“YURIRAPKISTU uka wawanakajj, Tatitun aski churäwinakapawa” sasaw Bibliajj qhanañchi (Sal. 127:3). ¡Ukatwa cristiano awk taykajj wawapar nasir uñjasajj wal kusisipjje!

Kusiskañäkchisa, walja lurañaw utjaraki. Wawajj kʼumara ukat sum jilsuñapatakejja, sapüruw sum manqʼasiñapa. Ukat Jehová Diosampi sum apasipjjañapatakejj ukhamarakiw awk taykajj wawaparojj wakichañapa ukat yanaptʼañapa. Biblian yatichäwiparjam uywañatakiw chʼamachasipjjañapa (Pro. 1:8). Ukampis ¿kunapachas yatichañ qalltapjjañapa, ukat kunjamsa yatichapjjaspa?

Manoa chachar kunas pasäna uk amuytʼañäni, jupajj nayra Israel markankir Zora markanwa jakasïna ukat Dan tributänwa. Mä urojja, Jehová Diosan angelapajj akham sasaw Manoa chachan warmiparojj säna: “Jumasti jan wawachasirïtawa, jichhasti jumajj usuriptasinjja mä wawanïyätawa” sasa (Jue. 13:2, 3). Cheqansa, uk yatisajj wal kusisipjjpachäna, ukampis kunjamsa uywapjjani uk yatiñ wal munapjjäna. Ukatwa Manoa chachajj akham sasin Diosar achiktʼasïna: “[Jehová] Dios Tatitu, nayasti achiktʼassmawa wastatampiy nanakan ukaru uka jaqema khithanim nanakaru yatiyañapataki kunanaktejj lurapkäjja naskani uka wawampejj uka” sasa (Jue. 13:8). Jupasa ukat warmipasa, wawa uywañ wali askitwa uñjapjjäna. Ukat Sansón wawaparojj Jehová Diosan kamachinakaparjam yatichañatakiw chʼamachasipjjäna, ukham lurapjjatapat bendicionanakwa katoqapjjäna. Bibliajj akham siwa: “Mä urusti [...] Diosan ajayupawa jupana uñstäna”. Diosan chʼamapamp yanaptʼataw Sansonajj kunaymaninak luräna, jupajj Israel markan juesanakajj utjkäna ukanakat maynïrïnwa (Jue. 13:25; 14:5, 6; 15:14, 15).

¿Kunapachas awk taykajj wawanakapar yatichañ qalltapjjañapa? Timoteorojj “wawatpachwa” Loida awichapampi ukat Eunice taykapampejj Diosan ‘arunakapa’ yatichapjjäna sasaw Bibliajj qhanañchi (2 Tim. 1:5; 3:15). Ukhamajja, Timoteojj wawatpachwa Diosan arunakap yateqañ qalltäna.

Cristian awk taykajj Jehová Diosaruw yanap mayipjjañapa ukat kunjamsa jiskʼatpach uywapjjani uksa tiempökipanwa amuytʼapjjañapa. Proverbios 21:5 qellqatajj akham siwa: “Suma amuytʼampi kuna amtäwinaka wakichatasa sumakiwa phoqhasi”. Awk taykajj janïr wawapan naskipanwa wakichasipjjañapa. Ukat kunanaksa wawapajj munani uk mä listaruw qellqtʼasipjjaspa ukat Diosan Arup yatichañatakejj kunsa lurapjjani uksa amuytʼapjjañapawa. Jiskʼatpach yatichañwa amtapjjañapa.

Kunjamsa mä wawajj jilsjje ukat parlkasajja, akham sasaw mä librojj qhanañchi: wawajj naski uka qallta phajjsinakanjja, lejjwipan (lajjwi) celulanakapajj jankʼakiw yaqha celulanakamp chikthapti sasa. Ukhamajj uka tiemponwa awk taykajj Jehová Diosata ukat kamachinakapat yatichapjjañapa.

Precursor regularjam irnaqtʼir mä kullakajj phuchapat akham siwa: “Nasitapat mä phajjsinïskän ukhatpachaw Diosan arup yatiyir apta. Ukat kunas pasaskäna uk janis sum amuykchïnjja, wali askitakiw yanaptʼawayäna. Ukat pä maranëjjäna ukhajja, jaqenakar tratadonak churjjänwa” sasa.

Jiskʼatpach wawanakar yatichasajj askinakaw jikjjatasi. Ukampis Bibliat yatichañajj mä jukʼa chʼamakiwa sasaw walja awk taykanakajj sapjje.

Wawanakajj janiw inaktʼapkiti ukat jankʼakiw yaqha lurañar uchasipjje. Ukatwa wawar yatichañajj awk taykatakejj chʼamakïspa. Wawanakajj inas may may yateqañ munapjjchi ukat ukajj walikïskiwa, kunattejj jichhaw kunanaktï uñjki ukanak uñtʼasipki. Wawanakapan sum istʼapjjañapatakejja, ¿kunsa awk taykanakajj lurapjjaspa?

Kuntï Moisesajj siskäna uk amuytʼañäni. Deuteronomio 6:6, 7 qellqatan akham siwa: “Juman chuymamaruy katoqam kawkïri mandamiento arunaktï jichhüruna churksma ukanakjja. Ukatsti wawanakamaruw yaticharakïta; utamankkasina, thakinjam sarkasina, ukhamarakiw parlarakïta ikintañataki, sartañatakisa” sasa. “Yaticharakïta” siski uka arojja, wasitat wasitat yatichaña sañ muni. Wawajja, mä alir uñtatawa, ukat kunjamtï alir sapa kuti uma warañajj wakiskejja, ukhamarakiw sapa kuti wawar yatichañajj wakisi. Ukat kunjamatï jilïr jaqenakarojj kutin kutini sañajj amtasipjjañapatak yanaptʼkejja, ¡wawanakarojj jukʼampiw yanaptʼi!

Wawanakaparu cheqa yatichäwi yatichañatakejja, awk taykanakajj jupanakampïñatakiw tiempo apstʼasipjjañapa. Akapachanjja, jan tiemponikiw sarnaqtanjja, ukatwa tiempo apstʼasiñajj chʼamakïspa. Ukampis kunanaktï cristianjam lurañasäki uk lurañatak “jan tiempjja ina chʼusaru tukuyapjjamti” sasaw apóstol Pablojj ewjjtʼistu (Efe. 5:15, 16). ¿Kunjamsa uka ewjjtʼarjam phoqsna? Mä irpir chuymani jilatatakejj lurañanakap phoqhañajj chʼamakïnwa, jupajj phuchaparuw uywañapäna ukat tamansa irnaqäwipansa lurañanakap phoqhañaparakïnwa. Warmipajja, precursora regularjamaw irnaqtʼäna, jupasti walja lurañanakanirakïnwa. ¿Phuchapar yatichañatakejj kawkitsa tiempo apsupjjpachäna?  Jilatajj akham siwa: “Janïr irnaqäwijar sarkasajj sapüruw warmijasa ukat nayasa Bibliat apstʼata sarnaqäwinaka librota jan ukajj Diosan Arupat sapüru yatjjatañataki folletot mä jukʼa liytʼarapipjjta. Ukat arumanakajja, janïr ikintkipanwa mä jukʼamp liytʼarapipjjta. Ukat Diosan arup yatiyir sarkasajj irpapjjapuntwa. Janipuniw jupar yatichañjja ukhamak jaytañ munapkti” sasa.

Wawanakasajj jilïrëjjasin lurañanakapamp phoqhapjjañapwa taqenis muntanjja. Ukampis Diosar taqe chuyma munapjjañapatakiw yatichañ jukʼamp muntanjja (Mar. 12:28-30).

Salmo 127:4 qellqatajj akham siwa: “Waynäpktan ukapach yurirapkistu uka wawanakajj nuwasirin amparapankir flechanakar uñtatawa” sasa. Uka qellqatajja, wawanakajj nuwasirin amparapankir flechanakäkaspas ukhamawa sasaw amuytʼayi. Nuwasirejj kawkharutï waktʼayañ munki ukar cheqakwa flechtʼañapa, kunattejj may flechtʼasajj janiw qhepar kuttʼayankaspati. Awk taykajj janiw wawapamp wiñay qheparapkaniti. Ukatwa wawaparojj jiskʼatpach cheqa yatichäwinak chuymaparu ukat amuyuparu imañapatak yatichapjjañapa.

Khitinakarutï Diosar yupaychañ toqet yanaptʼkäna ukanakatjja, akham sasaw apóstol Juanajj qellqäna: “Wawanakajjan Tatitumpi jakaskatap istʼasinjja wal kusista, janiw kunatsa ukham kusiskiristti” sasa (3 Juan 4). Cristiano awk taykanakajja, wawanakapan cheqa yatichäwirjam sarnaqaskir uñjasajj ukhamarakwa kusisipjje.