) sat qoqanakaw wal utjäna.

‘Israel markan yaqhep cheqanakanjja, janiw qoqanakajj utj-jjeti’ sasaw mä librojj qhanañchi. ¿Kunatsa? Qoqanakajj jukʼat jukʼat chhaqtawayi. Uka librojj akham qhanañchi: “Jaqenakajja, oraqejj yapuchañ utjañapataki, pasto achuyañataki, utanak maderanakamp lurañataki, phayañatak lawanak utjañapatakiw qoqanak phatʼanukuwayapjje” sasa (Plants of the Bible [Plantas de la Biblia]).