1-3. ¿Kunatsa Pablojj Jehová Diosar taqe chuyma confiyäna? (Aka janankir dibujo uñjjattʼam.)

NAYRÏR patak maranakanjja, Roma markan jakasir cristianonakajj jan wali tiemponwa jakapjjäna. Romanonakajj jan sinttʼasisaw jupanakar arknaqapjjäna. Cristianonakas jaqenakar uñisipkaspa, markan phichantatäñapatak jupanakas juchanïpkaspa ukhamwa uñjapjjäna. Walja cristianonakaruw katuntapjjäna, yaqhepanakarusti manqʼantatäpjjañapatakiw monte animalanakar churapjjäna. Ukatsti yaqhepanakarojj lawar chʼakkatasinwa jakkirpach phichantapjjäna, ukhamat arumajj markar sum qhantʼañapataki. Cristianonakajj ukhamanakan uñjasipjjañap sumwa yatisipjjäna.

² Uka tiemponwa romanonakajj apóstol Pablor katuntapjjäna. Ukhaman uñjasisajj inas jupajj akham jisktʼaschïna: “¿Cristianonakajj yanaptʼapjjpachïtaniti?” sasa. ¿Kunatsa? Mä kutejj sinti jan waltʼäwinwa uñjasïna ukat janiw khitis yanaptʼkänti. Ukampis  Pablojj sänwa: ‘Jesusaw yanaptʼitäna, chʼamsa churarakitäna’ sasa. Ukatsti, ‘leonan lakapat qhespiyitu’ sasaw sarakïna (2 Tim. 4:16, 17). *

³ Pablojj taqe chuymaw Jehová Diosar confiyäna. ¿Kunatsa? Diosajj kunjamsa nayrajj yanaptʼäna ukwa amtäna. ‘Aka jan waltʼäwin aguantañatakisa, jutïrin kuna jan walir atipjañatakis Diosaw chʼam churitani’ sasaw taqe chuyma confiyäna. Ukatwa akham säna: “Tatituw taqe jan walit qhespiyaskitani” sasa (2 Tim. 4:18). Cristiano jilanakajajj janis yanaptʼapkchitanejja, Jehová Diosampi Jesusampiw yanaptʼapjjetani sasaw taqe chuym confiyäna.

4, 5. 1) ¿Khitis yanaptʼapunistaspajja? 2) ¿Kunjamatsa Jehová Diosampejj jukʼamp sum apasisma?

⁴ ¿Awisajj sapaki, sinti jan walin jikjjatasirïtati? Inas jan trabajoni, usuntata, yateqañ utan jan waltʼäwinakana, jan ukajj kunayman yaqha jan waltʼäwinakan uñjasirïsta. Ukhaman uñjasis jan khitin yanaptʼatajj inas chuyma ustʼat jikjjatasirïsta. Cheqas jaqejj janiw yaqhep jan waltʼäwinak askichkaspati. Ukhamanakan uñjasisajj ¿kunsa lurasma? Jehová Diosaruw confiyañama, ukatakiw Bibliajj chʼamañchtʼistu (Pro. 3:5, 6). ¿Diosar cheqapunit confiysna? ¡Jïsa! Jehová Diosajj servirinakapar yanaptʼiwa, ukjja Biblian utjki uka sarnaqäwinakaw uñachtʼayistu.

⁵ Jumatï jan walin uñjassta ukat janirak khitis yanaptʼkstam ukhajja, jan sint llakisimti. Pablot yateqasim, jan waltʼäwinakan uñjasisajj Jehová Diosar taqe chuym confiyam. Ukatsti ukhaman uñjasisajj kunjamsa Jehová Diosajj yanaptʼasktam uksa juma pachpaw amuyañamaraki. Ukhamtï lurätajja, Jehová Diosarojj jukʼampiw confiyäta ukat jukʼamp sumwa Jupampejj apasirakïta.

6. Sinti jan walin uñjasisajja, ¿kunatsa awisajj Jehová Diosar confiyañajj chʼamakïspa?

⁶ Sinti jan walin uñjasisajj wali llakitas jikjjataskasma ukham amuytʼañäni. Uka jan waltʼäwi askichañatakejj taqe kunwa lurta, Jehová Diosarus yanaptʼap mayisiraktawa. Ukanak lurasajj janiw sinti llakisiñamäkiti, Jehová Diosaw yanaptʼitani sasaw confiyañama (Salmo 62:8; 1 Pedro 5:7 liytʼañataki). Jehová Diosan cheqpach amigopäñ munsta ukhajja, Jupar taqe chuyma confiyañwa yateqañama. Ukampis ukajj chʼamakïspawa. ¿Kunatsa? Jehová Diosajja, maynin mayisitanakaparojj janiw awisajj jankʼak jayskaspati, ukatwa Diosar confiyañajj chʼamakïspa (Sal. 13:1, 2; 74:10; 89:46; 90:13; Hab. 1:2).

7. Jehová Diosajj mayisitanakasar ¿kunatsa awisajj jan jankʼak jayskaspa?

⁷ ¿Kunatsa Jehová Diosajj mayisitanakas awisajj jan jankʼaki jayskaspa? Uk amuytʼañatakejj ak amtañasawa, Jehová Diosajj mä awkjamawa sasaw Bibliajj qhanañchi (Sal. 103:13). Awk taykanakajja, awisajj janiw wawanakaparojj kuntï munapki uk churapkapuniti. Churañ munapjjchi ukhasa, janiw ukaratpach churapkiti. Yaqhep wawanakajj caprichotakwa kuns mayipjje. Ukhamarus awk taykanakajja, kuntï wawanakapajj mayipki ukajj jupanakatakisa, yaqhanakatakis walikïskiti janicha uk sum amuytʼapjje. Jupanakatï wawanakapan taqe mayitanakap jankʼak churapjjaspa ukhajja, wawanakapan esclavoparuw tukupjjaspa. Ukampis awk taykanakajja, kunsa wawanakapajj munapjje, kunapachas churañajj wakisispa uk sumwa yatipjje. Alajjpachankir Awkisampejj niya ukhamarakiwa. Jupajj wal munasistu, kunsa muntan  ukat kunapachas churañajj wakisispa uk sum yati. Ukatwa kunjamsa Jehová Diosajj mayisitanakasar jaysani ukjja pacienciamp suytʼañasa (Isaías 29:16; 45:9 uñjjattʼarakïta).

8. Mä jan waltʼäwitï jiwasatak wali chʼamäni ukhajja, ¿kunsa Jehová Diosajj lurani?

⁸ Ak amtañasarakiwa, qawqsa sapa maynejj aguantirjamätan uk Jehová Diosajj sum yati (Sal. 103:14). Jupajj wakiski ukarjamaw chʼam churistu. Awisajja, janis aguantirjamäjjsna ukhamwa amuyassna. Ukampis mä jan waltʼäwitï jiwasatak wali chʼamäni ukhajja, Jehová Diosaw aguantañatak yanaptʼistani (1 Corintios 10:13 liytʼañataki). Ukhamasti, qawqsa aguantirjamätan uk Jehová Diosajj sum yati, uk yatiñaw jan sinti llakisiñatak yanaptʼistu.

9. Jehová Diosajj mayisitanakam jan jankʼaki jayskani ukhajja, ¿kamachañamasa?

⁹ Jehová Diosajj mayisitanakam jan jankʼaki jayskani ukhajja, pacienciampiw suytʼañama. Ak janipun armasimti, Jupajj wal yanaptʼañ munistu, ukampis kunapachay wakischini ukhaw yanaptʼistani. Bibliajj siwa: “[Jehová] Tatitojj jumanakat khuyapayasiñatakiw suyasipktam, jupasti walipuniw munasiñapjja uñachtʼayañ munapjjtam, Tatitusti khuyapayasiri cheqapa Diosarakiwa. ¡Kusisiñanïpjjew jupar suytʼirinakajja!” sasa (Isa. 30:18).

10-12. 1) ¿Kunatsa usuntat mä familiarar uñjañajj chʼamakejja? 2) Jan waltʼäwinakan uñjasis Jehová Diosar confiytan ukhajja, ¿Jupamp sum apasitasajj kunjamasa? Uk mä uñachtʼäwimpi qhanañchtʼam.

¹⁰ Payïr tʼaqanjja, Pablojj ‘leonan lakapatwa qhespïna’ sasaw yatjjataniwaytanjja. Jumatï Pabljam mä sinti jan waltʼäwin uñjassta ukhajja, ¿kunsa lurasma? Jehová Diosar confiyañamaw wakisi. Wali usuntat mä familiaramarus uñjkasma ukham amuytʼañäni. Jan aynachtʼañatakisa, suma amtanakar puriñatakisa Jehová Diosaruw yanaptʼa mayisiñama. * Ukham lurasajj janiw sinti llakisiñamäjjeti, ¿kunatsa? Kunjamsa jikjjatasta ukjja, Jehová Diosajj yatiwa, ukatwa jan sinti llakisiñamäjjeti. Ukhamarusa jan walinakan aguantañatakisa, Jupat jan jitheqtañatakis Diosaw yanaptʼaskätam uksa yatiraktawa (Sal. 32:8).

¹¹ Awisajja, Jehová Diosajj janis yanaptʼkiristam ukhamwa amuyasisma. Usuntat familiaramar qollañatakejj inas doctoranakajj may may sapjjeristam. Jan ukajj inas familiaranakaman chuymachtʼatäñ suysta, ukampis chuymachtʼañat sipansa jukʼamp jan walinakwa lurapjjeristam. Ukhamanakan uñjasisajja, Jehová Diosaruw yanaptʼa mayisiskakiñama, jukʼampirakiw Jupar jakʼachasiskakiñama (1 Samuel 30:3, 6 liytʼañataki). Ukatjja, Jehová Diosan yanaptʼap uñjasajj jukʼamp sumwa Jupampejj apasïta.

¹² Lidia * sat kullakat amuytʼañäni. Jupajj walja tiempow awk taykaparojj janïr jiwapkipan uñjäna. Kullakasti siwa: “Nayasa, esposojasa, jilajasa, walja kutiw janis kuns lurirjamäjjapjjerista ukham amuyasipjjerïta. Awisajja aguantañajj chʼamakïnwa. Ukampis kunjamsa Jehová Diosajj aguantañataki yanaptʼawayapjjetu uk jichhakiw qhan amuyasipjjta. Jehová Diosaw aguantañatakejj chʼam churawayapjjetu, yamas jan waltʼäwinak jan askichirjamäpkayäta ukhaw yanaptʼawayapjjetu” sasa.

13. ¿Kunjamsa Jehová Diosar confiyañajj Rosalía kullakar yanaptʼäna?

¹³ Jehová Diosar taqe chuyma confiystanjja, sinti jan waltʼäwinakan uñjaskañäni ukhajj Jupaw aguantañatak yanaptʼistani. Ukaw Rosalía  sat mä kullakampejj pasäna. Esposopajj janiw Jehová Diosan Qhanañchiripäkiti ukat jupat divorciasiñwa amtäna. Ukatjja, uka tiemponwa kullakan jilapajj mä jan wali usunïtap yatisirakïna. Mä qawqha tiempotjja, jilapan esposapaw jiwjjarakïna. Taqe ukanakajj Rosaliar wal aynachtʼayäna. Uka jan walinakat mä jukʼa sum jikjjatasjjäna ukhajja, precursorjam serviñwa qalltäna. Ukhamaruw mamapajj jiwjjarakïna. ¿Kunas taqe ukanak aguantañatakejj Rosalía kullakar yanaptʼäna? Jehová Diosar sapür mayisiña. Kuna amtar puriñatakisa jupajj Jehová Diosar mayisipunirïnwa. Kullakasti siwa: “Jehová Diosajj wali suma amigojapuniwa, naya pachparu jan ukajj yaqhanakar confiyañat sipansa, Jehová Diosar confiyañwa yateqawayta. Janipuniw kunas faltapkitänti, ukhamatwa Diosajj nayar yanaptʼaskatap amuyirïta. Jehová Diosamp chiktʼatäkiristsa ukham amuyasirïta” sasa.

14. Familiaramat maynitï tamat jaqsutächi ukhajja, ¿kunjamsa Jehová Diosajj yanaptʼiristam?

¹⁴ Jichhajj yaqha jan waltʼäwit parltʼarakiñäni. Mä familiaramas tamat jaqsutäkaspa ukham amuytʼañäni. Janiw tamat jaqsutanakamp parlañasäkiti sasaw Bibliajj qhanañchi, uk jumajj sum yattajja (1 Cor. 5:11; 2 Juan 10). Ukampis uka familiaramar munasitam laykojja, Biblian mayitaparjam phoqañajj inas chʼamächispa. * Ukhaman uñjassta ukhajja, ¿kunjamsa Jehová Diosajj yanaptʼiristam? Jupat jan jitheqtasa serviñamatakiw chʼam churätam. Ukhamajj Jehová Diosar confiyam ukaw Jupar jukʼamp jakʼachasiñataki yanaptʼätam.

15. ¿Kunatsa Adanajj Jehová Diosar jan istʼkäna?

¹⁵ Uka toqet parlkasajj Adán chachat amuytʼañäni. ¿Kunatsa jupajj Evan churat achu  manqʼantäna? ¿Jehová Diosar jan istʼasajj wiñayatakiw jakäjja sasat amuypachäna? Janiwa. Bibliansti siwa: “Adanajj janiw sallqjatäkänti” sasa (1 Tim. 2:14). Ukhamajj ¿kunatsa Adanajj Jehová Diosar istʼañat sipansa Evaru istʼpachäna? Jehová Diosat sipansa, Evaruw munasïna, ukatwa Diosar jan istʼkänti (Gén. 3:6, 17). ¿Kunsa ukajj yatichistu?

16. ¿Khitirus taqenit sipansa munasiñasa, ukat kunatsa?

¹⁶ Taqe kunat sipansa, Jehová Diosaruw munasiñasa (Mateo 22:37, 38 liytʼañataki). ¿Kunatsa? Ukaw familiaranakasar yanaptʼani, jupanakajj Diosar servirïpjjpansa janisa. Ukatwa Jehová Diosar sapürutjam jukʼamp munasiñataki ukat confiyañatak chʼamachasiñama. Familiaraman tamat jaqsutätap layku llakita uñjassta ukhajja, Jehová Diosaruw kunjamas jikjjatasta uk yatiyañama (Rom. 12:12; Fili. 4:6, 7). * Mä familiaran tamat jaqsutätapajj wali llakkañäspawa, ukampis ukajj Jehová Diosamp jukʼamp sum apasiñatakis yanaptʼkiristam ukhamwa uñjañama. Ukhamatwa Diosar confiyäta ukatsti Jupar istʼatamatjja taqe kunas walikïniwa.

17. Jiwasatï jan inaktʼas yatiyaskakiñäni ukhajja, ¿kunsa Jehová Diosajj lurani?

¹⁷ ¿Kunatsa Jehová Diosajj Pablor ‘leonan lakapat qhespiyäna’? Pablojj akham sänwa: “Qhespiyasiñ arunak parlañajjataki, khitinakatejj Tatitur jan uñtʼapki uka jaqenakan istʼapjjañapataki” sasa (2 Tim. 4:17). Jichhürunakanjja, Jehová Diosajj ukhamarakiw mä luräwi churistu, ukasti jaqenakar yatiyir sarañawa. Jupajj ‘yanapirinakaparjamaw’ uñjistu (1 Cor. 3:9, MT; 1 Tes. 2:4). Jiwasatï jan inaktʼas yatiyaskakiñäni ukhajja, kunatï wakiski uk Jehová Diosajj churapunistaniwa (Mat. 6:33). Ukatjja, Jupajj mayisitanakasar jaysapuniniwa sasin suytʼañas janiw sinti chʼamäkaniti.

18. ¿Kunsa Jehová Diosamp sum apasiñatakisa, Jupar confiyañatakis lurañasa?

¹⁸ Jehová Diosamp sapürutjam jukʼamp sum apasiñatak chʼamachasim. Kunapachatï sinti jan waltʼäwin uñjasïta ukhajja, uka jan waltʼäwejj Jehová Diosar jakʼachasiñatakis yanaptʼkiristam ukham uñjam. Biblia liyipunim ukat yatjjatarakim, liytʼkta ukanakat lupʼiñatakis tiempo apstʼasirakim. Jehová Diosar mayisiñ janipun jaytamti, Jupar jan qarjtas serviskakim. Taqe ukanaktï lurätajja, Jehová Diosajj jichhasa jutïrinsa jan waltʼäwinakar saykatañatakejj yanaptʼapunïtamwa.