Jaqenakar “ikit sartañ” yanaptʼapjjañäni

“Taqe akanakjja amuyasipjjam, kuna urunakantejj jakktan uka, ikit sartasiñajja horasäjjewa.” (ROM. 13:11.)

¿QHANAÑCHTʼASMATI?

¿Kunatsa cristianonakajj ajay toqet pʼarjjtatäñasa?

¿Yatiyir sarkasajja kuna toqenakat amuyañasasa, ukat kunatsa sum istʼañajj wakisiraki?

¿Yatiyir sarkasajj kunatsa munasiñ uñachtʼayañasa?

1, 2. ¿Kuna toqensa jaqenakajj wal ikirtʼasipki?

 SAPA marasa waranq waranqa jaqenakaw auto apnaqkasin ikjasajj jiwañar puripjje. Ukat yaqhanakasti, ikjasaw trabajotsa jaqsuyasipjjaraki. Kuna laykutejj qheptʼataw puripjje jan ukajj pachpa trabajonwa ikiskir katjayasipjje. Ukampis ajay toqen ikjañajj jukʼamp jan walinakaruw puriyistaspa. Ukatwa Biblianjja akham sispachïstu: “Kusisiñanïniw khititejj [jan ikjasa] suyaski” ukajja sasa (Apo. 16:14-16).

² Jehová Diosan jachʼa urupajj wali jakʼankjjewa. Ukampis jaqenakajj ajay toqen wal ikirtʼasipki. Iglesiar saririnakasa uka pachparakiw ikirasipki sasaw yupaychäwi pʼeqtʼirinakat yaqhepajj sapjje. Ukampis ajay toqet ikiña sasinjja, ¿kuna toqets parlasktanjja? ¿Kunatsa cheqpach cristianonakajj jan ikjañasäki? ¿Kunjamsa yaqhanakarus ikit sartañ yanaptʼsna?

¿KUNAS AJAY TOQET IKIÑAJJA?

3. ¿Ajay toqet ikirinakajj kunatakis chʼamachasipjje?

³ Kunapachatï maynejj ikiski ukhajja, janiw kuns lurkaspati. Ukampis ajay toqet ikirinakajja, jan tiemponiw sarnaqapjje. Kuntï munapki ukanak jikjjatañatakejj jan inaktʼasaw sarnaqapjje. Qollqenïñatakisa, kusistʼañatakisa jan ukajj wali mintatäñatakis walpun chʼamachasipjje. Ukat kuntï Jehová Diosajj lurapjjam siski ukanakjja janiw amtapkiti. Janirakiw Diosan Arupat yateqañatakis tiempo apstʼasipkiti. Ukampis khitinakatï ajay toqen jan ikipki ukanakajja, qhepa urunakan jakatas wal amuyasipjje, ukatwa Diosan munañapa lurañatakejj wal chʼamachasipjje (2 Ped. 3:3, 4; Luc. 21:34-36).

4. ¿‘Janiw mayninakjam ikjañasäkiti’ siski uka arunakar istʼañajj kunats wakisi?

⁴ Apóstol Pablojja, 1 Tesalonicenses 5:4-8 (liytʼasiñapawa) qellqatanjja, ‘janiw mayninakjamajj ikjañasäki’ sasaw  cristian masinakaparojj ewjjtʼäna. Ukampejj ¿kamsañs munäna? Qʼoma sarnaqañ toqet Jehová Diosan kamachinakap utjki ukarojj istʼañasawa, jan istʼksna ukhajja ikjasksnas ukhamaspawa. Maysa toqetjja akapachan tukusiñapajj sinti jakʼankjjewa, ukat jiwasatï munañasarjamaki sarnaqañäni ukhajja, ikjasksnas ukhamarakispawa. Ukhamajja jan wali jaqenakampejj janiw chikachasiñasäkiti ukhamatwa jan wali lurañanakat jarkʼaqasiñäni.

5. ¿Ajay toqet ikisipki ukanakajj kunjams amuyapjje?

⁵ Yaqhepanakajja, Diosajj janiw utjkiti ukat janiw kunapachas cuenta maykistaniti sasaw sapjje (Sal. 53:1). Ukat yaqhepajj akham sapjjarakiwa: “Diosajj janiw amtaskistuti, kunatarak jiwasast Jupat amtasiskañänisti” sasa. Ukatjja, iglesianakar sarasakis maynejj Diosar jakʼachaskaspa ukhamwa yaqhepajj amuyapjjaraki. Jïsa, ukham amuyasaw jaqenakajj ikirtʼasipki. Ukhamajj jupanakar sartayañasawa ¿Kunjamats sartaysna?

JIWASAW NAYRAQATA SARTAÑASAJJA

6. ¿Kunatsa cristianonakajj jan ikjañasäki?

⁶ Yaqhanakar ikit sartayañatakejja, nayraqatajj jiwasaw ikit sartañasa. Ukatjja, kunanakas ikjayistaspa ukanakatsa amuyasiñasawa. Khitinakatejj ajay toqen ikisipki ukanakajja, “chʼamakan[wa]” sarnaqapjje sasaw Bibliajj qhanañchi. Jïsa, thoqhoñanakana, umañanakana ukat qʼañu lurañanakan chʼamaktʼayataw sarnaqapjje. Nuwasiñsa, envidiasiñsa, jan pʼenqan sarnaqañsa janiw ajjsarapkiti (Romanos 13:11-14 liytʼasiñapawa). Ukat jupanak taypin sum sarnaqañajj chʼamawa. Ukhamasti, wal amuyasiñasawa. Mä auto apnaqerit parltʼañäni, “janiw ikjkäti” sasin chuymaparuk atinisispa ukhajja, ikjasaw jiwañar purispa. Ukhamajj janipun armañäniti, ajay toqen ikjasajja, jiwañaruw purtʼassna.

7. ¿Jaqenakan jan istʼañ munatajj kunarus purtʼassna?

⁷ Jaqenanakan jan istʼañ munataw yaqhep jilat kullakanakajj ikjapjjarakispa, “janipuniw Diosan arunakapat istʼañ munapkaniti” sasaw amuyapjjaspa (Pro. 6:10, 11). “Janirakis istʼañ munapkitejjä, inamayakiw qariskta” sasaw sapjje. Cheqasa, waljaniw jan istʼañ munapkiti. Ukampis yaqhepajj jan walinakan uñjasisaw jan ukajj amuytatasisaw qhepat istʼañ munapjjaspa. Ukhamasti, jupanakar ikit sartayañatakejja wali pʼarjjtatäñasawa. Kunjamatsa Diosan arunakapat istʼañ munapjjaspa uk wal amuyañasawa. Maysa toqetjja, jiwaspach jan ikjañatakejja, kunatsa Diosan arunakapat yatiyañajj wakisipuni uk sum amuyañasawa.

¿KUNATSA DIOSAN ARUNAKAPAT YATIYAÑAJJ WAKISI?

8. ¿Kunatsa yatiyir sarañajj wakisipuni?

⁸ Jaqenakan istʼatas jan istʼatas ak amtañasawa, yatiyir sarasajj Jehová Diosaruw jachʼañchtanjja, amtanakap phoqañatakiw Jupajj yatiyir sarapjjam sasajj khitistu. Ukat yatiyir sarktan ukhajj kunjamsa istʼapjje ukarjamaw sapa maynis uñjatäjjani. Jan istʼañ munirinakajj tukjataw uñjasipjjäni (2 Tes. 1:8, 9). Ukampis ‘aski jaqenakas jan aski jaqenakas’ igualak jaktasipkani sasin jan yatiyir sarjjsna ukhajja, jiwasan juchasäspawa (Hech. 24:15, MT). Khitinakatejj ‘cabritonakjam’ ajllinukutäpkani ukanakajja, jan mayampitakiw jiwarapjjani sasaw Bibliajj qhan yatichistu. Ukhamasti, Diosan khuyapayasiñapatwa jaqenakarojj jichhakamas yatiyasiski, ukhamata qhespisin wiñay jakañ katoqapjjañapataki (Mat. 25:32, 41, 46; Rom. 10:13-15). Ukampis jiwasatï jan yatiyir sarksna ukhajja, ¿kunjamatsa jaqenakajj wiñay jakañar apir suma yatiyäwinak istʼapjjaspa?

9. ¿Diosan arunakapat yatiyir sarañajj kunatsa jiwasatakis jaqenakatakis wali aski?

⁹ Diosan arunakapat parlir sarasajj jiwas pachpaw chʼamañchastanjja (1 Timoteo 4:16 liytʼasiñapawa). Kunjamtï yatktanjja, Diosan Reinopat parlir sarasasa ukat jaqenakar Jupjjat yatiyasasa jukʼampiw Jupar munastanjja, ukat iyawsäwisas jukʼampiw jiljjattaraki. Ukat  cristianjam sum sarnaqañatakis yanaptʼarakistuwa. Ukampis janiw ukakïkiti, jaqenakar yatiyir sarasin Diosar munasitas uñachtʼayasajja, wali kusisitaw jikjjatastanjja. Sañäni, khitinakatejj jaqe masipar Bibliat yatichapki ukanakajja wali kusisiñanïpjjewa, kunjamsa yateqerejj qollan ajayun yanaptʼatajj sum sarnaqañ qalltawayi uk uñjasajja chuymas chuymaw jikjjatasipjje.

AMUYTʼAÑASAWA

10, 11. 1) ¿Kunjamasta Jesusas ukat Pablos jaqenakar sum yatiyapjjäna? 2) ¿Jaqenakar sum yatiyañatakejj kunanak amuyañas wakisispa?

¹⁰ Kunjamatsa jaqenakajj Diosan Reinopat yatiñ munapjjaspa uk wal amuyañasawa. Jesusat amtañäni, jan juchan jaqjamajja, wali sumwa jaqen chuymapjja yatïna. Kunjamsa mä fariseojj colerañat chuymapan jikjjatasi, kunjamsa mä juchani jaqejj pisayasi ukat pisin jakasir mä viuda warmejj kunjam chuymampis jukʼa utjiripsa churaraki ukanakjja sum yatïna (Luc. 7:37-50; 21:1-4). Ukatjja, ukarjamaw sapa maynirus Diosan arunakapat yatichäna. Cheqas jiwasajj janiw jaqen chuymap yatksnati, ukhamajj kunjamsa jaqenakajj jikjjatasipjje, jan ukajj kunanaksa lurapjje ukanak amuyañataki chʼamachasiñasawa. Pablot yateqasipjjañäni, jaqenakajj kunjam chuymanïpjjesa ukat kawkinsa jakapjje, ukarjamaw sum yatichirïna (Hech. 17:22, 23, 34; 1 Cor. 9:19-23).

¹¹ Ukhamasti, Jesusampit Pablompit yateqasisin jaqenakar thaqhapjjañäni. Kunjamatsa istʼañ munapjjaspa uk amuyapjjapuniñäni. Sañäni, maynimp jikisiñäni ukhajja, kawkitsa jutpacha, kuna toqetsa parltʼasiñ munaspa ukat kunjam familianisa ukanak amuyañasawa. Ukat kuns luraski uksa amuyañasarakiwa, ukhamatwa jupampejj parltʼasiñ qalltsna.

12. ¿Diosan Arup yatiykasajj kuna toqet amuyasiñas wakisispa?

¹² Ukat yatiyir sarktan ukhajja, kunanakatejj pantjasiykistaspa ukanakat amuyasiñasarakiwa. Cheqas mä jilatampi jan ukajj mä kullakampi yatiykasin parltʼasiñajj askïspawa. Ukampis ak amtañäni, janiw jiwaskam parlirikejj sarktanti, jan ukasti jaqenakar Diosan arunakapat yatiyiriw sartanjja (Ecl. 3:1, 7). Ukhamasti, punkut punku sarkasin jiwas puraki parlasksna ukajj janiw walïkaspati. Antisasa, kunjamatsa jaqenakan chuymapar purtʼsna ukanakat parltʼasiñaw askïspa, ukhamatwa jaqenakar sum yatiysna. Ukat ¿celularat kamsaraksnasa? Cheqas yatiyir sarktan ukhajj wal yanaptʼasi. Ukampis jaqenakamp parlasktan ukjapuni jawsanipjjaspa ukhajja pantjasiyistaspawa.

JAQENAKAR TAQE CHUYM YANAPTʼAÑÄNI

13, 14. 1) ¿Kuna toqetsa utanejj yatiñ munaspa ukjja kunjamatsa amuysna? 2) ¿Diosan arunakapampi maynin chuymapar purtʼañatakejj kunas yanaptʼistaspa?

¹³ Kunapachatï Diosan arunakapat yatiyir sarktan ukhajja, kunsa jaqenakajj sapjje uk wali amuyumpi istʼañasawa. Ukat kuna toqenakat jisktʼañas walïspa uksa amuyañasarakiwa. Yaqhepajj kunayman toqet llakisipjje, “religionakiw wal utjaski, marka apnaqerinakas janiw sum apnaqapkiti ukat nuwasiñakiw kawkins uñjasiski” sasaw llakisiñ yatipjje. Ukhamasti, uka toqenakat parlañ qalltasaw Diosan bendicionanakapat jaqenakar amuytʼaysna. Sañäni, jaqejj kunja suma lurtʼatätansa ukat Biblian yatichäwinakaparjam sarnaqañajj kunatsa wakisi uka toqenakatwa sum amuytʼaysna. Ukatjja, Diosar mayisiñ toqetsa parlaraksnawa. Walja jaqenakaw uka toqet wal yatiñ munapjje, “¿cheqapunit Diosajj istʼpachïstu? ¿Taqe kasta oracionanakti istʼpacha? Ukat ¿jan istʼkchi ukhajj khitis istʼpachïstu?” sasaw wal yatiñ munapjje. Ukat Diosajj janiw utjkiti sirinakas uka toqet yatiñ munapjjarakispawa.

¹⁴ Maysa toqetjja, kunjamsa experienciani jilat kullakanakajj jaqenakar yatiyapjje uk amuyañasarakiwa. Kun jisktʼasasa amuyumpiw jaqenakan chuymapar purtʼañ yatipjje, janiw khitirus pʼenqasiyapkisa ni ajjsarthapiyapkisa. Kunjam arunakampis arjjayapjje, kunjamsa  uñkattʼapjje ukat kunjamsa utanin amuyunakapar respetatapsa uñachtʼayapjje ukanak wal amuyañasawa (Pro. 15:13).

JAQENAKAR SUMAT SARTAYAPJJAÑÄNI

15. ¿Kunatsa yatiyir sarkasajj jaqenakar sumat sartayañatak chʼamachasiñasa?

¹⁵ Wali sum ikisktan ukat maynejj mä akatjamat sartayistu ukhajja, ¿kamachtansa? Yaqhepajj wal colerasipjje. Sumat sartayapjjestaspa ukwa taqenis muntanjja. Kunapachatï jaqenakar ajay toqet sartayir sarktan ukhajja, ukhamarakiw yaqhepajj colerasipjjaspa. “¡Kuns munta!” sasaw awisajj toqesipjje. ¿Ukham satajj kamachañas wakisispa? Janiw colerasiñasäkiti. Antisas taqe chuym yuspärtʼasin sumat sarjjañasawa, ikit sartayatajj kunjamas jikjjatasi uk amuyañasawa (Pro. 15:1; 17:14; 2 Tim. 2:24). Inas ukhamat mayan istʼañ munjjchispa.

16, 17. ¿Jaqenakar yatiykasajj kunatsa chʼikhi chuymanïñasa?

¹⁶ Ukampis awisajja jan istʼañ laykukiw akham sapjjaraki: “Janiw tiemponïkti”, “nayajj religionanïtwa” sasa. Uk satajj ¿ukhamakit sarjjañäni? Janiwa, amuytʼasin sumat jisktʼasaw Biblian yatichäwinakapampi chuymar purtʼsna (Colosenses 4:6 liytʼasiñapawa).

¹⁷ Ukat yaqhepajj cheqapuniw jan tiemponi sarnaqapjjaraki. Ukhamächi ukhajja, sarjjañasawa, ukhamatwa respeto uñachtʼayañäni. Ukampis inas awisajj Bibliat mä qhawqha arunakampi yatichtʼawayaraksna. Yaqhep jilat kullakanakajj mä jukʼa parltʼasakiw yatichtʼapjje. Bibliat mä cheq liytʼasajja, amuytʼaykir mä jisktʼampi jaytapjje, ukhamat mayan uka toqet parltʼasiñataki. Qalltat tukuykamajj janiw mä minutotsa pasapkiti. Ukham mä qhawqha arunakamp parltʼasajja, awisajj wali sumwa utanin chuymaparus purtʼapjje ukat jan tiemponinakas yatjjatañ munapjjarakiwa. ¿Janit jiwasajj ukham yatichañ munkaraksna?

18. ¿Jaqenakar taqe cheqan sum yatiyañatakejj kunanakas yanaptʼistaspa?

¹⁸ Ukat kawkinkkasas jaqenakar yatiyañasarakiwa. Ukatakejj wakichatäñasawa. Walja jilat kullakanakaw Bibliat apstʼat qellqatanak apnaqasiñ yatipjje, yaqhepajj bolsilloruw apasipjje, ukat yaqhepasti bolsarus apasipjjarakiwa. Ukatsti, jaqenakampi parltʼasiñatakejj Biblian mä jiskʼa tʼaqapwa yatsupjjaraki. Ukat jiwasatï ukham yatiyañ munstan ukhajja, yatiyañ toqet irpir chuyman jilataruw jan ukajj mä precursoraruw jisktʼassna.

FAMILIARANAKAR SUMAT SARTAYAPJJAÑÄNI

19. ¿Familianakasar yanaptʼañatakejj kunatsa chʼamachasiskakiñasa?

¹⁹ Familiaranakasajj Bibliat yateqasin Diosar jiwasamp chika loqtapjjaspa ukwa taqenis muntanjja (Jos. 2:13; Hech. 10:24, 48; 16:31, 32). Ukampis awisajj janiw munapkiti. Ukatwa yaqhep jilat kullakanakajj chuymanakapan mayjtʼasipjje. Inakis familiaranakar yanapañataki chʼamachasipkaspa ukham amuyasipjje. Ukampis ak amtañasawa, Bibliat sum yatichkatas yaqhep familiaranakajj qhepatakwa amuytatasipjje, kunas pasjje ukhakiw Bibliat yateqañ munapjje.

20. ¿Familiaranakar suma arunakampi arjjayañajj kunatsa wakisi?

 ²⁰ Ukat familiaranakarojj sumat yatichañasawa, munkir jan munkir yatichañ munatajj chuym usuyasipjjaspa (Rom. 2:4). Amuytʼañäni, ¿utat uta yatiyir sarktan ukhajj kunjam arunakampis jaqenakar arjjaytanjja? ¿Janit wali respetompi ukat munasiñampi parlktanjja? Jïsa, familiaranakarojj ukham arunakampi arjjayañasarakiwa. Ukat sapa kuti Bibliampi ewjjañat sipansa, sarnaqatasampiw yatichañasa. Diosan arunakapat yateqañajj kunja askisa ukajj qhanaw luratanakasan uñjasiñapa (Efe. 4:23, 24). Jehová Diosajj kunjamsa askisatakejj taqe kunsa yatichistu ukwa familiaranakasajj amuyapjjañapa (Isa. 48:17). Mä arunjja, cheqpach cristianonakajj kunjamsa sarnaqapjje uk uñachtʼayañasawa.

21, 22. ¿Kunatsa familiaranakasar Diosan arunakapa yatichañatakejj chʼamachasiskakiñasa? Mä experienciampiw qhanañchtʼasma.

²¹ Mä kullakajj jichhakiw akham sas qellqanitayna: “Nänakajj 13 jila sullkäpjjtwa. Ukat jupanakar yatichañatakejj walpun chʼamachasta, sapa marapuniw cartanaks apayta” sasa. Uka kullakajj sapakis familia taypit Jehová Diosaru 30 maranaka loqtawaykchejja, jupanakar suma arunakampi ukat sarnaqatampi yanaptʼañatakiw chʼamachasi.

²² Uka kullakajj akham saskakiwa: “Mä urojja wali jayan jakasiri mä kullakajaruw telefonot jawsta. Ukat jupajj Bibliat yateqañ munta, mä kullakaw Bibliat parlir jutatayna, ukampis yatichita satajja janiw mayampsa kuttʼanjjeti sasaw situ. Ukatjja, nayaw yatichirisma sasaw kullakajar sumat sista. Uk satajj akham sasaw situ: ‘Walikiwa, ukampis may sañ munsma, janipuniw nayajj kunapachas Jehová Diosan Qhanañchiripäkati’ sasa. Uka qhepatjja, ¿Kunsa Bibliax chiqpachapuni yatichi? siski uka libro apayta. Ukampis katoqasajj ukhamakwa imjjatayna. Ukat walja kuti telefonot jawsasajja, librom aptasim ukat uñjjattʼañäni sasaw sista. Ukatjja, 15 minutonakaw parltʼasipjjta, Bibliat liytʼasinsa wali sum qhanañchtʼarakta. Ukat mä qhawqha kutimpiw telefonot jawsta. Ukampis jupajj janiw 15 minutonakak yateqañ munjjänti. Ukatwa jupajj jawsaniñ qallti. Awisajja, wali alwanakaw jawsasiniri ukat awisajj urun pay kutiw jawsanirakiri. Ukat mä maratjja Jehová Diosan loqtiripjamaw bautisasiwayi, ukat mä mara qhepatsti precursorjam irnaqañ qalltawayi”.

23. Ajay toqet jaqenakar ikit sartayañatakejj ¿kunatsa chʼamachasiskakiñasa?

²³ Chʼamäkipansa, suma chuyman jaqenakar Diosan arunakapat yatichañataki wal chʼamachasiñasawa. Waljaniw yatiñ munasipki. Sapa phajjsis pä tunka waranq jilaw oraqpachan bautisasipjje. Ukhamajja, kuntï Arquipo jilatar apóstol Pablojj siskäna uk amtapuniñäni, akham sasaw ewjjtʼäna: “Uñtam, kuna lurañtï Tatitojj churktam ukjja sum phoqham” sasa (Col. 4:17). Jutïr yatichäwinjja, kunatsa jaqenakar Diosan arunakapat yatiyañajj wakisipuni ukwa yateqaskañäni.

[Jiskt’anaka]

[13 janan recuadropa]

JAN IKJAÑATAKEJJ KUNANAKAS YANAPTʼISTASPA

▪ Jan inaktʼasaw Jehová Diosan munañap taqe chuym lurañasa

▪ Jan wali luräwinakat jaltañasawa

▪ Amuyasipjjañäni, ukatarak ikjasksna

▪ Yatiyirejj kusisit chuymampiw sarañasa

▪ Kunjamtsa jaqen chuymapar purtʼsna uk kunaymanit yantʼañasawa

▪ Yatiyir sarañajj kunatsa wakisi uk amtapjjapuniñäni