BIBLIAJJ KAMSISA: “Jan jumanak pachpatak llakisipjjamti, jan ukasti mayninakatsa llakisipjjarakim” (Filipenses 2:4).

KAMSAÑSA MUNI. Mayninakamp sum apasiñatakejja, jiwasak katoqañ suyañat sipansa churañasawa. Mayni pachpatak llakisirejj janiw mayninakamp sum apaskaspati. Sañäni, casarat mä chachatï jan ukajj warmitï jupa pachpatak llakisispa ukhajja, inas esposaparu jan ukajj esposopar yaqhampi engañjjchispa. Maynitï jupan utjki ukanakata jan ukajj wal yatitapat sapakuti jachʼañchasini ukhajja, jan amigonakaniw qheparani. El camino del carácter sat libronjja, ‘mayni pachpatak llakisiñajj janiw kuna sumarus apkiti’ sasaw qhanañchi.

KUNSA LURASMA

• Yaqhanakar yanaptʼaña. Mä suma amigojj confiykañawa, yanaptʼañatakis jankʼakiwa. Yaqhep yatjjatatanakarjamajja, mayninakat llakisirinakajj janiw llaki usumpejj sinti usuntapkiti, antisas jukʼamp kusisitäpjjewa.

• Mayninakat sinttʼasiña. Mayninakat sinttʼasiñajja, maynejj kunjamäskisa uk amuyaña, jupamp chika tʼaqesiña sañwa muni. Jumatï mayninakat sinttʼasïta ukhajja, janiw jan wali arunakampi chuym ustʼaykätati, mä arunjja, janiw chuym ustʼayañ layku jan wali arunakamp chansaskätati.

  Mayninakat sinttʼasiñajja, taqenir sum uñjañatakiw yanaptʼi. Mayninakat sinttʼasïta ukhajj janiw khitirus yaqhachkätati, kunayman kasta amigonakanirakïyätawa.

•   Mayninakatak tiempo apsusiña. Maynimpi walja tiempo chikachastan ukhajja, jukʼamp sumwa jupar uñtʼtanjja. Jumatï suma amigonak jikjjatañ munsta ukhajja, kunas jupanakar llakisiyi, kunas jupanakatak jukʼamp wakiskiri ukanakatwa parlañama. Ukhamajj mayninakar sumwa istʼañama. Jichhak mistur mä yatiyäwinjja, “purapat sum parltʼasipki uka jaqenakaw jukʼamp kusisita jakasipjje” sasaw qhanañchi.

BIBLIAJJ KAMSISA: “Jumanakatejj jan wali jaqenakampi chikachasipjjätajja, kuna suma luräwinaktï lurasipkta ukjja armasjjapjjätawa” (1 Corintios 15:33).

KAMSAÑSA MUNI. Khitimpiy chikachaschiñäni ukarjamaw walsa jan ukajj jan walsa lurañäni. Jaqenakajj kunjamsa apasipjje uka toqet yatjjatirinakajj (sociólogos) ukhamwa sapjjaraki. Sañäni, maynitï cigarro fumirinakampi jan ukajj divorciasir jaqenakampi sinti chikachasispa ukhajja, jupanakjamarakiw lurjjaspa.

KUNSA LURASMA. Kunjam jaqëñsa munta, khititsa yateqasiñ munta uka kasta amigonakwa thaqañama. Sañäni, amuytʼasirïpki, respetasirïpki, wajjtʼasirïpki, katoqtʼasirïpki ukham amigonakwa thaqañama.

USUCHJIR ARUNAK JAN PARLAÑA

“Utjapuniwa parlatanakapampi mayniru usuchjirejja” (PROVERBIOS 12:18).

WAJJTʼASIRÏÑA

“Khititï churañ yatki ukaw jukʼamp katoqe” (PROVERBIOS 11:25).

KUNJAMTÏ UÑJATÄÑ MUNKTAN UKHAM UÑJAÑA

“Taqe kunans kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam” (MATEO 7:12).