¿Jehová Diosax uñtʼtamti?
¿Jehová Diosax uñtʼtamti?
“Tatitux uñtʼiwa jupankirinakaruxa.” (2 TIM. 2:19.)
1, 2. 1) ¿Kuns Jesusax wal munirïna? 2) ¿Kuns jisktʼasipxañasa?
AKHAM sasaw mä fariseox Jesusar jisktʼäna: “¿Kawkïr mandamientos taqit sipansa wali jachʼaxa?” sasa. Ukat Jesusasti juparux sänwa: “Tatit Diosamaruw munäta taqi chuymamampi, taqi almamampi, taqi amuyumampiraki” sasa (Mat. 22:35-37). Chiqansa, Jesusax uka arunakarjamaw sarnaqäna. Awkiparux wal munasïna, ukat Jupan askit uñjatäñsa wal munarakïna ukat jan jithiqtasaw luqtäna. Ukatwa janïr jiwkasaxa akham säna: “Nayax Awkixan mandamientonakap phuqtxa ukhamarak jupax nayar munasitu ukanarakwa sarnaqta” sasa (Juan 15:10).
2 Diosarux uñtʼtwa ukat Juparux wal munasta sasaw walja jaqinakax sapxi, jiwasas ukhamarak sistanxa. Ukampis janiw Diosar uñtʼaña ukat munaña ukakïkiti. Jan ukasti, taqi kunxar Munañani Diosax ‘uñtʼistuti’ janicha uk yatiñasawa. Ukhamax akham jisktʼasiñaw askïspa: “¿Diosax nayar uñtʼituti ukat jupankirirjamat uñjitu?” sasa (2 Tim. 2:19). Taqi kunxar munañani Diosampi sum apasiñax wali askipuniwa.
3. ¿Diosax munaspachïtuti janicha sasax kunatsa yaqhipax pächasipxi? ¿Kunas jan pächasipxañapatakix yanaptʼaspa?
3 Yaqhipanakax Diosar wals munasipkchixa, Diosax janiw nayar munkpachïtuti sasaw sapxi. ¿Kunats ukham sapxi? Janis kunatak askïpkaspa ukham amuyasipxi. Ukampis Jehová Diosax janiw ukham uñjkistuti (1 Sam. 16:7). Apóstol Pablox akham sarakiwa: “Maynitix Diosar munchixa, Diosax juparux uñtʼarakiwa” sasa (1 Cor. 8:3). Ukhamasti, Diosamp uñtʼatäñatakixa, jiwasaw nayraqat Jupar munañasa. Akham sasin amuytʼañäni: “¿Kunatsa aka revista liytxa? ¿Kunatsa taqi chuymampi, amuyumpi Diosar serviñatak chʼamachastxa? ¿Jehová Diosar jakañaj katuyasxtti ukat bautisasxtti? Ukhamächi ukhaxa, ¿kunatsa ukham lurtxa?” sasa. Diosax taqi jaqin chuymanakapwa uñji, ‘ukat taqi markanakan suma munkañanakapwa’ apanini sasaw Bibliax qhanañchi (Hag. 2:7, NM; Juan 6:44 liytʼasiñapawa). Ukhamasti, Diosaw amigopañasatakix jawsistu, ukatwa Jupar jan jithiqtas servisktanxa. Jupasti wali munasiñampiw uñjistani, janipuniw jaytkistaniti, kunattix jupanktanwa (Sal. 94:14).
4. ¿Kunats Diosan amigopäñax wali wakiskirixa?
4 Niyakixay Jehová Diosax markapar jawschistuxa, Jupan munasiñapan jakañwa wal muntanxa (Judas 20, 21 liytʼasiñapawa). Ukat ‘jan chiqa thakit maysar saranukuñatakisa’ ukat ‘jakkir Diosat jan jithiqtañasatakisa’ Bibliax sumwa cristianonakarux iwxtʼistu (Heb. 2:1; 3:12, 13). Pablox janïr 2 Timoteo 2:19 jiskʼa tʼaqat qhanañchkasaxa, Himeneompit Filetompit parläna, jupanakasti Jehová Diosan markapankapxänwa, ukampis qhipatxa, chiqa thakitxa jithiqtxapxänwa (2 Tim. 2:16-18). Ukat Galaciankir yaqhip jilat kullakanakarux uka pachparakiw pasatayna. Diosan uñtʼatäsipkchïnsa, jupanakax chiqap thakit jithiqtxapxänwa (Gál. 4:9). ¡Janipuniw jiwasanakax ukhamar puriñ munktanti! Diosan amigopäñax wali askipuniwa, janiw akapachan kunas uka pachpax utjkiti.
5. 1) ¿Kunjam jaqïñassa Diosax muni? 2) ¿Khitinakatsa yatxataskañäni?
5 Maynitï Jehová Diosan uñtʼatäñ munchi ukhaxa, altʼat chuymanïñapawa, ukat iyawsirïñaparakiwa (Sal. 15:1-5; 1 Ped. 3:4). Kunjamsa nayra tiempon Abrahamax Diosar iyawsasax sarnaqäna ukat kunjamsa Moisesax altʼat chuymampi sarnaqarakïna ukanak uñjañäni. Jupanakax Diosan wali munatäpxänwa. Ukatsti, jachʼa jachʼa tukuri Coré chachax kunjamsa sarnaqäna uka tuqit jichhax yatxatarakiñäni, jupaxa Diosan amigopjamas amuyaskchïnxa Diosax juparux apanukünwa. Chiqpachansa, uka sarnaqäwinakax amuyasiñasatakiw sapa maynir wal yanaptʼistani.
Abrahamax iyawsañani jaqinakan awkipawa
6. 1) ¿Kunjamsa Abrahamax Diosan arsutanakapar atinisitap uñachtʼayäna? 2) ¿Diosax Abrahamarux uñtʼänwa sasax kunatsa sissna?
6 “Abramasti [Jehová] Tatiturux iyawsänwa” ukat “taqi khitinakatix iyawsäwi layku Diosampi katuqatäpki ukanakan awkipa[wa]” sasaw Bibliax qhanañchi (Gén. 15:6; Rom. 4:11). Chiqansa, Abrahamax uraqipsa, yänakapsa, amigonakapsa jaytawayxänwa, ukat jaya markaruw sarawayxäna (Gén. 12:1-4; Heb. 11:8-10). Jupax walja maranakaw taqi chuyma Jehová Diosar atinisis sarnaqäna. Kunapachatï Diosax Isaac wawamar sacrificiot luqtita siskäna ukhaxa, jankʼakiw Diosar istʼäna (Heb. 11:17-19). Jehová Diosax Abrahamarux wal munasïna, ukat kuntï arskäna ukar atinisitapsa yatirakïnwa, ukatwa “Nayarakiw juparux ajllirakta” sasax säna (Génesis 18:19 liytʼasiñapawa). Ukhamasti, janiw aliqak uñtʼkänti, jan ukasti, mä suma amigoparjamaw munasïna (Sant. 2:22, 23).
7. ¿Diosan arsutapatxa kunsa Abrahamax amuyäna, ukat kunjamsa sarnaqäwipampix uk uñachtʼayäna?
7 Wawanakamasti Suma Uraqirux mantapxaniwa ukat waljaniruw tukuyäxa, “quta thiyankir chʼallanakar uñtata” sasaw Jehová Diosax Abrahamar säna (Gén. 22:17, 18). Ukampis uka arunak phuqasir janis uñjawaykchïnxa, Diosax arunakaparux phuqapuniniwa sasaw taqi chuyma atinisiwayäna. Ukat sarnaqäwipampiw chiqapun atinisitap uñachtʼayäna (Hebreos 11:13 liytʼasiñapawa). ¿Jiwasanakax jupat yatiqasiraktanti? ¿Abrahamarjamti Diosax uñtʼarakistu?
Iyawsañan jaqinakax Jehová Diosaruw suyapxi
8. ¿Kunjam jakasiñsa jaqinakax wal munapxi?
8 Kʼumar jakasiña, casarasiña ukat wawanakanïñwa jaqinakax wal munapxi. Ukham jakasiñ munañax walikïskiwa, ukampis uka amtanakax janiw phuqaskapuniti. ¿Ukhaman uñjasiñäni ukhax kamachañänisa? Kuntï lurkañäni ukanwa iyawsäwisax kunjamäskisa ukax qhan amuyasini.
9, 10. 1) ¿Amtanakap phuqasiñapatakix yaqhipanakax kuns lurapxi? 2) ¿Jehová Diosan arsutanakaparux kunjamsa atinissna?
9 Aski luqtiriparjam Jehová Diosan uñtʼatäñ munstan ukhaxa, janiw munañap contrax kuns lurkañäniti. Yaqhipax Diosan leyinakap pʼakintasax kunampis qullayasxapxakiwa. Ukat yaqhipax irnaqäwirukiw chuym uchapxi. Familianakapatsa, taman tantachäwinakapatsa armtʼasxapxiwa. Ukat yaqhipasti Diosar jan iyawsirinakampis casarxapxakiwa. Chiqansa, ¿uka kasta cristianonakax Diosamp sum apasiñ chiqapunit munapxpacha? Abraham chachat amuytʼañäni. Janirakis Diosan arunakapax jankʼaki phuqaskitixä, amtajaruk sarnaqasxä sasin mayampi yänak apthapisin utjnuqaspäna ukat jaqinakansa wali uñtʼatäñ thaqhaspäna ukhaxa, ¿Jehová Diosax jupat kamsaspänsa? (Génesis 11:4 uñxattʼarakïta.) ¿Diosax jupar askita uñjaskakispänti?
10 ¿Kunanak phuqasiñapsa jumax munasma? ¿Jehová Diosax kuntï munktan ukxa churämaw siskistu ukarux pacienciampit suytʼtanxa? (Sal. 145:16.) Kuntï munktan ukax janiw awisax jankʼaki phuqaskaspati. Amtañäni, Abrahamax kuntï Diosax churämaw siskäna uk phuqasirxa janiw uñjawaykänti. Ukampis Diosax janiw jupat armaskänti. Jiwasatï Abrahamjam iyawsañänixa, Diosax bendicistaniwa janiw armaskistaniti (Heb. 11:6).
Altʼat chuymanimpi ukat jachʼa jachʼa tukurimpi
11. ¿Kuna luräwinaksa amuyatax Coré chachax katuqäna, ukat kunjamsa Diosar servïna?
11 Jehová Diosax Moisesampir Coré chachampirux janiw pachpa uñjkänti. ¿Kunatsa? Kunattix maynix Diosan kamachinakaparux istʼänwa ukat maynisti janiw istʼxänti. Leví tribunkir Coré chachat amtañäni, jupax Coat familiat jutirïnwa. Walja luräwinakwa Diosan markapanxa katuqäna, Jehová Diosax Israel markar Wila Qutan qhispiykäna ukxa uñjpachänwa, Sinaí qullun Diosar kutkatasipkäna uka jaqinak contras saytʼarakpachänwa ukat Diosamp arustʼäwir mantat arka apañsa yanaparakpachänwa (Éxo. 32:26-29; Núm. 3:30, 31). Amuyataxa, walja maranakaw Diosarux jan jithiqtas luqtpächäna, ukatwa walja israelitanakax jupar respetapxpachäna.
12. Kunjamtï 28 janan uñjaskixa, ¿jachʼa jachʼa tukutapatxa kunas Coré chacharux pasäna?
12 Ukampisa, Suma Uraqir sarkasinxa, Diosan markaparux janis Moisesax sum irpkaspa ukhamwa Coré chachax amuyäna. Ukatwa 250 jilïr chachanakampix Moisés contra parlapxäna. Diosampix sumsa apasipkaspa ukhamwa amuyasipxpachäna, ukatwa janix Moisesampi irpayasiñ munapkänti. Ukat Moisés tuqitsa Aarón jilap tuqitsa akham sapxänwa: “¡Jumanakakiw taqi kunsa lurasipktaxa! Taqpach markaw Tatitu Diosar katuyata, Tatitusti taqi nanakampïskarakiwa” sasa (Núm. 16:1-3). Ukham jachʼa jachʼa tukupxatapax janipuniw walïkänti. Moisesax ukxarux akham sarakïnwa: “Tatitu[w] yatiyani khitis jupanki” ukxa sasa (Números 16:5 liytʼasiñapawa). Ukat qhipürusti Coré ukat yaqha jilïrinakampix jiwaratäxapxänwa (Núm. 16:31-35).
13, 14. ¿Kunjamsa Moisesax altʼat chuymanïtap uñachtʼayäna?
13 Coré chachat sipanxa, “Moisesax chiqpachansa llampʼu chuymani jaqïnwa akapachanxa” (Núm. 12:3). ¿Kunjamatsa Moisesax llampʼu chuymanïtap uñachtʼayäna? Jupax altʼat chuymampiw Diosan kamachinakap phuqäna (Éxo. 7:6; 40:16). Biblianx janipuniw Diosan kamachinakapata ni amtanakapat jan wal parlatapax utjkiti. Jehová Diosax mä tabernáculo luräta ukat ukan yupaychapxitäta sasaw säna. Ukat kunjam telatsa, kuna kast hilompisa, kunjamäñapas ojalanakapasa ukat jukʼampinakwa Diosax sum qhanañchäna (Éxo. 26:1-6). Ukhamarakiw Jehová Diosax markap irpañapatakix irpir chuyman jilatanak uttʼayi. Taqi kun lurañatakis jupanakax iwxkistaspa ukham amuyastan ukhaxa, inas chuymasan mayjtʼassna. Chiqansa, alaxpachankir Awkisax jan pantjasir Irpirisawa, Juparakiw irpir chuyman jilatanakarux markap irpañapatakix uttʼayi. Ukat kunapachatï kuns iwxtʼapxistu ukhaxa, suma amtampirakiw iwxtʼapxistu. Moisesax kunjamsa tabernáculo lurañapäna taqi ukanak iwxtʼataxa, janiw Jehová Diosatakix coleraskänti ni jiskʼachatjamas amuyaskänti. Jan ukasti, taqi chuymaw istʼäna. Ukat irnaqirinakas kunjamtï Diosax Moisesar siskäna ukhamarjamaw taqi kuns lurapxäna (Éxo. 39:32). Taqi ukanakxa altʼat chuymampiw phuqäna. Uka luratanakax Diosankiwa sasaw sarakïna.
14 Walja maranak qhipatxa, Moisesax mayampiw altʼat chuymanïtap uñachtʼayäna. Mä kutixa, israelitanakaw jupa contra sartapxäna. Ukham uñjasaxa, coleränwa ukat janirakiw Diosar jachʼañchkänti. Ukham luratapatxa Jehová Diosax akham sänwa, janiw markajarux Suma Uraqir mantañapatakix irpxätati sasa (Núm. 20:2-12). Amtañäni, jupax Aarón jilapampix walja maranakaw israelitanakan jan wal parlatanakap istʼasin aguantapxäna. Jichhax ukham mä kuti pantjasitapatxa janiw Suma Uraqir mantkätati sasaw Diosax säna. ¿Uk istʼasax kamachänsa? Chuyma pʼakintatas jikxataskchïnxa, altʼat chuymampiw Jehová Diosan amtap phuqäna. Ukat “Jupasti chiqapa Diosawa, janiw jupanxa kunatix jan chiqapaki ukax utjkiti” sasaw sarakïna (Deu. 3:25-27; 32:4). Chiqansa, Moisesarux jan jithiqtas luqtiripjamwa Diosax uñtʼarakïna (Éxodo 33:12, 13 liytʼasiñapawa).
Diosar istʼañatakixa altʼat chuymanïñasawa
15. ¿Coré chachan pantjasitapat kuns yatiqsna?
15 Uraqpachan Diosan markapar uñjasipki uka jilatanakax walja amtäwinakaruw puripxi, ukat kun machaqat amtañas wakisi ukhaxa ukarjamaw sum amuytʼapxi. Ukampis ¿ukanak uñjasax jiwasax kamachtansa? Khitinakarutï markap uñjañapatak uttʼayki uka jilatanakar respetañäni ukhakiw Jehová Diosampix sum apasiñäni. Janiw Coré chachjam pantjasiñ munktanti. Jupax jachʼa jachʼa tukutapata ukat jan iyawsatapatwa Diosampix jan sum apasxänti. Moisesakis Israel mark irpkaspa janis Diosax irpkaspa ukhamakwa amuyäna. Ukham amuyatapatxa janiw Diosan uttʼayat pʼiqtʼirinakarux respetxänti. Diosar atinisispäna ukhax janiw ukham amuykaspänti. Jan sum amuyatapatxa chiqañchasispänwa. Ukampis Coré chachax janiw ukham lurkänti, walja maras Diosar luqtkchïnxa, qhipatxa jachʼa jachʼa tukusaw suma sarnaqäwipxa aptʼawayxäna.
16. ¿Moisesan altʼat chuymanïtapax kunjamsa yanaptʼistu?
16 Coré chachan sarnaqäwipatxa taqiniw yatiqsna, ukat irpir chuymaninakas yatiqapxarakispawa. Altʼat chuymanïñax wali askiwa, ukax Jehová Diosar atinisiña ukat khitinakarutï Jupax uttʼayki ukanakar istʼañsa yanaptʼarakistaniwa. ¿Moisesjam altʼat chuymanïñatak chʼamachastanti? ¿Taman pʼiqtʼasipki uka jilatanakarux repetasktanti ukat iwxanakaparus istʼasktanti? ¿Kunapachatï kunas jan waltʼxi ukhax cristianjamat saykattanxa? Altʼat chuymanïñäni ukat istʼasirakiñäni ukhaxa, Jehová Diosax uñtʼistaniwa ukat wal munasirakistani.
“Tatitux uñtʼiwa jupankirinakaruxa”
17, 18. ¿Diosamp sum uñjatakïskañatakix kunas yanaptʼistani?
17 Khitinakarutï Jehová Diosax uñtʼki ukanakat lupʼiñax wali askiwa. Abrahamamp Moisesampix jiwasjam pantjasir jaqïpkchïnsa, Jehová Diosampix suma jaqit uñtʼatäpxänwa. Ukampis Coré chachax Diosatxa jithiqtxänwa, janiw suma jaqit uñtʼatäxänti. Janipuniw jiwasanakax Coré chachjam tukuñasäkiti. Sapa maynis akham sasin jisktʼasiñasawa: “¿Jehová Diosax jan jitiqtir serviripjamti uñjitu? ¿Uka pä uñachtʼäwitxa kuns yatiqtxa?” sasa.
18 ¿Jehová Diosampi suma uñjatäñas ukat jupankïrïñas wali wakiskiripunixaya? Jiwasatix Diosar jan jithiqtas yupaychañäni ukat sapürutjam iyawsäwinitassa ukat altʼat chuymanïtassa uñachtʼayañäni ukhaxa, Diosatakix jukʼamp wakiskirïñäniwa. Chiqpachansa, Jehová Diosamp uñtʼatäñaxa wali askiwa. Ukhamatwa walja bendicionanak katuqañäni jichhürunsa ukhamarak jutïrinsa (Sal. 37:18).
¿Amtapxtanti?
• ¿Kunatsa Diosamp sum uñtʼayasiñax wali aski?
• ¿Kunsa Abrahaman iyawsäwipat yatiqassna?
• ¿Coré ukat Moisesan sarnaqäwinakapat kuns yatiqsna?
[Jiskt’anaka]
[26 janan fotopa]
Diosan arsutanakapax phuqasiniw sasaw Abrahamax taqi chuym atinisïna, ¿jiwasat kamsaraksnasa?
[28 janan fotopa]
Coré chachax Diosan uttʼayat pʼiqtʼirinakarux janiw respetkänti
[29 janan fotopa]
¿Jehová Diosax istʼasir jaqirjamat uñjistu?
