1. Jesusajj wal ‘kusisïna’ sasajja, ¿kunatsa Bibliajj sispacha? (Aka janankir dibujo uñjjattʼam.)

JESUSAJJ 70 arkirinakaparuw Diosan Reinopat yatiyir sarapjjañapatak khitäna. Ukampis jupanakajj uñisirinakapan jan waltʼayataw uñjasipjjañapäna. Sañäni, judionakan religión pʼeqtʼirinakapajj amuytʼasirinaka yatjjatatanaka ukhamäpjjänwa. Jupanakajja, Jesusarojj mä carpinteron yoqapakïkaspas ukham uñjayañ munapjjäna (Mar. 6:3). Jesusan arkirinakaparusti, jan yatjjatata aleq jaqenakarjamakiw uñjayañ munapjjarakïna (Hech. 4:13). Ukhamajj yatiyäwit kunjamsa kuttʼanipjjani uk Jesusajj wal yatiñ munäna. Arkirinakapajj ñanqha ajayunakan jan waltʼayatas uñjasipkchïnjja, Jesusan mayitanakap phoqapjjänwa, wali kusisitarakiw Diosan Reinopat yatiyasajj kuttʼanipjjäna. Uk uñjasasti Jesusajj wal ‘kusisïna’ sasaw Bibliajj qhanañchi. Cheqas kunja kusisitas jikjjatasïna ukajj nayranakapan qhanaw amuyaspachäna. Ukampis Jesusan arkirinakapajja, ¿kunatsa jan ajjsartʼasa wali kusisita yatiyapjjpachäna? (Lucas 10:1, 17-21 liytʼañataki.)

2. 1) ¿Kunatsa Jesusan arkirinakapajj wawanakjamäna? 2) Jan amuyañjam Biblian cheqa yatichäwinakap amuyañatakejja, ¿kunas Jesusan arkirinakapar yanaptʼäna?

² Jesusasti akhamwa Jehová Diosar säna: “Yupaychsmawa,  Awkejja, munañanirakïtawa alajjpachansa akapachansa. Jumawa yatiñ kankañ imanttajja wali yatiñan jaqenakatjja; ukatsti jukʼa yatiñan jaqenakaruw uñachtʼaytajja. Jïs, tata, ukhamwa jumajj muntajja” sasa (Mat. 11:25, 26). ¿Kunatsa Jesusajj arkirinakapar jukʼa yatiñani, mä arunjja, wawanakjamäpjjewa sasin sispachäna? Arkirinakapajj janiw jachʼa jachʼa tukurïpkänti, jan ukasti, wali altʼat chuymanïpjjänwa. Maysa toqetjja, judionakan religión pʼeqtʼirinakapajj wali yatjjatatanakäpjjänwa, wali yatiñanïpkaspas ukhamaw amuyasipjjäna, ukampis Jesusan arkirinakapajj janiw ukhamäpkänti, jan ukasti wawanakjamaw yatichayasipjjerïna (Mat. 18:1-4). Ukham altʼat chuymanïpjjatap laykojja, Jehová Diosajj qollan ajayupampiw jupanakar yanaptʼäna, ukhamatwa jan amuyañjam Biblian cheqa yatichäwinakap amuyapjjäna. Ukampisa, judionakan religión pʼeqtʼirinakapajj Supayampiw apayasipjjäna, ukatwa Diosan yatichäwinakap jan amuyapkänti.

3. ¿Kunsa aka yatichäwin yatjjataskañäni?

³ Jehová Diosajja, altʼat chuymaninakaruw Biblian cheqa yatichäwinakap amuyapjjañapataki yanaptʼäna, uk uñjasajj walpun Jesusajj kusisïna. ¿Jichhürunakan ukhamarakti altʼat chuymaninakan Biblian cheqa yatichäwinakap amuyapjjañapataki yanaptʼaskpacha? Jïsa, yanaptʼaskiwa. ¿Kunatsa ukham sistanjja? Aka yatichäwinwa kunjamsa Jehová Diosajj altʼat chuymaninakarojj jan amuyañjama Biblian cheqa yatichäwinakap amuyapjjañapatak yanaptʼi uk yatjjataskañäni.

4. Yatiyañataki lenguaje sencillo revistajja, ¿kunatsa mä suma regalowa sasin sistanjja?

⁴ Aka qhepa maranakanjja, Jehová Diosan markapajj jukʼamp qhana ukat amuykañwa yatichjje. Amuytʼañatakejj kimsa toqet uñjañäni. Maya, Jehová Diosan markapajj Yatiyañataki lenguaje sencillo revistwa lurawayi. * Ukasti, khitinakatï jan sum liytʼasiñ yatipki, jan ukajj jan sum mä aru parlañ yatipki ukanakatakejj suma regalopuniwa. Ukhamarusa, wawanakaruw sum amuytʼapjjañapatakejj yanaptʼi, ukwa walja awk taykanakajj amuyapjje. Walja familianakarakiw Oraqpachan Jilïr Irpirinakaru yuspärañataki cartanak apayapjje. Mä kullakajj akham siwa: “Yatiyañataki sat mayni revistampejj janiw tantachäwinakan arstʼañatak ampar aytirïkayätti, ukampis jichhajj aka machaq revistampejj jan ajjsarasaw arstʼta” sasa. Jichhajj taman yatjjatkasajj walja kutiw arstʼjje.

5. Wasitamp uñakipasin inglés arut apsusiwayki uka Traducción del Nuevo Mundo Bibliajja, ¿kunjam lurtʼatasa?

⁵ Paya, 2013 maran octubre 5 urojja, Jehová Diosan markapajj Traducción del Nuevo Mundo de las Santas Escrituras Biblwa wasitampi uñakipasajj inglés arut apsuwayi. * Uka Biblianjja, walja jiskʼa tʼaqanakajj jukʼa arunakanikëjjewa, ukampis yatichäwejj pachpakïskiwa, amuytʼañas janirakiw chʼamäjjeti. Sañäni, Job 10:1 qellqatajj nayrajj 27 arunakanïnwa, jichhajj 19 arunakanikëjjewa. Proverbios 8:6 qellqatajj nayrajj 20 arunakanïnwa, jichhajj 13 arunakanikëjjewa. Uka pä jiskʼa tʼaqanakajj nayrat sipansa, jichhajj jukʼamp sumaw amuytʼasjje. Alajjpachar sarañataki ajllit mä jilatajja, walja maranakaw Diosar serviski, jupasti siwa: “Jichhak mistur Bibliat Job qellqat liytʼasajja, jukʼamp sumwa amuyjjta, jichhakis liytʼkirista ukhamawa” sasa. Walja jilata kullakanakaw niya ukham sapjjaraki.

6. Mateo 24:45-47 qellqatanak sum qhanañchasitapatjja, ¿kamsasmasa?

⁶ Kimsa, aka qhepa maranakanjja, Jehová  Diosan markapajj Biblian yaqhep jiskʼa tʼaqanakap jukʼamp sumwa amuytʼjjapjje. Sañäni, Yatiyañataki julio 15, 2013 revistanjja, Mateo 24:45-47 qellqatatwa jukʼamp sum qhanañchasiwayi. Uka revistanjja, ‘amuyasiri cheqapa uywatajja’ (MT), Jehová Diosan Qhanañchirinakapan Oraqpachan Jilïr Irpirinakapawa sasaw qhanañchasïna. Ukatjja, ajllitanakasa ‘yaqha uwijanakasa’ ‘utankirinakäpjjewa’, jupanakajj Amuyasiri Cheqapa Uywatatwa ajay toqet manqʼa katoqapjje sasaw qhanañchasirakïna (Juan 10:16). Uka yatichäwinak yateqañasa yaqhanakar yatichañasa, ¡wali askipuniwa! Kunjamanakatsa Jehová Diosajj amuykaña yatichañ munirïtap uñachtʼayi uk uñjasipkakiñäni.

7, 8. Biblian qellqatäki uka sarnaqäwinakatjja, ¿kawkïrinakas jutïr urunakat parli?

⁷ Biblian qellqatäki uka yaqhep sarnaqäwinakat qhanañchañjja, marat maratjamaw Diosan markapajj mayjtʼayawayi. Nayrajja, uka sarnaqäwinakat jila partejj kunatï jutïr urunakan pasañapäkäna uka toqetwa qhanañchasirïna. Ukampis ¿sarnaqäwinakat ukham qhanañchañajj walikïskpachati? Jïsa. Jesús pachpaw mä qawqha sarnaqäwinakat ukham qhanañchirïna. Amuytʼañataki, mä kutejj akham sänwa: “Kunjamtejj Jonasajj mä jachʼa chawllan purakapankän kimsürumpi kimsa arumampejja, uka kikparakiw Jaqen Yoqapajj kimsürumpi kimsa arumampi oraq manqhankani” sasa (Mateo 12:39, 40 liytʼañataki).

⁸ Kunatï jutïrin pasañapäki ukjja Bibliankir yaqha sarnaqäwinakas qhanañcharakiwa. Sañäni, apóstol Pablojja, kunjamsa Abraham chachajj Agar ukat Sara warmimp apasïna uka toqetwa parläna, ukasti kunjamsa Jehová Diosajj Israel markarusa alajjpachankir markaparus uñji ukamp sasiwa sasaw jupajj säna (Gál. 4:22-26). Pablojj janiw uka toqenakatak qhanañchkänti, jan ukasti, Moisesan Leyinakapat yaqhepajj kuntï jutïrin pasañapäkäna ukanakatwa qhanañcharakïna. Ukanakat yaqhepajj akanakawa: tabernáculo, templo, Juchanak Pampachayasiñ Uru, jilïr sacerdote (Heb. 9:23-25; 10:1). Taqe ukanakat yatjjatasin kun sañsa muni uk amuytan ukhajja, jukʼampiw Jehová Diosar confiytanjja. Ukampis Biblian parlki taqe uka jaqenakasa, kunanakattï parlki ukanakasa, ¿jutïrin kunanakatï paskani ukanakatti parlaskpacha?

9. ¿Kunjamsa Nabot chachan sarnaqäwipajj nayrajj qhanañchasïna?

⁹ Nayrajja, Biblian qellqatäki uka jaqenakasa, cosasanakasa, jutïrin jaqenakajj jan ukajj cosasanakas utjkani ukanakatwa parli sasaw Bibliat apstʼat qellqatanakasajj qhanañchirïna. Amuytʼañataki, 1 Reyes 21:1-16 qellqatajja, Acab reyimpita Jezabel reinampitwa parli. Jezabel reinajj Nabot israelitaruw jiwayayäna, ukhamat Acab reyejj Nabot chachan uvas yapupampi qheparañapataki. 1932 maranjja, Yatiyañataki revistajj uka sarnaqäwit akham sänwa: ‘Acab reyimpi Jezabel warmimpejj Supayampi ukat jupan apnaqat organizacionapampi sasiwa. Nabot chachajj Jesusampi sasiwa, ukatsti Nabot chachan jiwatapajj Jesusan jiwatapampi sasirakiwa’ sasa. Ukampis 1961 maranjja, inglés arut apsuta “Santificado sea tu nombre” sat librojj akham sarakïnwa: ‘Nabot chachajj ajllit cristianonakampi sasiwa. Jezabel warmisti kʼari cristianonakampi sasirakiwa’ sasa. Ukatjja, ‘Nabot chachajj arknaqata uñjaskäna ukajja, ajllit cristianonakar qhepa urunakan arknaqasiñapäkäna ukampi sasiwa’ sasaw qhanañcharakïna. (1964 maranwa uka librojj español arut apsusïna.) Jehová Diosan markapajja, walja maranakaw ukham qhanañchasajj Diosar confiyañataki yanaptʼawayistu. Ukampis jichhajj janiw ukham qhanañchjjeti. ¿Kunatsa?

10. 1) Biblian utjki uka sarnaqäwinak sum qhanañchtʼasajja, ¿kunjamsa ‘amuyasiri cheqapa uywatajj’ jukʼamp amuytʼasirïtap uñachtʼayi? 2) Bibliat apstʼat qellqatanakasajja, ¿kunatakis jichhajj yanaptʼjjestu?

 ¹⁰ Biblian qellqatäki uka sarnaqäwinakat yaqhep nayra qhanañchäwinakajja, amuytʼañasa, amtañasa ukat ukarjam sarnaqañas chʼamänwa. Ukhamarusa, ukham qhanañchasajj kunansa jakäwisan yanaptʼistaspa ukajj janiw qhanäkänti. Ukatwa Jehová Diosajj ‘amuyasiri cheqapa uywatarojj’ jukʼampi sum amuytʼasin qellqatanak lurapjjañapataki yanaptʼawayi. ¿Kunjamsa Amuyasiri Cheqapa Uywatajj jukʼamp amuytʼasirïtap uñachtʼayi? Jichhajja, kunapachatï pachpa Bibliajj mä sarnaqäwit sum qhanstayki ukhakiw kun sañsa muni ukajj qhanañchasjje. Janiw ukakïkiti, Bibliat apstʼat qellqatanakasajj jichhajj wali qhanäjjewa, Biblian utjki uka sarnaqäwinakajja, Jehová Diosar confiyañatakisa, Jupar munasiñatakisa, aguantañatakisa, yaqha ukhamanakatakisa yanaptʼarakistuwa. *

11. 1) ¿Kunjamsa Nabot chachan sarnaqäwipat jichhajj qhanañchasjje? 2) ¿Kunsa Nabot chachat yateqtanjja? 3) Biblian qellqatäki uka sarnaqäwinakajj kun sañsa muni ukjja, ¿kunatsa qellqatanakasajj sapa maynit jan qhanañchjje? (“Aka revista liytʼirinakan jisktʼäwinakapa” siski uka yatichäwi 17 janan uñjjattʼam.)

¹¹ Nabot chachat parltʼaskakiñäni. ¿Kunjamsa jichhajj jupat qhanañchasjje? Qhana ukat amuykañaw qhanañchasjje. Nabot chachan jiwatapajj janiw Jesusan jiwatapampi ni ajllit cristianonakampi sasjjeti. Jan ukasti, Nabot chachajj Diosat jan jitheqtasaw jiwäna. Wali munañani marka apnaqerinakas jupar jan waltʼayañ munapkchïnjja, Nabot chachajj Diosan leyinakaparuw istʼäna (Núm. 36:7; 1 Rey. 21:3). ¿Kunsa uka sarnaqäwit yateqtanjja? Nabot chachjam jan walinakan uñjasiñäni ukhajja, jupjamarakiw Diosat jan jitheqtañasäkiti (2 Timoteo 3:12 liytʼañataki). Uka yatichäwjja, taqeniw amuytansa, amttansa, ukarjamas sarnaqaraktanjja. Cheqansa, Nabot chachan sarnaqäwipajj Jehová Diosar jukʼamp confiyañatakiw yanaptʼistu.

12. 1) Biblian qellqatäki uka sarnaqäwinakatjja, ¿kunsa jan amuyañasäki? 2) ¿Kunas jan amuyañjam Biblian cheqa yatichäwinakap amuyañatakejj yanaptʼistaspa? (Qhanañchäwi uñjjattʼam.)

¹² Biblian utjki uka sarnaqäwinakajja, jiwasan yateqasiñasatakïkchisa, janis jutïrit kuns parlkaspa ukham janiw amuyañasäkiti. ¿Kunatsa?  Bibliankir yaqhep sarnaqäwinakajja, kunas jutïrin pasani ukwa uñachtʼayi. Ukampis jichhürunakanjja Bibliat apstʼat qellqatanakasajja, mä sarnaqäwejj kun sañsa muni uk janiw añch qhanañchjjeti, jan ukasti, mä sarnaqäwejj kunjamsa yaqha sarnaqäwimpejj kikpaki ukwa qhanañchi. Kunsa uka sarnaqäwit yateqsna uksa qhanañcharakiwa. Amuytʼañataki, Nabot chachajj Diosat jan jitheqtasaw jiwañkam servïna. Jupan sarnaqäwipat liytʼañajja, kunjamsa Jesusajj Diosat jan jitheqtasa serviwayi, kunjamsa ajllit cristianonakas Jesusjam Diosat jan jitheqtasa servisipki, ukat yaqha uwijanakat waljanejj kunjamsa Diosat jan jitheqtasa jiwañkama serviwayapjjaraki, ukanakwa Nabot chachan sarnaqäwipajj amtayistu. Ukaw Jehová Diosajj qhana ukat amuykañ yatichirïtap uñachtʼayistu. *

13. Jesusan uñachtʼäwinakapatjja, ¿kawkïrinakas jichhajj qhana ukat amuykañ yatichasjje?

¹³ Uñachtʼäwinakasa uñtasïwinakasa, jan amuyañjam yatichäwinak sum amuytʼañatakiw yanaptʼistu ukat chuymarus purtʼarakistuwa. Jesusajj wali suma yatichirïnwa, jupajj uñachtʼäwinakampi, ukhamarak uñtasïwinakampiw yatichirïna (Mat. 13:34). Aka qhepa maranakanjja, Jesusan uñachtʼäwinakapajj jukʼamp qhana amuykañaw qellqatanakasan qhanañchasjje. Sañäni, Yatiyañataki julio 15, 2008 revistajja, levadurasa, mostaza jathasa, chawlla katuñ qänas kun sañsa muni uk sum amuytʼañatakiw yanaptʼawayistu. Uka uñachtʼäwinakajja, kunjamsa walja jaqenakajj Diosan Reinopat yateqasajj Jehová Diosar loqtjjapjje uk amuyañwa yanaptʼistu.

14. 1) Samaria markankir suma chuyman jaqetjja, ¿kunjamsa nayrajj qhanañchasïna? 2) ¿Kunjamas jichhürunakan qhanañchasjje?

¹⁴ Jesusajja, sarnaqäwinakat parlasajj awisajj walja toqenakatwa parlirïna. Uka sarnaqäwinakat yaqhepajja, profecianakänwa, yaqhepasti yateqasiñatak yatichäwinakarakïnwa. Uka sarnaqäwinakat kawkïrinakas profecianakäpachäna ukjja, ¿kunjamatsa yatsna? Aka qhepa maranakanjja, uka toqenakat jukʼamp qhanaw amuyasjje. Sañäni, nayrajj Samaria markankir suma chuyman jaqet kunjamsa qhanañchasïna uk amuytʼañäni (Luc. 10:30-37). 1924 maranjja, Yatiyañataki revistajj samaritano jaqejja, Jesusampi sasiwa sänwa. Jerusalenat Jericó markar saraqki uka thakejja, jaqenakampi sasiwa sarakïnwa. ¿Kunatsa ukham qhanañchpachäna? Adanampi Evampejj Dios contra saytʼasiwayapki ukhatwa jaqenakajj jukʼamp jan wali chuymanëjjapjje. Ukatsti, revistajj akham sasaw qhanañcharakïna: ‘Lunthatanakajj jachʼa empresanakampi alakip luririnakampi sasiwa, sacerdotempi levitampejj kʼari religionanakampi sasirakiwa’ sasa. Ukampis jichhürunakanjja, uka sarnaqäwejj janiw ukham qhanañchasjjeti. Jan ukasti, yaqha markankirinakaru yaqha jañchinïtapata, yaqha costumbrenïtapata jan yaqhachañatakiw qellqatanakasajj chʼamañchistu. Jehová Diosar uñtʼapjjañapataki yanaptʼañatakis chʼamañcharakistuwa. Jehová Diosajja, sapürutjamaw jukʼamp qhana yatichjje, ukajj wali kusiskañapuniwa.

15. ¿Kunsa jutïr yatichäwin yatjjataskañäni?

¹⁵ Jutïr yatichäwinjja, Jesusajj tunka virgenanakat parlkäna uka uñachtʼäwitwa yatjjataskañäni (Mat. 25:1-13). Aka qhepa urunakan uka tunka virgenanakat ¿kunjam amuytʼañassa Jesusajj munäna? ¿Uka sarnaqäwin jaqenakasa yänakasa mä uñtasïwinïpachati? Jan ukajj ¿jichha tiempon sarnaqañataki yatichäwikïpachacha? Uk yatjjatañäni.