¿Tatamar mamamar istʼañajj chʼamati?... Awisajj chʼamäspawa. Ukampis Jesusajj Jehová Diosarusa ukat tatap mamaparusa istʼapunïnwa, ¿uk yatiyätati?... Tatamar mamamar istʼañatakejj Jupat yateqasiñamawa. Jichhajj Jesusat jukʼamp yatjjataskakiñäni.

Jesusajj janïr aka Oraqer jutkasajja, Jehová Dios Awkipampiw alajjpachan jakasïna. Ukat aka Oraqenkäna ukhasti, Joseyampi Mariampiw jakasirakïna, jupanakaw tatap mamapäna. ¿Kunjamatsa Jesusajj aka Oraqer jutpachäna?...

Jehová Diosaw aka Oraqen jakañapatakejj Marian purakapar Jesusan jakäwip usküna. Llätunka phajjsinakaw Jesusajj Marian purakapan jilsüna, kunjamtï taqe wawanakajj jilsupki ukhama. Ukhamatwa Mariasa ukat José esposopas Jesusar uywañ qalltapjjäna.

Jesusan familiapajj Pascua fiesta amtiriw Jerusalenar saräna, ukanwa qawqsa Jesusajj Jehová Diosar munasïna uk uñachtʼayäna. Ukhajj 12 maranikïskänwa. Utar kuttʼasipkäna ukhaw Joseyampi Mariampejj Jesusan chhaqatäjjatap amuyasipjjäna. ¿Kawkinkpachänsa?...

Tatapamp mamapampejj jankʼakiw Jesusar thaqher Jerusalenar kuttʼapjjäna. Kimsa urunak thaqhasajj janipuniw jikjjatapkänti. ¡Wal llakisipjjäna! Ukampis jupajj templonkaskänwa. ¿Kunatsa Jesusajj ukankpachäna?... Jehová Dios Awkipat jukʼamp yateqañataki. Jesusajj Awkipar wal munasïna ukat kunjamsa Jupar kusisiyaspa ukwa yateqañ munäna. Jilïrëjjan ukhasa, alajjpachankir Awkiparojj istʼaskakïnwa. Awisajj chʼamäkchïnsa ukat tʼaqhesiñap wakiskchïna ukhasa, Jesusajj Awkipar istʼapunirïnwa. ¿Joseyarusa Mariyarusa ukhamarakit istʼpachäna?... ‘Istʼapunirïnwa’ siw Biblianjja.

¿Kunsa Jesusan sarnaqäwipat yateqsna?... Awk taykar istʼañajja, awisajj chʼamäspawa, ukampis istʼañasapuniwa. ¿Jumajj tatamar mamamaru istʼarakïtati?...