JULIAN sat mä jilatajj akham siwa: “Tamajan mä yatiyäwi istʼayäta, yoqajaw tamat jaqsutäjjäna. Uk istʼasajj qʼalpun aynachtʼirïta. Jupajj jilïr yoqajawa, wali sum apasipjjayäta. Taqe kunwa jupampejj lurapjjerïta. Wali suma wawänwa, ukampis qhepat jan wal sarnaqjjäna. Esposajajj wal jachäna, janiw kunjam chuymachtʼañsa puedkayätti. ‘¿Awk taykjamajj kunsa jan sum lurawaypachätan?’ sasaw jisktʼasipjjerïta”.

Tamat maynir jaqsuski ukhajja, chuyma ustʼataw jikjjatastanjja. Ukhamasti ¿kunatsa ukajj munasiñatwa lurasi sasin sistanjja? ¿Bibliajj uka toqet kamsisa? ¿Kunatsa maynejj tamat jaqsuta uñjasispa?

Jehová Diosan mä Qhanañchiripajja, akanak utjipanwa tamat jaqsuta uñjasispa. Maya, bautisatäjjasin jachʼa jucha luratapata. Paya, jucha lurasin jan arrepentisitapata.

Jehová Diosajja, janiw jan pantjasis sarnaqañas maykistuti. Ukampis qʼom sarnaqsna ukwa Jupajj muni. Amuytʼañataki, Jehová Diosajj akanakat jitheqtapjjam sistuwa: wachoq juchata, kʼari diosanakar yupaychañata, lunthatasiñata, sallqjañanakampi aparañata, jaqe jiwayañata, layqasiñanakata (1 Cor. 6:9-10; Apo. 21:8).

Diosan mayitanakap phoqañajj janiw sinti chʼamäkiti jan walinakats jarkʼaqarakistuwa. Sumankañan jakasirinak taypina ukat confiykaya jaqenak taypin jakasiñajj wali kusiskañawa. Ukajj Diosar servir jilat kullakanakas taypinakwa uñjasi. ¿Kunatsa? Diosar katuyasiñatakejj Biblian kamachinakaparjam sarnaqañwa arsuwaytanjja.

Bautisat mä cristianotï pantjasirïtap layku mä jachʼa jucharu purtʼaschi ukhajja, ¿kunas pasaspa? Nayra tiemponjja, Diosar servirinakat yaqhepajj jachʼa juchanakar purtʼasipjjarakïnwa. Ukhamäkchïna ukasa, Jehová Diosajj janiw jupanakar jaytanukkänti. David reyiw ukhaman uñjasïna. Jupasti wachoq juchwa luräna, jaqerus jiwayarakïnwa, ukampis Natán profetajj Davitar akham sänwa: “[Jehová] Tatitojj janiw jumarojj juchamat mutuykätamti” sasa (2 Sam. 12:13).

Davitan taqe chuyma arrepentisitapatjja, Jehová Diosajj juchanakap perdonänwa (Sal. 32:1-5). Jichhürunakan ukhamarakiwa, Diosan mä serviripatï jan arrepentiskani, jan ukajj jan walinak luraskakini ukhaw tamat jaqsusispa (Hech. 3:19; 26:20). Jachʼa jucha uñjapki uka irpir chuymaninakatï maynin jan taqe chuyma arrepentisitap uñjapjjani ukhajja, tamat jaqsupjjaniwa.

Mayniru tamat jaqsuski ukhajj inas qalltan akham amuysna: ‘Jan munasiñatwa uk lurapjje’ sasa. Yamas jaqsutäki ukampi sum apaschïyätan ukhaw ukham amuysna. Ukampis munasiñatwa ukajj lurasi, ukwa Bibliajj amuytʼayistu.

Jesusasti sänwa: ‘Yatiñajj luräwinak toqew uñachtʼayasi’ sasa (Mat. 11:19). Jucha luririru tamat jaqsusitapajj taqeniruw yanaptʼi. ¿Kunjamsa? Uk kimsa toqet uñjañäni.

Juchaniru tamat jaqsusitapajj Diosan sutip jachʼañchi. Jehová Diosan sutip apirinakjamajja, kunjamjjay sarnaqchiñäni ukarjamaw Jehová Diosan sutip askitsa, jan askitsa uñjayañäni (Isa. 43:10). Mä wawajja, sarnaqatapampiw awk taykaparojj askitsa, jan askitsa uñjayaspa. Ukhamarakiw jiwasampejja, kunjamjjay Jehová Diosan sutip apirinakjamajj sarnaqchiñäni ukarjamaw jaqenakajj Jehová Diosar askitsa, jan askitsa uñjapjjani. Jiwasatï Diosan sutip apir markapjamajj kamachinakaparjama sarnaqañäni ukhajja, Diosan sutipajj jachʼañchatäniwa. Ezequiel tiempon niya ukhamarakïnwa, yaqha markankir jaqenakajja, Jehová Diosan sutip istʼasajj jankʼakiw judionakat amtapjjerïna (Eze. 36:19-23).

Jiwasatï wachoq juchan sarnaqsna ukhajja, Diosan qollan sutipajj jan walit uñjatäspawa. Apóstol Pablojj akham sasaw cristianonakar ewjjtʼäna: “Istʼasir wawanakjamajja, jan munañanakamarjam sarnaqapjjamti, kunjämtï janïra Diosar uñtʼkasajj sarnaqapkäyätajj ukhamjja. Ukampis jichhajj qʼoma jakañanpun jakjjapjjam, jumanakar jawsir Diosasti qollanätap layku. Diosan arunakapan qellqatasti sarakiwa: ‘Jumanakajj qollanäpjjam, nayasti qollanätwa uka layku’” sasa (1 Ped. 1:14-16). Cheqas Diosatakjam qʼoma sarnaqatasajj Diosan sutiparuw jachʼañchi.

Jehová Diosan Qhanañchirinakapat maynitï jucha lurañan sarnaqaspa ukhajja, amigonakapasa, uñtʼatanakapasa, uk amuyapjjaspawa. Juch luririru tamat jaqsusitapajja, Jehová Diosajj mä qʼoma markanïtapwa uñachtʼayi. Cheqas uka markankirinakajj Biblian kamachinakaparjamaw sarnaqapjje, ukhamat qʼoma sarnaqañ utjañapataki. Mä kutejja, Suiza markan mä jan uñtʼat jaqew Tantachasiñ Utar saratayna. Jupasti sänwa: “Nayajj jumanakamp chikaw Diosar loqtañ munta” sasa. Kullakapasti nayrajj Jehová Diosan Qhanañchiripätaynawa, ukampis wachoq jucha luratap laykuw tamat jaqsuta uñjasitayna. Uka chachajj saskakiwa: “Jan walin sarnaqerinakaru jaqsupki uka markankañwa nayajj munta” sasa.

Juchaniru tamat jaqsusitapajj Jehová Diosan markapa qʼomäñapatakiw yanaptʼi. Apóstol Pablojja, kunatsa jan arrepentisirinakajj tama taypin jan utjañapäki uka toqetwa Corinto markankirinakar ewjjtʼäna. Pablosti sänwa: “Mä jukʼa levadurajj taqpach tʼantʼa maswa poqtayejja” sasa. Jucha luririnakajja, kunjamtï levadurajj masa poqtaykejja ukamp sasiwa sañwa Pablojj munaskäna. Ukatwa akham ewjjtʼäna: ‘Jucha luririrojj jumanak taypit alissupjjam’ sasa (1 Cor. 5:6, 11-13).

Pablojj parlkäna uka ‘jucha lurir’ jaqejja, amuyatajj wachoqa juchanwa sarnaqpachäna. Tamankir yaqhep cristianonakasa uka jaqen luratapajj walikïkaspas ukhamwa uñjapjjäna (1 Cor. 5:1, 2). Uka jachʼa jucha lurir jaqerutï jan kunas kamachaskaspäna ukhajja, inas mayni cristianonakajj markankir jan wali sarnaqer jaqenakjam sarnaqjjapchispäna. Jachʼa juchanak luririnakar jan kun kamachañajja, jan ajjsarasa Diosan kamachinakap pʼakintañaruw chʼamachaspa (Ecl. 8:11). Janiw ukakïkiti, juch lurasin jan arrepentisirinakajja, tamankirinakan iyawsäwinakapwa aynachtʼayaspa (Jud. 4, 12).

Juchaniru tamat jaqsusitapajja, jupa pachpa amuyasiñapatakiw yanaptʼaspa. Mä kutejj Jesusajja, awkipan utapat sarjjer waynatwa parläna. Uka waynasti sarjjasinjja, jan walinakan sarnaqasaw herenciap tukuntäna. Awkipan utapat jayankasa jakañajj jan walïtapa ukat chʼamätapwa yateqäna, ukatwa amuytatasisin arrepentisisa familiapan ukar kuttʼjjäna (Luc. 15:11-24). Awkejj yoqapan arrepentisitap uñjasinsti, wal kusisïna sasaw Jesusajj säna. Ukaw kunjamas Jehová Diosajj jikjjatasiraki uk amuyañatak yanaptʼistu. Jupajj sistuwa: “Janiw nayajj qhoru jaqen jiwañapjja munkti, jan ukasti uka qhoru jakañapjja apanukpan ukatsti jakarakpan” sasa (Eze. 33:11).

Tamat jaqsutäpki ukanakajja, herencia tukuntir waynjamarakiw kuntï aptʼasiwayapki uk qhepatak amtasipjjaspa. Kunjamsa Jehová Diosampi ukhamarak Jupan markapampi sum apasisajj  wali kusisita jakasipjjäna, ukat kunjamansa jichhajj tamat jaqsutäjjasajj jikjjatasipjje ukanakaw amuytatasiyaspa.

Munasiñampi ukhamarak qhana arunakampi sañaw tamar kuttʼañatakejj yanaptʼaspa. Salmo qellqer Davitajj sänwa: “Aski jaqen jawqʼatapa katoqañajja wali askiwa, ukhamarak toqetapasa mä suma qʼapkir qollar uñtatarakiwa” sasa (Sal. 141:5, Aymar Biblia). Juyphi pachan paseot sarir mä jaqet parltʼañäni. Wali thayanjja, uka jaqejj qarjtaspawa, ikimpis niy atipayasirakispawa. Jupatï khunu khunun ikjaspa ukhajja, jiwaspawa. Yanapirinakan puriniñapkamajja, compañeropaw jan ikjañapatak ajanut sapa kuti tʼajjllitataspa. Ukajj usuchkchinisa, jan jiwañatakiw yanaptʼaspa. Davitajj ukhamarakiw aski jaqet cheqañchäwi katoqañajj jupan askipatakïtap amuyäna.

Cheqas tamat jaqsutäñaw juchachasirirojj amuytʼasiñapatak yanaptʼaspa. Qalltan parltʼaniwayktan uka Julian jilatan yoqapajja, 10 maratwa jan walinak apanukus Diosan markapar kuttʼanjje. Jupasti siwa: “Tamat jaqsutäñaw kuntï lurkayäta ukajj jan walïtap amuyañatak yanaptʼawayitu. Ukham cheqañchäwi katoqañajajj wakisipunïnwa” sasa (Heb. 12:7-11).

Mayniru tamat jaqsuski ukajj wali llakkañawa. Ukampis ukajj janiw jiwasar qʼal aynachtʼayañapäkiti. Kuna amtampitï jaqsuski uk phoqasiñapatakejj taqeniw yanaptʼsna.

Irpir chuymaninakat khitinakatï jucha luririnakar tamat jaqsutätap yatiyapki ukanakajja, Jehová Diosat yateqasisin munasiñ uñachtʼayañatakiw chʼamachasipjje. Ukatsti, wasitampi tamar kuttʼaniñapatakejj kunsa lurañapa ukjja, munasiñampi ukat qhana arunakampiw qhanañchtʼapjjañapa. Ukhamarus ukanak amtayañatakejja, arrepentisipjjatap uñachtʼayapki ukanakarojj sapa maraw irpir chuymaninakajj visittʼapjjañapa. *

Familiaranakajja, tamat jaqsuñ amtasiwayki ukar respetasaw tamaru ukhamarak juchachasiriru munasipjjatap uñachtʼayapjjañapa. Julian jilatajj akham siwa: “Yoqajajj wawajaskakïnwa, ukampis jan wali sarnaqatapaw jupampi sum jakasiñataki jarkʼapjjetäna” sasa.

Tamankir jilat kullakanakajja, jaqsutanakampi jan jikisisa, jan parlasaw cheqpach munasiñ uñachtʼayapjjaspa (1 Cor. 5:11; 2 Juan 10, 11). Ukhamatwa Jehová Diosajj irpir chuymaninak toqe juchañchki ukar yanaptʼapjjani. Ukatsti tamankirinakajj jaqsutan familiaranakaparuw munasiñampi yanaptʼapjjañaparaki, cheqas wali llakitaw jupanakajj jikjjatasipjje. Juchachasirin familiarapäpjjatap laykojja janiw tamankirinakajj yaqhachapjjañapäkiti (Rom. 12:13, 15).

Julian jilatasti siwa: “Jucha luririnakaru Jehová Diosan markapat jaqsutäpjjañapajj wakisipuniwa, ukaw Diosan kamachinakaparjam sarnaqañatak yanaptʼistu. Maynin tamat jaqsutäñapajj wali llakkañäkchisa, qhepat maynir yanaptʼaspawa. Jan wali luratapat yoqajaru jaqsupkäna ukajj janis kunäkaspa ukham uñjiriskayäta ukhajja, janipuniw amuyaskaspänti” sasa.