¿Akapachan tukusïwipajj kunjamsa purinini?
¿Akapachan tukusïwipajj kunjamsa purinini?
“Janiw chʼamakanakankapktati Tatitun jutäwip urupajj akatjamat jumanakar katuntañapataki, kunjämatejj mä lunthatajj akatjamat jutki ukhama.” (1 TES. 5:4.)
¿QHANAÑCHTʼASMATI?
¿Aka qellqatanakarjamajj kunanakas jutïrin niya pasañampïski?
1. ¿Jan waltʼäwinak aguantañatakisa ukat wakichtʼatäñatakis kunas yanaptʼistani?
BIBLIAN jikjjataski uka profecianakan phoqhasitapaw kunanakas niya pasañampïski uk amuytʼañ yanaptʼistu. Ukhamasti, ¿kunas wakichtʼat suyañatak yanaptʼistani? Apóstol Pablojj akham sasaw ewjjtʼistu: “Janirakiw jiwasajj kuntejj uñjktan ukar chuymjja churktanti, jan ukasti kuntejj jan uñjktan ukaruwa katuyasipjjtanjja” sasa. Ukhamawa, alajjpachan jakaña jan ukajj aka Oraqen wiñay jakañ suytʼäwinïkstansa janiw uka suytʼäwis armañasäkiti. Diosar taqe chuyma servirinakajj kuna suytʼäwinïpjjesa uk amtapjjañapatakiw Pablojj cristianonakar uka arunakampi ewjjtʼäna. Uka suytʼäwirutï chuym churapjjaspänjja, jan walin uñjasisasa ukat arknaqatasa aguantapjjaspänwa (2 Cor. 4:8, 9, 16-18; 5:7).
2. 1) ¿Kuna suytʼäwinïktantï ukar chuyma churañatakejj kunsa lurañasa? 2) ¿Kunsa aka yatichäwinsa ukat jutïr yatichäwinsa yatjjataskañäni?
2 Kuna suytʼäwinïktantï ukar chuyma churañatakejja, kuntï jan uñjktan ukaruw katuyasiñasa, ukwa apóstol Pablon ewjjtʼapat amuysna (Heb. 11:1; 12:1, 2). Diosajj wiñay jakañat arsuwayki ukanak phoqhasiñapatakejja, kunanakas jutïrin pasani ukwa aka yatichäwina ukat jutïr yatichäwin tunka toqet yatjjatañäni.
¿AKAPACHAN TUKUSÏWIP JANÏR PURINKIPAN KUNAS PASANI?
3. 1) ¿1 Tesalonicenses 5:2, 3 qellqatarjamajj kunas pasañapa? 2) ¿Politiconakajj kunsa lurapjjani ukat khitinakas jupanakampi chikachasipjjpachäni?
3 Pablojj Tesalónica markankir cristianonakar qellqkäna uka cartanwa kunas nayraqat pasani uk arsuwayäna (1 Tesalonicenses 5:2, 3 liytʼasiñapawa). Ukanjja, apóstol Pablojj Jehová Diosan urupatwa parli, ukasti kʼari religionanakar tukjasaw qalltani ukat Armagedón jachʼa chʼajjwäwimpiw tukuyarakini. Diosan urupa niya qalltañampïkani ukhajja, marka apnaqerinakajj akham sapjjaniwa: “Taqe kunas sumakïskiwa, janiw kunas paskaniti” sasa. Ukajj inas mayak phoqhaschini jan ukajj jukʼat jukʼat phoqhaschini. Marka apnaqerinakajj kunayman jan waltʼäwinak utjki ukanakat mä qhawqhanak niyas chhaqtayañampïpkaspa ukham inas amuyapjjchini. ¿Kʼari religionanak pʼeqtʼirinakajj kunsa lurapjjpachäni? Niyakejjay akapachankirïpjjchejja inas politiconakampi chikajj ukham sapjjarakchini (Apo. 17:1, 2). Ukhamäspajja, nayra Judá markankir kʼari profetanakjamaw lurasipkaspa, jupanakat Jehová Diosajj akham sänwa: “Taqe kunas walikïskiwa sapjjarakiwa, ukampisa taqe kunasa jan walipuniwa” sasa (Jer. 6:14; 23:16, 17).
4. ¿Mayninakat sipansa kunsa jiwasajj amuytanjja?
4 “Taqe kunas sumakïskiwa, janiw kunas paskaniti” sasin khitinakay sasipkchini, ukampis Diosan urupajj niya qalltañampïskatapwa uñachtʼayani. Ukatwa apóstol Pablojj akham säna: “Jilatanaka, janiw chʼamakanakankapktati Tatitun jutäwip urupajj akatjamat jumanakar katuntañapataki, kunjämatejj mä lunthatajj akatjamat jutki ukhama. Taqe jumanakajj qhanankirïpjjtawa” sasa (1 Tes. 5:4, 5). Mayni jaqenakat sipansa, Bibliarjamajj kunanakatï jichhürunakan pasaski ukanakajj kunja wakiskirisa uk sum amuytanjja. ¿“Taqe kunas sumakïskiwa, janiw kunas paskaniti” sapkani ukajj kunjamapunis phoqhasini? Uk phoqhasir uñjañatakejj suyañasawa. “Ukatpï jan ikjañasäkitejj mayninakjamajja, jan ukasti pʼarjjtatäñasawa taqe amuyumpi.” (1 Tes. 5:6; Sof. 3:8.)
JUPA PACHPA ATINISIR MÄ “REINA”
5. 1) ¿Kunjamsa jachʼa tʼaqhesïwejj qalltani? 2) ¿Janiw kunas paskitaniti sasajj khiti “reinas” sani?
5 ¿Ukjjarojj kunas pasani? Pablojj akham sänwa: “Kunapachatejj jaqejj akham siskani: ‘Taqe kunas sumakïskiwa, janiw kunas paskaniti’ sasa, ukkhawa akatjamata jupanakjjaru tʼunjäwejj jutani” sasa. Nayraqatjja “Jachʼa Babilonia[wa]” akatjamat tʼunjatäni, ukasti “qʼañu warmit” uñtʼatarakiwa, mä arunjja, oraqpachankir taqpach kʼari religionanak apnaqeri (Apo. 17:5, 6, 15). Taqpacha kʼari religionanak contra ukat cristianöpjjtwa sirinak contra sartaskani ukhaw jachʼa tʼaqhesïwejj qalltani (Mat. 24:21; 2 Tes. 2:8). Waljaniruw mä akatjamat katjani. ¿Kunatsa? Kunattejj ukürkamajja, uka qʼañu warmejj mä reinäkaspas ukhamwa jupa pachparu atinisini ukat akham saskaniwa: “Janirakiw tʼaqheskäsa” sasa. Ukampis mä akatjamatwa qʼal aynachtʼani, ‘mä urunakïkaspas’ ukhamäniwa (Apo. 18:7, 8).
6. ¿Khitis kʼari religionanakar tʼunjani?
6 ¿Khitis qʼañu warmi contrajj sartani? “Tunka wajjrani” ‘ajjsarkañ animalaw’ sartani sasaw Bibliajj qhanañchi. Apocalipsis librorjamajja, ajjsarkañ animalajj Naciones Unidas sat Organizacionawa (ONU), “tunka wajjranakasti” kawkïr markanakatï “jachʼa wila ajjsarkañ animal[ar]” yanaptʼapki ukanakawa (Apo. 17:3, 5, 11, 12). * ¿Qʼañu warmirojj kunjamsa tukjapjjani? Kawkïr markanakatï ONU sat organizacionankapki ukanakaw tukjapjjani ukat kunjamäkitï uksa qhanstayapjjani, “janchipsti manqʼapjjarakiniwa, ninampirakiw nakhantayapjjani”. Ukat wiñayataki tʼunjatäniwa (Apocalipsis 17:16 liytʼasiñapawa).
7. ¿Kunatsa ajjsarkañ animalajj qʼañu warmi contra sartani?
7 Kunatsa ajjsarkañ animalajj qʼañu warmi contrajj sartani ukwa Bibliankir profecianakajj qhanañcharaki. Jehová Diosajj qʼañu warmir tukjañwa amti, “uk lurapjjañapataki[w]” marka apnaqerinakan chuymaparojj uskuni (Apo. 17:17). Religionanakajj kunayman jan waltʼäwinakwa akapachan utjayasipkaki, ukatwa markanakajj tukjañ amtapjjaspa. Ukat politiconakajj amtapatsa lurasipkaspa ukhamwa amuyasipjjani. Ukampis Diosaw jupanak toqejj kʼari religionanakar tukjaskani. Ukat Supayan apnaqat akapachajj payaruw jaljtani ukat mayaw mayni contrajj sartani, Supayasti janirakiw kuns lurirjamäkaniti (Mat. 12:25, 26).
DIOSAN MARKAP CONTRAW SARTAPJJANI
8. ¿Magog markat Gog satäkis ukajj kunsa lurani?
8 Kʼari religionanakajj qʼala tukjatäjjapjjani ukhajja, Diosan markapajj “jan perqanakampi muyuntayataki” sumakis jakasisipkaspa ukham jaqenakajj amuyapjjani (Eze. 38:11, 14). Jehová Diosar yupaychirinakajj janis arjjatirinïpkaspa ukhamäniwa, ukampis ¿kunas jupanakar pasani? Diosan Aruparjamajja walja markanakaw jupanak contra sartapjjani, cheqas Magog markat Gog satäkis ukaw ukhamar wiytani, mä arunjja, Supaya (Ezequiel 38:2, 15, 16 liytʼasiñapawa). ¿Uk yatisajj llakisiñasäspati?
9. 1) ¿Kunas cristianonakarojj jukʼampi llakisiyistu? 2) ¿Jehová Diosar jukʼampi confiyañatakejj kunsa lurañasa?
9 Diosan markap contra sartapjjañap yatisajj janiw ajjsarktanti. Jakäwis qhespiyañataki llakisiñat sipansa, Jehová Diosan sutipa jachʼañchatäñapataki ukat taqe kunjjar Munañanïtapa qhanstañapatakiw jukʼamp llakistanjja. Jehová Diosajja, “ukapachaw jumanakajj yatipjjäta nayan Tatitütajja” sasaw 60 jila kutejj säna (Eze. 6:7). Ukhamasti, Ezequielan profeciap phoqhasiñapjja wal muntanjja, ukat Jehová Diosajj “wawanakapar jan walinakat qhespiyi[riwa]” sasaw confiyaraktanjja (2 Ped. 2:9). Janïr uka uru purinkipanjja, kunanakatï Jehová Diosar taqe chuyma confiyañatak yanaptʼkistani ukanakwa lurañasa, ukhamatwa kunas kunäskpan Jehová Diosar taqe chuyma serviskakiñäni. Ukhamasti, ¿kunsa lurañasa? Diosat mayisiñasa, Bibliat yatjjatañasa, kuntï yateqktan ukanakat lupʼiñasa ukat Diosan Reinopat yatiyañasa. Ukhamatwa wiñay jakañ suytʼäwisat janipun armaskañäniti, ukaw “kunjämatejj anclajj mä barcorojj katjjäsejja” ukham katjjäsistani (Heb. 6:19; Sal. 25:21).
JEHOVÁ DIOSAJJ KHITISA UK TAQE MARKANAKAW YATIPJJANI
10, 11. ¿Kunjamsa Armagedonajj qalltani ukat kunas uka chʼajjwäwin pasani?
10 Diosan markap contra sartapkani ukhaw yaqha profeciajj phoqhasirakini. Jehová Diosajj Jesús toqe ukat angelanakap toqew markapar arjjatañatakejj sartani (Apo. 19:11-16). Ukhamatwa, “taqe chʼaman Diosan jachʼa urupa[jj]” qalltani, ukasti Armagedón sas uñtʼatarakiwa (Apo. 16:14, 16).
11 ¿Armagedón jachʼa chʼajjwäwin kunas pasani? Jehová Diosajj Ezequiel toqew akham qhanañchäna: “Nayaw Gog siski jupjjarojj kunayman ajjsarkañanaka apayanëjja, [...] jaqenakapasti jupanakpachakiw espadanakapampi nuwarasjjapjjani. Naya Tatituw ukjja arsta” sasa. Supayat saytʼasisin nuwasirinakajj wal ajjsarapjjani ukatwa jupanakkam nuwarasjjapjjani. Ukhamaw Supayasa ukat jupan apnaqat akapachas qʼala tukjatäpjjani, kunattejj Jehová Diosajj akham siwa: “Kawkïri yaqha markanakatejj [Supayampi] chika sarapki ukanakjjarusti [...] ninampi asufrempi puriyanirakëjja” sasa (Eze. 38:21, 22). ¿Ukjjarojj kunas paspachäni?
12. ¿Markanakajj kamsapjjanisa?
12 Ukat markanakajj Jehová Diosamp tukjatäsipkatapwa amuyasipjjani. Kunjamtï israelitanakar arktiri egipcio soldadonakajj Wila lamar qotan sapkänjja, ukhamarakwa Supayan yanapirinakapajj akham sapjjani: “[Jehová] Tatituw jupanak lantejja jiwas contra nuwasi[ski]” sasa (Éxo. 14:25). Cheqasa, Jehová Diosajj khitis ukwa markanakajj yatipjjani (Ezequiel 38:23 liytʼasiñapawa). ¿Kunapachas taqe ukanakajj qalltani?
TAQE MARKANAKJJAR CHʼAMANI YAQHA MARKAJJ JANIW UÑSTKANITI
13. ¿Daniel profetajj metalanakat lurat jachʼa jaqet parlkäna ukan kayunakapampita ukat lukʼananakapampit kunsa yattanjja?
13 Kuna tiemponsa jakasktan uk amuytʼañwa Daniel libronkir mä profeciajj yanaptʼistu. Daniel profetajj metalanakat lurat mä jachʼa jaqetwa parli (Dan. 2:28, 31-33). Uka jachʼa jaqejja, kawkïr markanakatï nayrajj Diosan markapar qʼal aynachtʼayañ munapkäna uka chʼamani markanakampi sasiwa: Babilonia, Medopersia, Grecia ukat Roma. Ukat taqe markanakjjar chʼamani yaqha markarakiw jichhürunakan utjañapäna, uka markaw metalanakat lurat jachʼa jaqen kayunakapampi ukat lukʼananakapampi sasejja. Nayrïr Jachʼa Chʼajjwäwinjja, Gran Bretaña markampi Estados Unidos markampiw mayachtʼasipjjäna. Ukhamasti, kayunakampi ukat lukʼananakampejj taqe markanakjjar chʼamani markajj angloamericanawa. Metalanakat lurat jachʼa jaqetjja kayunakapaw qhep qhepajja. Ukhamasti taqe markanakjjar chʼamani yaqha markajj janiw uñstkaniti. Ukhamarus kayupampi lukʼananakapampejj hierrompi ñeqʼempi luratawa, ukajja taqe markanakjjar chʼamani angloamericanajj jan suma saytʼatätapwa uñachtʼayistu.
14. ¿Armagedón qalltkani ukhajj kawkïr markas wali chʼamanïskakini?
14 Uka pachpa profecianjja, mä qollutwa mä jachʼa qalajj saraqani. Uka qalajja Jehová Diosan Reinopampi sasiwa, qollusti Jehová Diosajj taqe kunjjaru Munañanïtapa sañ munaraki. Uka qalajj 1914 maratwa qollut saraqasinki, ukat jichhajj metalanakat lurata jaqen kayupar puriñatakejj wali chʼamampiw qalajj saraski. Ukat Armagedonanwa metalanakat lurat jaqejj kayut pʼeqekam qʼala tʼunjatäni (Daniel 2:44, 45 liytʼasiñapawa). Ukhamasti kunapachatï Armagedonajj qalltkani ukhajja, taqe markanakjjar chʼamani angloamericanaw chʼamanïskakini. ¡Uka profecian phoqhasitap uñjañajj wali kusiskañapunïniwa! * Ukampisa, ¿kunsa Jehová Diosajj Supayar lurani?
KUNJAMSA JEHOVÁ DIOSAJJ SUPAYAR TUKJANI
15. ¿Armagedón tukuyatarojj kunas Supayampir sajjranakapampir pasani?
15 Nayraqatajja, kunjamsa yanapirinakapajj aka oraqen tukjat uñjasipjjani ukjja pachpa Supayaw uñjani. Ukjjarusti, ¿kunas Supayar pasani? Ukjja apóstol Juanaw qhanañchistu (Apocalipsis 20:1-3 liytʼasiñapawa). Jesucristow ‘manqhapacha chʼamakan llavepa aptʼatäski’, jupaw Supayaru ukat sajjranakapampirojj mä cadenampi ñachʼañtani ukat waranqa maratakiw manqhapacha chʼamakaru jaqontani (Luc. 8:30, 31; 1 Juan 3:8). Ukhamaw katariru pʼeqet taqjjatañ qalltani (Gén. 3:15). *
16. ¿Supayajj “manqhapacha chʼamakar” jaqontatäkani ukhajj kunjamas jikjjatasini?
16 ¿Supayampi sajjranakapamp jaqontatäpkani uka “manqhapacha chʼamakajj” kunasa? Apóstol Juanajj “manqhapacha chʼamakat” parlkäna ukajja, griegonjja ábyssos aruwa, ukasti “mikʼaya” jan ukajj “jan tukusir pʼiya” sasaw jaqokipasirakispa. Ukhamasti, uka cheqarojj janipuniw khitis jakʼachaskaspati, jan ukasti Jehová Diosampi ukat khitirutï ‘manqhapacha chʼamakan llavepa’ churki uka angelakiw jakʼachasispa. Supayasti jiwatäkaspas ukhamaw jan kun lurañatak mikʼayar jaqontatäni, ukat janirakiw jaqenakarojj jan walinak lurkaniti. ¡‘Leonar uñtata warartʼasisa sarnaqeri’ Supayan lakapasti ñachʼantatäniwa! (1 Ped. 5:8.)
¿SUMANKAÑA JANÏR UTJKIPANJJA KUNANAKAS PASANI?
17, 18. 1) ¿Kuna toqenakatsa aka yatichäwin yatjjatawaytanjja? 2) ¿Jan walinakajj chhaqtjjani ukhajj kunas utjani?
17 Wali sustjaskañanakaw niya pasañampïski. Jaqenakan “taqe kunas sumakïskiwa, janiw kunas paskaniti” sapjjañap wal suyasktanjja. Ukatjja, Jachʼa Babilonian tʼunjäwipa, Magog markat Gog satäkis ukajj Diosan markap contra sartatapa, Armagedón jachʼa chʼajjwäwi ukat Supayampir sajjranakapampir “manqhapacha chʼamakar” jaqontatätapwa uñjarakiñäni. Kunapachatï jan walinakajj chhaqtjjani ukhajja, janiw nayrjamäjjaniti taqe kunas wali sumapunïniwa: Criston Waranqa Maranak Apnaqäwipanjja “jilarkir sumankañampiw kusisipjja[ñä]ni” (Sal. 37:10, 11).
18 Aka yatichäwinjja kunanakatï jan uñjaski ukanakatwa phesqa toqet yatjjatawaytanjja, ukat ukanakaru ‘chuym churañasaw’ wakisi. Jutïr yatichäwinwa, kunanakas jutïrin pasani ukanak phesqa toqet yatjjataskarakiñäni.
[Qhanañchäwinaka]
^ Apocalipsis... ¡se acerca su magnífica culminación! librot 251 janat 258 janakam uñjjattʼäta.
^ Traducción del Nuevo Mundo de las Santas Escrituras Biblian Daniel 2:44 qellqatan Diosan Reinopajj ‘taqe aka reinonakaruw tukjani’ siski ukajja, metalanakat lurat jachʼa jaqen partenakapampi saski uka reinonakawa. Ukat Apocalipsis libronkir profeciarjamajja, ‘taqe reyinakaruw tantachasini’ “taqe chʼaman [Jehová] Diosan jachʼa urupana jupampi nuwasiñataki” sasaw qhanañcharaki (Apo. 16:14; 19:19-21). Ukhamasti, Armagedonanjja janiw Daniel libron parlki uka reinonakaki tukjatäpkaniti, jan ukasti oraqpachankiri taqe gobiernonakaw tukjatäpjjani.
^ Kunapachatï Supayampi sajjranakapampejj waranqa maranak tukuyatar “nina asufre qotaru jaqontatä[pkani]” ukhaw Jesusajj pʼeqet taqjjatañ tukuyani (Apo. 20:7-10; Mat. 25:41).
[Jiskt’anaka]
[4, 5 jananakan recuadropa/fotonakapa]
AKANAKAW NIYA PASAÑAMPÏSKI:
1 “Taqe kunas sumakïskiwa, janiw kunas paskaniti” sapjjaniwa
2 Markanakajj “Jachʼa Babilonia” contraw sartapjjani ukat tukjapjjani
3 Jehová Diosan markap contraw sartapjjani
4 Armagedón jachʼa chʼajjwäwiw utjani
5 Supayampi sajjranakapampiw “manqhapacha chʼamakar” jaqontatäpjjani
