Suman jakasiñatakix qullan ajayurjam sarnaqapxañäni

“Janiw janchin munañaparjam jakkxtanti, jan ukasti [ajayurjamaw] jakxtanxa.” (ROM. 8:4.)

1, 2. 1) ¿Auto jan amuyumpi apnaqañax kunatsa jan walïki? 2) ¿Ajay tuqit jan amuyasksna ukhaxa kunarus pursna?

 JAQINAKAX janiw auto amuyumpi apnaqxapxiti, marat maratjamaw chijir puriñax jilxattaski sasaw Estados Unidos markankir mä autoridadax satayna. Ukax chiqäskapuniwa, auto wali amuyumpi apnaqañat sipansa, yaqhipax celularat parlasa, maysanak uñanaqasisa jan ukax yaqhanak lurasaw apnaqapxi. Chijir puririnakatxa waljaniw akham sapxi: “Celularat parltʼasisaw choferox auto apaskäna” sasa. Ukat ukham apnaqasarakiw thak saraskirinakarus awisax takxatapxi. Ukampis ukham apnaqañax askïkaspas ukhamwa yaqhip choferonakax amuyapxi. Janiw chijir puriñatxa amuyasipkiti.

² Kunapachatï maynix jan amuyumpi auto apnaqi ukhaxa, janiw thakin utjki uka señalanaksa uñjkiti, ukhamatwa jan wali chijir puripxi. Jehová Diosar yupaychañ tuqitxa uka pachpaw pasarakispa. Jan amuyasksna, yaqha tuqinakat llakisisa sarnaqasksna ukhaxa, ajay tuqit jan waltʼañaruw pursna. Iyawsäwisax aynachtʼaspawa sasaw apóstol Pablox säna (1 Tim. 1:18, 19). Ukatwa Roma markankir cristiano jilat kullakanakar qillqasax akham sarakïna: “Akapachankkis ukanakat llakisiñaxa jiwañar apiriwa, ukampis Ajayun jakañat llakisiñaxa wiñay jakañaru, ukhamarak sumankañaruw api” sasa (Rom. 8:6). ¿“Akapachankkis ukanakat llakisiña” sasinxa kuna tuqitsa apóstol Pablox parlaskäna? ¿Ukanakat jan llakisiñatakix kunas yanaptʼistaspa? Ukat ¿“ajayun jakañat” llakisiñatakix kunas yanaptʼarakistaspa?

Jupanakatakix “janiw kuna juchañchäwis utjkiti”

3, 4. ¿Pablox kunjamsa jikxatasïna, ukat kunatsa uk yatxatañax wakisi?

³ Romankir jilat kullakanakar qillqkasaxa, mä jan walin uñjasta sasaw Pablox säna. ‘Kuntix nayax munkta uka contraw janchixankkis  uka juchax munañapar’ apnaqañ munitu sasaw qhanañchäna (Romanos 7:21-23 liytʼasiñapawa). ¿Jan walinak lurasat jan ukax juchar atipañax wali chʼamäkaspas ukham amuyasach ukham sispachäna? Janiwa, jupax askinak lurañatakiw chʼamachasïna. Alaxpachar sarañataki ajllit cristianjamas ukat mä misionerjamas wali amuytʼasir suma chuyman jilatänwa (Rom. 1:1; 11:13). Ukhamax ¿kunatsa ukham sispachäna?

⁴ Chuymajanxa Jehová Diosan munañap wali sumwa phuqañ munta, ukampis janiw phuqirjamäkti sasaw apóstol Pablox säna. ¿Kunatsa? ‘Juchanïtas laykuxa, taqiniw Diosan kʼajkir kankañapat jarkʼaqatätanxa’ sasaw Bibliax qhanañchi (Rom. 3:23, MT). Ukhamasti, Adanan wawapjamaxa, Pablox pantjasir jaqïnwa, ukat chuymapas jan walinakaruw apañ munarakïna. Chiqpachansa taqiniw ukhaman uñjasiraktanxa. Ukat akapachanxa kunayman jan walinakaw utjaraki, ukanakaw Jehová Diosar taqi chuyma luqtañatxa maysar uñtayistaspa. Wiñay jakañar apir kʼullkʼu thakitsa saranukuyarakistaspawa (Mat. 7:14). Ukampis Pablotakix mä yanapaw utjäna, kunjamatï jiwasatakix utjki ukhama.

5. ¿Kunas Pablor yanaptʼäna?

⁵ “¿Khitiraki [...] qhispiyitani?” sasaw apóstol Pablox jisktʼasïna. Ukat “Diosaruwa yuspagärta, Jesucristo [...] tuqi” sasaw qhanañcharakïna (Rom. 7:24, 25, MT). Ukatxa, akham sasaw Jesucristomp chika alaxpachar sarir ajllit cristianonakarux sarakïna: Qullan “ajayurakiw [...] Diosan wawanakapätas qhanañchi.” “Diosatxa herencia katuqarakiñäni [...]. Uka herenciaxa Cristompirakiw katuqañäni” sasa (Romanos 8:1, 2 liytʼasiñapawa; Rom. 8:14-17). Ukhamasti, ajllit cristianonakax Jesucriston luqtasitaparuw taqi chuym iyawsapxi ukat Jehová Diosan qullan ajayupampi yanaptʼataw jañchin utjki uka jucharux atipapxi. Ukhamax “janiw kuna juchañchäwis [jupanakatakix] utjkiti”. ‘Juchan munañaparjam sarnaqañatsa jiwañatsa qhispiyatäpxiwa.’

6. ¿Kunatsa taqi cristianonakas Pablon arsutanakapat yatxatañasa?

⁶ Chiqansa, Pablox alaxpachar sarir jilat kullakanakaruw Jesucriston luqtasitapar iyawsañ tuqitsa, ukat qullan ajay tuqitsa parlaskäna. Ukampis uka arunakapax aka uraqin jakañ suyir cristianonakatakis wali askirakiwa. Ukat niyakixay Pablon arunakapax Diosan amuytʼayatächixa, taqi cristianonakaw uka arunak amuytʼañatakisa ukat askinak apsuñatakis chʼamachasiñasa.

“Jucharux janchina juchañchi”

7, 8. 1) ¿Moisesan katuqat Leyinakax kunatakis jan chʼamanïkäna? 2) ¿Kunsa Jehová Diosax qullan ajay tuqisa Jesusan luqtasitap tuqis jikxatawayi?

⁷ Juchax jañchisxarux wali chʼamaniwa sasaw Pablox Romanos paqallqu jaljan qhanañchi. Ukat kimsaqallqu jaljansti Diosan qullan ajayupax kunja chʼamanisa uka tuqitwa parlaraki. Ukatxa, uka qullan ajayuw juchan chʼamapar atipañatakix yanaptʼistu sasaw cristian masinakapar sarakïna. Chiqansa, qullan ajayun yanaptʼataw Jehová Diosan munañapsa sum phuqapxäna ukat Jupampis sum apasipxäna. Ukxarusti, qullan ajayumpi ukat Jesucriston luqtasitapampiw Diosax amtanakap phuqaraki, Moisesan katuqat Leyinakampix janiw phuqkaspänti sasaw Pablox qhanañcharaki.

⁸ Jïsa, Moisesan katuqat Leyinakax jaqinakan juchanïtap uñachtʼayañatakïnwa. Ukat uka Leyinakarjam luqtir jilïr sacerdotenakas juchanïpxarakïnwa, ukhamax janiw juch qʼal apaqañatakix mä sacrificiox luqtaskaspänti. Ukatwa Jehová Diosax amtap phuqañatakixa mä sapa Yuqapar khitaniwayi. Uka Yuqapax ‘jiwasjam juchar purirjam janchi cuerponiw’ jutäna. Ukat jaqinakan juchanakap layku sacrificiot luqtasaw Diosax ‘juchar janchina juchañchawayi’. Ukhamatwa Moisesan katuqat Leyinakan jan chʼamanïtapsa  uñachtʼayarakïna. ¿Kunsa taqi ukanakampi amuytanxa? Alaxpachar sarir cristianonakax Jesucriston luqtasitapar taqi chuymaw iyawsapxañapa, ukhamatwa Dios nayraqatan askit katuqatäpxaspa. Ukatwa Pablox jupanakar akham säna: “Jiwasanakasti janiw janchin munañaparjam jakkxtanti, jan ukasti Ajayumpi chiktʼataw jakxtanxa” sasa (Romanos 8:3, 4 liytʼasiñapawa). Ukat jupanakataki wakichat “jakañ corona” katuqañatakix aka Uraqin jiwañkam sum sarnaqapxañapawa, janiw Diosat jithiqtapxañapäkiti (Apo. 2:10).

9. ¿Romanos 8:2 qillqatax kuna kasta leyinakatsa parli?

⁹ Ukat apóstol Pablox janiw Moisesan katuqat Leyinakatak parlkänti, jan ukasti yaqha kasta leyinakat parlarakïna: ‘juchan munañapampita ukat jiwañan munañapampita’ parlarakïna (Rom. 8:2). Ukat “juchan munañapa” sasin jaqukipatäki uka griego aruxa, “ley” sañwa munarakispa. Ukampis janiw kamachinakat parlkiti. Jan ukasti, “kunatix chuymasan walirus jan walirus apkistu uk sañ muni, uka leyiw munañapar apnaqistu. Ukat jaqinakax ukarjamaw sarnaqapxaraki” sasaw mä qillqatax qhanañchi.

10. ¿Kunjamatsa juchampir jiwañampir katuyatätanxa?

¹⁰ “Kunjämatix mä sapa jaqi tuqi juchax aka uraqir mantankixa, ukat jiwax uka jucha laykurak utjixa, ukhamarakiw jiwax taqi jaqirux katuntawayi juchachasitap layku” sasaw apóstol Pablox qhanañcharaki (Rom. 5:12). Chiqansa, Adanan wawanakapjamaxa, taqiniw juchan munañaparus ukat jiwañan munañaparus katuyatäpxtanxa. Ukat jiwañar apir jan walinak lurañasatakiw jucharar chuymasax aparakistu. Ukatwa Pablox Galacia markankir cristiano jilat kullakanakarux akham sasin sispachäna: “Khitinakatix [jañchin, MT] luräwinakan qhipap arkapxi [...] ukanakaxa janiw Diosan reinopanxa katuqatäpkaniti” sasa (Gál. 5:19-21). Chiqansa, ‘jañchin munañanakaparjam jakapki’ ukat jan wali amuyunakampi apayasipki ukanakaw jan wal sarnaqañxa yatipxi (Rom. 8:4). Ukampis khitinakatix wachuq juchanakan sarnaqapki, layqasiñanakan sarnaqapki, Diosarus kutkatapki ukat yaqha ukham sinti jan walinak lurapxi, ¿ukanakakiw jañchin munañaparjam sarnaqapxi sissnati? Janiwa. Galacia markankir cristiano jilat kullakanakar qillqasaxa, jan wali amuyunakamppachatwa Pablox parläna. Celasiñasa, colerasiñasa, nuwasiñasa ukat envidiasiñasa jañchin munañanakapawa sasaw säna. Ukhamasti, ukanakampi jan apayasiñatakix sapüru chʼamachasiñasawa.

11, 12. ¿Jiwañar apir juchat qhispiñatakix kunjamsa Jehová Diosax yanaptʼawayistu, ukat Jupampi sum apasiñatakix kun lurañasarakisa?

 ¹¹ Ukampis janiw sinti llakisiñasäkiti, juchan munañapatsa jiwañan munañapatsa Jehová Diosaw qhispiyasistu. Jesusax uka tuqit akham sasaw säna: “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” sasa (Juan 3:16-18). Ukhamasti, jiwañar apir juchat qhispiñatakix Jehová Diosan munasiñapan jakañataki chʼamachasiñäni, ukat Jesucriston jiwatapar atinisiñasarakiwa. Ukhamax kunatsa Pablox “Diosaruwa yuspagärta, Jesucristo [...] tuqi” sasax sispachäna uk amuytanwa. Ukat jiwasax ukham sañasarakiwa.

¹² Munañapar apnaqañ munkistu uka juchax jiwañar apir mä usumpi sasiwa. Kunjamatix mä jan wali usut qullasiñatakix doctoran iwxanakap sum istʼktanxa, ukhamarakiw pantjasirïkasas Jehová Diosar istʼañasaxa. Ukat jiwañar apir juchat qhispiñatakix Jesucriston jiwatapar taqi chuym iyawsañasarakiwa. Ukampis janiw ukaruk tukuskiti, Diosampi sum apasiñatakisa ukat jupan bendicionanakap katuqañatakisa qullan ajayurjam sarnaqañasawa sasaw Pablox säna.

Qullan ajayurjam jichhatpach sarnaqapxañäni

13. ¿Qullan ajayurjam sarnaqaña siski ukax kamsañs muni?

¹³ Qullan ajayurjam sarnaqañatakix urut urutjam chʼamachasiñasawa. Janiw mä chiqawjankkasax kawkirus purksnati (1 Tim. 4:15). Pantjasiñax utjaskakchinisa, kunatix askïki ukanak lurañataki nayrar sartañasawa. Ukat qullan ajayurjam sarnaqañataki chʼamachasiñäni ukhaxa, pachpa Jehová Diosas aski luräwinakas uñjasax chuymapan kusisiniwa (Gál. 5:16).

14. ¿Jañchin munañaparjam jakirinakax kunjamsa sarnaqapxi?

¹⁴ Yaqhipax janchin munañaparjamaw jakapxi ukat yaqhipasti qullan ajayurjamaw jakapxaraki sasaw Pablox Roma markankir cristianonakar säna (Romanos 8:5 liytʼasiñapawa). Ukat “jañchi” sasinxa janiw cuerpo tuqit parlkiti. Jan ukasti, kunjamsa juchax pantjasir jaqinakarux apnaqistu uka tuqitwa parlaski. Amtañäni, ‘kuntix nayax munkta uka contraw janchixankkis uka juchax’ apnaqañ munitu sasaw Pablox säna, jupax janiw jañchin munañanakapampi atipayasiñ munkänti. Ukampis khitinakatix jañchin munañaparjam jakapxi ukanakax janiw juchar atipañatakix chʼamachasipkiti. Kuntï Diosax  mayki ukanakxa maysaruw apanukupxi. Ukat janirakiw Jehová Diosarus yanaptʼita sasax mayisipkiti. Kunjamtï Pablox siskixa, “akapachan jakañatakwa llakisipxi”, mä arunxa kuntï chuymapan munapki ukarukiw arkapxi. Ukampis khitinakatix ajayurjam jakapki ukanakax “ajayu tuqin jakañatwa llakisipxaraki”, jupanakatakix Jehová Diosan munañap lurañaw nayranki.

15, 16. 1) ¿Kuntï munktan ukanakax kunjamsa chuymasar mayjtʼayaspa? 2) ¿Jichha tiempo jaqinakax kuna tuqinakatsa llakisipxi?

¹⁵ (Romanos 8:6 liytʼasiñapawa.) Amuytʼasapuniw walinaksa jan walinaksa lurtanxa. Ukhamasti, khitinakatix jañchin munañanakapat llakisipxi, jan ukax ukak munasipki ukanakax jankʼakiw kuna jan walinaksa lurapxi. Chuymansa, amuyunsa ukanakak munasipki.

¹⁶ Ukampis ¿kunakis jaqin chuymapan utjaski? Apóstol Juanax akham siwa: “Taqi kuntix akapachax churañatak uñachtʼayki ukaxa, janiw Dios Awkit jutkiti, jan ukasti akapachatwa juti. Janchin jan wali munañanakapa, kuntix nayrax uñjkis ukansa munañanaka, jachʼa jachʼa tukuñanaka, taqi ukanakwa akapachax churañ muni” sasa (1 Juan 2:16). Jichhürunakanxa, jaqix uka jan walinakakwa munaski. Ukatwa kunayman axtaskañ qʼañu luräwinakansa sarnaqapxi. Ukat qamirïñasa, wali aytatäñas wali khusawa sasaw sapxi. Ukatxa, uka jan walinakakiw peliculanakansa, libronakansa, Internetansa ukat televisionansa phuqäski. Ukampis khitinakatix ukarjam sarnaqapki ukanakax janiw Jehová Diosampix sum apasipkaspati. Jupatakix jiwatäpkaspas ukhamawa, ukat jutïrinxa chiqapuniw jiwañ uñtʼapxani. Bibliax akham siwa: “Janchin jakañat llakisirinakaxa Diosan uñisiripäpxiwa, ukatsti janiw Diosarux munapkiti ni mandamiento arunakaparusa jaysapkarakiti. Uka laykupï khitinakatix akapach janchin munañanakaparuki serviñ munasipki ukanakaxa, janiw kunjämatsa Diosatakjamäkaspati” sasa (Rom. 8:7, 8).

17, 18. ¿Kunjamatsa ajayun jakañ tuqit llakisitas uñachtʼaysna, ukat kuna bendicionanaksa katuqañäni?

¹⁷ “Ajayun jakañat llakisiñaxa wiñay jakañaru, ukhamarak sumankañaruw api” sasaw Pablox sarakïna. Ukampis ¿kunjamatsa ajayun jakañ tuqit llakisitas uñachtʼaysna? Kuntï Jehová Diosax qullan ajayup tuqix yatichkistu ukarjam sarnaqañasawa. Ukat amuyun jiltañatakisa Diosan chuymap amuyañatakisa chʼamachasiñasarakiwa. Ukhamatwa jiwasatakix ‘mandamiento arunakapax wali munatäni’ ukat amtanakaparjamas sarnaqarakiñäni. Kuna yantʼan uñjasisasa janiw pächaskañäniti, jankʼakiw jan walinakat jithiqtasax askinak lurañäni. Ukat qullan ajayurjam sarnaqasaxa, wali sumaw chuymasan jikxatasiñäni, ukat jutïrinsa wiñay jakañ katuqarakiñäni, ukat Jehová Diosampis wali sum apasirakiñäni.

¹⁸ Ukhamasti, qullan ajayurjam sarnaqañataki chʼamachasipxañäni. ‘Kuntï lurañasäki ukanak’ phuqañaw jiwasatakix nayrankañapa. Mä arunxa, Diosar mayisiñasa, Biblia liyiñsa, tantachäwinakar sarañsa ukat jaqinakar yatichir sarañsa janipuniw armasiñasäkiti (1 Ped. 1:13). Ukat jañchin munañanakapar arkañat sipansa, kuntï Diosax qullan ajayup tuqi yatichkistu ukarjam sarnaqañataki chʼamachasiñasawa. Ukham lurañäni ukhaxa, walja bendicionanak katuqañäni, wiñayatakiw wali sum jakasiñäni (Gál. 6:7, 8).

¿Qhanañchasmati?

• ¿Kunatakis Moisesan katuqat Leyinakax jan chʼamanïkäna, ukat kunsa Diosax lurawayi?

• ¿Kunas juchan munañapasa ukat jiwañan munañapasa, ukat kunjamatsa qhispsna?

• ¿Qullan ajayurjam sarnaqañatakix kun lurañasasa?

[Jiskt’anaka]

[12, 13 jananakan fotonakapa]

¿Jañchin munañaparjamat jumax sarnaqaskta, jan ukax qullan ajayurjamach jakaskta?