“MÄ CHHIJLLÄWI qhepatjja, chʼajjwäwinak utjipanwa Jehová Diosan Qhanañchirinakapat waljanejj utanakap jaytawayas sarjjapjjäna. Ukat manqʼasa, qollas pistʼjjänwa ukat jiltʼkäna uksa jilaruw aljapjjäna. Banconakajj llawtʼasjjänwa, cajero automático satäkis ukan janiw qollqes utjjänti” sasaw François jilatajj qhanañchi, jupajj jichhak nayrar sartaski uka markanwa irpir chuymanjam irnaqtʼaski.

Tantachasiñ Utanakan qheparir jilat kullakanakarojja, jankʼakiw Sucursalankirinakajj kunanakatï wakiski ukanaka ukat qollqe apayapjjäna. Chʼajjwir gruponakajj thakin controlanakwa uttʼayapjjäna, ukampis niyakejjay Jehová Diosan Qhanañchirinakapan politicar jan mitisirïpjjatap yatipjjchïnjja, sucursalan autonakap pasayapjjerïnwa.

François jilatajj saskakiwa: “Mä Tantachasiñ Utar sarasipkayäta ukhajja, jan soldado isinïpki (francotirador) jupanakaw sarapkayäta uka autor fusiltʼanipjjäna, ukat niyapuniw waktʼayapjjetäna. Ukat armantat mä soldador tʼijunir uñjasajj jankʼakiw sucursalar kuttʼawayjjapjjta. Jan jiwapjjatajat Jehová Diosarojj wal yuspärapjjta. Uka Tantachasiñ Utan 130 jilat kullakanak jarkʼaqasipkäna ukanakajj qhepürojj qhespipjjarakïnwa. Ukat yaqhepajj sucursalaruw purinipjjäna, ukanwa ajay toqeta ukat kunantï yanaptʼañajj wakiskäna ukanakamp jan walinak pasañapkam yanaptʼapjjayäta”.

“Qhepatjja, sucursalajj uka markankir jilat kullakanakan walja cartanakapwa katoqapjjäna, ukan taqe chuymaw yuspärapjjäna. Uka jilat kullakanakajja, yaqha cheqankir jilat kullakanakan yanaptʼap uñjasajj jukʼampiw Jehová Diosar confiyapjjäna”.

Aka Oraqen jan waltʼäwinakapampi jan ukajj jaqenakamp jan waltʼayat uñjastan ukhajja, “waliki, janjjatasim, manqʼasirakim” sasakejj janiw yanaptʼa munapki ukanakarojj sisktanti (Sant. 2:15, 16). Jan ukajj Jesusan nayrïr arkirinakapjamarakiw yanaptʼasiñatak chʼamachastanjja. Jupanakajj machʼa tiempo jakʼachasinitap amuyasajja, “amtapjjän[wa] mä yanap apayañatak Judeankir jilatanakaru, kunjämatejj sapa mayni jupanakan utjkän ukhamarjama” (Hech. 11:28-30).

Diosan servirinakapajja, yanaptʼatäñ munapki ukanakarojj jankʼakiw yänak toqet yanaptʼtanjja. Ukampis jaqenakajj ajay toqet yanaptʼatäñ munapjje (Mat. 5:3). Jaqenakar arkirijar tukuyapjjam sasaw Jesusajj satayna ukhamat arkirinakapar yatiyañajj wali askïtap amuyapjjañapataki ukat ukarjam lurapjjañapataki (Mat. 28:19, 20). Ukatakejj sapa mayniw tiempsa, chʼamsa ukat qollqsa apstʼastanjja. Diosan markapjamajja, yanaptʼañatak qollqe irantaski ukajj khitinakatï yanap munapki ukanakar yanaptʼañatakiwa. Ukampis Diosan Reinopata ukat suma yatiyäwit jukʼamp yatiyasiñapatakiw irtasi. Ukhamatwa Diosaru ukat jaqe masisar munasitas uñachtʼaytanjja (Mat. 22:37-39).

Jehová Diosan Qhanañchirinakaparu oraqpachan yatiyasiñapatak yanaptʼirinakajj kuntï churapki ukanakat janiw pächasipjjañapäkiti, kunattejj wali askirjamaw apnaqasiski. Jumajj ¿yanaptʼatäñ munapki uka jilat kullakanakar yanaptʼasmati? ¿Jesusan arkiripar tukupjjañapataki jaqenakar yanaptʼaski uka luräwir yanaptʼañ munasmati? Ukhamächi ukhajja, Biblian aka ewjjtʼaparjamaw lurasma: “Yanaptʼañajj amparamankaskchi ukkhajja, jan ‘Janiw’ siskamti khititejj yanapa maykätam ukarojja” (Pro. 3:27).