Inglés arut Yatiyañataki revistaxa uñtʼat arunakampiw yaqhax lurasini

INGLÉS arun wali uñtʼat arunakampiw yaqha revistax lurasxani, uksti kusisit chuymampiw yatiyaniñ munapxaraksma. Aka revistat uksaruxa, sapa phaxsiw uka machaq revistax apsusini ukat marpacharakiw yantʼañatakix lurasiskani. Kunanakatï sapa semanan yatxatasiskixa uka yatichäwinakax pachpakïskaniwa, ukat campox utjaskani ukhaxa, wakiskani uka yaqha yatichäwinakas uchatäskarakiniwa. ¿Kuna amtampis Inglés arut uñtʼat arunakampi machaq revistax lurasiskani? Uka qillqatax Jehová Diosan Qhanañchirinakapar yanaptʼañatakiwa, ukhamatwa jupanakax Diosan suma yatichäwinakapat jukʼampi sum yatxatapxani.

Fiyi, Ghana, Kenia, Liberia, Nigeria, Papúa Nueva Guinea ukat islas Salomón uka markanakanxa, Inglés arut parlapxi. Jilat kullakanakasax utapan yaqha arsa parlapkchixa, tantachäwinakansa, Diosan Arupat yatiyiris sarapki ukhaxa niya taqiniw Inglés arut parlapxi. Ukampis Bibliat apstʼat Inglés arut qillqatanakasax jilat kullakanakasatak amuytʼañax chʼamakiwa. Ukat yaqha markat jutiri jilat kullakanakax janis sumpach Inglés aru yatipkchixa, uka arutwa mayninakampix parltʼasipxi. Janiw ukakïkiti, wawatpach parlapkäna uka kasta aru parliri tamar sarañatakis janirakiw utjkiti.

Yatiyañataki revistat yatxatäwix sapa semanaw apasi ukat uka yatichäwinak tuqiw Diosan arunakapat tiempopar yatiqtanxa. Ukhamasti, Inglés aru parliri jilat kullakanakasax yatichäwinakat jukʼamp sum yatiqapxañapatakixa, Inglés arut uñtʼat arunakampi yaqha revistaw lurasiskani. Uka revistanxa, nayrïr janapakiw mayjtʼani, ukat jiskʼa piqʼiñchäwisa, tʼaqanakasa, jisktʼanakasa, recuadronakasa, dibujonakasa, ukhamarak fotonakasa, kunjamtï jichhakam luraskixa ukhamakïskaniwa. Ukhamasti, Yatiyañataki revistat yatxatäwin yatiqañatakixa, kawkïr revistampis yatxatani ukxa sapa mayniw ajllisxani. Uk amuytʼañatakixa, aka pachpa jananwa uñxattʼasma. Uka chiqax taman yatxatañataki nayrïr yatichäwit payïr tʼaqapat apstʼatawa.

Walja jilat kullakanakaw Jehová Diosaru akham sasin achiktʼasipxi: “Arsutanakam yatiqañatakix chʼikhi chuymay churita” sasa (Sal. 119:73). Ukhamax Inglés arut uñtʼat arunakampi qillqat machaqa revistaxa, ukham achiktʼasir jilat kullakanakaruw yanaptʼani. Wayn tawaqunakarusa, Inglés jan sum yatirinakarusa, Yatiyañataki revistat yatxatäwix jukʼamp sum wakichasipxañapatak yanaptʼaspa ukwa munapxta. ¡Jehová Dios yuspäranipxsmawa ‘jilat kullakanakar munasiñam’ uñachtʼayatamata, ukhamarak “Amuyasiri Chiqap Uywata” taypi suma yatichäwinak churatamatsa! (1 Ped. 2:17; Mat. 24:45, MT.)

Jehová Diosan Qhanañchirinakapan Uraqpachan Jilïri Irpirinakapa