Galilea Qotat inti jalsu toqen Jesusajj milagro lurasajj waljaniruw manqʼayäna, ukanwa reyit uttʼayañ munapjjäna ukhajj escapjjäna. Uka pachpa arumaw Jesusajj uma patjja sarnaqäna, Pedrorus umat waysurakïna. Qalltanjja, Pedrojj uma patjja sartaskänwa, ukampis pächasitap laykuw umar jalantäna. Uka arumarakiw Jesusajj thay tʼakurayäna, ukhamatwa discipulonakaparojj thayamp jan apayasiñapatak yanaptʼpachäna.

Jesusajj mayampiw Capernaumar purïna. Ukanjja, Jesusajj milagro lurasin manqʼaykäna uka jaqenakaw akham jisktʼapjjäna: “¿Kunapacharak akar purintasti?” sasa. Jesusasti ‘manqʼa katoqañ laykukiw thaqapjjestajja’ sasaw jupanakarojj toqenoqäna. “Trabajipjjam, ukampis jan tukusir manqʼa laykojja, jan ukasti wiñay jakañ churki uka jan tukuskir manqʼa layku trabajipjjam” sasaw sarakïna. Jupanakasti sapjjänwa: “¿Diosajj mayki uka luräwinak phoqañatakejj kunsa nanakajj lurapjjerista?” sasa (Juan 6:25-28).

Inas jupanakajj Leyejj kun lurapjjañapsa mayi uka toqet amuyapjjchïna, ukampis Jesusajj janiw uka toqet parlkänti, ukatwa akham säna: “Diosan mayitapajj akawa, khitirutï Diosajj khitanki ukar confiyapjjañamawa” sasa. Uka jaqenakajj janiw Jesusar creyipkänti. Jesusar creyiñatakejj mä señal uñjañ munapjjäna, ukatwa akham sapjjäna: “¿Kunsa luräta? Nanakan nayra awkinakajajj maná sat manqʼwa wasaran manqʼapjjäna. Kunjamtï qellqatäkejja: ‘Jupajj alajjpachankir tʼantʼwa jupanakan manqʼapjjañapatakejj churäna’ sasa” (Juan 6:29-31; Salmo 78:24).

Señal mayipjjepanjja, Jesusajj khitis uka milagronak lurañatakejj chʼam churi uka toqetwa parläna, akham sasa: “Cheqpachapuniw sapjjsma, Moisesajj janiw alajjpachankir tʼantʼa churapkayätamti, jan ukasti Awkijaw alajjpachankir cheqpach tʼantʼa churapjjtamjja. Diosan tʼantʼapajj kawkïritï alajjpachat saraqanki ukawa, akapacharuw jakañ churaraki” sasa. Jaqenakajj janiw uka arunak sum amuyapkänti, ukatwa akham sasin ruwtʼapjjäna: “Tata, uka tʼantʼa churapjjapunita” sasa (Juan 6:32-34). Jesusajj ¿kuna “tʼantʼatsa” parlaskäna?

Jesusajj sänwa: “Nayätwa wiñay jakañ churir tʼantʼajja. Khititejj nayan ukar jutki ukajj janipuniw kunäkipansa awtjayaskaniti, khititejj nayar confiyki ukajja, janirakiw mayampsa umat pharjayaskaniti. Kunjamtï sapksmajja, jumanakajj nayar uñjapjjestawa, ukhampachas janiw creyipktati. [...] Nayajj alajjpachatwa saraqanta, ukampis janiw nayan munañaj lurir jutkti, jan ukasti khitankitu ukan munañap luririw jutta. Khitankitu ukan munañapajj akawa, taqe khitirutï jupajj churkitu ukanakatjja, janiw khitirusa chhaqayañajäkiti, jan ukasti jupanakarojj qhepa urun jaktayañajawa. Awkijan munañapajj akawa, taqe khititï Yoqar katoqki, jupar confiykaraki ukajja, wiñay jakañanïñapawa” sasa (Juan 6:35-40).

Uk istʼasajja judionakajj wal colerasipjjäna, ‘¿kunjamatsa jupajj “nayätwa alajjpachat saraqanir tʼantʼajja” sasin saspa?’ sasaw jupa contrajj parlapjjarakïna (Juan 6:41). Jupanakatakejj Jesusajj aleq jaqekïnwa, awk taykapas Galileankir Nazaret markatäpjjarakïnwa. Ukatwa sapjjäna: “¿Janit jupajj Josean Jesús sat yoqapäki, janit awkipsa taykapsa uñtʼktanjja?” sasa (Juan 6:42).

Jesusajj sarakïnwa: “Jan jumanakajj ukham parlapjjamti. Janiw khiti jaqes nayan ukar jutkaspati, janitï nayar khitankitu uka alajjpachankir Awkejj irpankaspa ukhajja. Nayaw juparojj qhepa urun jaktayäjja. Profetanakan Qellqatanakapajj akham siwa: ‘Taqe jupanakajj  Jehová Diosan yatichatäpjjaniwa’ sasa. Taqe khititejj alajjpachankir Awkir istʼki, yateqkaraki ukajja, nayan ukaruw juti. Janiw khiti jaqes alajjpachankir Awkirojj uñjkiti, jan ukasti khititejj Diosat jutki ukakiw Awkirojj uñji. Cheqpachapuniw sapjjsma, khititejj creyki ukajj wiñay jakañwa katoqani” sasa (Juan 6:43-47; Isaías 54:13).

Amtañäni, Jesusajj Nicodemompi parlkäna ukhajja, wiñay jakañatakejj jaqen Yoqapar confiyañajj kunja wakiskirisa ukwa qhanañchäna, akham sasa: ‘Taqe khitinakatï Diosan sapa Yoqapar confiyapjjatap uñachtʼayapki ukanakajj janiw jiwapkaniti, jan ukasti wiñay jakañ katoqapjjani’ sasa (Juan 3:15, 16). Jesusajj kunjamsa wiñay jakañ katoqapjjañapatak yanaptʼaspa ukwa waljanir parläna. Cheqansa janiw maná tʼantʼasa, ni Galilea tʼantʼasa wiñay jakañapatakejj maynir yanaptʼkaspänti. ¿Kunjamatsa wiñay jakañ katoqapjjaspäna? Jesusajj sänwa: “Nayätwa wiñay jakañ churir tʼantʼajja” sasa (Juan 6:48).

Jesusajj alajjpach tʼantʼat parlaskakïnwa, Capernaúm markankir mä sinagoganwa uka toqet jukʼampi parläna.