Qollq amuyump apnaqaña
Walja jaqenakaw Biblian wiñay yatichäwinakaparjam lurasajj qollqe toqet jan sinti problemanëjjapjjeti.
QOLLQ SUM APNAQAÑATAK MÄ AMTAR PURIÑA
BIBLIAJJ KAMSISA: “Suma amuytʼampi kuna amtäwinaka wakichatasa sumakiwa phoqhasi, ukampis mäki wakichata amtäwinakajja aynachtʼañaruwa puriyi” (Proverbios 21:5).
KAMSAÑSA MUNI. Qollq sum apnaqañatak mä suma amtar puriñäni ukhajja, ukarjamaw lurañasa. Janiw kuntï munkta uk taqpach alasiñ puedkapunïtati, uk amtapunim. Ukhamajj wali amuyumpiw qollqem gastañama.
KUNSA LURASMA
-
Qhawqhay qollqejj utjchi ukarjamak gastaña. Kuna gastonakas utji ukanak mä listar qellqtʼasim, ukatjja qhawqha qollqes sapa gastotak munasini ukarjam jaljarakim. Mä gastotak qhawqhatï munaskäna ukat sipans jukʼamp gastjjäta ukhajja, maynïr gastot apaqtʼam, sañäni, gasolinatak jilpach gastjjsta ukhajja, kunatï sinti jan wakiskirïki ukat apaqtʼam, inas restauranter manqʼer sarañatak imatäki ukat apaqchisma.
-
Ina chʼusat manur jan mantaña. Jan ina chʼusat qollqe maytʼasimti. Antisas mä kun alañ munsta ukhajj qollqe tanttʼasim. Qollq maytʼasiñ munasksta ukhajja, jankʼak uk pagañatak chʼamachasim, ukhamatwa jukʼamp manur jan mantkätati. Maytʼassta ukhasti, kunjamsa pagäta uk amuykiptʼasin ukarjam phoqarakim.
Sapa kuti qollqe maytʼasirejja, jan sinttʼasisaw qollqe gastaspa. Ukhamajj janïr qollqe maytʼaskasajj sumwa amuykiptʼasiñama.
KUNATÏ ASKÏKI UK LURAÑATAK CHʼAMACHASIÑA
BIBLIAJJ KAMSISA: “Jayra jaqejj qholliña horasajja janiw qhollkiti, ukampis yapu apthapi horasajj thaqtaniwa, ukatsti janiw jikjjatkaniti” (Proverbios 20:4).
KAMSAÑSA MUNI. Jayräñajj pobreruw maynir tukuyaspa. Ukhamasti, kunsa jutïrin luräta uk sum amuykiptʼasajj trabajtʼir jaqëñataki, qollqsa amuyump apnaqañatak chʼamachasim.
KUNSA LURASMA
-
Trabajtʼirïña. Confiykaya, trabajtʼir jaqëyäta ukhajj janiw trabajot facilak jaqsupkätamti. Lurañanakap sum phoqerinakajja, jefenakapamp wali munatäpjjewa.
-
Honradöña. Trabajon jan honradokäta ukhajja, jan walitwa uñtʼayasïta, trabajo jikjjatañas chʼamarakïniwa.
-
Jan qollqe chuymäña. Qollqe añcha munañajj usuntañaruw puriyiristam, amigonakamsa aptʼasismawa. Qollqejj janiw jakäwin nayrankañapäkiti, uk janipun armasimti.
BIBLIAN YAQHEP WIÑAY YATICHÄWINAKAPA
Internetan jw.org cheqanwa Biblia liytʼasma, ukajj walja arunakanwa utji.
TIEMPSA QOLLQSA VICIONAKAR JAN GASTAÑA
“Machirinakasa, sinti manqʼerinakasa tukjasiñaruw puripjje, jayra jaqenakasa isitsa thantharnukstataw sarnaqapjje” (PROVERBIOS 23:21).
JAN SINT LLAKISIÑA
“Jan jumanakajj jakañanakamat llakisipjjamti, kuns manqʼañäni kuns umañäni sasajja. Janiraki cuerponakamatsa llakisipjjamti, kunampis isisiñäni sasajja” (MATEO 6:25).
JAN ENVIDIASIÑA
“[Envidiasir] jaqejj mäkiwa qamiriptañ muni, ukampis jupajj janiw yatkiti pobres kankaña jupjjaru jutañapjja” (PROVERBIOS 28:22).
