Aka revista liytʼirinakan jisktʼäwinakapa

¿Pasïr maran kunanakas Diosan markapan lurasiwayi ukax kunjamas jakthapisi, ukat kunjamsa amuytʼañasa?

Anuario ukat marzo phaxsin Diosan Apnaqäwipat Yatiyañataki sat qillqatanakanx kunanakas Diosan markapan lurasiwayi ukanakaw uñachtʼayasi, uk uñxatasax kunjamas Diosan arunakap yatiyasipki aka uraqpachanxa, ukwa yatsna. Ukampis uka yatiyäwix sapa filar jalanuqtʼatawa. Ukanak sum yatiñatakix sumpach uñxattʼañäni.

Marpach yatiyäwi. Aka 2011 marataki Anuario sat libronxa sum uñachtʼayi Uraqpachanx kunjamsa Diosan arunakapax pasïr maran yatiyasiwayi ukanakata. Mä arunxa, kunanakas 2009 marana septiembre qalltat 2010 agosto tukuykama lurasiwayi ukanak uñachtʼayi.

Yatiyirinakax qhawqharus puriwayi ukat 2009-2010 sapa phaxsi qhawqhanis yatiyapxi. Khitinakatï Diosan arunakap yatiyañataki mayitanak phuqapki ukanakaw “Yatiyirinaka” sataxa, bautisatäpans janisa. Yatiyirinakax qhawqharus puriwayi siski ukaxa, ¿kamsañs muni? Marpachanx kuna phaxsins jilpach informex katuqasitayna ukaw uka filanx yatiyasi. Ukampis uka filanxa pasïr phaxsin yatiyirix jan informe churkchi ukhax pä kutiw uka phaxsinx jakhutäxani. Ukatwa wakisirix jiwasanakax informe tiempoparu sapa phaxsin churañasa. 2009-2010 sapa phaxsi qhawqhanis yatiyapxi, ukax marpach informenak katuqasinwa jakthapisi ukat tunka payaniruw jalanuqasiraki.

Taqpach horanaka. Kunjamtï 2011 Anuario libron uñachtʼayaskixa, pasïr maranxa, 1,600 millón horanakaw Diosan arunakapat yatiyasitayna. ¿Jehová Diosar yupaychatasax uka horanakakïpachati? Janiwa, yaqha tuqit Diosar yupaychañax utjaskakiwa, tamar tumptʼaña, tantachäwinakar saraña, Bibliat sapa mayni yatxataña ukat amuytʼañampi, ukanakax janiw jakhutäkiti.

Gastonaka. Pasïr maranxa, Jehová Diosan Qhanañchirinakapax 155 millón dolaranakwa precursor especialanakatakisa, misioneronakatakisa ukat tama tumptʼirinakatakisa gastapxatayna. Uka gastonakarux janiw mantkiti qillqatanak lurasiñapatakisa, ni uraqpachankiri pä tunk waranq Betelan servirinakasa.

Jesusan jiwäwip amtasax vino umtʼirinak ukat tʼantʼa manqʼirinaka. Kawkir bautisat jilat kullakanakas Jesusan jiwatap amtañataki tantachäwinxa tʼantʼampi vinompi malltʼawayapxi uk sañ muni. Ukhamax ¿taqi uka cristianonakat alaxpachar sarapxani? Janiwa. Yaqhipax yaqha religionanakar nayra tiempo sarasax janiw sumpach amuyapkiti. Yaqhipasti usutäpxarakiwa, janiw chuymanakapan qhanpach amuyasipkiti. Ukatwa alaxpachar sarañataki jawstʼatätwa sasax pantjasipxaspa. Chiqpachansa janiw yatksnati qhawqha ajllitanakas aka uraqin utjaski ukxa. Ukampis janiw uk yatiñax jiwasarux waktʼkistuti. Khitinakas Jesusan jiwäwip amtasax vino umtʼapxatayna ukat tʼantʼsa manqʼapxarakitayna ukanak yatiñatakix janiw Uraqpachan Jilïr Irpirinakas listanïpkiti. *

Chiqpachansa, ‘Tatit Diosan mä qhawqha servirinakapax’ uraqinkasipkakiniwa kunapachatix jachʼa tʼaqhisiñ urunakan tʼunjañ thayax antutatäni ukhaxa (Apo. 7:1-3). Ukampis taqi kunat sipansa uraqpachan Diosan arunakap yatiyañatakiw ajllit cristianonakax chʼamachasisipki, ukaxa Anuario libronwa yatiyasiski.

[Qhanañchäwi]