1. ¿Kunjamsa mä angelajj Supayar tukuwayi? Uk qhanañchtʼam.

QALLTANJJA wali sumwa mä angelajj Jehová Diosamp apasïna. Ukampis qhepatjja, jaqenakampi yupaychayasiñwa munjjäna. Uka jan wali amuyu apanukuñat sipansa, uka toqet lupʼiskakïnwa ukhamatwa juchar purtʼasïna (Sant. 1:14, 15). Jupasti Supaya sasin uñtʼatawa, ‘janirakiw cheqan achtʼkänti’. Diosar kutkatasitap laykusti ‘kʼarin awkiparuw’ tukuwayaraki (Juan 8:44, MT).

2, 3. ¿Kunatsa Diosan enemigoparojj “Satanás”, “Diablo”, “katari”, “dragón” sasin sutichasi?

² Kutkataskäna ukhat aksaruw Supayajj Diosan jachʼa enemigopar ukhamaraki jaqenakan enemigopar tukuwayi. Bibliarjamajja, Supayajj kunayman jan walinakwa luri, cheqas Supaya jan ukajj Satanás sutejja, “kutkatasiri” sañ muni. ¿Kunsa ukajj uñachtʼayi? Supayajja, janiw Diosan Taqe Kunjjar Munañanïñap munkiti, jan ukasti uñisiwa ukatwa uka contrajj taqpach chʼamapamp nuwasi. Jehová Diosan apnaqäwipajj tukusispa ukwa jupajj muni.

³ Apocalipsis 12:9 qellqatarjamajja, Supayajj Diablo sasin uñtʼatarakiwa, uka sutejj “kʼarintiri” sañwa muni. Supayajja, janiw Diosar respeto uñachtʼaykänti, jan ukasti ‘Diosajj kʼariwa’ sasaw säna. ‘Jachʼa katari’ sutejja, kunjamsa Supayajj Edén huertan  katari toqejj Evaru engañjäna ukwa amtayarakistu. ‘Dragón’ sutisti ajjsarkañ mä jachʼa animalatwa amtayarakistu. Supayajj ukhamawa, Diosan amtanakap jan phoqasiñapatakejj ajjsarkañ mä jachʼa animaljamaw saytʼasi, Diosan servirinakaparus qʼal tukjañ munaraki.

4. ¿Kunsa aka yatichäwin yatjjataskañäni?

⁴ Cheqansa Supayajj Diosat jitheqtayañ munistu, ukatwa Diosan Arupajj akham ewjjtʼistu: “Wali amuytʼasirïpjjam, jankʼakïpjjarakim, jumanakar uñisir Supayasti mä leonar uñtataw warartʼasisa sarnaqaski khitiru manqʼantañatakisa” sasa (1 Ped. 5:8). Ukhamajja, Supayajj kunjam chuymanisa ukwa aka yatichäwin kimsa toqet yatjjataskañäni. Ukaw Jehová Diosana ukhamarak markapana enemigopat jarkʼaqasiñatak yanaptʼistani.

5, 6. 1) ¿Kunjamatsa angelanakan wali chʼamanïpjjatap yattanjja? 2) ¿Kunjamatsa Supayajj ‘jiwayañatak chʼamanejja’?

⁵ Alajjpachan jakiri angelanakajj wali ‘chʼamanïpjjewa’ (Sal. 103:20). Jaqenakat sipansa jukʼamp chʼamani wali yatiñani ukhamäpjjewa. Diosar servir angelanakajj chʼamapampejj jaqenakaruw yanaptʼapjje. Amuytʼañataki, mä kutejja mä sapa angelakiw 185.000 asirio soldadonakar jiwarayäna. Mä sapa jaqejj janiw uk lurkaspänti, mä ejercitotakisa ukham lurañajj chʼamäsapänwa (2 Rey. 19:35). Yaqha horasasti, mä angelajj Jesusan apostolonakaparuw carcelat qhespiyarakïna, ukham lurasaw wali yatiñanïtapsa chʼamanïtapsa uñachtʼayäna. Uka angelajj guardianakan jan uñjkataw cárcel manqhar mantäna, punku jistʼarasinsti apostolonakaruw qhespiyäna, ukatjja jan uñjkatarakiw punku jistʼantjjäna. Guardianakajj ukankasipkchïnsa, janipuniw uka angelan taqe ukanak luratap amuyapkänti (Hech. 5:18-23).

⁶ Diosar servir angelanakajj jaqenakaruw chʼamapampejj yanaptʼapjje, ukampis Supayajj jan walinakwa chʼamapampejj luri. Cheqansa Supayajj wali chʼamaniwa jaqenakarus jan walinak lurañatakiw chʼamañchi, ukatwa Bibliajj jupat akham qhanañchi: ‘Akapacha apnaqeri’, ‘akapachan diosapa’ sasa (Juan 12:31; 2 Cor. 4:4). Supayajj ‘jiwayañatakis chʼamanirakiwa’ (Heb. 2:14). Ukajj janiw jupa pachpas taqe jaqenakar jiwaykaspa ukham sañ munkiti. Ukhamajj ¿kunatsa Bibliajj jaqe jiwayiriwa sasin sispacha? Maya, akapachajja Supayjam uñisiri nuwasiri jaqenakamp phoqantatawa. Paya, Eva warmejja Supayan kʼari arunakaparuw istʼäna, Adanasti janirakiw Diosar istʼkänti ukhamatwa juchasa jiwañasa utji (Rom. 5:12). Ukatwa Jesusajj akham säna: “Supayajj [...] jaqe jiwayiriwa” sasa (Juan 8:44). Cheqas ¡Supayajj wali chʼamani enemigosawa!

7. ¿Kunjamsa sajjranakajj wali chʼamanïpjjatap uñachtʼayawayapjje?

⁷ Supay contra saytʼktan ukhajja, janiw jupa contrak saytʼktanti, jan ukasti, ‘Jehová Diosajj janiw Taqe Kunjjar Munañanïkiti’ sasin sapki ukanak contraw saytʼaraktanjja. Diosat jitheqtir walja angelanakas jan ukajj sajjranakasa uka taypinkapjjarakiwa (Apo. 12:3, 4). Sajjranakajja, jaqenakar tʼaqhesiyasaw wali chʼamanïpjjatap kutin kutin uñachtʼayawayapjje (Mat. 8:28-32; Mar. 5:1-5). Supayasa ñanqha angelanakasa wali chʼamanïpjjewa, uk janipun armapjjañäniti (Mat. 9:34). Jehová Diosampi jan yanaptʼayasksna ukhajja, janipuniw kunapachas Supayarojj atipksnati.

8. 1) ¿Kuna amtanis Supayajja? (9 janankir foto uñjjattʼam.) 2) Amuyatamarjamajja, ¿kunjamsa jaqenakajj Supayat yateqasis jan walinak lurapjje?

⁸ “Supayasti mä leonar uñtataw warartʼasisa  sarnaqaski” sasaw apóstol Pedrojj säna. Mä qellqatarjamajja, griego arut jaqokipatäki uka “warariña” arojja, “manqʼat wali awtjat animalan wararitapa” sañwa muni. Cheqansa Supayajj uka animaljamäskapuniwa. Taqe aka oraqpachajj Supayan munañapankjjchisa, jupajj jaqenakar jiwarayañ munaskakiwa (1 Juan 5:19). Jupatakejja, akapachankir jaqenakajj mä jukʼa manqʼakïkaspas ukhamawa. Supayajj aka Oraqenkasipki uka ajllit cristianonakampiru, ‘yaqha uwijanakampiruw’ jan waltʼayañ muni, jupanakaw jupatakejj “mä jachʼa platökaspas” ukhamajja (Juan 10:16; Apo. 12:17). Supayajja Jehová Diosan markaparuw tʼunjañ muni. Nayra patak maranakatpachaw Supayajj Jesusan arkirinakapar uñisiñat arknaqawayi, ukham lurasaw kunja jan sinttʼasirisa uk uñachtʼayi.

9, 10. 1) ¿Kunjamsa Supayajj israelitanakar jan waltʼayäna? (Uñachtʼäwinakamp qhanañchtʼam.) 2) ¿Kunatsa Supayajj israelitanakar jan waltʼayañ munäna? 3) Jehová Diosan mä serviripajj jachʼa juchar purtʼaski ukhajja, ¿kunjamsa Supayajj jikjjataspacha?

⁹ Supayajj yaqha toqetarakwa jan sinttʼasirïtap uñachtʼayi. Amuytʼañataki, manqʼat wali awtjat leonajj jan sinttʼasisaw kuns manqʼanti. Janïr jiwaykasajj janiw sinttʼaskiti, jiwayjjasin manqʼantasasti janirakiw chuyms ustʼayaskiti. Supayajj niya ukhamarakiw jaqenakar jan walir purtʼayasajj jan sinttʼaskiti. Amtañäni, israelitanakan wachoq juchar purtʼasipjjañapsa jan ukajj jupanakatakik taqe kun munapjjañapsa wal suypachäna. Zimri chachan wachoq juchar purtʼasitapata ukhamarak Giezi chachan jupatakiki taqe kuns munirïtapat Biblian liytʼktan ukhajja, ¿kunjamsa jan sinttʼasiri Supayajj jikjjataspachäna uk amuysnati? (Núm. 25:6-8, 14, 15; 2 Rey. 5:20-27.)

¹⁰ ¿Kunatsa Supayajj israelitanakar jan waltʼayañ munpachäna? Uka markatwa Mesiasajj jutañapäna. Uka Mesiasaw Supayarojj jan mayampitak chhaqtayañapäna, Jehová Diosan Taqe Kunjjar Munañanïtapsa juparakiw uñachtʼayañapäna, uk Supayajj sum yatïna (Gén. 3:15). Israelitanakan Jehová Diosamp sum apasipjjañapsa janiw Supayajj munkänti, ukatwa jupanakar kunaymanit pantjasiyañ munäna. Amuytʼañataki, David chachan wachoq juchar purtʼasitap uñjasajj janiw sinttʼaskänti. Moisesajj Suma Oraqer mantañ  aptʼaskäna ukhasa janirakiw sinttʼaskänti. Cheqas Jehová Diosan mä serviripajj jachʼa juchar purtʼaski ukhajja, Supayajj wal kusisi. Jaqenakajj ukham jan walinakar purtʼasipki ukhaw Supayajj Jehová Diosar jiskʼachi (Pro. 27:11, NM).

11. ¿Kunatsa Supayajj Sara warmir yantʼpachäna?

¹¹ Kawkïr familiattï Mesiasajj jutañapäkäna uka familiarojj Supayajj wal uñisïna. “Mä jachʼa marka[ruw] tukuyäma” sasin Jehová Diosajj Abraham chachar siskäna ukhajj kunas pasäna uk amtañäni (Gén. 12:1-3). Kunapachatï Abrahamampi Sarampejj Egipto markankasipkäna ukhajja, uka marka apnaqer reyiw Sara warmir irpasïna, ukhamat jupamp casarasiñataki. Ukampis Jehová Diosaw Sara warmir jarkʼaqäna (Génesis 12:14-20 liytʼañataki). Isaacajj janïr naskäna ukhajja, niya ukhamarakiw Gerar marka apnaqer reyejj Sara warmimpïñ munäna (Gén. 20:1-7). ¿Supayati uka reyinakarojj Sarampïñ munapjjañapatak chʼamañchpachäna? Bibliajj janiw uk qhanañchkiti. Ukampis ak amtañäni, Sara warmejj Ur markan suma jakasiñwa jaytawayäna, ukhamat carpanakan jakañataki. Chachaparu jaytañapataki ukhamarak Jehová Diosaru serviñ jaytañapatakiw Supayajj uka reyinakan suma jakasiñapamp yantʼañ munpachäna. Sara warmejj jupa toqe Mesiasajj jutañapäkäna uk aptʼasispäna ukhajja, Supayajj wal kusisispäna. Chachapampi sum apasiñapsa, suma warmit uñtʼatäñsa, Jehová Diosampi sum apasiñapsa janiw Supayajj munkänti. ¡Supayajj jan sinttʼasiripuniwa!

12, 13. 1) Jesusajj naskäna ukhajja, ¿kunsa Supayajj luräna? 2) ¿Kunjamsa Supayajj Jehová Diosar loqtir wayn tawaqonakar uñjpacha?

¹² Jesusajj walja patak maranak qhepatwa nasïna. Nasjjäna ukhajja, Supayajj janiw Jesusat akham amuykpachänti: “Wali suma wawawa suma uñnaqtʼaniwa” sasa. ¿Kunatsa? Uka wawajj Abrahaman familiapatwa jutäna ukatsti jilsjjasajj Mesiasaruw tukuñapäna, Supayajj ukanak sum yatïna. Ukatsti Jesusajj ‘Supayan luratanakapwa tʼunjañaparakïna’ (1 Juan 3:8). ¿‘Mä wawar jiwayañajj sinti jan walïspawa’ sasat Supayajj amuypachäna? Janiwa. Jupatakejj kunatï walïki ukat jan walïkaraki ukanak lurañajj pachpakiwa. Ukatwa Jesusarojj naskäna ukhajj jankʼaki jiwayañ amtäna. ¿Kunsa Supayajj ukatak lurpachäna?

¹³ Kunapachatï Herodes reyejj ‘judionakan reyipan’ nasitap yatïna ukhajja, wal colerasïna jiwayañwa amtarakïna (Mat. 2:1-3, 13). Ukatwa akham säna: ‘Taqe yoqall wawanakaru jiwarayapjjam pä maranit aynacharu, taqe Belenankirinakaru, ukhamarak uka jakʼankirinakarusa’ sasa (Mateo 2:13-18 liytʼañataki). Jesusajj janiw ukan jiwayatäkänti. Ukampis ¿kunsa ukajj Supayat uñachtʼayistu? Jupatakejja, jaqen jakañapajj janiw kuna valoranïkisa ni wawanakan jakañapasa. Supayajj mä leonar uñtasitaw warartʼasis sarnaqaski. Jupajj jan sinttʼasiriwa, janipun uk armapjjañäniti.

14, 15. ¿Kunjamsa Supayajj jaqenakar engañji?

¹⁴ Jehová Dios contra saytʼasipjjañapatakiw Supayajj jaqenakar sallqjje, jan ukajj engañji (1 Juan 4:8). ¿Kunjamsa uk luri? Ajay toqen janis aynachtʼatäpkaspa ukhamwa jaqenakar amuyayi, mä arunjja, Diosan amigopäñajj janis wakiskaspa ukham amuyayi (Mat. 5:3). Supayajj jaqenakan amuytʼanakapjja chʼamaktʼayiwa ukhamat Jehová Diosan cheqa yatichäwinakap jan yateqapjjañapataki (2 Cor. 4:4).

¹⁵ Jehová Diosajj janiw yaqha diosanakar yupaychañas munkiti, Supayajj uk sum yati  (Éxo. 20:5). Ukatwa kunayman kʼari religionanakamp jaqenakar engañji. Kunapachatï jaqenakajj Jehová Diosar yupaychañat sipansa nayra achachilanakaparu ukhamaraki kunanakatï alajjpachansa akapachansa utjki ukanakar yupaychapjje ukhajja, Supayajj walpun kusisi. Khitinakatï taqe ukanak lurapki ukanakajj Jehová Diosarus kusisiyapkaspa ukhamwa amuyapjje, ukampis yupaychatanakapajj inamayakiwa. Isaías profetan tiempopanjja niya ukhamarakiw israelitanakampejj pasäna. Ukatwa Jehová Diosajj jupanakar akham säna: “¿Kunatsa qollqenakam kunatejj jan tʼantʼäki ukar inamaya churasipkta? ¿Kunatsa qollqenakam kunatejj jan askïki ukar inamay tukjasipkta? Sum istʼapjjeta, ukatsti suma manqʼanak manqʼapjjäta, sinti suma manqʼanak manqʼapjjäta” sasa (Isa. 55:2). Uka arunakampejja, kʼari religionanakajj jan wali manqʼampi sasïkaspas ukham amuytʼayasaw Diosajj jupanakar yanaptʼañ munaskäna.

16, 17. 1) ¿Kunatsa Jesusajj “¡nayat saraqet, Supaya!” sasin Pedror säna? 2) ¿Kunjamsa Supayajj engañjañ munistu?

¹⁶ Supayajja, Jehová Diosan taqe chuyma servirinakaparojj engañjarakispawa. Amtañäni, kunapachatï Jesusajj ‘jiwayapjjetaniwa’ sasin arkirinakapar säna ukhajja, apóstol Pedrojj munasiñat akhamwa Jesusar säna: “[Tata, jumata khuyapayasim, MT] ¡janiw ukajj jumar pasañapajj wakiskaspati!” sasa. Jesusasti kutikipstasin sänwa: “¡Nayat saraqet, Supaya!” sasa (Mat. 16:22, 23). ¿Kunatsa Jesusajj Pedror uka arunak sispachäna? Jesusajja, jaqenakar qhespiyañataki ukat Supayan kʼarïtap uñachtʼayañatakiw jiwañapäna. Janiw jupa pachpat khuyapayasiñ horasäkänti, ukampis Supayajj ukham lurañap wal munpachäna.

¹⁷ Aka ñanqha pachajj niyaw tukusjjani. Ukhamajj jan wali tiemponakanwa jaktanjja. Ukampis Supayajj uka toqet jan sinti llakisksnati, jan ukajj jiwas pachpat khuyaptʼayassna ukwa muni. Akapachan tukusiñapatakejj wali jaya tiempos faltkaspa, jan ukajj janis kunapachas tukuskaspa ukham amuyayañwa munistu. Ukampis ukajj janiw ukhamäkiti. Amuyasipjjapuniñäni, qhepa urunakanwa jaktanjja uk janipuni armañäniti (Mar. 13:37).

18, 19. 1) ¿Kunjam amuyañassa Supayajj muni? 2) ¿Kunjamsa Jehová Diosajj yanaptʼistu?

¹⁸ Jehová Diosajj janis munaskistaspa, juchanakas janipunis kunapachas perdonkistaspa ukham amuyañaswa Supayajj muni. Ukampis ukajj janirakiw cheqäkiti. Bibliajj akham siwa: “Diosasti askiwa, janiw armaskaniti kuntejj lurapkta, ukhamarak munasiñanakamsa uñachtʼayapjjarakta Diosankir jilatanakar yanaptʼasina ukanakatjja” sasa (Heb. 6:10). Kunjamtï uka qellqatajj siskejja, Jehová Diosajj taqe kunanaktï jupa layku lurktan ukanak wali askitwa uñji (1 Corintios 15:58 liytʼañataki). Cheqansa Jehová Diosajj janiw Supayar munaskiti, janirakiw perdonkarakinisa. Ukhamajj janipuni Supayan kʼari arunakapampejj engañayasiñäniti.

¹⁹ Supayajj wali chʼamaniwa, jan sinttʼasiriwa ukat sallqjjañwa munarakistu, ukwa aka yatichäwin yatjjatawaytanjja. Ukampis Jehová Diosan yanaptʼapampejj Supayar atipjsnawa. Kunanakampis jupajj sallqjjestaspa ukajj Biblian qellqatawa, uk yatiñaw sipitanakapar jan jaltʼañatak yanaptʼistu (2 Cor. 2:11). Ukampis janiw uka sipitanakat yatiñakejj wakiskiti, jan ukasti ukanakar jan jaltʼañatakiw chʼamachasiñasa. Ukatwa Bibliajj akham sistu: “Supayatakisti saytʼasipjjarakim, uka Supayasti jumanakatjja jaltawayjjarakiniwa” sasa (Sant. 4:7). Jutïr yatichäwinjja kunjamsa Supayan kimsa sipitanakapar saykatsna ukwa yatjjataskañäni.